“I Alehdier Kamarain, ni Pein Ahi Lokaia”

Maria Salas Calvo, emen pwildaken mehn Guam me tepin iangala Mwomwohdiso wet, saikinte wadek Pwuken Mormon ni pein ah lokaia, CHamoru (me mahs kin spehl “Chamorro”). CHamoru iei ehu sang nan lokaia riau en lokaiahn Austronesia 450 [pahpwiki limeisek] me kin doadoahk nan kahndekehn Pacific me sohte iang wia kisehn deke kan nan Oceania. Lokaiahn CHamoru mwomwen tepsang pwihn en aramas ehu me seiloak sang palimesehn Asia ong sapwen Mariana kan ni sounpar 3,500 [silikid limepwiki]-4,000 [pahkid] samwalahro.

Maria oh ah pwoud Don, me pil wia emen Souleng en Imwin rahn akan en CHamoru, medewehier laud duwen kousoan oh kaunlahn tohn ehu sahpw sang nan pahr 1600 [kid wenepwiki] koa oh doula ah wekidalahr lokaiahn CHamoru oh tiahk pohn Guam. “Tiahk kohsang soahng tohto duwen mour me tepsang rehn mehn Spain kan,” Maria koasoaiahier. NI arail lelehr nan Guam, mehn Spain kan songehr en kousoanla oh kaunda aramas akan en CHamoru. “Aramas akan pohn deke kan lohdier,” Don kawehwedahr.

Tohtohn aramas en CHamoru tikitiklahr, pil duwehte dewen tiahk ong mwomwen mour oh lokaiahn CHamoru. NI tepin senteri kerieisek, pahn epwelpen sounpei en US pohn Guam, lokaiahn CHamoru sohla mweimweida, oh palien neipi isikala dikseneri en CHamoru ong lokaiahn Wai. Ihte ni tepin pahr 1970 [kid duwepwiki isihsek] koa me palien koapwerment songehr tapihada kapwurehda pwilidaken lokaia oh tiahk en Guam.

Maria medewedahr en kawehwe irehkan me pilipilsang nan Pwuken Mormon ohng lokaiahn CHamoru. Soangen doadoahk en kawehwe wet pahn sewese kekeirdahn doadoahk kan en pwurehng kapwurehda CHamoru pohn Guam. E ehuieng Ann Rivera, me wia sounkaweid en pwirokrahm en palien lokaia riau nan Ohpis en Kamarain, pwehn tehk mwahu ma ah doadoahk en kawehwe idawehn wiepe kapw ieu me pid duwen spehl oh krahmer. E kadoahkehki doadoahk en kawehwe wet erein sounpar riau.

“Pak tohto nan erein ahi doadoahk en kawehwe, ahi mohngionget kin ahneki pepehm en dirala oh pilenmesei nekilahr,” e indahier. “I alehdi kamarain, ni pein ahi lokaia, me Sahm Nanleng sohte ketin kupwurki soahng tohto. Ihte me E ketin kupwurki kitail en poakehngki Ih atail mohngiong oh lamalam unsek.”

Nan pahr 1989 [kid duwepwiki welihsek duwau], Maria kanekelahr kawehwepen ehu pwuhk en irehkan me pilipilsangehr nan Pwuken Mormon ong lokaiahn CHamoru: Sileksion Siha Ginen l Leblon Mormon—Otror Na Testamenton Jesu Kristo. Lih menet oh ekei tohn Mwomwohdiso kan kisikisehkiher pwuhk kei ong sounkaweid en wasahkoa, me iangahki Kepina Joseph F. Ada. Territorial Laipreri en Guam iangahki doadoahken kawehwehpen lokaiahn CHamoru nan wasahn nahkpene me kesempwal kan en poadoapoaden Guam.

Ni Nohpempe 24 [rieisek pahieu], 1989 [kid duwepwiki welihsek duwau], palien kosonned kamanahla kahrepe ieu me kapaia en Maria doadoahk. E koasoaia ni kaping “Maria Salas Calvo, emen Mormon me poadidi oh mehlel me pil wia emen mehn Chamorro me kesempwal oh uhtohr,” ong ah pweida kan. Kahrepe wet ketihtihki me doadoahkepen kawehwehn Pwuken Mormon ong lokaiahn CHamoru “wia kasalepen doadoahk laud pweida ieu nan doadoahk kesempwal en kolokol lokaiahn Chamorro, me wiahda nan Chamorro kaselel ehu soaiepen rongamwahu en Sises Krais.”