“Ikar Bwilōn̄, ilo Kajin Eo Aō Make”

Maria Salas Calvo, juon iaan armej in Guam ro jinoin tata kar kobatok ilo Kabun̄ in, ejjan̄in de kar riiti Bok in Mormon eo ilo kajin eo an make, CHamoru (kar jipeļe eo m̧okta “Chamorro”). CHamoru ej juon iaan kajin ko ruo wōt an kajin ko 450 an RiAustronesia ro kōnono kake Pacific in me rejjab uwaan Oceanic subgroup eo. Kajin CHamoru āinwōt ekar waļo̧k jān juon em̧m̧akūt an juon kumi ejenolo̧k in armej ro jān Southeast Asia n̄an Mariana ko iturinļo̧k 3,500–4,000 iiō ko remootļo̧k.

Maria im ļeo pāleen, Don, raar barāinwōt juon RiCHamoru Armej ro Rekwojarjar ilo Raan Ko Āliktata, kar ļōmņak eļap kōn ekōjkan an rilikin ro jukjuk in ameņak jān 16th century m̧aantak kar jelet kajin eo im m̧anit eo an RiCHamoru ilo Guam. “M̧anit eo ej okoktak ipeļaakin elōn̄ iaan iminene ko me kar kwaļo̧ki jān RiSpain ro,” Maria ekar ba. Ke ilo Guam, RiSpain ro raar pukōt n̄an anokņake armej in CHamoru. “Armej ro ilo āne ko raar būromōj,” Don ekar kōmeļeļeik.

Oran armej in CHamoru ro ekar dikļo̧k, im barāinwōt men ko bwinnin m̧anit eo n̄an iminene ko im kajin eo an RiCHamoru ro. Ilo jinoin 20th century eo, ium̧win kakien an jarin tariņae eo an US ilo Guam, kajin eo an RiCHamoru kar kabōjrake, im em̧ool naval administration eo ekar tūle CHamoru-English tikjinede ko. Ilo wōt kar jinoin 1970 ko kijejeto ko an kien raar jino kemour kajin eo im m̧anit eo an armej in Guam ro.

Maria ekar kāālet n̄an ukōt kāālet ko jān Bok in Mormon n̄an kajin CHamoru. Kain ukook in ekar jipan̄ n̄an kijejeto ko an eddōkļo̧k eo n̄an bar kemour kajin CHamoru ilo Guam. Liin ekar bōk kōkapilōklōk ippān Ann Rivera, tōrāāktōr eo an bilingual būrookraam̧ eo ilo Department eo an Education eo an Guam, n̄an kanooj lale bwe ukook eo an en ļoor juon standard system eo ej kab m̧ōj ejake an jipeeļ im grammer an kajin CHamour. Liin ekar jerbale ukook eo ium̧win ruo iiō.

“Jet iien ilo jerbal in ukook eo aō, būruō ekar en̄jake an kanooj obrak im ikar libobo kōn dān in kōmejaaļaļ,” liin ekar ba. “Ikar bwilōn̄, ilo kajin aō make, bwe Jemed ilo Lan̄ ekar jab kajjitōk eļap. E ej kajjitōk wōt ippād n̄an iakwe E kōn aolepān būruōd im ad ļōmņak.”

Ilo 1989 eo, Maria ekar kadedeļo̧k ukook eo an kāālet ko jān Bok in Mormon ilo kajin-CHamour: Sileksion Siha Ginen I Leblon Mormon—Otror Na Testamenton Jesu Krist. Liin im membōr ro jet an Kabun̄ in raar kwaļo̧k bok eo n̄an ritōl ro ijo jokwe ie, ekoba Governor Joseph F. Ada. Territorial Library of Guam ekar kobaik ukook eo ilo CHamoru ilo collection ko rein juon ilo jekjōn eo an Guam archive ko.

Ilo Nobōmba 24, 1989 eo, territorial legisature eo ekar kōm̧m̧ane juon resolution n̄an nōbar jerbal eo an Maria. Ekar nōbar “Maria Salas Calvo, juon Mormon ewujlepļo̧k im niknik barāinwōt juon RiChamorro eutiej im makeļo̧k,” kōn tōprak eo an. Resolution eo ekar kean̄ bwe ukook eo an Bok in Mormon n̄an kajin CHamoru ej “jutak kōn juon tōprak ļapļap ilo aolep kōjparok-aorōk an kajin Chamorro, ej letok ilo kajin Chamorro eo aiboojoj juon bwebwenato eļap kōn gospel eo an Jisōs Kraist.”