Pene 7

Te mau tāvini taea’e

I te tau fa’atupura’a rā’au nō te matahiti 1829, e mea to’eto’e ’e te rarirari roa i te ’āva’e mē ra. Tē fa’aea ra te feiā fa’a’apu nō Harmony i roto i te fare, ’ua fa’ataime i tā rātou tanura’a e tae roa e maita’i mai te reva, tē fa’aitoito ra ïa Iosepha ’e Oliver i te fa’ahaere i te ’ohipa ’īritira’a i mua.¹

’Ua tae rāua i ni’a i te fa’ati’ara’a o te mea i tupu i rotopū i te mau ’āti Nephi ’e te mau ’āti Lamana i te pohera’a Iesu i Ierusalema. Tē parau ra te reira nō te mau ’āueuera’a fenua ’e te mau vero rahi tei fa’aano i te ta’ata ’e tei taui i te hōho’a o te fenua. ’Ua paremo te tahi mau ’oire i roto i te repo, ’ua tūtu’ihia te tahi ’e ’ua pau i te auahi. ’Ua fa’atore te uira i te ra’i i te hō’ē roara’a e maha hora ’e ’ua mo’e roa te mahana, ’e ’ua po’ihia te feiā i ora mai i te pōiri ta’ota’o. Toru mahana tō te ta’ata ’auera’a, ’e ’ua heva nō tō rātou feiā i pohe.²

I te pae hope’a, ’ua ta’i mai te reo o Iesu Mesia i roto i te rumaruma. ’Ua ui ’oia : « E ’ore ānei ’outou e fāriu mai iā’u i teienei, e tātarahapa ho’i i tā ’outou mau hara, ’e e fa’aro’o mai, ’ia fa’aorahia ’outou e au ra ? »³ ’Ua ’īriti ’oia i te pōiri ’e ’ua tātarahapa te ta’ata. ’Āria, ’ua putuputu rātou i te hiero i te hō’ē vāhi tei parauhia Bounetifula, ’e ’ua fa’ati’a parau rātou i te mau tauira’a māere mau i tupu i ni’a i te fenua.⁴

Tē paraparau ra te ta’ata i te tahi ’e te tahi, tē ’ite ra rātou i te Tamaiti a te Atua tē poura’a mai mai ni’a mai i te ra’i. « Inaha, ’o vau nei, ’o Iesu Mesia, ’o tā te mau peropheta i fa’a’ite mai e tae mai i te ao nei ».⁵ ’Ua fa’aea ’oia i rotopū ia rātou nō te tahi taime, ma te ha’api’i ia rātou i tāna ’evanelia ’e ma te fa’aue ia rātou ’ia bāpetizo-utuhi-hia nō te fa’aorera’a hara.

« ’E ’o te fa’aro’o iā’u ’e tē bāpetizohia ra, e ora ïa », ’ua parau ’oia. « ’O te riro ïa ’ei ta’ata i te bāsileia o te Atua ra ».⁶ Hou ’oia ’a reva ai i te ra’i, ’ua hōro’a ’oia i te tahi mau ta’ata parau ti’a i te mana nō te bāpetizo i te ta’ata i ti’aturi iāna.⁷

’A ’īriti ai rāua i te reira, ’ua hitimahuta roa Iosepha ’e Oliver i teie mau ha’api’ira’a. Mai tōna taea’e ’o Alvin, ’aita Iosepha i bāpetizohia a’enei, ’e ’ua hina’aro ’oia ’ia ha’api’i rahi atu ā nō ni’a i teie ’ōro’a ’e te mana e tītauhia nō te rave i te reira.⁸

---

I te 15 nō mē 1829, ’ua mau te ua ’e ’ua haere atura Iosepha ’e Oliver i roto i te uru rā’au piri mai i te ’ānāvai Susquehanna. ’Ua tūturi rāua i raro ’e ’ua ui atura i te Atua nō ni’a i te bāpetizora’a ’e te fa’aorera’a hara. ’A pure ai rāua, ’ua tae mai te reo o te Fa’aora ia rāua ra, ’e ’ua fā mai te hō’ē melahi i roto i te hō’ē ata māramarama. ’Ua parau ’oia ’o Ioane Bāpetizo tōna i’oa ’e ’ua tu’u ihora i tōna nā rima i ni’a i tō rāua upo’o. ’Ua ’ī tō rāua ’ā’au i te ’oa’oa ’a ’atihia ai rāua i te here o te Atua.

’Ua parau Ioane : « I ni’a iho ia ’ōrua e tā’u nā tāvini taea’e nei, i te i’oa o te Mesia ra tē hōro’a atu nei au i te Autahu’ara’a a Aarona ra, ’o tei mau i te mau tāviri nō te utuutura’a o te mau melahi, ’e nō te ’evanelia nō te tātarahapa, ’e nō te bāpetizo nā roto i te utuhira’a nō te ha’amatarara’a i te hara ».⁹

E reo māru tō te melahi, ’āre’a rā mai te huru ra ē, ’ua puta roa i roto ia Iosepha ’e ia Oliver.¹⁰ ’Ua fa’ata’a atu ’oia ē, tē fa’ati’a nei te Autahu’ara’a a Aarona ia rāua ’ia fa’atupu i te mau bāpetizora’a, ’e ’ua fa’aue ’oia ia rāua ’ia bāpetizo ia rāua, ’ia reva atu ’oia. ’Ua parau ato’a ’oia ē, e fāri’i mai rāua i te tahi fa’ahou mana autahu’ara’a ’āraua’e, o te hōro’a ia rāua i te mana nō te hōro’a i te hōro’a o te Vārua Maita’i i ni’a ia rāua ’e i ni’a i te feiā tā rāua e bāpetizo atu.

I te revara’a Ioane Bāpetizo, ’ua haere Iosepha ’e Oliver i te pae ’ānavai ’e ’ua tomo atura i roto i te pape. ’Ua bāpetizo nā mua Iosepha ia Olive, ’e i te taime iho ā ’a matara mai ai ’oia i rāpae i te pape, ’ua ha’amata Oliver i te tohu nō ni’a i te mau mea e tupu mai ’āria. I muri iho, ’ua bāpetizo atura Olive ia Iosepha, tei ti’a mai mai raro mai i te pape ma te tohu i te ti’ara’a mai te ’ēkālesia a te Mesia, tā te Fatu i parau e fa’ati’a ’oia i rotopū ia rātou.¹¹

Nō te pe’e i te mau arata’ira’a a Ioane Bāpetizo, ’ua ho’i rāua i roto i te uru rā’au ’e ’ua fa’atōro’a rāua ia rāua i te Autahu’ara’a a Aarona. I roto i tā rāua tuatāpapara’a Bibilia, ’e tā rāua ato’a ’īritira’a i te mau pāpa’a parau tahito, ’ua tai’o pinepine Iosepha ’e Oliver nō ni’a i te mana nō te ’ohipa nā roto i te i’oa o te Atua. I teienei, tē amo nei rāua iho i taua mana ra.

I muri mai i tō rāua bāpetizora’a, ’ua ’ite Iosepha ’e Oliver ē, te mau pāpa’ira’a mo’a i riro nā e ’ohipa hōhonu ’e e parau ’aro, ’ua riro mai ïa ’ei ’ohipa māramarama. ’Ua fa’aīhia tō rāua ferurira’a i te parau mau ’e te māramarama.¹²

---

I New York, ’ua hina’aro roa ïa te hoa o Oliver, ’o David Whitmer, i te ’ite rahi atu ā nō ni’a i te ’ohipa a Iosepha. Noa atu tei Fayette David i te orara’a, fātata e toru ’ahuru maile i te ātea ia Manchester, ’ua riro mai rāua Oliver ’ei hoa i te taime tē ha’api’i ra Oliver i te fare ha’api’ira’a ’e tē ora ra i’ō Semita (Smith) mā. Pinepine rāua i te paraparau nō ni’a i te mau ’api ’auro, ’e ’ia haere Oliver i Harmony, ’ua fafau ’oia ia David ē, e pāpa’i atu ’oia iāna nō ni’a i te ’īritira’a.

’Aita i maoro roa tē tae mai nei te mau rata. ’Ua pāpa’i Oliver ē, ’ua ’ite Iosepha i te tahi mau tuha’a o tōna orara’a ē e’ita roa te hō’ē ta’ata e ’ite, maori rā nā roto i te heheura’a a te Atua. ’Ua fa’ata’a atu ’oia i te mau parau a te Fatu ia Iosepha ra, ’e i te ’īritira’a o te pāpa’a parau. I roto i te hō’ē rata, ’ua fa’a’ite Oliver i te tahi mau rēni nō te ’īritira’a, ma te fa’a’ite pāpū ē e parau mau te reira.

Tē fa’a’ite ra te tahi rata ’ia David ē, ’o te hina’aro o te Atua teie ’ia hōpoi mai ’oia i tōna pupu ’e tōna pere’o’o i Harmony nō te tauturu ia Iosepha, Emma ’e Oliver ’ia nu’u i Fayette, i reira rātou e fa’aoti ai i te ’īritira’a.¹³ ’Ua ha’amata ri’i te ta’ata i Harmony i te hi’o ’ē ia Semita (Smith) mā. ’Ua fa’ari’ari’a ato’a vetahi mau ta’ata e hāmani ’ino ia rātou, ’e ’āhani ’aita te ’utuāfare o Emma, ’ua pēpē pāpū ïa rātou.¹⁴

’Ua fa’a’ite David i te mau rata a Oliver i tōna nā metua ’e mau taea’e ’e mau tuahine, tei fāri’i ’ia haere mai Iosepha, Emma ’e Oliver iō rātou. E hua’ai ’o Whitmer mā nō te tahi feiā paraparau Heremani tei noho i terā vāhi ’e ’ua mātauhia rātou ’ei ta’ata rave ’ohipa ’e te paieti. E mea piri ri’i tō rātou ’āua fa’a’apu i te fare o Semita (Smith) mā nō te haere e fārerei, e mea ātea ato’a rā nō te ’ōpani i te feiā ’eiā e ha’ape’ape’a mai ia rātou.¹⁵

’Ua hina’aro roa David ’ia haere ’oi’oi i Harmony, ’ua fa’aha’amana’o rā tōna metua tāne iāna ē, e piti ā mahana ’ohipa rahi e tīa’i ra hou ’oia ’a reva ai. E tau tanura’a terā tau, ’e e piti ’ahuru tā fenua e ti’a ’ia hurihia te repo ’e ’ia ’āno’ihia te porifenua (gypse) ’ia tupu maita’i te sītona. ’Ua parau tōna metua tāne, e ti’a iāna ’ia pure nā mua nō te ha’api’i mai e ti’a mau ānei iāna ’ia fa’aru’e i teienei.

’Ua ha’apa’o David i te parau ’a tōna metua tāne, ’e ’a pure ai ’oia, ’ua putapū ’oia i te Vārua i te paraura’a iāna ’ia fa’aoti i tāna ’ohipa i te fare hou ’a haere ai i Harmony.

’Ia po’ipo’i a’e, ’ua haere atu David i roto i te fa’a’apu ’e ’ua ’ite atu ’oia i te fa’a’apu ’ua tanuhia, ē i te pō nā mua atu, ’aita ïa te repo i hurihia. ’A haere ai ’oia e hi’o haere i te ātea ri’i, ’ua ’ite mai ’oia ē, e ono tā tei hurihia te repo i roto i te pō, ’e tei reira te ’ārote e tīa’i ra iāna nō te rēni hope’a.

’Ua māere roa te metua tāne o David i te ’itera’a i te ’ohipa i tupu. ’Ua nā ’ō ’oia : « ’Ia hi’o vau, e rima mana rahi tō roto i te reira, e mea tano ’ia pou ’oe i Pennsylvania i te otira’a iho ā te porifenua i te ’āno’ihia ».

’Ua fa’aitoito David i te huri i te repo e toe ra ’e i te fa’aineine i te reira ’ia ’auhune maita’i te tanura’a mā’a. I te otira’a, ’ua tā’amu ’oia i tōna pere’o’o i ni’a i te tahi mau pua’ahoro fenua pāutuutu maita’i ’e reva a’era i Harmony nā mua a’e i te tai’o mahana i mana’ohia.¹⁶

---

I te taera’a mai ’o Iosepha, ’o Emma ’e ’o Oliver i Fayette, ’ua rahi roa te ’ohipa a te metua vahine ’o David. E va’u tamari’i tā Mary Whitmer ’e tōna hoa fa’aipoipo ’o Peter, mai te ’ahuru ma pae matahiti haere i te toru ’ahuru matahiti, tē vai ra tei fa’aea i tō rātou iho fare, tei pīha’i iho noa rā. E pau te mau mahana ’o Mary i te ’ohipa-noa-ra’a, ’ua rahi atu ā ïa te ’ohipa i teie nau manihini e toru. E fa’aro’o tō Mary i te pi’ira’a o Iosepha ’e ’aita ’oia i amuamu, tē rohirohi nei rā ’oia.¹⁷

E mea ve’ave’a roa i Fayette i terā ra tau ve’ave’a. Tē pu’a ra Mary i te ’ahu ’e tē fa’aineine ra i te mā’a, tē tai’o ’īriti ra Iosepha i roto i te hō’ē piha i ni’a mai. Nā Oliver te rahira’a taime e pāpa’i, i te tahi rā taime, nā Emma ’aita ana’e nā te hō’ē i roto ia Whitmer mā e fa’a’ohu nō te rave i te pēni tara.¹⁸ I te tahi mau taime, ’ia rohirohi Iosepha ’e Oliver nō te ’ohipa ’īritira’a, e hāhaere rāua nā rāpae nā te hō’ē pape hopuna ’e e tāoraora rāua i te tahi ’ōfa’i i ni’a i te pape.

E ma’a taime noa tō Mary nō te fa’afa’aea, ’e e mea teimaha te ’ohipa hau ’e te tītaura’a i ni’a iāna.

I te hō’ē mahana, tei te fare vaira’a mā’a ’oia nō te fa’atē i te ū o te mau pua’atoro, ’ite ihora ’oia i te hō’ē ta’ata rouru hinahina ’e te hō’ē pūtē i ni’a i tōna tapono. ’Ua ri’ari’a ’oia i tōna fāra’a mai mai te reira noa, ’ua tāpiri mai rā ’oia ma te paraparau ia Mary ma te reo marū, ’e ’ua hau atura ’oia.

’Ua nā ’ō atu oia : « ’O Moroni au ». « ’Ua rohirohi roa ’oe i teie ’ohipa hau tei hōro’ahia ia ’oe ». ’Ua tātara mai ’oia i tāna pūtē i ni’a i te tapono ’e ’ua tātātara a’era ’oia ’a hi’o noa ai Mary.¹⁹

’Ua nā ’ō fa’ahou ’oia : « ’Ua ha’apa’o maita’i ’oe ma te tu’utu’u ’ore i tā ’oe ’ohipa ». « Nō reira, e mea tano ’ia fāri’i ’oe i te hō’ē ’itera’a pāpū ’ia ha’apūaihia tō ’oe fa’aro’o ».²⁰

’Ua tātara a’era Moroni i tōna pūtē ’e ’ua rave mai nei i te mau ’api ’auro. ’Ua fa’a’ite ’oia i te reira i mua i te mata ’o Mary ’e ’ua huri a’era i te mau ’api ’ia hi’o ’oia i te mau pāpa’ira’a i ni’a i te reira. I te hurira’ahia te ’api hope’a, ’ua a’o ’oia iāna ’ia fa’a’oroma’i ā ’e ’ia vai ha’apa’o maita’i noa ’oia ’a amo noa ai i tāna hōpoi’a rahi nō te tahi fa’ahou ā taime. ’Ua parau mai ’oia ē e ha’amaita’ihia ’oia nō te reira.²¹

’Ua mo’e a’era teie ta’ata pa’ari i muri iho ’e ’o Mary noa atura teie. Tē vai noa ra tāna ’ohipa, ’aita roa atu rā te reira i ha’ape’ape’a fa’ahou iāna.²²

---

I te ’āua fa’a’apu a Whitmer mā, ’ua ’oi’oi te ’īritira’a a Iosepha, e mea fifi rā te tahi mau mahana. ’Ua hāhaere tōna ferurira’a i ni’a i te tahi atu mau ’ohipa, ’e ’aita fa’ahou te rōtahira’a i ni’a i te mau mea pae vārua.²³ E ta’ata-noa-hia i te fare na’ina’i o Whitmer mā ’e ’ua rahi te mau fa’a’āreareara’a. ’Ua riro te haerera’a i reira ’ei ha’apaera’a i tō rāua Emma orara’a mai tā rāua i ’ite i Harmony.

I te hō’ē po’ipo’i, tē fa’aineine ra Iosepha nō te ’ohipa ’īritira’a, ’ua ’iriā atura ’oia ia Emma. I muri iho, i tōna pa’umara’a atu ia Oliver ’e ia David ra i te piha i ni’a nō te ’ohipa ’īritira’a, ’aita hō’ē a’e parau i matara mai.

’Ua haere ’oia i rāpae i te piha ’e ’ua haere atu nā roto i te mau tumu mā’a hotu. ’Ua fa’aātea atu ’oia fātata hō’ē hora, ma te pure. I te ho’ira’a mai ’oia, ’ua tātarahapa ’oia i mua ia Emma ma te ani i te fa’aorera’a hapa. Ho’i a’era ’oia i ni’a i te ’ohipa ’īritira’a mai tei mātāmua ra.²⁴

Tē ’īriti ra ’oia i te tuha’a hope’a o te pāpa’a parau, tei parauhia te mau ’api na’ina’i a Nephi, ’o te fa’a’ohipahia ’āraua’e nō te ha’amatara’a o te buka. Tē fa’ati’a ra te reira i te hō’ē ’ā’amu tū’ati i te ’ā’amu tā rāua Martin i ’īriti ’e tei mo’e, tē parau nei te mau ’api na’ina’i nō ni’a i te hō’ē taure’are’a tamāroa ’o Nephi tōna i’oa, tei arata’ihia te ’utuāfare mai Ierusalema i te hō’ē fenua i parauhia ra. Tē fa’ata’a ra te reira nō hea mai te pāpa’a parau ’e nō ni’a i te mau fifi mātāmua i rotopū i te mau ’āti Nephi ’e te mau ’āti Lamana. Hau atu te faufa’a rahi, tē hōro’a nei te reira i te hō’ē ’itera’a pāpū pūai nō Iesu Mesia ’e tāna tāra’ehara.

I te ’īritira’a Iosepha i te mau pāpa’ira’a i ni’a i te ’api hope’a, ’ua ’ite mai ’oia ē, tē fa’ata’a ra te reira i te fā o te pāpa’a parau ’e te i’oa o te reira, te Buka a Moromona, nō ni’a i te i’oa o te peropheta pāpa’i ’ā’amu tahito ra tei putu i teie buka.²⁵

Mai te taime ’a ha’amata ai ’oia i te ’īriti i te Buka a Moromona, ’ua ha’api’i rahi mai Iosepha nō ni’a i tāna hōpoi’a ananahi i roto i te ’ohipa a te Atua. I roto i te reira mau ’api, ’ua ’ite fa’ahou mai ’oia i te mau ha’api’ira’a niu tāna i ha’api’i mai i roto i te Bibilia, nā reira ato’a te tahi mau parau mau ’āpī ’e te mau mea tāna i ’apo nō ni’a ia Iesu Mesia ’e tāna ’evanelia. ’Ua ’ite ato’a mai ’oia i te tahi mau tuha’a nō ni’a i te mau mahana hope’a nei, e tohu ra nō te hō’ē hi’o mā’itihia ’o Iosepha tōna i’oa, ’o te riro i te fa’atae mai i te parau a te Fatu ’e i te fa’aho’i fa’ahou mai i te ’ite ’e te mau fafaura’a i mo’e na.²⁶

I roto i te pāpa’a parau, ’ua ha’api’i mai ’oia ē, ’ua parau rahi ’o Nephi nō te hō’ē parau tohu ’a Isaia nō ni’a i te hō’ē buka tā’atihia e’ita tā te feiā ’ite e nehenehe e tai’o. I te tai’ora’a Iosepha i terā parau tohu, ’ua mana’o ’oia ia Martin Harris ’e te ’aivāna’a ra Anthon tāne. Tē ha’apāpū ra te reira ē, ’o te Atua ana’e te nehenehe e fa’atae mai i teie buka mai raro mai i te repo ’e e fa’ati’a i te ’ēkālesia ’a te Mesia i roto i te mau mahana hope’a nei.²⁷

---

I te otira’a ia Iosepha ’e tōna mau hoa te ’īritira’a, ’ua feruri rātou i te parau a te Fatu i roto i te Buka a Moromona ’e i roto i tāna mau heheura’a—e fa’a’ite i te mau ’api i nā ’ite e toru. I terā taime, ’ua haere mai nā metua ’o Iosepha ’e ’o Martin Harris e fārerei ia rātou i te ’āua fa’a’apu ’a Whitmer mā, ’e i te hō’ē mahana, ’ua tāparu Martin, Oliver, ’e David ia Iosepha ’ia riro rātou i terā nā ’ite. ’Ua pure atu Iosepha ’e ’ua pāhono mai te Fatu i te nā-’ō-ra’a ē, mai te peu e tūru’i rātou i ni’a i te Fatu ma tō rātou ’ā’au ato’a ’e mai te peu e pūpū rātou ia rātou i te fa’a’itera’a i te parau mau, e ’ite rātou i te mau ’api.²⁸

’Ua parau ta’a ’ē Iosepha ia Martin : « E mea ti’a roa ’ia fa’aha’eha’a ’oe ia ’oe i mua i te Atua i teie mahana, ’e mai te peu e ti’a ia ’oe, ’ia noa’a te fa’a’orera’a o tā ’oe mau hara ».²⁹

I muri ri’i mai i terā mahana, ’ua arata’i Iosepha i teie nā ta’ata e toru i roto i te uru rā’au piri i te fare o Whitmer mā. ’Ua tūturi rātou i raro ’e ’ua pure hō’ē hō’ē rātou, hō’ē i muri mai i te tahi, ’ia fa’a’itehia mai te mau ’api, ’aita rā e ’ohipa i tupu. ’Ua tāmata rātou i te tahi fa’ahou taime, ’aita hō’ē a’e mea. I te hope’a, ’ua ti’a a’era Martin ’e ’ua fa’aātea a’era iāna, ma te parau ē, ’o ’oia te tumu ’ua vai piri noa te mau ra’i.

’Ua ho’i fa’ahou Iosepha, Oliver ’e David nō te pure, ’āria ’ua fā mai te hō’ē melahi i roto i te māramarama teatea i ni’a ia rātou.³⁰ Tei roto i tōna rima te mau ’api ’e ’ua huri hō’ē hō’ē a’era i te mau ’api nō te fa’a’ite i teie nau ta’ata i te mau tāpa’o tei nana’ohia i ni’a iho. ’Ua fā maira te hō’ē ’aira’amā’a i pīha’i iho iāna, ’e i ni’a i te reira tē vai ra te mau tao’a tahito tei fa’a’itehia i roto i te Buka a Moromona : te mau ’īriti parau, te pāruru ’ōuma, hō’ē ’o’e ’e te ’avei’a ra i arata’i i te ’utuāfare o Nephi mai Ierusalema i te fenua i parauhia ra.

’Ua fa’aro’o nā ta’ata i te reo o te Atua i te nā-’ō-ra’a : « ’Ua heheuhia teie mau ’api e te mana o te Atua, ’e ’ua ’īritihia te reira e te mana o te Atua. Te ’īritira’a o te reira, tā ’outou i ’ite, ’ua ti’a ïa, ’e tē fa’aue nei au ia ’outou ’ia hōro’a i tō ’outou ’itera’a pāpū nō te mea tā ’outou e ’ite mata nei ’e tā ’outou e fa’aro’o nei ».³¹

I te revara’a te melahi, ’ua haere Iosepha i roto i te uru rā’au ’e ’ua ’ite a’era ’oia ia Martin i te tūturira’a. ’Ua parau mai Martin ē, ’aita ā ’oia i fāri’i i te ’ite nō ’ō mai i te Fatu, tē hina’aro noa nei rā ’oia ’ia ’ite mata i te mau ’api. ’Ua ani ’oia ia Iosepha ’ia pure nā muri iāna. ’Ua tūturi Iosepha i pīha’i iho iāna ’e hou rāua ’a ’ū’uru ai i te hō’ē parau, ’ua ’ite rāua i terā melahi i te fa’a’itera’a i te mau ’api ’e te tahi ato’a mau tao’a tahito ra.

« ’Ua nava’i te reira ! ’Ua nava’i te reira ! » ’Ua tuō ’o Martin. « ’Ua ’ite tō’u nā mata ! ’Ua ’ite tō’u nā mata ! »³²

---

I terā avatea, ’ua ho’i Iosepha ’e nā ’ite e Toru i te fare o Whitmer mā. Tē paraparau ra Mary Whitmer i nā metua o Iosepha, horo mai nei Iosepha i roto i te piha. « Pāpā ! Māmā ! », ’ua pi’i ’oia. « ’Ua ’oa’oa roa vau ! »

’Ua horo a’era ’oia nō te pārahi i pīha’i iho i tōna metua vahine. ’Ua nā ’ō a’era ’oia : « ’Ua fa’aue te Fatu ’ia fa’a’itehia te mau ’api i e toru fa’ahou ta’ata ». « ’Ua ’ite rātou iho ē, ’aita vau i ha’avare haere i te ta’ata »

Mai te huru ē, ’ua tātarahia te tahi zugo i ni’a i tōna tapono. « E ti’a atura ia rātou ’ia amo i te hō’ē tuha’a », ’ua nā ’ō ’oia. « E ’ere fa’ahou ’o vau ana’e i mua i te ao tā’āto’a nei ».

Horo mai nei Martin i roto i te piha, ’ua ’ī roa tōna ’oa’oa. « ’Ua ’ite mata vau i te hō’ē melahi nō te ra’i mai », tāna i tuō. « Tē ha’amaita’i nei au i te Atua ma tō’u ’ā’au ato’a ē, ’ua fāri’i mai ’oia ’ia riro vau—’o vau iho nei—’ei ’ite nō te rahi o tāna ’ohipa ! »³³

Ma’a mahana i muri mai, ’ua haere mai ’o Whitmer mā i te fare o Semita (Smith) mā i Manchester. Nō tō rātou ’itera’a ē, ’ua parau te Fatu e fa’ati’a ’oia i tāna parau « nā roto i te vaha o nā ’ite i te rahi e au i tōna ra mana’o », ’ua haere Iosepha i roto i te uru rā’au, nā reira ato’a tōna metua tāne, ’o Hyrum ’e ’o Samuel ’e e maha taea’e o David Whitmer—’o Christian, Jacob, Peter tamati ’e John—’e tā rātou ato’a tao’ete tāne, ’o Hiram Page.³⁴

’Ua putuputu te mau ta’ata i te hō’ē vāhi e haere-pinepine-hia e te ’utuāfare Semita (Smith) nō te pure ’ōmo’e. Nā roto i te parau fa’at’ia a te Fatu, ’ua fa’a’ite Iosepha i te mau ’api ’e ’ua hōhora atura i mua i teie pupu. ’Aita rātou i ’ite i te hō’ē melahi mai nā ’ite e Toru, ’ua vaiiho rā Iosepha ia rātou ’ia tāpe’a i te pāpa’a parau i roto i tō rātou rima, ’ia huri i te mau ’api ’e ’ia hi’opo’a i tō te reira pāpa’ira’a tahito. Māoti tō rātou tāpe’ara’a i te mau ’api i pāpū ai tō rātou fa’aro’o i te ’itera’a pāpū o Iosepha nō ni’a i te melahi ’e te mau pāpa’a parau tahito ra.³⁵

I teienei ’ua oti te ’īritira’a ’e tē vai ra te mau ’ite nō te turu i tōna ’itera’a pāpū nō ni’a i teie temeio, ’aita e faufa’a fa’ahou ’ia tāpe’a Iosepha i te mau ’api. I te haerera’a teie nau ta’ata i rāpae i te uru rā’au ’a ho’i atu ai i te fare, ’ua fā mai te melahi ’e ’ua hōro’a atu Iosepha i te pāpa’a parau mo’a i roto i tōna rima.³⁶

Fa’ata’ara’a

1. Oliver Cowdery to William W. Phelps, 7 nō setepa 1834, LDS Messenger and Advocate, ’Ātopa 1834, 1:14 ; Staker, « Where Was the Aaronic Priesthood Restored? », 158, note 49.

2. 3 Nephi 8 ; Oliver Cowdery to William W. Phelps, 7 nō setepa 1834, LDS Messenger and Advocate, ’Ātopa 1834, 1:15–16 ; hi’o ato’a Kowallis, « In the Thirty and Fourth Year », 136–90.

3. 3 Nephi 9:13.

4. 3 Nephi 10:9 ; 11:1.

5. 3 Nephi 11:10 ; 15:21–24 ; hi’o ato’a Ioane 10:16.

6. 3 Nephi 11:33.

7. 3 Nephi 11:23–33.

8. Oliver Cowdery to William W. Phelps, 7 nō setepa 1834, LDS Messenger and Advocate, ’Ātopa 1834, 1:13–16.

9. Te Parau Ha’api’ira’a ’e te mau Parau Fafau 13:1 (Joseph Smith History, 1838–56, volume A-1, 17–18, i roto JSP, H1:292–94 [draft 2]) ; Oliver Cowdery to William W. Phelps, Sept. 7, 1834, LDS Messenger and Advocate, ’Ātopa 1834, 1:15 ; Staker, « Where Was the Aaronic Priesthood Restored? », 142–59. Tumu parau : Te fa’aho’i-fa’ahou-ra’a o te autahu’ara’a a Aarona

10. Oliver Cowdery to William W. Phelps, Sept. 7, 1834, LDS Messenger and Advocate, ’Ātopa 1834, 1:15.

11. Joseph Smith History, 1838–56, volume A-1, 17–18, i roto JSP, H1:292–94 (draft 2) ; « Articles of the Church of Christ », June 1829, i roto JSP, D1:371.

12. Joseph Smith History, 1838–56, volume A-1, 18, i roto JSP, H1:294–96 (draft 2).

13. « Mormonism », Kansas City Daily Journal, 5 nō tiunu 1881, 1 ; James H. Hart, « About the Book of Mormon », Deseret Evening News, 25 nō māti 1884, [2] ; Joseph F. Smith to John Taylor and Council of the Twelve, 17 nō setepa 1878, draft, Joseph F. Smith, Papers, Vaira’a buka ’ā’amu o te ’Ēkālesia ; Joseph Smith History, 1838–56, volume A-1, 21, i roto JSP, H1:306 (draft 2).

14. Joseph Smith History, 1838–56, volume A-1, 18, i roto JSP,H1:296 (draft 2).

15. « Mormonism », Kansas City Daily Journal, 5 nō tiunu 1881, 1 ; Dickinson, New Light on Mormonism, 250 ; « The Book of Mormon », Chicago Tribune, 17 nō tītema 1885, 3 ; Joseph Smith History, 1838–56, volume A-1, 21, i roto JSP, H1:306 (draft 2).

16. Lucy Mack Smith, History, 1844–45, book 8, [8] ; Orson Pratt and Joseph F. Smith, Interview with David Whitmer, Sept. 7–8, 1878, [10], i roto Joseph F. Smith to John Taylor and Council of the Twelve, Sept. 17, 1878, draft, Joseph F. Smith, Papers, Vaira’a buka ’ā’amu o te ’Ēkālesia ; Cook, David Whitmer Interviews, 26–27.

17. Orson Pratt and Joseph F. Smith, Interview with David Whitmer, Sept. 7–8, 1878, [10], i roto Joseph F. Smith to John Taylor and Council of the Twelve, Sept. 17, 1878, draft, Joseph F. Smith, Papers, Vaira’a buka ’ā’amu o te ’Ēkālesia.

18. James H. Hart, « About the Book of Mormon », Deseret Evening News, 25 nō māti 1884, [2].

19. Skousen, « Another Account of Mary Whitmer’s Viewing of the Golden Plates », 40 ; [Andrew Jenson], « Eight Witnesses », Historical Record, ’Ātopa 1888, 621.

20. Orson Pratt and Joseph F. Smith, Interview with David Whitmer, Sept. 7–8, 1878, [10], i roto Joseph F. Smith to John Taylor and Council of the Twelve, Sept. 17, 1878, draft, Joseph F. Smith, Papers, Vaira’a buka ’ā’amu o te ’Ēkālesia.

21. Skousen, « Another Account of Mary Whitmer’s Viewing of the Golden Plates », 40 ; [Andrew Jenson], « Eight Witnesses », Historical Record, ’Ātopa 1888, 621.

22. [Andrew Jenson], « Eight Witnesses », Historical Record, ’Ātopa 1888, 621 ; Orson Pratt and Joseph F. Smith, Interview with David Whitmer, Sept. 7–8, 1878, [10], i roto Joseph F. Smith to John Taylor and Council of the Twelve, Sept. 17, 1878, draft, Joseph F. Smith, Papers, Vaira’a buka ’ā’amu o te ’Ēkālesia ; Stevenson, Journal, 23 nō tītema 1877.

23. Whitmer, Address to All Believers in Christ, 30.

24. « Letter from Elder W. H. Kelley », Saints’ Herald, 1 nō māti 1882, 68 ; hi’o ato’a Bushman, Rough Stone Rolling, 77.

25. Joseph Smith History, 1838–56, volume A-1, 34, i roto JSP, H1:352–54 (draft 2). Mau tumu parau : ’Īritira’a o te Buka a Moromona ; Te mau ’api ’auro

26. 2 Nephi 3:7–19.

27. Joseph Smith History, circa Summer 1832, [5], i roto JSP, H1:15 ; 2 Nephi 26:16 ; 27:15–21.

28. Te Parau Ha’api’ira’a ’e te mau Parau Fafau 17 (Revelation, June 1829–E, at josephsmithpapers.org) ; Te Parau Ha’api’ira’a ’e te mau Parau Fafau 5:11–18 (Revelation, Māti 1829, i ni’a ia josephsmithpapers.org) ; Joseph Smith History, 1838–56, volume A-1, 23, i roto JSP, H1:314–17 (draft 2).

29. Lucy Mack Smith, History, 1844–45, book 8, [11].

30. Joseph Smith History, 1838–56, volume A-1, 24–25, i roto JSP, H1:316–18 (draft 2).

31. « Letter from Elder W. H. Kelley », Saints’ Herald, 1 nō māti 1882, 68 ; Joseph Smith History, 1838–56, volume A-1, 24–25, i roto JSP, H1:316–20 (draft 2) ; « Testimony of Three Witnesses », i roto Book of Mormon, 1830 edition, [589]. Tumu parau : Te mau ’ite o te Buka a Moromona

32. Joseph Smith History, 1838–56, volume A-1, 25, i roto JSP, H1:320 (draft 2).

33. Lucy Mack Smith, History, 1844–45, book 8, [11] ; book 9, [1].

34. Lucy Mack Smith, History, 1844–45, book 9, [1] ; 2 Nephi 27:14.

35. « Testimony of Eight Witnesses », i roto Book of Mormon, 1830 edition, [590]. Tumu parau : Te mau ’ite o te Buka a Moromona

36. Lucy Mack Smith, History, 1844–45, book 9, [2].