25 Mopadayon ngadto sa Kasadpan

“Mopadayon ngadto sa Kasadpan,” kapitulo 25 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)

Kapitulo 25: “Mopadayon ngadto sa Kasadpan”

Kapitulo 25

Mopadayon ngadto sa Kasadpan

Sa dihang si Jennetta Richards mibiyahe kadali ngadto sa Preston, England, pagka-Agosto 1837, ang iyang mga higala nga si Ann ug Thomas Walmesley adunay daghang nasulti mahitungod sa usa ka grupo sa mga misyonaryo nga gikan sa Amerika.

Nagmasakiton si Ann sa milabayng katuigan, nag-anam og kagrabe hangtud nga mora na lang siyag panit ug bukog. Dihang misangyaw si Heber Kimball niya, gisaaran siya nga mamaayo kon magbaton siya og pagtuo, maghinulsol, ug magpabunyag. Gibunyagan si Ann ngadto sa bag-ong simbahan sa wala madugay human niana, uban sa walo pa ka mga tawo, ug ang iyang panglawas miarang-arang sa hinay-hinay.

Daghan sa mga tawo nga gibunyagan nga sakop sa kongregasyon ni James Fielding. Bisan tuod gitugutan ni Reverend Fielding ang mga misyonaryo sa pagsangyaw diha sa iyang simbahan, nagdumili siya sa pagpabunyag ug medyo naglagut sa pagkawala sa iyang mga parukyano.¹

Naintriga si Jennetta sa mensahe sa Amerikano nga mga misyonaryo. Nagpuyo siya sa gamay nga barangay sa probinsya nga gitawag og Walkerfold, baynte kwatro ka kilometro gikan sa mga panghaw ug naghuot nga kadalanan sa Preston. Ang iyang kaugalingong amahan usa ka Kristiyano nga ministro sa barangay, mao nga nagdako siya nga gitudloan sa pulong sa Dios sa iyang panimalay.

Karon, pipila lang ka semana gikan sa iyang ika-baynte nga adlawng natawhan, kuryuso siya nga dugang nga makat-on sa kamatuoran sa Dios. Sa dihang mibisita siya sa mga Walmesley, nahimamat niya si Heber ug nainteresado sa iyang gisulti mahitungod sa mga anghel, sa karaan nga rekord nga gisulat diha sa bulawang mga palid, ug sa usa ka buhing propeta kinsa nakadawat og mga pagpadayag gikan sa Dios, sama sa mga karaang propeta.

Gidapit ni Heber si Jennetta nga maminaw kaniya nga magsangyaw nianang gabhiona. Miadto si Jennetta ug naminaw ug gusto nga makadungog pa og dugang. Pagkasunod adlaw, naminaw na pud siya kang Heber ug nasayud nga ang iyang mga pulong tinuod.

Pagkasunod buntag, gihangyo ni Jennetta si Heber sa pagbunyag niya. Si Heber ug Orson Hyde misunod kaniya ngadto sa daplin sa Suba sa Ribble, ug giunlod siya ni Heber diha sa tubig. Gikumpirmahan dayon nila siya diha sa daplin sa suba.

Gusto ni Jennetta nga magpabilin sa Preston uban sa ubang mga Santos human sa iyang bunyag, apan kinahanglan niyang mobalik ngadto sa iyang mga ginikanan sa Walkerfold. Naghinam-hinam siya nga mopaambit sa iyang bag-ong relihiyon ngadto kanila, apan dili siya sigurado kon unsay reaksyon sa iyang amahan sa iyang desisyon nga moipon sa mga Santos.

“Ang Ginoo mopahumok sa kasingkasing sa imong amahan,” miingon si Heber kaniya. “Basin makahimo pa ko sa pagsangyaw diha sa iyang chapel.”

Nanghinaut nga sakto siya, mihangyo si Jennetta kang Heber sa pag-ampo alang kaniya.²

Mibiyahe si Joseph nianang samang ting-init ngadto sa Canada aron bisitahon ang mga Santos sa Toronto. Samtang wala siya, namulong si Joseph Sr. sa usa ka miting sa Dominggo didto sa templo sa Kirtland mahitungod sa naglisud nga Safety Society. Gipanalipdan niya ang pagkatawo sa iyang anak ug gipanghimaraut ang binuhatan sa mga masinupakon, kinsa naglingkod sa pikas tumoy sa kwarto.

Samtang namulong ang patriyarka ngadto sa mga Santos, mibarug si Warren Parrish ug namugos nga mamulong. Gisultihan siya ni Joseph Sr. sa dili pagbalda, apan daling milabang si Warren sa kwarto ug mipugos sa iyang kaugalingon diha sa entablado. Gigunitan niya si Joseph Sr. ug misulay sa pagbitad niya gikan sa pulpito. Misinggit ang patriyarka kang Oliver Cowdery, kinsa nagserbisyo isip ang lokal nga huwes sa kalinaw, apan walay gibuhat si Oliver sa pagtabang sa iyang higala.

Nakita nga nameligro ang iyang amahan, kalit nga mibarug si William Smith, gilayug si Warren, ug gibira gikan sa entablado. Milukso si John Boynton, nga miibut og espada. Gipunting niya ang tumoy niini sa dughan ni William ug mihulga sa pagduslak sa iyang kauban nga apostol kon mohimo siya og laing lakang. Ang ubang masinupakon mikuha og mga kutsilyo ug mga pistola gikan sa ilang mga bulsa ug mipalibut kang William.

Nagkaguliyang sa templo. Ang mga tawo nanagan ngadto sa mga pultahan o mieskapo sa dug-ol nga mga bintana. Ang mga tinugyanan sa balaod kalit nga nanulod sa kwarto, miduot sugat sa nanagan nga mga tawo, ug nakigbugno sa armadong mga tawo.³

Sa dihang mibalik si Joseph sa Kirtland paglabay sa pipila ka semana ug nahibalo sa nahitabo, miorganisar siya og dinalian nga komperensya sa mga Santos ug mipatawag og pagpaluyo nga boto sa matag lider sa simbahan.⁴ Ang mga Santos mipaluyo kaniya ug sa Unang Kapangulohan apan misalikway ni John Boynton, Luke Johnson, ug Lyman Johnson isip mga sakop sa Korum sa Napulog Duha.⁵

Nakahupay ang boto sa pagsalig, apan nasayud si Joseph nga ang mga problema sa Kirtland dugay pang masulbad. Isip bugtong nga stake sa simbahan, ang Kirtland unta ang mohatag og dapit nga pundokanan alang sa mga Santos. Apan nanlimbasug ang lungsod sa ekonomiya ug sa espiritwal—ug gisulsulan sa mga masinupakon ang talandugon nga mga miyembro sa simbahan batok kaniya. Alang sa daghang mga tawo, mihunong na ang Kirtland sa pagkahimong dapit sa kalinaw ug espiritwal nga kalig-on.

Bag-ohay lang, pinaagi sa usa ka panan-awon, miawhag ang Ginoo kang Joseph sa paghimo og bag-ong mga stake sa Zion ug sa pagpadako sa mga utlanan sa simbahan. Nagtuo si Joseph ug Sidney nga karon na ang panahon aron moadto sa Missouri, mosusi sa bag-ong pamuy-anan sa Far West, ug mo-establisar og ubang mga stake isip pundukanan nga mga dapit alang sa mga Santos.⁶

Kinahanglang mobisita si Joseph sa Missouri tungod usab sa ubang mga rason. Nabalaka siya nga ang apostasiya sa Kirtland nakaapekto sa mga lider sa simbahan sa Zion. Sa dihang gi-establisar nila ang Far West, si John Whitmer ug William Phelps wala magpakitambag sa bishopric o sa high council, sumala sa gisulti sa pinadayag. Mipalit usab sila og yuta sa kaugalingon nilang mga ngalan gamit ang gidonar nga kwarta ug gibaligya kini aron personal nga makaginansya.

Bisan og ang duha ka lalaki miangkon sa ilang sayop, nagsuspetsa si Joseph ug ang ubang mga lider sa simbahan nga dili gihapon sila matinuuron sa ilang pagdumala sa yuta sa Missouri.⁷

Nabalaka usab si Joseph sa impluwensya sa mga sakop sa iyang kaugalingong Unang Kapangulohan kinsa nangandam nga mobalhin ngadto sa Far West. Nagkasumpaki sila ni Frederick Williams kalabut sa pagdumala sa Kirtland Safety Society, ug nakadaut kini sa ilang panaghigalaay.⁸ Si Oliver, sa kasamtangan, dili na komportable ni Joseph nga adunay mas aktibong papel sa lokal nga ekonomiya ug politika. Siya ug si David Whitmer, ang presidente sa simbahan sa Missouri, mibati nga migamit si Joseph og sobra ra nga impluwensya sa temporal nga mga butang diha sa iyang tahas isip propeta.⁹

Samtang kining mga tawhana wala makigkunsabo ni Warren Parrish o sa ubang mga masinupakon, ang ilang pagkamaunungon ngadto kang Joseph naminosan sa milabay nga walo ka bulan, ug nabalaka siya nga makahimo sila og mga problema didto sa Zion.

Sa wala pa mobiya sa Kirtland, mihangyo si Joseph sa iyang igsoong si Hyrum ug ni Thomas Marsh nga mouna kaniya og adto sa Far West aron pasidan-an ang matinud-anong mga Santos sa nagkadako nga kasungian tali niya ug niining mga tawhana.¹⁰ Gidawat ni Hyrum ang misyon, bisan og nagpasabut kini nga iyang biyaan ang iyang asawa, si Jerusha, nga pipila na lang ka semana manganak na sa ilang ikaunom nga anak.¹¹

Ang disgusto ni Oliver sa propeta dili lang tungod sa mga panagsumpaki kon unsaon sa pagdumala ang simbahan. Sukad nga nakat-on mahitungod sa dinaghan nga kaminyoon panahon sa iyang dinasig nga paghubad sa Biblia, nahibalo si Joseph nga ang Dios mosugo usahay sa Iyang katawhan sa pagsunod niini nga baruganan. Wala dayon sunda ni Joseph kini nga kahibalo, apan paglabay sa pipila ka tuig usa ka anghel sa Ginoo misugo niya sa pagminyo og dugang nga asawa.¹²

Human madawat ang sugo, nanlimbasug si Joseph nga mabuntog ang iyang natural nga pagkadili uyon sa ideya. Nakita na niyang daan ang mga pagsulay nga moabut tungod sa dinaghan nga kaminyoon, ug dili siya gustong moapil niini. Apan giawhag siya sa anghel sa pagpadayon, misugo kaniya sa pagpaambit lamang sa pinadayag ngadto sa mga tawo kansang integridad makanunayon. Gisugo usab sa anghel si Joseph nga ihilum usa kini hangtud nga makita sa Ginoo nga angay na nga ipahibalo ang binuhatan sa publiko pinaagi sa Iyang mga sulugoon.¹³

Sa mga katuigan nga nagpuyo si Joseph sa Kirtland, usa ka batan-ong babaye nga ginganlan og Fanny Alger nakatrabaho sa panimalay sa mga Smith. Nakaila pag-ayo si Joseph sa iyang pamilya ug misalig kanila. Matinud-anon nga mga Santos ang iyang mga ginikanan kinsa mipasakop sa simbahan sa unang tuig niini. Ang iyang uyoan, si Levi Hancock, nakamartsa sa Kampo sa Israel.¹⁴

Nagsunod sa sugo sa Ginoo, mitanyag og kasal si Joseph kang Fanny uban sa tabang ni Levi ug sa pagtugot sa iyang mga ginikanan.¹⁵ Gidawat ni Fanny ang mga pagtulun-an ni Joseph ug ang iyang tanyag, ug ang iyang uyoan ang mipahigayon sa seremonya.¹⁶

Tungod kay wala pa moabut ang panahon nga itudlo ang dinaghan nga kaminyoon diha sa simbahan, gihilum ni Joseph ug Fanny ang ilang kaminyoon, sama sa gisugo sa anghel.¹⁷ Apan mikatap ang mga hungihong diha sa pipila ka tawo sa Kirtland.¹⁸ Pagka-tinglarag sa 1836, mipalayo na si Fanny.¹⁹

Nanghinaway og maayo si Oliver sa relasyon ni Joseph kang Fanny, apan dili klaro kon unsa ka dako ang iyang nahibaloan bahin niini.²⁰ Kon unsa ang nahibaloan ni Emma mahitungod sa kaminyoon dili usab klaro. Paglabay sa panahon, naminyo si Fanny sa laing lalaki ug mipuyo nga bulag sa dakong grupo sa mga Santos. Sa kadugayan, nakadawat siya og sulat gikan sa iyang igsoong lalaki nga nangutana mahitungod sa iyang dinaghan nga kaminyoon ngadto ni Joseph.

“Amoa ra na,” misulat og balik si Fanny, “ug wala koy ikasulti.”²¹

Sa tinglarag sa 1837, samtang mibiya si Sidney ug Joseph padulong sa Far West, si Wilford Woodruff nagpuyo isip usa ka misyonaryo taliwala sa mga mangingisda ug mga tigdakop og balyena diha sa Fox Islands sa amihanang bahin sa Atlantic Ocean.²² Siya ug ang iyang kompanyon, si Jonathan Hale, miabut sa usa sa mga pig-ut nga isla sa hinapos nga mga semana sa Agosto. Walay usa nila nga nahibalo mahitungod sa dapit, nga nalukop sa labung nga mga kahoyng evergreen, apan gusto nilang motabang sa pagtuman sa panagna ni Isaias nga ang katawhan sa Ginoo magpundok gikan sa mga isla sa kadagatan.²³

Sa wala pa mobiya sa Kirtland kining duha ka lalaki, ang pipila sa mga masinupakon misulay sa pagwala sa kadasig ni Jonathan sa pag-adto sa Fox Islands, nanagna nga wala siyay mabunyagan didto. Dili siya gusto nga mamatud-an silang sakto.²⁴

Si Wilford ug Jonathan nagtambayayong na sa pagtrabaho sulod sa pipila ka bulan. Human mibiya sa Kirtland, misulay sila sa pagpaambit sa ebanghelyo ngadto sa pamilya ni Wilford sa estado sa Connecticut, apan ang iyang uyoan, iyaan, ug ig-agaw lamang ang nabunyagan.²⁵ Miapil si Phebe Woodruff kanila sa wala madugay, ug mibiyahe sila padulong sa daplin sa dagat ngadto sa balay sa ginikanan ni Phebe sa Maine, diin didto na siya karon nagpuyo samtang mipadayon sila sa ilang misyon.²⁶

Usa sa unang mga kontak ni Wilford ug Jonathan diha sa mga isla mao ang usa ka ministro nga ginganlan og Gideon Newton. Si Wilford ug Jonathan nakig-ambit og pagkaon sa iyang pamilya ug mihatag kaniya og Basahon ni Mormon. Pagkahuman, ang mga misyonaryo miadto sa iyang simbahan ug si Wilford misangyaw gikan sa Bag-ong Tugon.²⁷

Sa misunod nga pipila ka adlaw, si Wilford ug Jonathan nagsangyaw matag adlaw, kasagaran sa mga eskwelahan. Ilang nahibaloan nga ang mga tawo diha sa mga isla maalam, kugihan, ug mabination. Mitambong si Gideon ug ang iyang pamilya sa kadaghanan sa ilang mga miting. Gitun-an sa ministro ang Basahon ni Mormon ug nabati ang Espiritu nga mipamatuod sa kamatuoran niini. Apan wala siya masayud kon makadawat ba siya niini—ilabi na kon nagpasabut kini nga iyang biyaan ang iyang kongregasyon.²⁸

Usa ka buntag, human nga sobra na sila og usa ka semana diha sa mga isla, si Wilford nagwali ngadto sa dako nga kongregasyon sa simbahan ni Gideon. Ang mainitong pagdawat sa wali nakapabalaka sa ministro, kinsa misukmat sa mga misyonaryo wala madugay nianang adlawa. Gisultihan niya sila nga daghan na siya og nabasa sa Basahon ni Mormon ug dili makadawat niini. Nagplano siya nga gamiton ang iyang impluwensya diha sa mga isla aron mahunong ang ilang pagsangyaw.

Miadto si Gideon sa simbahan aron sa pagsangyaw sa iyang kaugalingong wali, nga nakapahimo ni Wilford ug Jonathan nga magduha-duha kabahin sa ilang kalampusan sa isla. Apan sa dihang miabut si Gideon sa iyang simbahan, iyang nakita nga kini walay sulod. Walay miadto aron maminaw niya nga magsangyaw.²⁹

Nianang gabhiona, si Wilford ug Jonathan mipuyo sa balay sa usa ka kapitan sa dagat nga ginganlan og Justus Eames ug sa iyang asawa, si Betsy. Ang mga Eames nainteresado sa mensahe sa mga misyonaryo, ug human sa usa ka miting sa Dominggo, gidapit sila ni Wilford nga magpabunyag. Sa iyang kalipay, midawat sila.³⁰

Milingi ngadto ni Jonathan, gihinumduman ni Wilford nga ang mga masinupakon sa Kirtland nanagna sa ilang kapakyasan sa mga isla. “Lakaw ug bunyagi siya,” miingon si Wilford, nga nagtudlo kang Justus, “ug pamatud-i nga mini nga mga propeta kadtong mga tawhana.”³¹

Mipadayon sa iyang buhat sa Far West, gihulat ni Hyrum ang pag-abut sa iyang igsoon, nanghinaut sa matag adlaw nga magdala og balita si Joseph gikan ni Jerusha. Nakita ni Hyrum ug Thomas nga naglambo ang Far West. Giplano sa mga Santos ang lagpad nga kadalanan ug dagko nga mga bloke sa siyudad alang sa mga balay ug mga tanaman. Ang mga bata nagkinataw-anay ug nagdula diha sa kadalanan, naglikay-likay sa mga kabayo, karwahe, ug karomata nga molabay kanila. Ang lungsod adunay mga balay ug kabina, usa ka hotel, ug pipila ka mga buhatan ug tindahan, lakip ang usa ka balay tipiganan sa bishop. Diha sa sentro sa lungsod mao ang luna alang sa usa ka templo.³²

Miabut si Joseph ug Sidney sa Far West sa sayong bahin sa Nobyembre, apan wala silay balita alang ni Hyrum. Sa dihang mibiya sila sa Kirtland pipila ka semana ang milabay, wala pa manganak si Jerusha.³³

Dali nga miorganisar si Joseph og komperensya sa Far West aron hisgutan ang mga paagi sa pagpalapad sa pamuy-anan alang sa umaabut nga kalamboan. Nakita niya ug ni Sidney nga ang dapit aduna pay luna alang sa pagpundok ug paglambo sa mga Santos nga dili makapahuot sa mga silingan ug makarisgo og dugang nga kasamok. Sa komperensya, gipahibalo ni Joseph ang ilang mga plano alang sa pagpalapad ug gilangan ang dugang nga buluhaton sa bag-ong templo hangtud nga ipadayag sa Ginoo ang Iyang kabubut-on mahitungod sa building.

Ang propeta mipatawag usab sa mga Santos sa Far West og boto sa pagpaluyo sa mga lider sa simbahan. Niining panahuna, gitangtang si Frederick Williams gikan sa iyang katungdanan sa Unang Kapangulohan, ug ginominar ni Sidney Rigdon si Hyrum aron mopuli sa nabakanting pwesto. Giaprubahan sa mga Santos ang nominasyon.³⁴

Paglabay sa pipila ka adlaw, nadawat ni Hyrum ang dugay nang gipaabut nga balita sa usa ka sulat gikan sa Kirtland. Apan gisulat kini sa iyang igsoong si Samuel, dili ni Jerusha. “Minahal nga Brother Hyrum,” kini nagsugod, “misulat ko nimo karong gabhiona aron sa pagbuhat sa usa ka katungdanan, nasayud nga ang tanang resonabling tawo gustong mahibalo sa kahimtang sa iyang pamilya.”

Giganid sa mga mata ni Hyrum ang tibuok pahina. Nanganak si Jerusha og himsog nga batang babaye, apan ang pagpanganak nakapaluya niya. Naningkamot ang pamilyang Smith nga maulian ang iyang panglawas, apan namatay siya human sa pipila ka adlaw.³⁵

Diha-diha dayon nangandam si Hyrum ug Joseph nga mobalik sa Kirtland. Sa wala pa mobiya, pribadong nakigkita si Joseph kang Thomas ug Oliver.³⁶ Giistoryahan nila ang pagsupak ni Oliver sa kaminyoon ni Joseph ngadto ni Fanny Alger, apan ang ilang kasungian wala masulbad.³⁷ Sa katapusan, gitunol ni Joseph ang iyang kamot ngadto ni Oliver ug miingon nga gusto niyang mahunong ang bisan unsang panagsumpaki nga anaa tali kanila. Gilamano ni Oliver ang iyang kamot, ug nagbulag-bulag sila.³⁸

Si Joseph, Sidney, ug Hyrum miabut sa Kirtland paglabay sa pipila ka semana. Sa mga panimalay sa mga paryente, nakit-an ni Hyrum ang iyang lima ka mga anak nga nagbangutan gihapon sa kalit nga pagkawala sa ilang inahan, kinsa gilubong diha sa sementeryo tapad sa templo. Tungod sa iyang bag-ong mga responsibilidad sa Unang Kapangulohan, walay ideya si Hyrum kon unsaon niya pag-atiman kanila nga siya ra.³⁹

Giawhag ni Joseph ang iyang igsoon sa pagminyo og usab ug girekomendar si Mary Fielding.⁴⁰ Buotan siya, maayo og edukasyon, ug mapahinunguron sa simbahan. Mahimo siyang maayo nga kauban alang ni Hyrum ug mapinanggaong inahan sa iyang mga anak.

Mitanyag og kaminyoon si Hyrum kang Mary wala madugay human niana. Sa edad nga treyntay sayis, nakadawat siya og daghang mga tanyag sa kaminyoon sa iyang kinabuhi, apan kanunay niya kining gibalibaran. Kausa, mipasidaan ang iyang inahan nga dili gayud makigminyo sa usa ka biyudo nga adunay mga anak. Kon mouyon siya nga makigminyo kang Hyrum, diha-diha dayon mahimo siyang inahan sa unom ka anak.

Gikonsiderar ni Mary ang tanyag sa kaminyoon ug gidawat. Nakadayeg na siya sa pamilyang Smith, gikonsiderar si Joseph isip usa ka igsoon, ug gitahud si Hyrum sa iyang kamapainubsanon.⁴¹ Gikasal sila usa ka adlaw sa wala pa ang Pasko.⁴²

Daghang mga Santos ang nahupay nga nabalik na si Joseph sa Kirtland, apan ang bisan unsang paglaum nga iyang mapahiuli ang panag-uyon diha sa simbahan nahanaw ra dayon. Si Warren Parrish, Luke Johnson, ug John Boynton nakig-abut matag semana kang Grandison Newell ug sa ubang mga kaaway sa simbahan aron sa pagsaway sa Unang Kapangulohan. Ang kanhi mga lig-ong miyembro sama ni Martin Harris miapil kanila wala madugay, ug sa katapusan sa tuig, ang nangulo nga mga masinupakon miorganisar og kaugalingon nilang simbahan.⁴³

Wala madugay human niini, misulat si Vilate Kimball sa iyang bana sa England mahitungod sa kahimtang sa simbahan sa Ohio. Nasayud sa gugma ni Heber alang kang Luke Johnson ug John Boynton, kinsa iyang mga kauban nga sakop sa korum, nagduha-duha si Vilate sa pagsulti kaniya sa ngil-ad nga balita.⁴⁴

“Wala koy pagduha-duha nga masakitan ka niini,” misulat siya kang Heber. “Nangangkon sila nga nagtuo sa Basahon ni Mormon ug sa Doktrina ug mga Pakigsaad apan ang ilang binuhatan naglimud niini.”⁴⁵

Sa katapusang bahin sa sulat, midugang si Marinda Hyde og mubong sulat ngadto sa iyang bana nga si Orson. Si Luke Johnson magulang ni Marinda, ug ang apostasiya nakapaguol kaayo kaniya. “Wala ka gayud makakita og mga panahon sa Kirtland nga sama sa among nakita karon,” misulat siya, “kay daw ang tanang pagsalig sa usag usa nawala.” Kinahanglang magbantay ug mag-ampo siya aron masayud sa iyang kaugalingon sa hustong dalan nga sundon niining makuyaw nga mga panahon.

“Gusto nako nga makita ka,” miingon siya kang Orson, “niini nga panahon sa akong kinabuhi.”⁴⁶

Daw walay makapugong sa mga pagbati sa mga masinupakon. Nangangkon sila nga wala tarunga pagdumala ni Sidney ug Joseph ang Safety Society ug gitikasan ang mga Santos. Nagtuo si Warren nga ang usa ka propeta kinahanglang mas diosnon kay sa ubang mga tawo, ug iyang gigamit ang kapakyasan sa Safety Society aron mapakita nga wala makab-ut ni Joseph kini nga sumbanan.⁴⁷

Human sa pipila ka bulan nga paningkamot nga makig-uli sa nangulo nga mga masinupakon, ang high council sa Kirtland mipahimulag kanila. Giilog dayon sa mga masinupakon ang templo alang sa ilang kaugalingong mga miting sa simbahan ug mihulga nga ilang abugon gikan sa Kirtland si bisan kinsa nga maunungon gihapon kang Joseph.

Nagtuo si Vilate nga ang mga masinupakon nasayop sa ilang pagpalayo gikan sa mga Santos, apan mibati siya og kasubo alang kanila kay sa kasuko. “Human sa tanan nakong nasulti mahitungod niining masinupakon nga grupo,” misulat siya kang Heber, “adunay pipila kanila nga akong gimahal, ug duna akoy dakong pagbati ug kalooy alang nila.”⁴⁸ Nasayud siya nga ang pagkabangkaruta sa Safety Society misulay kanila sa espiritwal ug temporal nga paagi. Nagtuo usab siya nga dunay nahimong mga sayop si Joseph samtang nagdumala sa institusyon, apan wala siya mawad-i og pagtuo sa propeta.

“Ako nagtuo gayud nga nagpaubos si Joseph sa iyang kaugalingon atubangan sa Ginoo ug naghinulsol,” miingon siya kang Heber. Ug misalig siya nga ang simbahan makalahutay sa lisud nga mga panahon.

“Miingon ang Ginoo, siya nga dili makalahutay og pagpanton apan molimud kanako dili mabalaan,” misulat siya. Tingali nagpasabut kana nga atubangon nga mag-inusara ang kasilag nga anaa sa Kirtland samtang siya ug ang mga bata maghulat sa pag-uli ni Heber gikan sa iyang misyon. O kon mograbe ang sitwasyon, mahimong nagpasabut kini sa pagbiya sa ilang balay ug sa pagbalhin ngadto sa Missouri.

“Kon kinahanglan namong mobiya,” miingon siya kang Heber, “akong buhaton.”⁴⁹

Ang mga masinupakon sa Kirtland misamot og kalagot ug kaagresibo sa pagsugod sa bag-ong tuig. Ang kapintas sa mga manggugubot naghulga sa simbahan, ug ang utang ug gibutang-butang nga legal nga mga kaso nagsunod sa propeta. Wala madugay ang usa ka lokal nga sheriff, nga nagdala og warrant of arrest [awtoridad sa pagdakop], misugod sa pagpangita kaniya. Kon madakpan, mag-atubang si Joseph og gasto kaayo nga husay sa korte ug posible nga pagkabilanggo.⁵⁰

Pagka-Enero 12, 1838, nangayo ang propeta sa tabang sa Ginoo ug nakadawat og pagpadayag. “Ipakuha sa kapangulohan sa akong simbahan ang ilang mga pamilya,” misugo ang Ginoo, “ug pabalhina ngadto sa kasadpan sa pinakadali kutob nga maklaro ang agianan.”

Giawhag sa Ginoo ang mga higala ni Joseph ug ang ilang mga pamilya sa pagpundok usab ngadto sa Missouri. “Pagmalinawon sa inyong mga kaugalingon, O kamo nga mga lumulupyo sa Zion,” mideklarar Siya, “o walay kasiguroan alang kaninyo.”⁵¹

Ang mga Smith ug mga Rigdon miplano dayon sa ilang pag-eskapo. Ang duha ka lalaki hilum nga mibiya sa Kirtland nianang gabhiuna, ug ang ilang mga pamilya misunod ra usab dayon sakay sa mga karwahe.

Nianang gabhiuna, sa dihang ngitngit na sa tibuok Kirtland, misakay si Joseph ug Sidney sa ilang mga kabayo ug mibiya sa lungsod.⁵² Mibiyahe sila pahabagatan hangtud sa buntag, nga miabut og dul-an sa usa ka gatus ka kilometro. Sa dihang gikapoy na ang ilang mga kabayo, nanghunong ang mga lalaki aron hulaton ang ilang mga asawa ug mga anak.

Wala na maglaum si Joseph ug Sidney nga makakita pa pag-usab sa Kirtland. Sa dihang miabut na ang ilang mga pamilya, ang mga lalaki miipon kanila diha sa ilang mga karwahe ug mipadulong sa Far West.⁵³