Klou el Ongdibel
A Rubak el Jesus Kristo a Lmuut el Mei
Ongeteruich el buil 2024 klou el ongdibel
14:49

A Rubak el Jesus Kristo a Lmuut el Mei

Mla er a President Russell M. Nelson

President er a Ikelesia er a Jesus Kristo er a Uriul-klebesei el Santo

Chelecha eng taem el kau me ngak a mengedmokl el kirel sel Ongerung el Lemei a Rubak e Osobel, el Jesus Kristo.

Rudam me a rudos er ngak, kuureng a saul el Rubak a mla omekngeltengat er ngak meng sebechek el me mengedecheduch er kemiu.

Tial ongdibel, e a Rubak a mla mengedecheduch er kid lokiu a Remesiungel. Ak mengelechel er kemiu el mo mesuub a klemechir. Bo mousbech el merritel el kirel a klemerang me a diak el klemerang er a ikal merael mei lelolem el buil.

A ulekerreuil me a urerel a Salt Lake Templo me a bebil er a basio el meliuekl er a Temple Square a kmeed leim el rak lorael a ureor ngii. A osenged a kmo tial ureor a mo merek er a ulebengelel a 2026. Kede mereng a sulir tirkel loureor er tial meringel lureor.

Aika el mereko lelolem el buil, e kede mla oterekokl e lmuut loterekokl a kltiu el templo er a chelsel a kleim el beluu. E chelecha el mo er a ulebengelel a rak, e kede mo olterekokl a lmuut el kleim.

Chelecha el sils eng dmeu a rengmam louchais okedecherul a tacher me a kleuid el bebil er a templo. Bo mungil lorrenges sel kuchais aikel basio le borngii.

  • Juchitán de Zaragoza, Mexico

  • Santa Ana, El Salvador

  • Medellín, Colombia

  • Santiago, Dominican Republic

  • Puerto Montt, Chile

  • Dublin, Ireland

  • Milan, Italy

  • Abuja, Nigeria

  • Kampala, Uganda

  • Maputo, Mozambique

  • Coeur d’Alene, Idaho

  • Queen Creek, Arizona

  • El Paso, Texas

  • Huntsville, Alabama

  • Milwaukee, Wisconsin

  • Summit, New Jersey

  • Price, Utah

Rudam me a rudos er ngak, ko mesa el kmo ngera dubechang er medad? Nglunguchek meng diak el mochib er kid tial tokubets el taem! A Rubak a meral lorreched er a Urerel.

Ngera uchul me kede kmal lorreched lomekedechor a betok el templo? E ngerang? Le Rubak el mla dmu er kid el uaisei. A klengeltengat er a templo olngeseu el mengedibel er a Israel er a ikal eru el beluu. Aika el klengeltengat a dirrek lolngeseu el kudmekelterir a rechad el mo mengedmokl el kirel Ongeru Lemei a Rubak!

Ongerung el Lemei Osobel.

El uaia ulochel a profet Isaia, me a tekoi le dilu Handel’s Messiah, sel luut el mei a Jesus Kristo, “a klebkellel a Rubak a mo mocholt, me a rokui el chad a mo mesang.”

Seikid el sils “e ngii a mo oltekau er a kabelment: e mo okedongall el Klebokel, Omekrael, Mesisiich el Dios, Diak a Ulebengelel Chedam, el Prince er a Budech.”

A Jesus Kristo a mo mengedereder er a uodel Jerusalem me a Beches el Jerusalem el “mo dechor er a Beluu er a Merikel.” Ngara ikal eru el basio, e Ngii a mo mengedereder a urellel a Ikelesia er Ngii.

Seikid el sils e a Rubak a mo merael chisel el “King er a re King, e Rubak er a rokui el Rubak.” Tirkel rokui el obengkel a mo “mokedong, e mengilt, e mui ra klaumerang”

Rudam me a rudos, chelecha eng taem el kau me ngak a mengedmokl el kirel sel Ongerul Lemei a Rubak e Osobel, el Jesus Kristo. Chelecha eng taem el derelii otirekled er ngii el mo kot el ngaruchei er a rokui. Me tial beluulechad el mui er a betok el mengetelaol lolibesongel, e kede mekerang a doruul er ngii?

Templo er a Rome Italy.

A blechoel lomengull er a chelsel a templo a mo ngosukid. Chelsel a blil a Rubak, e ke de mo chemau a Jesus Kristo. Kede mesuub el Kirel. Kede meruul a telbiil el mo oltirakl er Ngii. Kede mo ungil Medengelii. E sel doltirakl a telbiled er a templo, eng mo klou a techelled el ngmai olisiich er a Rubak. Chelsel a templo, e kede ngmai osebechakl er a ikel ongetikaik er a beluulechad. Ng mlo klou a klemedengei er kid el kirel a bliochel beltikelreng er a Jesus Kristo me a Demad er a Babeluades! Kede melchesuar a budech me a chedaol selbechakl, el diak el uai a mesmesim el beluulechad.

Tiakid a yaksok er ngak e le ko er kemiu: A bek el meral losiik er a Jesus Kristo a mo metik er Ngii er a chelsel a templo. Ko mo melchesuar a chubechub er Ngii. Ko mo metik a nger el kirel a chetiteuokel el ker. Ko mo mui el medengelii a deureng er a ebangkelio er Ngii.

AK mla mo medengei el kmo sel kot el klou a belkul ker el derta er kid a kired longer ngii a kmo: Ng techang ma lechub e ngerang omodersii ra klengar kau el kirel?

President Nelson el toktang.

A uldesuek el mo oltirakl er a Jesus Kristo a kot el ngaruchei el tekoi el blak relii. Sera kngara skuul er a kltoktang, eng mlo mesisiich a klaumera er ngak el kirel a chedaol Dios el Chedam me a Ngelekel, el Jesus Kristo. Seikid el me er chelechang e a Osobeled a ngii a beduk el blak teketekii ra klengar ngak. Tia mla ngmodech a rokui el tekoi el kulilt el meruul. Tia mla remuul a betok e ra bebil ra tekoi el kulilt el mo beot. Ng mla meskak a moktek me a ulekrael er a ikel kuruul. E mla sobecheklak er a ses el eolt er a klengar. Msall e kuchais a eru el okesiu:

A kot, a bechik er a Dantzel er a le kiul mo smecher, eng dimlak a rolel er ngak el louchais er a rengelekam. Ng di mle, ngak el tang, el chebuul, e lmangel losiik a ngesou. Ak mereng a saul, le ngokiu Chedaol Reng, e a Rubak a ulechotii er ngak a uchul ea Dantzel a mlengai el mo remei. Tiaikid a rirelak, el mo chelellakl a renguk. Cherengel a taem, eng mlo sebechek el meledaes er a renguk. Uriul, eak mlo bechil a Wendy. Ngii a mlo moktek er sel ongeru lokesiu.

A Wendy me ngak er a ki moureor el ngara cheroid el beluu, e a remekngit el chad a ngiluu a boes loterkii er a bdeluk e omoes. Ng di dimlak el tobed a tama er tial boes. Tiaikid el dilubech el teletael, ea klengar kemam a mlurachab. Eng di Wendy me ngak a ulemelchesiu er a budech. Ng budech el ngii “chengelakl er a rokui el klemedengei.”

Rudam me a rudos, a Rubak a dirrek el mo mengelaod er kemiu! Ngii a mo melisiich er kemiu. Ng mo omekngeltengat er kemiu loba budech, er a chelsel a chetituokel teletael.

Rubak el Jesus Kristo.

Kulengit me mrengesii tial yaksok er a Jesus Kristo le ko er kau: Ngii a mo okiu medad, Ngii a mo nga er a kadikm me a katur er kid, e a Reng er Ngii a mo nga er a chelsel a rengud, e a reanghel er Ngii a mo iliuekl el mesebechakl er kid.

Ng diak a telkelel a ngesou er a Osobel el me er kau. A diak kede betebengar el ringel el mlo er Ngii er a Gethsemane me a Kolkata a milkedmokl el kirem! A diak a ulebengelel Tngakireng er Ngii meng milkedmokl el kirem!

Ak mengelechel er kemiu el mo chemoit a temiu er a bek el sandei—er a chelsel a klengar kemiu—el mo mengisois er a klemedengei er kemiu el kirel a Tngkaireng er a Jesus Kristo. A renguk oberaod el kirir tirkel ngara chelsel a klengit e diak lodengei el kmo te mekerang. Ng lmangel a renguk er tirkel kurusii er a chedaol tekoi ma lechub e te chellungel a berraod le tir el diak el lodengei el kmo ngera ng rirelii a Jesus Kristo el kirir.

A Jesus Kristo a ngilai a kngtim, ringel molab, kngtil a rengum me a, chelitechetum. Ng diak el di el kau el tang loltekau! Ngii a mo ousubes er kau sel mouchel a rengum er a kngtim. Ngii a mo omekngeltengat er kau er a ikel mousbech. E Ngii a mo omekungil a telemall el rengmiu. Sel mrengedau el mo er Ngii, e a berraod el moltekau a mo kebekakl. A lsekum e ko meruul e oltirakl a telbiil el mo oltirakl er a Jesus Kristo, e ko mo medengei el kmo a meringel taem er a klengar a di tedeb. A ringel el moltekau a “obult el mo deureng el ngara Kristo.”

Ng kuk diak msal mereched a lechub e ke kuk kmal meudang el mo mui loltirakl er a Jesus Kristo. Seikid e kau a mo mui el medengelii a klengeltengat er a Tngkaireng er Ngii. Ke dirrek el kmal mo meduch el lolngeseu el mengedibel er a Israel.

Luut er a Jesus Kristo.

Kemiu el rudam me a rudos er ngak, aika el merael mei el sils, e a Jesus Kristo a lmuut el mei er a beluulechad el Mesiah. Chelecha el sils ea kumekedong er kemiu el muut lotuil a klengar kemiu er a Jesus Kristo. A kumekedong er kemiu el mo olngeseu el mengedibel er a beriid el Israel e mongedmokl er a beluulechad el kirel Ongeru Lemei a Rubak. A kumekedong er kemiu el mo ouchais el kirel a Kristo, e sioning er a Kristo, e oumera er a Kristo, e ngara deureng er a Kristo!

Mei er a Kristo e motilii a [rengum]” el rokir er Ngii. Tiaikid a bertelel a deureng er a klengar!

A ngarbab el klungiaol a direke merael mei, e rudam me a rudos er ngak, le Osobel a lmuut el mei! A ngarbab el klungiaol a direke merael mei le Rubak orreched er a Urerel. A ngarbab el klungiaol a direke mei sel debult a rengud me a klengar kid el bedul a Jesus Kristo.

A kuchotii a sioning er ngak el kmo a Jesus Kristo a Ngelekel a Dios. Ngak a oltirakl er Ngii. Ng chetengakl el ngak a Mesiungel. Sel Luut er Ngii el Mei, “ea klebkellel a Rubak a mo mocholt, me a rokui el chad a mo mesang.” Seikid el sils a mo sils er a deureng el mo er a remelemalt!

Ngokiu a klisichel a chedaol kiis er a priesthood el kulab, e a kuchais er tial klemerang le ko er kemiu me a beluulechad el rokir! Loba ngklel a Jesus Kristo, amen.