Chedaol Llechukl—Uchetemel a Klaumerang
Ngdiak el sebeched elmo chelbed ersel moktek e ra chedaol llechukl el lomult e melmolem e loumerang e ra ebangkelio.
A bechik, ra Mary, me ngak a direke milsang a sbringu el ngarngii a siasing e ra babier me a llechukl ra medal el kmo, “Books: The Original Handheld Device.”
A kulemdasu er tial lutebengall el klumech ma belkul a ikel dongu el ngara chimad el do ngituuk el mla mo usbechall. Mak mlo ungil lomtab, e mlo melchesuar el kmo ngidil dongu ma blol chimong el redem er ngii a blebelel a chad el llomes a diak el sebechel lmuut elmo klou malechub el ngarngii a belkul el ua sel lulekrael el reng el mei el ngara chedaol locholt.
A blol dongu el ngara chimad malechub e ngara urered, a Bibilia me a Babier ra Mormon: Tiang a Dirrek el Louchais el Kirel a Jesus Kristo a meskid a ulekrael el reng me a osisecheklel a Jesus Kristo, el Losobel e ra beluulechad. Kede mekreos a ikal babier el kirel a ikel tmolech el ngerachelir el meluches el kirel a Dios el lomekrael er tirkel profet e ra chuodel me a rechad mesel lulekrael el lulmesterir el kirel a klengar er tir.
Ngobengkel a osisecheklir a re ngar el profet, a ikal chedaol llechukl a meskid a ulekrael el losisechakl el kired er chelechal beluulechad. A ikal chedaol llechukl a kot el mesisiich sel lolsisechakl, mesmechokl, mengelaod, e olserechakl a rengrir a re dertal chad ma telungalek el losiik a ulekrael el ngara Rubak.
A chedaol llechukl, lobengkel a ulekrael reng el ngara Chedaol Reng, a melemolem el kot e luchelel sel lomecheluchel e lomult er tirkel chad el ngariou a rengrir e ou mekikngit el reng e sorir elmo oltirakl e ra Jesus Kristo. A chedaol llechukl a olngeseu el melketek e ra uchetemel a mo sebechel lotekau a mekedekudem el lutekengel a cherareu el mengitechut a klaumerang.
A re beches el direke miltecholb a mla omekngeltengat e telil a Ikelesia e ra reksi er ngii rokir. A tara okesiul a lulterkokl eldi ngara renguk. Sera ak ngeasek el bishop, teru el smiich el rodos el misionari a ulisechakl e ra telungalek ra William Edward Mussman. Ngkel demerir, mle meduch el chad e ra llach, a mle ngarbab el meredel e ra klou el kombalii. Ng mle blak a rengul a bechil, ra Janet, e lolngeseu ra telungalek er tir el kiei loltirakl ra klengar e ra Jesus.
A re kladikm el ngelekir el sechal ma redil, el diul mlara lluich ma derengel a rekrir, a dirrek el mlosisechakl. Til teuang el ngilai a osisechakl e ngara ikelesia. Tirkal rodos el misionari a milketeklii sel lomengiuel a Babier ra Mormon e meluluuch el kirel a klaumerang el kirel sel chedaol llechukl. E meang el tekoi, le tial telungalek a uleak e ra nglunguuch a chiliuii sel rokir el Babier ra Mormon ra di chelsel a kedeb el taem.
Tirkel ward misionari, el teru el mle Relief Society president, a ulebengterir el ngara ongdibel ra sakament.
Me tial telungalek ra le bochu le metecholb, e te miltecheb ra idisel a babier el melekoi a kengtil a Ikelesia. Tiang a mle uchei e ra internet, ngdi a ikal klalou a milkekii a klou el baks.
Tirkel rodos el misionari a mle siotai er ngak serak direke beches el okedei ma eua rekik el bishop elmo olengeseu el longer a ker elmo modars. Me sera ki bom kaseues ra chelsel a blirir, e tial klou el baks el mui ra babier el melekoi a kengtil a Ikelesia a ngara blengel a rum. Ak miluluuch el kirel tial ngerachel. Me sera lomuchel a nglunguuch, ea Chedaol Reng a milngululau el me rengak, “Ng mlamo medengei el kmo ng klemerang.” Tiang a mle orechudel. A rodos el misionari a oumerang el kmo tial rokir el telungalek a uluumerang. Te ulmdedenger el kirel a demerir.
Ak mle mereched el louchais er ngii el kmo a Chedaol Reng a uremlak el kmo ngii a mlamo oumerang. “Seng klemerang?” Ng mlo ungil lomes er ngak e dilul kmo a Chedaol Reng a ulterkeklii a klemerang el kirel a Babier ra Mormon me a Ikelesia elmo rengii.
Ma kulker a le ngarngii a belkul aki mluut el chemuiu a ikal babier, alsekum mete mla nguu a oterkeklel a reng.
A demerir a ulenger el kmo ngdiak a ututelel. Me te bekl el chedal tial telungalek el dirrek el lultireklii a nger er ngii.
Ng dilu kmo ng mle ngarngii a orechudel el keril: Ng ta ra uchul e te ngilai a kmal betok el babier el lomtok e ra Ikelesia a tir el mle chedal a tara klechelid. A lmuut el tara tekoi, ngii a ultebedii a klou el ngeseu elmo olngeseu el lomekedechor ra beches el ikelesia er seikid el klechelid. Ngii a uluuchais er ngak el kmo tirkel rodos el misionari a ulisechakl er ngii el kirel a ultutelel a ongeltacher, el mle ungil a rengul e kongei er ngii, ngdi ngii a melbedebek alsekum eng ngdiak el mekngit a le dirrek el kobkelii sel lodars el kiltmeklii ra uchelelel. Ak dilu er ngi el kmo sel blel harau er ngii el lodars a diul chetengakl e ungil tekoi.
A reua Mussman ma ngelekir el sechal, bechil a ngelekir, ma ngelekir redil.
Tial rokir el telungalek a miltecholb. Ng tal rak ruriul e te mlouak el telungalek e ra Templo ra Oakland California. Ng mlo sebechek el ngarngii. Ngkel ngelekir el sechal a rirekir a skuul ra llach, mlo ungil ersel skeng ra llach ra California, e mlo ungil mesiou ra beluu e ra Siabal. Ak mla mesterir ra ikal betok el rak ra bekl el telecheroll el lolemolem el loltirakl e ra ebangkelio. Ak mlo sebechek el mengetmokl e ulemak e ra tara ngelekir el redil.
A re mla bult el ngarngii er chelechal taem a kmal lungil. Tial mlo merek el Ongelolem el buil ea Coach Andy Reid, ngkel lomtebechel ra rechad e ra football ra Kansas City Chiefs, me ngak, me re bebil ra rechad lomtechei ra klechelid er kid me a re bebil ra klechelid, a milngedecheduch e ra ongdibel ra betok el klechelid e ra Ikelesia ra Riverside el ngara New York City. A Coach Reid a ulemeketakl e ra lmuut el longerung el techall me a onger el kirel siotaikeng ma techall, el ngii a moktek e ra ebangkelio er a Jesus Kristo. A bol tutau, me a re bechemam, Tammy Reid ma Mary, e aki mlara ongdibel ra sakrament e ra Manhattan Second Ward. Ng mle mui ra reng el lomesiou. Te mle betok a re beches el direke miltecholb el mla rengii. Teim el direke miltecholb el chedal a Ikelesia, teua el meklou el sechal ma imol ngeasek el chad, a re mle teloi e ra rechedal a Aaronic Priesthood el merous e ra sakrament. A kungil a renguk el louchais el kmo a osisiu el lomrolir a re beches eI rechedal a Ikelesia a merael meliuekl er tial Ikelesia.
Ng dmeu a rengmam el kirel a domes el lildisir tirkel kongei a ikel chedaol el siotaikeng, ngmodech a klengar er tir, e kongei ersel techall elmo oltirakl e ra Jesus Kristo. Te soiseb ersel rael ra telbiil e lokiu ra klaumerang, ouchel el reng, techolbechelid, e molterkokl el uaikel losisechakl el ngara Chedaol Bibilia ma Babier ra Mormon.
Ngdiak el sebeched elmo chelbed ersel moktek e ra chedaol llechukl el lomult e melemolem e loumerang e ra ebangkelio. Tirkel chuodel el profet lolekoi er tir ra Babier ra Mormon a mle medengelii sel lurerel a Jesus Kristo me tulsisechakl e ra ebangkelio er Ngii. A Babier ra Mormon a ngosukid elmo kmeed ra Dios sel dosuub, e omtab, e meruul a ikal lolsisechakl. A Profet Joseph Smith a ulsisechakl el kmo “A sechal [malechub a redil] a sebechel mo kmeed e ra Dios sel loltirakl a ikel tekoi er tial [babier] ra ikel kuk bebil ra babier.”
A mo medengei el kmo a Babier ra Mormon a tekingel a Dios, ng kired el menguiu, omtab, e meluluuch el kirel e solang e ouedikel el kirel a ikel tekoi el ngarngii precepts. A profet Moroni a mle yaksok el kmo a Dios a mochotii a klemerang er tial babier el me rekid sel doluluuch el ngara rengud, loba blak el reng, me a klaumerang el ngara Kristo. Mesuub e ra Babier ra Mormon a orechudel el kirel a dolemolem el ngara bult.
Sel domtab ersel delongelel a Bibilia ma Babier ra Mormon el dongu ra chim, e kede oker ra tal ker. Ng locha ua ngera ututelelel e lungil sel momdasu el teblol hong a blol sebechel alsekum ma Rubak a melekoi me bol dak e lerung e “di bol tang e ra chimad”? Tiakid sel Rubak a milketeklii el kirel sel “ulelkael ra Judah,” el Bibilia, me a “ulelkael ra Joseph,” sel Babier ra Mormon.
Ngara betok el lutebengall el lomengull, a Babier ra Mormon a meskid a uchetemel a llach el smisichii e meredem e lokiu ra Bibilia. Sel lechul a Tngakireng e ra Jesus Kristo a tmolech el lokesiu.
A Bibilia a meskid a bleketakl el cheldechedechal a Jesus Kristo ra losiou ra le ngar, luldimukl ra kodelel ma Okisel ra Kodall. A Babier ra Mormon a lmuut el bleketakl el kirel sel Tngakireng ra Jesus Kristo, el tekoi re profet a tmolech el mesaod er ngii ruchei ra Kodelel.
Sel luchelel a Alma er a bliongel 42 a llecheklel sel lutebengall el llach el kirel a Tngakireng e ra Jesus Kristo.
Me kede chiuii el uasei: “Tial klengar a taem el dekekerongel a msa chad meng ngouchel e mesiou ra Dios—Sel Rebetel a Chad a mlo uchul me a kodelel a klechad ma reng el mlora rokui el chad—Mekiis ra kodall a okiu ra ouchel el reng—Dios el Ngii a melngakireng el kirel a klengit er tial beluulechad—Klechubechub a mo er tirkel louchel—Rokui el dimo mukerkeriil ra Dios—Klechubechub a mei leng sel Tngakireng—Ngdi ngkel meral louchel a mo suobel.”
A President Russell M. Nelson a dilul kmo, “Ak yaksok el kmo sel moluluuch el mesuub er a Babier er a Mormon er a bek el sils, e kemiu a mo meruul a ungil telbiil er a—bek el sils.” Ngii a dirrek el yaksok el kmo alsekukm “ke blechoel el mengoit a temem el menguiu ra Babier ra Mormon e ke mo mesisiich el lomtok a ikel mekngit ra bekl el sils.”
Ng di uaikel kdilung, ak mlo chemat e ra ikel luldasu el kirel a mle kot el dongu ra chim—a babier. Ngdi, ak dilengchii sel klou el lusbechelel a internet er chelechal beluulechad. A tara beches el dongu ra chim a sebechel meskid a tekoi el ngara reksii el belkeik e ra meklou el blil a babier. Kede dmeu a rengud el kiei ra uaikal taem. Ak kmal dmeu a renguk el kmo tiang a meskid a chedaol babier me a klalou ra Ikelesia el ngarngii el lokiu a digital. A Internet a kot el mesisich el dongu el kirel omesubel a ebangkelio. Chelechal taem, te betok el chad a ouchais a chedaol llechukl mora resechelirir lousbech e ra dongu ra melidiul. A Babier ra Mormon app, e tia okesiu, a ungil rolel el dochoterir a re sechelid el mora Babier ra Mormon e sebechel douchais el ngara klebechel e melmalt el rael ra ngidil basio el mngar ngii.
Ma Internet a meskid a betok el klengeltengat, e ngarngii a telmelel, eldi uai sel llechukl el babier el lomtok e ra Ikelesia el kuluuchais er ngii ra uchelel, ng dirrek el mengetmokl a rauelreng e mengitechut a klaumerang ra ikel kesiokel el llechul a ebangkelio. Ng sebechel telkib e ra “mekngit er chelechal taem” el President Nelson a dilii.
A cherareu me tirkel lolngeseu er ngii, a ungil medengei e diak el lomekereu, a mla mekdebechii ra Internet a di uai sel baks el mui ra llechukl el babier el lomtok e ra Ikelesia el kuluuchais el kirel ra uchelel, el moktek a mengeroid er kau e ra ikel klemerang el multuil er ngii ra Dios.
A ikel mondai el ngarngii el lomekdubech a raureng e ra ikal betok el rak a meral diosisiu. Tiang kmal merang sel sekum e ke mengaisisiu er chelechal taem me a 1960, er sera ak lluich a rekik.
A chedaol llechukl a osisecheklid elmo ungil lomiich e mellomes ra rokui el tekoi. A Internet a sebechel dousebch er ngii el ngara klebechel a rolel malechub eng mekngit el rolel.
Di diul el meketeket ma re beches el chedal a Ikelesia el mesuub e ra ebangkelio a kirir elmo uldelomel el kirel a ikel tir omes. Lak ko momes a delngerengel, cheleblad, malechub a chelebirukel lomeruul. Alsekum me ke mong, e kemo melemolem er ngii meng ngoikau el loldengelengel e ra rael el tomelii a klaumerang e choitechetur a omrolem ersel diak a ulebengelel klengar. Ke sebechem elmo uedikel el lungil malechub eng mekngit. Mosiik a lemalt e bom cheroid e ra ikel milkolk el ngara Internet el bedikl ma skel a telemall. Bol mui a klengar er kau ra ungil, melmalt el luldasu; bol deu a rengum, moilil ngdi mcheridau e ra klebelung. Ngarngii a klekakerous. Sel ongeteruich me a edei el tebechelel a klaumerang a mengasireng el lulekrael. Ngara bekl el tekoi, e kau tal el chad blechoel el menguiu ra Babier ra Mormon, el ngii a mo nguu a Reng el loea ra klengar er kau e ngosukau el mesa klemerang e ra chelbirukel.
A tekingek elmo er tirkel locha mla metuchakl ra rael ra telbiil a mluut elmo ra chedaol llechukl, omrolel a ulaoch, meruul a tekingel a Chelid e ra rekeblid, me a chelitakl ra klaumerang. A re bekl el chad el kesiokel e ra rengul a Rubak. Aki ousbech er kemiu! A Rubak ousbech er kau, e kau ousbech er Ngii! Ke di blechoel eldi outkeu er kau. A ikal betok el rak el kusiou ra Ikelesia, e ak meral mengeluolu er tirkel klebokel el chad el liluut el morsel rael ra telbiil e mlo mesiou e ulemekngeltengat ra re bekl el chad el betik a rengrir er tir malechub e te mlo kaseues.
A chedaol llechukl me a re ngar el profet a meklou el rolel ea oubeltikelreng el Demad ra Babeluades a mengetmokl a Uldesuel el kirel a deurreng el ngarngii el mora re bekl el Ngelekel.
Ak melekoi el meral sioning ersel klebkelel a Jesus Kristo me a milketmokl el Tngakireng er Ngii, e loba ngklel a Jesus Kristo, amen.