Vahe 7
Fānau ʻa e ʻOtua Tatau
ʻI he kamataʻanga ʻo ʻOkatopa 1963, naʻe teuteu ʻe he kulupu fakalotofonua ʻa Sōleki Siti ko e Kautaha Fakafonua maʻá e Fakalakalaka ʻo e Kakai ʻUliʻulí (NAACP) ke fai ha fakahāhā loto ʻi tuʻa ʻi he Temipale Sikueá lolotonga ʻa e konifelenisi lahí. ʻI hono fakahā ʻi he ngaahi ongoongo ʻa e ʻIunaiteti Siteití ʻa e fakahāhā loto ʻoku ʻamanaki ke faí, naʻe ʻamanaki ʻa kinautolu naʻa nau fokotuʻutuʻú ʻe hoko ʻa e fakahāhā lotó ke fakalotoʻi ai ʻa e kau taki ʻo e Siasí ke fakamahinoʻi ʻenau fakakaukau ki he ngaahi totonu fakasivilé.
Neongo naʻe poupouʻi ʻe he Deseret News ʻa ia ʻoku fakalele ʻe he Siasí ʻa e faaitaha fakaematakalí ʻi he 1956, ka naʻe kei tōmui pē ʻa e ngāue ʻa ʻIutaá, ʻi hono fakafehoanaki ki he ngaahi siteiti ofi maí, ki hono fakapaasi ʻo e ngaahi lao ki he totonu fakasivilé. Naʻe ʻamanaki ʻa e NAACP ʻe ʻomi ʻe he Siasí ha fakamatala mālohi ke ne tākiekina ʻa e kau faʻu laó ke fakapapauʻi ʻoku potupotutatau ʻa e maluʻi mo e ngaahi faingamālie ʻa e kakai kotoa pē ʻi he vahefonuá.
Naʻe ʻamanaki ke hoko ʻa e fakahāhā loto ko ia ko ha taha ia ʻo e ngaahi fakahāhā loto lahi ʻi he faʻahitaʻu ko iá ʻi he ʻIunaiteti Siteití. ʻI he konga kimuʻa ʻo e taʻú, naʻe fokotuʻu ʻe he palesiteni ʻo ʻAmeliká ko Sione F. Kenetī ha lao ki he ngaahi totonu fakasivilé ke maluʻi ʻa e Kau ʻAmelika ʻAfiliká mo e kakai matakali kehekehé mei he laulanú. Hili ha ngaahi māhina siʻi, naʻe tokoni ʻa e NAACP ke fokotuʻutuʻu ha laka tokolahi ʻi Uasingatoni, DC, ke fakahāhā loto ki he ngaahi fetōʻaki fakasōsiale mo fakaʻekonōmika ʻi he ʻIunaiteti Siteití. Naʻe fakaʻosi ʻa e laká ʻaki ha lea fakalotolahi meia Dr. Māteni Lufa Kingi Jr., ko ha taki ʻiloa ʻi he ngaahi totonu fakasivilé, ʻa ia naʻá ne ueʻi ai ha kakai tokolahi ke nau tuʻu ʻo fakafepakiʻi ʻa e ngaahi fakamaau taʻetotonu fakamatakalí.
Hili hono ʻilo ʻa e fakahāhā loto kuo palani ki he Temipale Sikueá, naʻe fokotuʻutuʻu ai ʻe Sitēlingi Mekimalini, ko ha palōfesa filōsofia ʻi he ʻUnivēsiti ʻo ʻIutaá, ke fakataha ʻa e kau taki ʻo e NAACP Sōleki Sití mo Hiu B. Palauni ʻo e Kau Palesitenisī ʻUluakí.
ʻI he efiafi ʻaho 3 ʻo ʻOkatopá, naʻe talitali ai ʻe Palesiteni Palauni ʻa ʻAlipate Filiti, ko e palesiteni ʻo e kulupu fakalotofonua NAACP, mo e niʻihi kehe naʻa nau fokotuʻutuʻu ʻa e fakahāhā lotó ki he ʻŌfisi Pule ʻo e Siasí. Naʻe kau ki ai foki mo N. ʻEletoni Tena, ʻa ia naʻe toki uiuiʻi ʻi he ʻaho ko iá ke fetongi ʻa Henelī D. Moile ʻi he Kau Palesitenisī ʻUluakí.
ʻI he fakatahá, naʻe fehuʻi ai ʻe he kau fokotuʻutuʻú pe ʻoku fakataumuʻa nai ʻa e Siasí ke poupouʻi ʻa e ngaahi totonu fakasivilé.
Naʻe pehē ʻe Palesiteni Palauni, “Hangē ko ia ʻoku mou ʻiloʻí, ʻoku ʻikai kau ʻa e Siasí ʻi he ngaahi meʻa fakapolitikalé.” ʻOku ʻi ai hono hisitōlia fuoloa ʻi he tuʻu tauʻatāina mei he ngaahi meʻa fakapolitikalé.
Naʻe pehē ʻe he kau fokotuʻutuʻú naʻe faʻa lea ʻa e Siasí fekauʻaki mo e ngaahi palopalema fakaeʻulungāngá. Pea naʻa nau fakaʻuhinga leva ʻo pehē, ko e ngaahi totonu fakasivilé ko ha palopalema fakaeʻulungaanga ia.
Naʻe tui tatau ʻa Palesiteni Palauni mo kinautolu, ka naʻe ʻikai ke na tui mo Palesiteni Tena ʻe ʻaonga ke fai ha fakahāhā loto. Naʻá na palōmesi ke talanoa kia Palesiteni Makei kau ki hano fai ha fakamatala ʻa e Siasí ki he ngaahi totonu fakasivilé.
Hili ʻa e fakatahá, naʻe kole ʻe Palesiteni Palauni mo Palesiteni Tena kia Sitēlingi Mekimalini ke tokoni ange ki hano teuteu ha fakamatala ke fakangofua mai ʻe Palesiteni Makei. ʻI he taimi ko ʻení, naʻe tapou ʻa ʻAlipate Filiti ki he kau mēmipa ʻo e NAACP ke toloi ʻa e fakahāhā lotó kae ʻoange ha taimi feʻunga ki he Siasí ke tukuange mai ʻa e fakamatalá. Naʻe ʻosi faʻu ʻe ha niʻihi ʻo e kau fakahāhā lotó ha ʻū papa fakaʻilonga, ka naʻa nau loto-lelei ke tatali ʻi ha uike ʻe taha.
ʻI he ʻaho Tokonaki ko hono 5 ʻo ʻOkatopá, naʻe fakahoko ai ʻe Palesiteni Palauni ki he NAACP, kuo fakangofua ʻe Palesiteni Makei ha fakamatala, ʻa ia naʻe lau ʻe Palesiteni Palauni ʻi he konifelenisi lahí ʻi he pongipongi hono hokó.
Naʻe pehē [ʻe he fakamatalá], “ʻOku ʻikai ke ʻi he Siasí ni ha tokāteline, tui pe ngāue ʻoku fakataumuʻa ke taʻofi ʻa e fiefia ʻa ha taha ʻi he ngaahi totonu fakasivilé, ʻo tatau ai pē pe ko e hā ʻa e matakali, lanu ʻo e kilí, pe faʻahinga. ʻOku mau tui ko e tangata kotoa pē ko ha fānau ia ʻa e ʻOtua tatau, pea ko ha angakovi ia ki ha taha pe kulupu ke taʻofi ʻa e faʻahinga ʻo e tangatá mei he totonu ke maʻu ha ngāue maʻuʻanga moʻui, ke maʻu ha faingamālie fakaako kakato, pea ke maʻu ʻa e faingamālie kotoa pē ʻo e tangataʻifonuá.”
Naʻe hoko atu ʻo pehē, “ʻOku mau kole atu ki he tokotaha kotoa pē ʻi he feituʻu kotoa pē, ʻi loto pe ʻi tuʻa ʻi he Siasí, ke fakatukupaaʻi kinautolu ki hono fokotuʻu ʻa e tuʻunga tatau fakasivilé maʻá e fānau kotoa ʻa e ʻOtuá. Ka ʻi ai ha meʻa ʻe maʻulalo ange heni, ʻoku maumauʻi ʻe ia ʻetau fakakaukau māʻolunga ki he feohi fakatokoua ʻa e tangatá.”
Naʻe peesi ʻuluaki ʻa e fakamatalá ʻi he ongoongó ʻi Sōleki Siti mo e ngaahi feituʻu kehé. ʻI he kole ʻa ʻAlipate Filití, naʻe ʻikai fakahoko ʻe he NAACP ʻa e fakahāhā lotó lolotonga ʻa e konifelenisí. Naʻá ne fakatuʻamelie ʻe lava ke fepoupouaki ʻene kautahá mo e Siasí.
Naʻá ne pehē, “Kapau te tau ngāue fakataha, ʻe ʻi ha tuʻunga lelei ange hotau siteití.”
ʻI he taʻu 1963, naʻe fefonongaʻaki maʻu pē ʻa ʻĒliu ta Losa Kamākou ʻi Palāsila. Naʻá ne maʻu ʻa e Lakanga Taulaʻeiki Faka-Melekisētekí hili ha kiʻi taimi siʻi mei he ʻaʻahi ʻa ʻEletā Sipenisā W. Kimipolo ki Saute ʻAmelika ʻi he taʻu 1959, pea kuó ne hoko ʻeni ko ha tokoni ʻi he kau palesitenisī ʻo e Misiona Palāsilá. ʻI he tupu vave ʻa e Siasí ʻi he ngaahi konga lahi ʻo e fonuá, naʻe fiemaʻu ʻe hono uiuiʻí ke ne fakataha mo e Kāingalotu ʻi he ngaahi kolo mamaʻo hangē ko Lio ti Senelo, Pelo Holisoni, Lesifi, mo Palāsīlia, ko e kolomuʻa langa foʻou ʻo Palāsilá.
ʻI he ngaahi taʻu ʻe fā kuohilí, kuo laka hake ʻi he toko tolumano nimaafé ʻa e kakai kuo nau kau ki he Siasí ʻi ʻAmelika Latiná. ʻI he taʻu 1961, naʻe fokotuʻu ai ʻa e fuofua siteiki lea faka-Sipeini ʻo e Siasí ʻi Mekisikou Siti. ʻI he taimi tatau, kuo laka hake ʻi he liunga uá ʻa e lahi ʻo e ngaahi misiona ʻi Saute ʻAmeliká. Kuo ʻi ai ʻeni ha misiona ʻe ua ʻi Palāsila, ua ʻi ʻĀsenitina, taha ʻi ʻUlukuai, taha ʻi Silei, pea taha ʻoku kau ki ai ʻa Pelū mo Polivia.
ʻI he ngaahi misiona takitaha ko ʻení, ko e taumuʻá ke fakamafola lahi ange ʻa e ongoongoleleí, tokoni ki he Kāingalotú ke nau moʻui faivelenga, pea fokotuʻu ʻa e ngaahi fuofua siteiki ʻi Saute ʻAmeliká. ʻI hono fokotuʻu ʻa e ngaahi siteiki ko ʻení ʻe maʻu ai ʻe he kāingalotú ha mafai lahi ange ke tataki mo ngāue ʻi he Siasí, pea taʻofi ai hono fiemaʻu ha kau takimuʻa mei tuʻa honau ʻēliá.
Naʻe tui fakatouʻosi ʻa Ueini Peki, ko e palesiteni ʻo e Misiona Palāsilá, mo e tokotaha ʻi muʻa ʻiate iá, ko Kalani Pengikata, ko e founga lelei taha ke teuteuʻi ai ʻa e Kāingalotú ki he fatongia ʻo e ngaahi siteikí ko hono langa hake mo akoʻi ha kau takimuʻa fakalotofonua ʻo e Siasí. Naʻe hoko ʻa e aʻusia ʻa ʻĒliu ko ha faifekau ʻi he siasi Metotisí ko ha taha lelei ki he takimuʻa ʻi he Siasí, pea naʻe vave hono ui ia ʻe Palesiteni Pengikata ki he ngaahi fatongiá.
Ko e taha ʻo hono ngaahi fuofua uiuiʻi fakatakimuʻá ko e tokoni ʻi ha kau palesitenisī fakavahefonua mo ha Kāingalotu Palāsila kehe ʻe toko ua. Naʻe ʻikai ke ne alāanga ki hono ngaahi fatongia foʻoú, pea ʻi he hili ʻene faingataʻaʻia ke mahino honau taumuʻá, naʻá ne talanoa kia Palesiteni Pengikata. Naʻá ne pehē “ʻOku ʻikai ke u fakahoko ʻi heni ha meʻa ʻoku ʻaonga.”
Naʻe fehuʻi ange ʻe he palesitení, “Ko e hā ʻokú ke fie fakahokó?”
Naʻe tali ange ʻe ʻĒliu, “ʻOku ou fie foki ki hoku koló ʻo faiako. Te u lava ʻo hoko ko ha faiako lelei.”
Naʻe fakamatalaʻi ange leva ʻe Palesiteni Pengikata naʻe mahuʻinga ʻa e Kāingalotu fakalotofonuá ki he fakalakalaka ʻa e Siasí ʻi honau fonuá. ʻI he hoko ʻa ʻĒliu ko ha mēmipa ʻo e kau palesitenisī fakavahefonuá, naʻá ne fua ai ha fatongia mahuʻinga ʻi hono uiuiʻi mo akoʻi ʻa e kau takimuʻa mo e kau faiako fakalotofonua ʻo e Siasí.
Naʻe pehē ange ʻe he palesitení, “Ko e taimi ʻeni ʻoku ohi hake ai ʻe he ʻEikí ʻEne kau tamaioʻeikí ki hono fokotuʻu ʻEne ngāué ʻi he mālohi ʻi Saute ʻAmeliká. ʻOku uiuiʻi ha niʻihi ke fataki ʻa e haʻamongá, pea kuo hoko ia ʻi he taimí ni ko ho fatongia.”
Naʻe fakafokifā pē ʻa e vakai ʻa ʻĒliu ki he tuʻunga fakatakimuʻa ʻi he Siasí ʻi ha founga foʻoú. ʻI ha ngaahi uike siʻi, naʻá ne ngāue lelei mo e kau mēmipa kehe ʻo e kau palesitenisī fakavahefonuá.
Hili iá, naʻe akoʻi ʻe ʻĒliu ha kau takimuʻa fakalotofonua tokolahi—ko ha fatongia naʻe hokohoko atu hili hono uiuiʻi ia ki he kau palesitenisī fakamisioná. ʻI heʻene hoko ko ha tokoni kia Palesiteni Pengikata mo Palesiteni Pekí, naʻá ne tokoni ki hono kaungā Kāingalotú ke fakalakalaka ʻa e tuʻunga ʻo ʻenau ngaahi houalotu sākalamēnití, fakaʻaiʻai ʻa e kau mai ki he ngaahi ngāue langa ʻa e Siasí, pea ngāue ke fakamālohia ʻa e ngaahi kolo [ʻo e Siasí]. Ko ʻeni, ko e fē pē ha feituʻu naʻe fokotuʻu lelei ai ʻa e Siasí ʻi he misioná, naʻe aʻu pē ʻo hoko ʻa e ngaahi koló mo e vahefonuá ko e ngaahi uooti mo e siteiki. Kapau naʻe fiemaʻu ha papitaiso pe hilifakinima, naʻe fai ia ʻe ha tokotaha Palāsila maʻu lakanga fakataulaʻeiki.
Naʻe hoko ʻa e uaifi ʻo ʻĒliu ko Naiá, ko ha tokoni ʻi he houalotu Palaimeli ʻa e misioná, ʻa ia naʻá ne fatongia ʻaki hono teuteuʻi ʻo e Kaingālotú ki he tuʻunga fakatakimuʻa ʻi he siteikí. ʻI he muimui ʻa e kau palesitenisií ʻi ha sīpinga fakalūkufua ʻa e Siasí ʻi he ngaahi siteikí, naʻa nau fakahoko ai ha konifelenisi ʻi he taʻu kotoa maʻá e kau taki mo e kau faiako ʻi he Palaimelí. ʻI he ngaahi lēsoni ʻa Naia ki he kau fafiné, naʻá ne fai ai ha ngaahi fokotuʻu ki hono akoʻi ʻo e fānau īkí, fakalakalaka ʻa e kau mai ki he Palaimelí, pea mo hono fakaʻaongaʻi ʻo e naunau fakalēsoní mo e ʻū fakatātā naʻe ala maʻú.
Naʻá ne talaange ki he kau ngāue ʻi he Palaimelí ʻi he konifelenisi ʻo e 1963, “ʻOku mau kole ki he ʻOtuá ke Ne tāpuakiʻi ʻa e ngāue kotoa kuo mou fakahoko maʻá e fānaú pea ke Ne fakatupulaki ʻetau tuí mo ʻetau holi ke moʻui ʻo fakatatau mo e ngaahi tefitoʻi moʻoni ʻo e ongoongoleleí, ʻo fakatukupaaʻi kitautolu ʻi he loto-vēkeveke mo e fakamātoato ʻi he ngāue kuó Ne tuku mai kiate kitautolú.”
ʻI he ngāue ʻa ʻĒliu ʻi he kau palesitenisī fakamisioná, naʻá ne fua faivelenga hono fatongiá ʻo hangē ko ia naʻá ne fai ʻi heʻene kei faifekaú. Naʻá ne talaange kia Palesiteni Pengikata ʻoku fiemaʻu ki he ākonga moʻoní ʻa e mateaki mo e līʻoa kakato ki he ngāue ʻa Kalaisí.
Naʻe pehē ʻe ʻĒliu, “ʻOku ʻiloʻi ʻeni ʻe ha tokotaha pē ʻoku Metotisi lelei.” Pea naʻá ne tui ʻoku totonu ke mahino ia ki he tokotaha ʻo e Kau Māʻoniʻoni ʻi he Ngaahi ʻAho Kimui Ní.
ʻI he ofi ki he fakaʻosinga ʻo e taʻu 1963, naʻe ʻikai fiemālie ʻa Uolo Meisi, naʻá ne taʻu fāngofulu-mā-fā ʻi he taimi ko iá. ʻI heʻene kaungā puleʻi ha falekoloa ʻe tolu ʻi Sōleki Sití, naʻe ʻikai ke ne fakapapauʻi pe ʻoku totonu ke ne fakaava hono falekoloá ʻi he ʻaho Sāpaté. Kuo akoʻi ia ʻi heʻene tupu haké ko e Sāpaté ko ha ʻaho toputapu ia ke mālōlō ai. Ka kimui ní, kuó ne fakatokangaʻi ʻoku tokolahi ha Kau Māʻoniʻoni ʻi he Ngaahi ʻAho Kimui Ní naʻa nau fakatau ʻi he ʻaho Sāpaté ʻo hangē pē ko e kakai kehé.
Ko e feituʻu kotoa pē naʻá ne vakai ki aí, naʻe ava ʻa e ʻū falekaí, pausá, mo e ʻū falekoloá ʻi he ʻaho Sāpaté. Pea naʻe fakakaukau foki hono kaungā pisinisi taʻu lahi ko Teili Sonasí, ʻoku totonu ke fakaava foki mo hona ʻū falekoloá. Naʻe lahi ʻa e fakataú ʻi he ʻaho Sāpaté, pea naʻe tali ʻe Uolo ʻa e fakakaukau ke fakaava ʻa e ʻū falekoloá, he ʻoku nau tokoni ai ki he ngaahi fāmili ʻoku nau fiemaʻu ke fakatau ʻi he fakaʻosinga ʻo e uiké. Naʻe siʻisiʻi ha ngaahi ʻapi naʻe ua ʻenau kaá, pea koeʻuhí naʻe meimei ke ʻalu ʻa e husepānití ʻi he kaá ki he ngāué ʻi he lolotonga ʻo e uiké, ko e ʻaho Sāpaté ko ha ʻaho mahuʻinga ia ke fai ai ʻa e fakataú.
Naʻe ʻikai ke fuʻu ongoʻi fiemālie ʻaupito ʻa Uolo ki hono fakalele ʻa e ʻū falekoloá ʻi he ʻaho Sāpaté. Naʻá ne ongoʻi hohaʻa ʻi he fakakaukau ʻokú ne taʻofi ʻa e fānau kei talavou ʻokú ne fakangāueʻí mei heʻenau ʻalu ki heʻenau ngaahi fakatahaʻanga fakalotú. ʻI he ngaahi taʻu kimuʻá, kuó ne talaange kia Teili ʻe mohu tāpuekina ʻenau pisinisí kapau te nau tāpuni ʻi he ʻaho Sāpaté. Naʻe ʻikai loto ki ai ʻa Teili. Naʻá ne fakamulituku ʻa e talanoá ʻaki ʻene pehē ange, “He ʻikai ke tau tāpuni.”
Neongo ia, naʻe hoko ha talanoa kimuí ni mai mo Siosefa Filitingi Sāmita, ko e palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ke hohaʻa ai ʻa Uolo. Naʻe fakatau maʻu pē ʻa Palesiteni Sāmita mo hono uaifi ko Sesí ʻi honau falekoloa ʻi he tafaʻaki fakahihifo ʻo Sōleki Sití. ʻI he ʻaho ʻe taha, naʻe lue atu ʻa Palesiteni Sāmita ki he kānita fakatauʻanga kakanoʻi manú ʻa ia naʻe ngāue ai ʻa Uoló.
Naʻá ne pehē ange, “Brother Meisi, ʻoku ou fakaʻamu ke ke toʻo ʻa e fakaʻilonga ko ē mei he matapā sioʻatá.” Naʻe lahi ʻa e ʻū fakaʻilonga ʻi he matapā sioʻatá, ko ia naʻe fehuʻi ange ai ʻe Uolo pe ko e fakaʻilonga fē naʻá ne ʻuhinga ki aí.
Naʻe talaange ʻe Palesiteni Sāmita, “Ko e fakaʻilonga ko eé ‘Ava ʻi he Sāpaté.’” Naʻá ne talaange kia Uolo ʻokú ne loto ke fakatau mei he ʻū falekoloa ʻoku nau fakaʻapaʻapaʻi ʻa e ʻaho Sāpaté ʻaki ʻenau tāpuni ʻi he ʻaho Sāpaté. Naʻá ne tafoki leva ʻo lue ki tuʻa. Kuo teʻeki ke toe sio ʻa Uolo kiate ia ʻi he falekoloá talu mei ai.
Kuo laka hake ʻi he vaeuaʻi senitulí ʻa e hoko ʻa Palesiteni Sāmita ko ha ʻaposetoló. Lolotonga ʻa e taimi ko iá, kuó ne vakai ki he mōlia atu ʻa hono fakaʻapaʻapaʻi ʻo e ʻaho Sāpaté ʻe he kau Kalisitiané ʻi he funga ʻo e māmaní. Lolotonga ʻene fakatokangaʻi ʻa e ngaahi ʻuhinga mahino ki he ngāue ʻi he ʻaho Sāpaté, naʻá ne hohaʻa mo ha kau takimuʻa kehe ʻo e Siasí fekauʻaki mo e fakaʻau ke hoko ʻa e ʻaho Sāpaté ko ha ʻaho ki he ngaahi ʻekitivitií mo e fefakatauʻakí. Kuo tā tuʻo-lahi ʻenau lea fekauʻaki mo hono fakaʻaongaʻi ʻo e Sāpaté ki he ngaahi sipotí, mamata heleʻuhilá, fakataú, mo e ngaahi ʻekitivitī kehe ʻoku lava ʻo fai ʻi he ngaahi ʻaho kehé. Kuo kōlenga ʻe Siosefa Filitingi Sāmita ki he Kāingalotú ke tauhi ʻa e ʻaho ʻo e ʻEikí ke māʻoniʻoni, ʻo tuʻo lahi ange ia ʻi ha toe ʻaposetolo ʻi hono taimí.
Kuó ne lea ʻaki ʻi he konifeleni lahi ʻo ʻEpeleli 1957, “Kuo pau ke tau taʻofi ʻa hono maumauʻi ʻo e ʻaho Sāpaté. ʻOku ou palōmesi atu, kapau te mou tauhi ʻa e ʻaho Sāpaté, ʻa kimoutolu ʻoku mou fakaava homou ngaahi falekoloá ʻi he ʻaho Sāpaté, kapau te mou tāpuni kinautolu pea fai ʻa e ngaahi fatongia kuo ʻoatu ʻe he ʻEikí mo tauhi ʻEne ngaahi fekaú, te mou tuʻumālie.”
Hili ha taʻu ʻe ua mei ai, naʻe akoʻi ʻe he Kau Palesitenisī ʻUluakí ʻa e tefitoʻi moʻoni tatau, ʻo kole ki he Kāingalotu ʻo e Siasí ke taʻofi ʻa e fakatau ʻi he ʻaho Sāpaté.
Hili ʻa e talanoa ʻa Uolo mo Palesiteni Sāmitá, naʻá ne loto ai ke fai ha liliu. Naʻá ne maʻu ʻa e ueʻi naʻá ne tōnounou ʻi he meʻa naʻá ne ʻilo ʻoku totonu ke faí.
Naʻá ne toe talanoa ai kia Teili fekauʻaki mo hono tāpuni ʻo e ʻū falekoloá ʻi he ʻaho Sāpaté, pea naʻe ʻikai fie fakakaukau ʻa Teili ki ai. Naʻe talaange ʻe Uolo, “Sai, koeʻuhí ʻoku mahuʻinga lahi ʻeni kiate au, te ke fili ai pe te ke fakatau kakato ʻa e pisinisí pe ko ʻeku fakatau kakato ia.”
Hili ha māhina ʻe taha mei ai, naʻe loto ʻa Teili ke tukuange ʻena fengāueʻakí. Te ne maʻu ʻa e falekoloa ʻe ua, pea maʻu ʻe Uolo ʻa e taha. Naʻe fakakaukau ʻa Uolo ke toe fakaava hono falekoloá ʻi ha hingoa foʻou ko e: Macey’s.
Naʻe ʻikai fuoloa, naʻe fanongonongo ai ʻe he Deseret News ʻe tāpuni ʻa e Macey’s ʻi he ngaahi ʻaho Sāpaté. ʻI he pō ko iá ʻi he 11:15, naʻe telefoni mai ai ha taha ki he ʻapi ʻo Uoló. Ko Sisitā Sāmita ia. Naʻá ne pehē ange, “ʻOku fakaʻamu ʻa e palesitení ke talanoa mo koe.”
Naʻe haʻu leva ʻa Palesiteni Sāmita ki he telefoní. Naʻá ne pehē ange, “Brother Meisi, ʻoku ou sio ʻi he pepa ʻo e pōní kuó ke tāpuni ho falekoloá ʻi he ʻaho Sāpaté. Te u toe foki atu.”
Hili ha kiʻi taimi, kuo fakatokangaʻi ʻe Uolo ʻoku fakatau ʻa Palesiteni Sāmita ʻi he falekoloá.
ʻI he kamataʻanga ʻo e taʻu 1964, ko e taʻu ia hono hongofulu-mā-hiva ʻa e hoko ʻa Pele Sipāfooti ko ha palesiteni lahi ʻo e Fineʻofá. Ko e mēmipasipi fakaemāmani lahi ʻo e houalotú ko e toko 262,002, naʻe ʻi ai ʻa e kau fafine ʻi he uooti mo e kolo naʻe laka hake ʻi he toko onoafé ʻoku fakataha maʻu ai pē ʻa e Kau Fineʻofá ke feakoʻaki mo fai ha ngaahi ngāue ʻofa. Naʻe tānaki mo tokangaʻi ʻe he Fineʻofá ʻene paʻanga pē ʻaʻana ke fakalele ʻaki ʻa e ngaahi polokalama, ʻekitivitī, mo e ngāue lahi kau ai ʻa e Relief Society Magazine (Makasini ʻa e Fineʻofá), ʻa ia ʻe fakamanatua ʻeni ʻa e taʻu ʻe nimangofulu hono pākí.
Naʻe laukau ʻaki ʻe Palesiteni Sipāfooti ʻene kau fafine Fineʻofá. Naʻá ne fakatokangaʻi ʻi he konifelenisi fakataʻu ʻa e houalotú, “ʻI ha ʻaho ʻoku kau ai ʻa e kau fafiné ʻi he ngaahi ʻekitivitī lahi pea tokolahi hanau niʻihi ʻoku ngāue paʻanga, ʻoku fakalotolahi ʻa e fakaʻau ke tokolahi ange ʻa e ʻavalisi ʻo kinautolu ʻoku kau mai maʻu pē ki he ngaahi fakataha ʻa e fineʻofá. ʻOku mau fakamālō ki hoʻomou mateaki ki he Fineʻofá pea mo hoʻomou moʻui angatonú.”
ʻI he kamataʻanga ʻo e taʻu foʻoú, naʻe ʻamanaki atu ʻa Palesiteni Sipāfooti mo hono ongo tokoni ko Meleane Saapa mo Loisi Matisení, ki ha ngaahi māhina fefonongaʻaki lahi.
ʻI he polokalama fakafekauʻaki foʻoú, naʻe ʻaʻahi ai ʻa e kau palesitenisī lahi mo e poate ʻo e Fineʻofá ki he ngaahi konifelenisi fakasiteikí lolotonga ʻa e ʻuluaki māhina ʻe ono ʻo e taʻú ke akoʻi ʻa e kau taki ʻo e Fineʻofá pea lea ki he kau palesitenisī fakasiteikí, kau aleaʻanga māʻolungá, kau pīsopelikí mo e kau taki fakasiteiki mo e fakauōtí. Ne nau maʻu mei heʻenau kau ki he ngaahi konifelenisi ko ʻení ha ngaahi faingamālie foʻou ke akoʻi ʻa e kau taki lakanga fakataulaʻeikí fekauʻaki mo e ngāue ʻa e Fineʻofá.
ʻI hono fokotuʻu ʻe he Siasí ha ngaahi siteiki lahi ange ʻi tuʻa mei he ʻIunaiteti Siteití, naʻe toe lahi ange ʻa e fefolauʻaki fakatuʻapuleʻanga ʻa e kau palesitenisií. Naʻa nau toki akoʻi kimuí ni ha ngaahi siteiki ʻi ʻAositelēlia, Nuʻu Sila, mo Haʻamoa, pea naʻa nau ʻaʻahi ki he Kāingalotu ʻi ʻIulopé ʻi he faʻahitaʻu failaú.
Lolotonga ʻa e ʻaʻahi ki he ngaahi konifelenisi fakasiteikí ʻi he tapa kehekehe ʻo e māmaní, naʻe ʻoatu ai ʻe Palesiteni Sipāfooti mo ʻene kau mēmipa ʻi he poaté ʻa e Ko e Fakaaké (The Awakening), ko ha filimi ʻoku fakamahino ai ʻa e mahuʻinga ʻo e Fineʻofá. Naʻe hoko ʻa e mīsini fakaʻata lahí ko ha meʻangāue manakoa fakaako ʻi loto pea ʻi tuʻa ʻi he Siasí, meimei koeʻuhí ko ʻene maʻamaʻá pea faingofua ke fakaʻaongaʻí. ʻI ha ngaahi ʻata ʻoku huluʻi ʻi ha monitoa, naʻe fakamatalaʻi ʻe he Ko e Fakaaké ha talanoa faʻu ʻo Mele Sāmita, ko ha mēmipa ʻo e Siasí ʻa ia naʻe fakafou ʻi he Fineʻofá mo e ngaahi ʻaʻahi fakataautaha mei he kāingalotu ʻo e uōtí ʻa hono toe fakaake ʻene tui kuo hōloá. ʻI he ngaahi ʻata fakaʻosi ʻo e filimí, kuo foki ʻa Mele mo hono fāmilí ki he lotú pea naʻa nau teuteu ke silaʻi kinautolu ʻi he temipalé.
ʻI ha ngaahi taʻu lahi, kuo faʻa fakangofua ʻe Palesiteni Sipāfooti mo hono ongo tokoní ʻa e ʻū naunau ako ʻa e Fineʻofá. Hangē ko e Ko e Fakaaké, kuo tohi mo faʻu ia ʻe he kau mēmipa ʻo e Fineʻofa ʻo e Siteiki Sōleki Patilaá kimuʻa pea fakaʻaongaʻi ʻe he kau palesitenisī lahi ʻo e Fineʻofá ko ha konga ʻo ʻenau ako ki he ngaahi siteikí.
Ka neongo iá, ko e fatongia ki hono faʻu ʻo e naunau fakalēsoni ki he ngaahi houalotu ʻo e Siasí kuo tuku ia kimuí ni mai kia ʻEletā Hāloti B. Lī mo e Fakataha Alēlea Fakafekauʻaki ki he ngaahi Meʻa Kotoa ʻa e Siasí naʻe toki fokotuʻú. Lolotonga iá ʻoku teʻeki ke fakaʻaongaʻi ʻe he Fineʻofá ʻa e ngaahi palani lēsoni fakafekauʻakí, ka kuo kamata kole ʻe he kōmití ke fakahū mai ʻe he ngaahi houalotu kotoa ʻa e Siasí ha ngaahi fokotuʻutuʻu ki he ngaahi lēsoní mo e ngaahi naunau kehé ke fakangofua. Naʻe poupouʻi ʻe Palesiteni Sipāfooti ʻa e liliu ko ʻení, pea ʻi heʻene hoko ko ha mēmipa ʻo e fakataha alēlea fakafekauʻakí, naʻá ne kau ʻi he ngāue ki hono fakafekauʻaki ʻo e ngaahi lēsoni ʻa e Siasí.
ʻI he ʻaho 24 ʻo Sune 1964, naʻe aʻu ʻa e fefonongaʻaki ʻa Palesiteni Sipāfōtí ki he fakahahake ʻo e ʻIunaiteti Siteití ki he “ʻAho ʻo e Fineʻofá” ʻi he Fea Fakaemāmani Lahi ʻa Niu ʻIoké. Hangē ko e Fea ʻi Kolomupiá ʻi he 1893, naʻe vakai ʻa e Siasí ki he feá ko ha faingamālie ke vahevahe ʻene pōpoakí ʻi ha tuʻunga fakaemāmani lahi. Naʻe langa ai ha holo lahi faiʻanga fakaʻaliʻali ke hangē ko e Temipale Sōlekí pea fai ai ha ngaahi fakamatala kehekehe fekauʻaki mo e Fakamoʻuí mo ʻEne ongoongoleleí, kau ai mo ha filimi manakoa miniti ʻe 15 naʻe ui ko e Fekumi ʻa e Tangatá ki he Fiefiá (Man’s Search for Happiness), ʻa ia naʻe akoʻi ai ʻa e kau ʻaʻahí fekauʻaki mo e palani ʻo e fakamoʻuí.
Naʻe fokotuʻu ʻa e ʻAho Fineʻofá ke fakaʻaliʻali ai ʻa e ngaahi lavameʻa ʻa e houʻeiki fafine ʻo e Kau Māʻoniʻoni ʻi he Ngaahi ʻAho Kimui Ní. Ko e meʻa makehe ʻo e ʻahó ko e hiva ʻa e kuaea ʻa e “ngaahi faʻē hivá” mei he Kau Fineʻofa mei he siteiki ʻi Niu ʻIoké mo e tukui kolo kehé. Naʻe tohoakiʻi mai ʻe heʻenau hivá ha kakai tokolahi, pea naʻe fakakaukau ai ʻa Palesiteni Sipāfooti naʻe fakalakalaka ʻa e konisetí ʻi he taimi kotoa pē. Ko ha feituʻu longoaʻa ʻa e feá, ka ʻi he hiva fakataha ʻa e kau fafiné ʻi he ngaahi himí mo e mūsika toputapu kehé, naʻe hangē naʻe mōlia atu ʻa e longoaʻá. Kia Palesiteni Sipāfōtí, naʻe hangē naʻa nau hiva mo e kau ʻāngeló.
Hili iá, naʻe ʻeke ange ʻe ha faiongoongo pe ko e hā naʻe ʻikai ai ke ʻi ai ha kuaea ʻa e “ngaahi tamai hivá.”
Naʻá ne tali ange, “Ko e meʻá he ko e kautaha kakai fefine kimautolu.”
ʻI he taimi ko ʻení, naʻe tangutu ʻa Kīsepa ʻOliva ʻi ha falelotu naʻe lolotonga langa ʻi Kuilimesi, ʻAsenitina. Ko e fuofua falelotu ia ʻi he fonuá naʻe langa ʻe he kau faifekaú ʻi he polokalama langa ʻa e Siasí, pea naʻe ʻamanaki mai ʻa e Kāingalotu naʻe omi ki he konifelenisi fakavahefonuá ʻi he pongipongi ko iá ki heʻene ʻosí. Hangē ko e ngaahi falelotu lahi ʻi he māmaní, naʻá ne fakafofongaʻi ʻa e ngaahi taʻu lahi ʻo e ngāue mateaki mo e feilaulau ʻa e Kāingalotu naʻe lotu aí.
Naʻe haʻu ʻa Kīsepa mo hono husepāniti ko Leanató mei he motu ʻĪtali ko Sisilií. Hangē ko e kau ʻĪtali tokolahi, kuó na hiki ki ʻAsenitina hili ʻa e Tau Lahi Hono II ʻa Māmaní ke maʻu ha ngāue lelei ange. Neongo ʻa e faingataʻa ʻo e fakaangaanga ki ha fonua, anga-fakafonua mo e lea foʻoú, ka naʻá na maʻu ʻi Saute ʻAmelika ha ʻapi maʻa ʻena fānau ʻe toko nimá. Hili ha taʻu ʻe fitu mei he hiki mei Sisilií, naʻe feʻiloaki ai ʻa Kīsepa mo e ongo faifekau ʻo e Kau Māʻoniʻoni ʻi he Ngaahi ʻAho Kimui Ní, pea naʻe ʻikai fuoloa kuó ne tali mo hono ongo ʻofefiné ʻena pōpoakí. Talu mei ai, kuo mali fakatouʻosi ʻa e ongo ʻofefiné mo ha ongo talavou mei he Siasí.
ʻI he taimi tatau, naʻe hohaʻa ʻa Kīsepa ʻi heʻene tangutu ʻi he konifelenisí. Naʻe hoko ha feʻamokaki fakaʻekonōmika ʻi he fonuá. Naʻe hiki ʻa e koloá ʻi ʻAsenitina ʻaki ha peseti ʻe 20 ʻi he taʻu, pea naʻe mole ʻa e ngāue ʻa e tokolahi ʻi he fefaʻuhi ʻa e ngaahi pisinisí ke lava ʻo totongi ʻa e kau ngāué. ʻI he lolotonga ʻa e ngaahi tuʻunga taʻe-pau fakaʻekonōmiká, kuo foki ʻa Lenato, ko e tangata ngaohi kató ki Sisilī, pea naʻá ne loto ke kau ange hono fāmilí mo ia.
Neongo ia, ka naʻe ʻikai ke fie ʻalu ʻa Kīsepa. ʻI he taʻu ʻe nima hili ʻa e ʻaʻahi ʻa ʻEletā Sipenisā W. Kimipolo ki ʻAsenitiná, kuo tupulaki ʻa e Siasí ʻo laka hake ʻi he toko valuafé. Naʻe mālohi hono ngaahi koló, pea kuo hoko ʻa e totongi vahehongofulu ʻa e Kāingalotu faivelengá ko e fuofua taimi ia ʻi he hisitōliá ke ne fakapaʻanga ʻa e Misiona ʻAsenitiná. Naʻe tupulaki ʻa e tokolahi ʻo e kau papi uluí, ʻo fakamālohia ai ʻa e ngaahi haʻofangá ʻo hangē ko ia naʻe kau ki ai ʻa Kīsepá.
Ka naʻe ʻikai ha kolo ʻe taha ʻo e Siasí ʻi ʻĪtali. Kapau naʻe fili ʻa Kīsepa ke kau fakataha mo Lenato ai, naʻe pau ke ne tukuange ʻa e ngaahi tāpuaki ʻo e maʻulotu maʻu pē ʻi he Siasí. Pea koeʻuhí naʻe ʻikai kau ʻa Lenato ki he Siasí, he ʻikai ke ne lava ʻo fakahoko ʻa e sākalamēnití pe ngaahi ouau kehe ʻo e lakanga fakataulaʻeikí kia Kīsepa.
ʻI he ʻosi ʻa e sēsini pongipongi ʻo e konifelenisi fakavahefonuá, naʻe fakafeʻiloaki atu ʻa Kīsepa kia ʻAfa Situlongo, ko e palesitenisi ʻo e Misiona ʻAsenitiná, peá ne fakamatala ange hono faingataʻaʻiá. Naʻá ne talaange naʻá ne fie nofo mo hono ongo ʻofefiné ʻi ʻAsenitina, ka naʻá ne ongoʻi foki naʻe fiemaʻu ke ne kau fakataha mo hono husepānití ʻi ʻIulope.
Naʻe fakafanongo ʻa Palesiteni Situlongo peá ne poupou ange ke foki [ʻa Kīsepa] ki ʻĪtali. Naʻe talaange [ʻe he Palesitení], “Ko e feituʻu ia maʻaú.”
“Ko e hā ʻoku totonu ke u fakahoko fekauʻaki mo e Siasí?” Ko e fehuʻi ange ia ʻa Kīsepá.
Naʻe palōmesi ange [ʻa e Palesitení], “ʻE tupulaki ʻa e Siasí ʻi ho koló. He ʻikai fiemaʻu ke ke hohaʻa ki ai.”
Naʻe taʻepauʻia ʻa Kīsepa. ʻE lava nai ke hoko moʻoni ha meʻa pehē? Ka naʻá ne fili ke falala ki he ʻEikí pea foki ki ʻĪtali. He koeʻuhí kuo teʻeki ke takihalaʻi ia ʻe heʻene tuí.
ʻI Sune 1964, naʻe sio ʻa Talaiasi Kulei taʻu hongofulu mā valu kuo hiki mai ha fāmili foʻou ki hono kaungāʻapí. ʻI heʻene lue fakalaka atu honau ʻapí, naʻá ne fakatokangaʻi ha fānau ʻoku nau vaʻinga mai ʻi tuʻa.
Naʻe kaila mai ha taha, “Ko e Fāmili Felisí kimautolu. ʻOku mau Māmonga!”
Kuo tupu hake ʻa e ʻAmelika ʻAfilika ko Talaiasí ʻi ha ngaahi siasi kehekehe mo ʻene mātuʻá, kau ai ha ngaahi siasi ʻe niʻihi naʻe tokolahi ai ʻa e matakali ʻUliʻulí. Naʻe hoko ʻene tokanga ki he tui fakalotú ke ne ako ai fekauʻaki mo e Katoliká, tui faka-Siú, ʻIsilamí mo e Tui Pahaí. Neongo ʻene nofo ʻi Kololató, ko ha siteiti ʻoku kauʻāfonua mo ʻIutā, ka naʻe siʻisiʻi ʻene ʻilo fekauʻaki mo e Kau Māʻoniʻoni ʻi he Ngaahi ʻAho Kimui Ní. Pea naʻá ne fakapapauʻi kuo teʻeki ke ne fetaulaki mo ha taha [Siasi].
ʻI he ngaahi māhina hokó, naʻá ne maheni ai mo e fāmili foʻoú. Naʻe ngāue ʻa Sione Felisi ʻi ha kautaha letiō akoako pea naʻá ne akoʻi kia Talaiasi ʻa e founga talanoa fakaletioó ʻo ngāue ʻaki ʻa e māmá mo e ongó (Morse code). Naʻe tokanga ange ʻa Papulā, ko e uaifi ʻo Sioné, ki hono vahevahe ʻene tui fakalotú. Naʻá ne foaki ange mo ʻene fānaú ha tatau ʻo e Tohi ʻa Molomoná [maʻa Talaiasi]. Naʻe momou [ʻa Talaiasi] ke toʻo ia, ka naʻá ne saiʻia ʻi he laukongá pea faifai pē peá ne kamata lau ia.
Naʻe ongo ki hono lotó ʻa e ngaahi lea ʻi he Tohi ʻa Molomoná, pea naʻá ne fakaafeʻi ʻa e ongo faifekaú ke na ʻaʻahi mai kiate ia. Kuo mālōlō ʻene tamaí ʻi he ngaahi taʻu kuohilí, pea ko ia pē mo ʻene faʻē ko ʻElisií naʻe ʻi ʻapí. Ko ha tokotaha Kalisitiane mālohi [ʻa ʻElisī] pea naʻá ne fiefia ke talanoa maʻu pē mo e kakai ʻo e ngaahi tui fakalotu kehé. Naʻe ʻikai fakakaukau ʻa Talaiasi te ne tokanga ki he haʻu ʻa e ongo faifekaú.
Ka ʻi he lolotonga ʻa e ʻaʻahí, naʻá ne nofo pē ʻi hono lokí. Pea ʻi he mavahe ʻa e ongo talavoú, naʻá ne ui ʻa Talaiasi ke haʻu.
Naʻá ne talaange, “ʻOku ʻikai ke u loto ke toe foki mai ʻa e ongo talavou ko eé.”
“He ko e hā?” Ko e fehuʻi ange ia ʻa Talaiasí.
Naʻá ne talaange, “Ko hoku ʻapi ʻeni, pea ʻoku ʻikai ke u fiemaʻu kinaua ʻi heni.”
Naʻe ʻiloʻi ʻe Talaiasi ke ʻoua te ne toe fakafehuʻia ia, ka naʻe faingataʻa ke ne tukunoaʻi ia. ʻI heʻene toe fehuʻi fakaʻosi ange ki [heʻene faʻeé] pe ko e hā naʻe ʻikai loto ai ki he ongo faifekaú, naʻe fakamatala ange [heʻene faʻeé] naʻe tuʻo taha ʻa e ʻaʻahi ange ki hono ʻapí ha ongo faifekau ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻikai fuoloa ʻena ʻi lotó kuo fehuʻi ange ʻe ha faifekau ʻe taha pe ko ha hakoʻi ʻUliʻuli ia.
Naʻá ne tali ange, “ʻIo, ko hono moʻoní ia.”
Naʻe mavahe leva ʻa e ongo faifekaú ʻo ʻikai ke toe ʻi ai ha fakamatala, pea talu mei ai mo e ʻikai ke ne saiʻia ʻi he Siasí.
Naʻe ʻikai fiemālie ʻa Talaiasi ʻi he talanoa ko ʻení. Naʻá ne tui ki heʻene faʻeé, ka naʻá ne fakakaukau foki pe naʻe makehe nai ʻa e kovi ʻo e meʻa naʻe aʻusia [ʻe heʻene faʻeé].
Naʻe hoko atu ʻa e ako ʻa Talaiasi mo e ongo faifekaú, pea naʻe ʻikai fuoloa kuó ne fie kau ki he Siasí. Ka neongo ia, ʻi he ʻaho kimuʻa ʻi hono papitaisó naʻá ne fehuʻi ange ki he ongo faifekaú kau ki he ngaahi akonaki ʻa e Siasí fekauʻaki mo e matakalí. Naʻá ne fakakaukau ki heʻene kaunga kiate iá.
ʻI ha kiʻi momeniti, naʻe ʻikai lea ha taha. Naʻe tuʻu hake leva ha taha ʻo e ongo faifekaú ʻo lue māmālie ki he tuliki ʻo e lokí ʻo sītuʻa mai kia Talaiasi. Naʻe pehē ange leva ʻa e faifekau ʻe tahá, “ʻE Brother Kulei, ko hono moʻoní he ʻikai ke ke lava ʻo maʻu ʻa e lakanga fakataulaʻeikí.”
Naʻe fakafokifā ʻa e ongoʻi ngalivale ʻa Talaiasí. Naʻá ne fakakaukau, “Naʻe moʻoni pē ʻeku faʻeé.” Te ne kau fēfē nai ʻi he taimí ni ki he Siasí? Naʻá ne ongoʻi naʻe kehe ʻa e fakafōtunga kiate iá koeʻuhí ko ʻene ʻUliʻulí, pea naʻe ʻikai ke ne loto ke vakai kiate ia ʻokú ne maʻulalo ange ʻi ha toe taha kehe.
ʻI he pō ko iá, naʻe tokoto ʻa Talaiasi ʻi hono mohengá ʻo taʻotaʻo ʻi ha monomono. Naʻá ne tui ki he ʻOtuá mo e fakamoʻui ʻoku fakafou ʻia Sīsū Kalaisí. Pea ʻi he ʻahó ni, kuó ne tui ki he meʻa kotoa pē kuo akoʻi ange ʻe he ongo faifekaú. Naʻe ʻikai ke ne ʻilo ʻi he taimi ko ʻení pe ko e hā ʻa e meʻa ke faí. Te ne fakafenāpasi fēfē nai ʻene tuí mo e meʻa kuó ne ako fekauʻaki mo e fakangatangata ʻe he Siasí ʻa e lakanga fakataulaʻeikí.
Naʻá ne fakaava hake ʻa e matapā sioʻata ofi maí, pea falala atu hono ʻulú ki ai. Naʻá ne mānava ʻaki ʻa e ʻea hauhau ʻo e poʻulí, peá ne fai ha lotu. ʻI heʻene ʻosí, naʻá ne tāpuni ʻa e matapā sioʻatá pea feinga ke mohe. Ka naʻe ʻikai ke ne mamohe pea faifai ʻo ne ongoʻi ʻoku totonu ke toe fai haʻane lotu. Naʻá ne toe fakaava ʻa e matapā sioʻatá pea kamata ke lotu.
ʻI he taimi ko ʻení, naʻe ongo mahino mai ha leʻo. Naʻe pehē mai, “Ko e ongoongolelei ʻeni kuo fakafoki maí pea ʻoku totonu ke ke kau ki ai.”
ʻI he taimi ko iá, naʻe ʻiloʻi leva ʻe Talaiasi ʻa e meʻa naʻe pau ke ne faí. ʻI he ʻaho hokó, naʻe papitaiso ia peá ne hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.