Ehu Poadepen Mwomwohdiso nan
Guam
Oaralap
Ni imwin Mahwin Keriau o, Souleng en Imwin Rahn akan me wie papah nan palien sounpei en mehn Amerika kan oh wie koukousoan nan Guam tepiadahr pein arail tuhpene kei. Ni tepin pahr 1950 [kid duwepwiki limeisek], branch kei koukoudahr ong tohn doadoahk en sounpei kan, arail peneinei kan, oh Souleng kan me koukousoan nan Guam. Sang ni utuhtpen misineri kan sang Misin en Japan, toweh kan tapihadahr ehukihong rongamwahu wet ohng kempoakeparail kan. Ni imwilahn sounpar eisek, keioun imwen kaudek kan nan Guam kasarawilahr pwehn apwalihala branch kan me wie kekeirdahr.
Souleng kan nan Guam wie doadoahk ongehr kempoakepahrail kan. Nan lukepen kamadipw, mesen lahng sakanakan, oh wekideklahn tiahk, toweh kan kin wiewia arail doadoahk en papah, padapadahk, oh kaukawehwe. Nan pahr 1970s [kid duwepwiki isihsek]samwa, irail pwildaken Chamoru kan, me arail lokaia oh tiahk solahr doadoahk ki erein dih tohto kei, tepidahr tuhweng toweh kan oh misineri kan. Mwurin irail mehn Chamoru kan me tepin wiahla tohn mwomwohdiso, Maria oh Donald Calvo, pepdaislahr nan May 1977 [kid duwepwiki isihsek isuh], Maria tapihada kawehwe Pwuken Mormon ohng lokaiahn Chamoru. Maria kopworopworiki me doadoahk en kawehwe wet pahn sewese irail mehn Chamoru me weliakapwalahr oh esehla rongamwahu ni pein arail lokaia oh iei me pahn sewese kolokol arail lokaia. Ansou me ah doadoahk kan ntingdahr nan 1989 [kid duwepwiki welihsek duwau], palien kou kosonned nan Guam wiadahr kosonned ehu me kesempwalki kawehwehpen Pwuken Mormon me e wia ehu “pweida laud” nan kolokol lokaiahn Chamoru.
Mendahte mahwen me elehiong koukoudahn branch kan nan Guam, Souleng kan wasahu inenen nantihong “wia uwen me kumwail kak pwe kumwail en dadaurete minimin me Ngehno kin ketikihong kumwail sang ni sapwellime kisakis en popohl me kin kolokol kumwailpene”Episos 4:3 ni arail kin ehuiong kempoakepahrail kan.