“Ikar Aikuj in Kōpeļļo̧k Kōjām ko”

Elōn̄ļo̧k jān en̄oul iiō ko in bwebwenato eo an Kabun̄ in ilo Guam, ro uwaan Kabun̄ in raar itok jān bar juon jikin, jim̧or āinwōt membōr ro an jarin tariņae an US ak rilikin ro jān elōn̄ laļ ko. Ilo jem̧ļo̧kin Pata eo an Laļ in kein II, Gwendolyn im Victor Olsen raar em̧m̧akūtļo̧k n̄an Guam im jino kajutak juon peejnej kar ņa etan South Sea Store. Ro uwaan Kabun̄ in ekar ekkā etal n̄an m̧weo im̧wer n̄an loļo̧k, riit, kōjan̄jan̄ piano, kakkūje, ak kōnono. Ke juon branch an Kabun̄ in ekar ejaak ilo Guam ilo Oktoba 1951 eo, Victor ekar erom branch būreejtōn eo jinoin tata.

Ilo 1976 eo, Maria Salas Calvo im ļeo pāleen, Donald, erro jim̧or RiCHamoru (kar m̧okta jipeļe “Chamorro”), armej in Guam, ej kab m̧ōj an kar m̧are im kar kappukōt juon im̧ōn jar. Maria ekar keememej, “Kōm kar kappukōt im kōm kar kanooj in oktak jidik kōnke kōm kar etal n̄an aolep kabun̄ ko rooktak jān doon im kōm kar kōņaan pukōt juon men eo em̧m̧anļo̧k n̄an kōm̧m̧an bwe kōmin juon baam̧le em̧ōņōņōļo̧k.” Juon raan, ke mijenede ro jān Kabun̄ in raar jikrōkļo̧k im̧aan kōjām eo, Donald ej keememej, “Ikar bōk juon en̄jake em̧m̧an. Ikar aikuj in kōpeļļo̧k kōjām ko n̄an armej rein n̄an letok n̄an eō ennaan eo aer.” Calvo ro raar peptaij ilo Māe 21, 1977 eo.

Ilo ejja tōre in wōt, ilo jōm̧ar in 1977 eo, juon RiCHamoru rijikuuļ in high school kar etan Hebert J. Leddy ekar riiti Bok in Mormon eo juon mōttan ekar leļo̧k n̄an e. Leddy ekar kajjitōk ippān ro jinen im jemen eļan̄n̄e emaron̄ kar peptaij, bōtaab ilo tōre in, raar meļeļe kajjitōk in āinwōt juon kowaan in jolet im m̧anit. Raar abōb. Juon ritōl an priesthood ilo ije ej jokwe ie ekar kallim̧uri Leddy bwe eļan̄n̄e enaaj kar pokake kōņaan ko an ro jinen im jemen, ilo jem̧ļo̧kin enaaj bōk rie eo aer.

Ejjab to ālkin, Leddy ekar pād ilo juon junior achievement kweilo̧k ilo Indiana. Ilo juon iien kōttar n̄an an kelo̧kļo̧k wōt (layover) ilo Hawaii, ekar ioon juon Armej eo Rekwojarjar ilo Raan Ko Āliktata jān Guam, eo ejkab m̧ōj an kadedeļo̧k master degree eo an ilo Brigham Young University (BYU). Rikadwōjļo̧k in BYU eo ekar karuwaineneik Leddy n̄an etal n̄an m̧weo im̧ōn n̄an katak eļapļo̧k kōn gospel eo. Aolep Bōļaide ium̧win ruwalitōk wiik ko, Leddy ekar ioon mijenede ro ilo m̧weo im̧ōn baam̧le eo an Jesus.

“Aolep men ikar katak ikar āinwōt jeļā,” Leddy ekar keememej. “Ilo aō kar riiti Bok in Mormon, ikar lo bwe epen n̄an door laļļo̧k. Ikar jeļā ekar m̧ool.” Kōn mālim eo an ro jinen im jemen, ekar kanne n̄an im etal n̄an Brigham Young Univeristy ilo Provo, Utah. Ijo, ruo raan ālkin raan in ļotak eo an kein 18th, ekar peptaij. Ke ekar kwaļo̧k ennaan eo ippān ro jinen im jemen, raar uwaak, “Ejja wōt ke kōm kar ajeļo̧k eok n̄an Anij ke kwar ļotak, kōmij kiiō lewaj n̄an eok aolep anemkwoj n̄an erom juon kein jerbal an Anij.”

Leddy ekar erom RiCHamoru eo jinoin tata n̄an jerbal āinwōt juon mijenede ke ekar kūr n̄an Tennessee Nashville Mijen ilo 1979 eo.