“I Anahnehda Ritingpeseng Wenihmw kan”

Me tohtohsang pahr rieisek en poadoapoad en Mwomwohdiso wet nan Guam, tohn Mwomwohdiso kan kohsangehr ekis wasa tohrohr, mie me wia tohn sounpei en US de irail akan me kohkoihsangehr udahn sapwarail kan oh kousoanlahr ekei sahpw. Ni kaimwseklahn Mahwen Keriau o, Gwendolyn oh Victor Olsen mwekidlahngehr Guam oh tapiadahr katanga pesnes ehu me kahdanki South Seas Store. Tohn mwomwohdiso kan kin kalapw pwarek imwarahu pwehn mwemweit, wadawad, kesengki neira piano, komoal, de koasoakoasoai. Ansou me ehu branch en Mwomwohdiso wet wiawidahr nan Guam nan Oakotohpe 1951 [kid duwepwiki limeisek ehu], Victor wiahla keioun branch preseden.

Nan pahr 1976 [kid duwepwiki isihsek wenou], Maria Salas Calvo oh ah pwoud, Donald, koaros mehn CHamoru (mahs kin spehl ”Chamorro”), pwilidaken mehn Guam, apwetehnte pwopwoudla oh wie raparapahki ehu mwomwohdiso. Maria tamandahr, ”Se raparapahkiher oh se ekis weksang mehteikan pwehki se towehdahr pelien lamalam wekpeseng kei oh se men diar mehkot mwahu pwe sen wiahla peneinei popohl ehu.” Ehu rahno, ansou misineri kan sang Mwomwohdiso wet lel ni ahi wenihmwo, Donald kin tamanda, ”I anekihda pepehm mwahu ehu. I anahnehda ritingpeseng wenihmwo koanong aramas pwukat en kihong ie arail padahk.” Peneinei en Calvo pepdaislahr Mei 21 [rieisek ehu], 1977 [kid duwepwiki isihsek isuh].

Nan ansouohte, nan soamer en 1977 [kid duwepwiki isihsek isuh], tohn skuhl pwulopwul en CHamoru men me kahdanki Herbert Leddy wadekehr Pwuken Mormon ehu me kempoakepah men kihengehr. Leddy pekiher rehn ah pahpa nohno ma e kak pepdaisla, ahpw ansouo, dahme irail wehwehki iei me pekipek wet wia soikalahn pein ah sohso oh tiahk. Ira sohte mweidada. Emen olen wasahu me ahneki prihsduhd inoukihongehr Leddy me ma e pahn peikiong ah pahpa nohno, e udahn pahn alehdi ara utuht.

Mwurinte mwo, Leddy towehdahr kapokon en pweida ehu me wiawi nan Indiana. Ni ah komkomoal nan airport en Hawaii, e tuhwongedier Souleng en Guam emen me apwete neksang ah kadoahke nah mahsder diknrih ni Brigham Young University (BYU). Me kesepwil sangehr BYU o lukehier Leddy en kin koihla imwehu pwehn kaskuhlki me tohto kan me pidada rongamwahu wet. Nialem koaros erein wihk waluh, Leddy tuhwengehr misineri kan nan imwen peneinei en Sises.

“Soahng koaros me I kaskuhlki likamwete I esehier,” Leddy tamandahr. “Ni ahi wadekehr Pwuken Mormon, I diarada me epwelen ien pwilikihdi. I esehier me e mehlel.” Sang ni mweimwei en ah pahpa nohno, e kadoahke oh towehda Brigham Young University nan Provo, Utah. Wasahu, rahn riau mwurin ah lel sounpar 18 [eisek waluh], e pepdaislahr. Ansou me e ehukiheng rohng wet ah pahpa nohno, ira sapengkiher, “Duwehte aht mweidehng uhk Koht ansou ke ipwidio, met se kiheng uhk saledek unsek en wia sapwellimen Koht mehn doadoahk.”

Leddy wiahla keioun mehn CHamoru me wia papahn misineri ni ah alehdi pwukoahu ong nan misin en Tennessee Nashville nan pahr 1979 [kid duwepwiki isihsek duwau].