Vahe 14
Kehe ʻi he Taimí Ni
ʻI Fēpueli ʻo e 1972, naʻe loto-siʻi ʻa ʻEletā Sipenisā W. Kimipolo. Kuo ʻosi toʻo ʻe he faitoʻo kimó ʻa e kanisā ʻi hono kiá ka kuo keina ai siʻono leʻo kuo vaivaí, pea ko ʻeni kuo ʻikai ke lava ʻo lea leʻo lahi ange hono leʻó ʻi he fafaná. Naʻe toe hoko foki siʻi hōloa hono mafú ko e tupuʻanga ʻo e loto-hohaʻá mo e vaivai fakaesinó. Naʻá ne tohi ʻi heʻene tohinoá, “Ko e moʻoni ʻoku fakaʻauʻau hifo ai pē siʻeku moʻuí.”
ʻI he tokanga ʻa e Kau Palesitenisī ʻUluakí ki he hōloa siʻi moʻui ʻa ʻEletā Kimipoló, naʻa nau holoki leva ʻene taimi-tēpile fefonongaʻakí. Naʻá ne lava atu ki he fakatapui ʻo e Temipale ʻOkitení mo e Temipale Polovó, fakahoko ʻa e uiuiʻi ʻo e kau teuteu ngāue fakafaifekaú, mo faleʻi ʻa e Potungāue Hisitōlia ʻa e Siasí naʻe toki fokotuʻú, mo honau kau ngāue fakapalōfesinale tokolahí. Naʻá ne houngaʻia ke kei lava ʻo ngāue maʻá e ʻEikí ʻi he ngaahi foungá ni, ka naʻe fakautuutu ange ʻene hohaʻa naʻá ne hoko ko ha kavenga ki he Siasí.
ʻI he hōloa ange siʻono tūkungá, naʻá ne talanoa leva mo Kamila pea mo Palesiteni Hāloti B. Lī mo Palesiteni N. ʻElitoni Tena. Naʻe kau atu ki ai mo Toketā Lāsolo M. Nalesoni ke fealēleaʻaki ha faleʻi taukei fakafaitoʻo.
Naʻe pehē ʻe ʻEletā Kimipolo, “Ko ha tangata tei mate au. ʻOku ou lava ʻo ongoʻi ʻa e hōloa ʻeku moʻuí. ʻI he tuʻunga lolotonga ʻo ʻeku fakaʻauʻauhifó, ko ʻeku tuí te u lava ke moʻui ʻi ha toe māhina pē ʻe ua.”
Naʻá ne tala ki he kulupú, ʻoku ngali he ʻikai toe sai ia ʻo ka ʻikai fai ha tafa faingataʻa. Naʻe fakamatalaʻi ʻe Toketā Nalesoni, ʻa ia naʻe maheni mo e founga tafá, ko ha tafa kehekehe ʻe ua. Naʻá ne pehē, “ʻUluakí, ko e kālava lahi kuo maumaú ʻoku fiemaʻu ke toʻo kae fetongi ʻaki ha kālava ngaohi. Uá, ko e kālava toʻohema ʻi muʻa ʻoku hifo ki he konga fika ua ʻo e mafú kuo pau ke faitoʻo ke fakaleleiʻi ʻa e tafe ʻa e totó.”
Naʻe ʻeke ange ʻe Palesiteni Lī, “Ko e hā ha faʻahinga fakatuʻutāmaki ʻi he faʻahinga tafa peheé?”
Koeʻuhí ko e taʻu motuʻa ʻo ʻEletā Kimipoló, naʻe ʻikai ai ke ʻilo ʻe Toketā Nalesoni. Naʻá ne pehē, “ʻOku ʻikai haʻamau taukei ʻi he fai ʻa e ongo tafá ki he kau mahaki ʻi he toʻu ko ʻení. Ko e meʻa pē te u lava ʻo tala atú, ʻoku māʻolunga ʻaupito ʻa e fakatuʻutāmaki ʻe ala hokó.”
Naʻe fakahoko leʻo siʻi ange ʻe ʻEletā Kimipolo, “Ko ha tangata motuʻa au pea ʻoku ou mateuteu ke mate. ʻE lava ke fakamoʻui au ʻe he ʻEikí ʻi he taimí ni pē ʻo fakatatau mo Hono finangalo ke u kei moʻuí. Ka ko e hā te Ne fiemaʻu ai au ʻoku ou fakaʻau ke motuʻá ka ʻoku ʻi ai ha niʻihi te nau lava ʻo fakahoko ʻa e meʻa ʻoku ou faí pea mo lelei angé?”
Naʻe puna fakafokifā ʻa Palesiteni Lī ki ʻolunga. Naʻá ne pehē ange, “Sipenisā,” mo tukiʻi hono tukeʻi nimá ʻi hono tesí, “kuo uiuiʻi koe! He ʻikai ke ke mate! Te ke fai ʻa e meʻa kotoa ʻe fiemaʻu ke ke faí ke tokangaʻi koe pea hokohoko atu hoʻo moʻuí!”
Naʻe pehē ange ʻe ʻEletā Kimipolo, “Sai, ʻe tafa leva au.”
Hili ha māhina ʻe ua mei ai, naʻe talitali ai ʻe ha fānau fefine ʻe lauiafe ne nau kaikaila fiefia, ʻa e kau tautehina ʻOsimoní—ʻa ʻAlani, Ueini, Mēlili, Siei, mo Toni—ʻi heʻenau kaka ki he siteisi kolisiume ʻi Hemitoni, ʻi Vesīniá. Naʻe tui ʻe he kau tautehina taʻu hongofulu-mā-fā ki he taʻu uofulu-mā-ua ko ʻení ha talausese vaʻe fālahi hinehina mo ha ʻū sote ne fokotuʻu hono kolá ki ʻolunga pea mo ha ʻū maka siueli fetapaki. Ko e taimi naʻa nau kamata ai ke hiva mo faivá, naʻe kei kikī pē ʻa e kau mamatá.
Naʻe fakakaukau ʻa ʻŌlive ʻOsimoni ʻi mui ʻi he siteisí naʻe mālie ʻa e siofi ʻe he tamaiki fefiné ʻene fānau tangatá. Ko e taimi naʻá ne mali ai mo hono husepāniti ko Siaosi ʻOsimoní ʻi he Temipale Sōlekí ʻi he lolotonga ʻa e Tau Lahi Hono ll ʻa Māmaní, naʻe ʻikai haʻana teitei fakakaukau ʻe hoko ʻena fānaú ko ha kau hiva ʻiloa—pea hoko ko ha niʻihi ʻo e Kāingalotu ʻiloa taha ʻi he māmaní. Ko ʻena ongo tamaiki tangata lalahí, ʻa Vili mo Tomu, naʻe ʻikai lelei ʻena fanongó, pea naʻe feinga ai ha toketā ke fakalotoʻi ʻa ʻŌlive mo Siaosi ke ʻoua naʻa toe ʻi ai haʻana fānau. Ka naʻe maʻu ʻe he ongomātuʻá ha toe fānau ʻe toko fitu makehe, pea naʻe lelei kotoa ʻenau fanongó.
ʻI heʻenau kei īkí, naʻe ako ʻa ʻAlani, Ueini, Mēlili, Siei, mo Toni ke hiva fakafaʻafaʻahi mo nau hoko ko ha kau hiva tuʻu maʻu ʻi ha polokalama televīsone naʻe fakamafola fakafonua. Ko e taimi naʻa nau lalahi hake aí, naʻa nau fakaʻamu ke fulihi ʻenau ngaahi hiva motuʻá ke feʻunga ʻa e ongó mo e kuongá.
Ka naʻe manako ha kakai kei talavou tokolahi ia ʻi he. ongo ʻoku haʻahaʻakí mo e kītā ʻuhilá ʻi he fasi haʻuhaʻulú. Ka naʻe hohaʻa ha kau taki faka-Siasi ʻe niʻihi tokua naʻa fuʻu fakatupu moveuveu. Naʻe maʻu ʻe ʻŌlive mo Siaosi ʻa e hohaʻa tatau, ka naʻá na tui mo ʻena fānaú ʻe toe lava foki ke tuʻuaki ʻe he fasi haʻuhaʻulú ha lelei. Naʻe fakakaukau ʻa ʻŌlive ʻe lava ke hoko hono ngaahi fohá ko ha tākiekina lelei ʻi he māmaní—kapau ʻe aʻu ʻenau hivá ki he kakai totonú.
Naʻá ne faʻa talaange ki he fānau tangatá ni, “ʻOku ʻi ai hamou misiona makehe. Naʻe ʻi ai e ʻuhinga naʻe foaki atu ai ʻe he ʻOtuá ʻa e talēniti ko ʻení.”
ʻI he 1970, naʻe hiki ai ʻe he kau tautehiná ha foʻi hiva naʻe ui ko e “One Bad Apple,” (Foʻi ʻĀpele Kovi ʻe Taha) ʻo hivaʻi ʻe Mēlili mo Toni. Naʻe manakoa ʻa e foʻi hivá, ʻo ʻilolahia vave ai ʻa e kau tangatá ni. Hili iá, naʻe ngāue mālohi ʻa ʻŌlive mo Siaosi ke tokoniʻi ʻena tamaiki tangatá ke nau tauhi ʻa e ngaahi fekaú. Lolotonga ʻo e inu mo fakaʻaongaʻi ʻe he kau hiva ʻiloa kehé ʻa e faitoʻo konatapú, naʻe talangofua ʻa e kau tautehina ʻOsimoní ki he Lea ʻo e Potó. Naʻe ʻikai ke nau ō ki he ngaahi fakafiefia longoaʻá, ka naʻe fakahoko ʻe he kau tautehiná ha ngaahi efiafi fakafāmili ʻi ʻapi, maʻulotu, mo fai ha ngaahi fakataha lotu ʻi heʻenau ngaahi fononga konisetí.
Hili ʻenau hoko ʻo manakoá, naʻe talanoa ʻa e kau tautehiná mo Palesiteni Siosefa Filitingi Sāmita, ʻo ne fakamanatu ange honau fatongia ke vahevahe maʻu pē ʻa e ongoongoleleí. Naʻe fakamanatu kimui ange ʻe he tokoni ko Hāloti B. Lií kiate kinautolu ʻoku siofi kinautolu ʻe māmani pea ʻe ala fakamāuʻi ʻa e Siasí ʻo makatuʻunga ʻi heʻenau ngaahi tōʻongá. Naʻá ne fakalotolahiʻi kinautolu ke nau fakaʻehiʻehi mei he ngaahi tūkunga fakatuʻutāmaki fakaeangamaʻá pea taukaveʻi ʻa e meʻa naʻa nau tui ki aí.
Naʻá ne akoʻi kinautolu, “ʻE ʻi ai maʻu pē ha fili ʻe ua. Fili maʻu pē ʻa e meʻa te ne ʻomi koe ke ke ofi taha ai ki he puleʻanga fakasilesitialé.” Peá ne lau leva ʻa e folofola ʻa e Fakamoʻuí mei he Malanga ʻi he Moʻungá: “Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻa ia ʻoku ʻafio ʻi he langí.”
Naʻe ʻikai fuoloa kuo fakafekauʻaki ʻe ha kakai tokolahi ʻi he ʻIunaiteti Siteití ʻa e Siasí mo e fāmili ʻOsimoní. Ko e taimi naʻe talanoa ai ʻa ʻŌlive mo e kau faiongoongó, naʻe meimei ke ne ʻohake maʻu pē ʻa ʻene tui fakalotú mo hono ivi tākiekina ki he tōʻonga moʻui hono fāmilí mo e mūsika fakafiefiá. ʻI heʻenau talanoa mo e kau faiongoongó, naʻe talanoa tauʻatāina maʻu pē foki ʻa e fānau tangatá ia ki heʻenau tui fakalotú, pea naʻe faʻa meili mai ʻe honau kau muimuí ha ʻū tohi mo ha ngaahi fehuʻi fekauʻaki mo e Siasí. Koeʻuhí ko e tupu vave ʻa e Siasí ʻi he ʻIunaiteti Siteití, naʻe ʻi ai ha ngaahi uooti mo ha ngaahi kolo ʻi he ngaahi kolo lalahí naʻe faʻa tā ai ʻa e kau tautehina ʻOsimoní, ʻo faingofua ange ai ki he kakaí ke nau fetuʻutaki mo e kau faifekaú pea mo feʻiloaki mo e Kāingalotu kehé.
Ko hono moʻoní, naʻe fakaʻaliʻali ʻe he Church News ha ngaahi konga mei he ʻū tohi ʻa e kakai naʻa nau ʻilo ʻa e Siasí ʻo fakafou ʻi he fāmili ʻOsimoní. Naʻe kamata muimuiʻi ʻe ha tokotaha ʻa e Kau Māʻoniʻoni ʻi he Ngaahi ʻAho Kimui Ní, hili ʻene mamata ki he fiefia mo e vāofi ʻa e fāmili ʻOsimoní. Naʻa nau tohi ʻo pehē: “Naʻá ku ʻilo naʻe ʻi ai haʻane fekauʻaki mo ʻenau tui fakalotú.”
Lolotonga ha koniseti ʻi Vesīniá, naʻe kau atu ai ʻa e siʻisiʻi taha ʻo e fāmili ʻOsimoní, ʻa e taʻu valu ko Simí, ki hono ngaahi tokouá ʻi ha foʻi hiva ʻi he funga siteisí. Naʻe nofo pē ʻa ʻŌlive ʻi mui ʻi he siteisí mo ʻene kiʻi taʻahine taʻu hongofulu mā ua ko Malií, ʻo tali fehuʻi ki ha taha faiongoongo ʻi he feituʻú.
Naʻe fakamatalaʻi ʻe ʻŌlive, “Naʻá ku feinga ke tatau pē ʻenau mavahé mo ʻenau nofo ʻi ʻapí.” Naʻá ne fakakaukau ʻoku vāofi ange ʻa e fāmilí ʻi he taimí ni ko ʻenau folau fakatahá. Ko hono moʻoní, naʻe lolotonga fengāueʻaki fakataha ʻa e kau tautehiná ʻi ha ʻalapama faingataʻa foʻou—ko ha meʻa naʻe loloto mo fekauʻaki fakatāutaha ange ʻi ha toe meʻa kuo nau fakahoko.
Naʻá ne pehē, “ʻOku nau fakahoko ʻa e meʻa naʻe fakataumuʻa ʻe he ʻOtuá ke nau faí.” “Ko e longaʻi fānau naʻa nau tohoakiʻi maí ʻoku nau kumi kiate kinautolú he ʻoku nau fiemaʻu ha meʻa lahi ange mei heʻenau moʻuí.”
ʻI he ʻosi ha māhina ʻe taha mei ai, ʻi he pongipongi ʻo e ʻaho 12 ʻo ʻEpeleli 1972, naʻe teuteu ʻa Toketā Lāsolo M. Nalesoni ke ne fakahoko ʻa e tafa mafú. Kuó ne ʻosi fakahoko ha ngaahi tafa ʻe laungeau ʻi heʻene moʻuí, ka naʻe teʻeki fakahoko ki ha ʻaposetolo ʻa e ʻEikí. Pea neongo naʻá ne ʻosi lotua ʻa e founga ngāue ʻe fai kia ʻEletā Kimipoló mo fakalaulauloto ki he founga lelei taha ke fakahoko ai iá, ka naʻe ʻikai ke ne loto-falala te ne lava pe ʻe lava ʻe ha toe toketā faitafa kehe ʻo fakahoko lelei ia.
ʻI he kole ʻa Toketā Nalesoní, naʻá ne maʻu ai ha tāpuaki meia Palesiteni Lī mo Palesiteni Tena ʻi he ʻaho kimuʻá. Naʻá na hilifaki hona ongo nimá ki hono ʻulú, pea tāpuakiʻi ia ke ne lava ʻo fakahoko ʻa e tafá ʻo ʻikai ha fehālaaki. Naʻá na talaange ʻoku ʻikai ha ʻuhinga ia ke manavasiʻi ai ʻi heʻene ongoʻi taʻe-feʻungá. Naʻe ʻohake ia ʻe he ʻEikí ke ne fakahoko ʻa e tafá ni.
Naʻe kamata ʻa e tafá ʻi he hoko ʻa e valú. Naʻe fakamohe ʻe ha toketā fakaongonoa ʻa ʻEletā Kimipolo, kae tuʻu teuteu pē ʻa e tokoni ʻo Toketā Nalesoní mo ha kau neesi pea mo e kau mēmipa kehe ʻo e timi tafá. Naʻe ofi mai pē ha mīsini ki he mafú mo e maʻamaʻá ʻi he tafaʻakí, ʻo teu ke fakamānava mo pamu ʻa e toto ʻo ʻEletā Kimipoló.
ʻI he fakahinohino ʻa Toketā Nalesoní, naʻe ngāue lelei ʻa e timí ke fetongi ʻa e kālava kuo maumaú ʻaki ha kālava ngaohi—ko ha kiʻi foʻi pulu pelesiteiki naʻe ʻi ha kiʻi ʻā ukamea. Ko e lahi ʻo e meʻá ni naʻe meimei tatau mo e vaeua ʻo e fua takai ʻo hono motuʻa tuhú.
Hili hono fokotuʻu ʻo e kālavá, naʻe kamata leva ʻa Toketā Nalesoni ke ne tuitui. Naʻá ne fakahoko māmālie ʻa e matahoko ʻo e kālavá ki he kakanó, ʻaki ʻa e mataʻituitui totonu takitaha.
Pea toki hiki leva ʻene tokangá ki he fakaava ʻo e meʻa naʻá ne taʻofi ʻa e tafe ʻa e totó ki he mafú. Naʻá ne maʻu ha halanga toto ʻoku tokoto hifo ʻi he fatafata ʻo ʻEletā Kimipoló, ʻo ne tuʻusi hono konga ki laló pea fakahoko ʻa e kālavá ʻi lalo pē ʻi he halanga-toto naʻe mapuní. Naʻe toe tuitui leva ʻe he toketaá, ʻaki ha fanga kiʻi matatuitui mataiiki kae ʻoua kuo pipiki moʻoni ʻa e kālava moʻui leleí.
ʻI heʻene ngāué, naʻe fakatumutumu ʻa Toketā Nalesoni ʻi he ola lelei ʻa e tafá. Naʻe fiemaʻu ai ha fanga kiʻi ngāue iiki ʻe lauiafe, ʻo takitaha fiemaʻu ai ha founga ngāue faingataʻa moʻoni. Ka naʻe ʻikai ke hoko ha kiʻi fehālaaki ʻe taha. Ko e taimi naʻe fiemaʻu ke toʻo ai ʻa ʻEletā Kimipolo mei he mīsini ki he mafú mo e maʻamaʻá, hili ia ha houa ʻe fā pe lahi ange mei he kamata ʻo e tafá, naʻe sokiʻi ʻe he kau ngāue fakafaitoʻó hono mafú ʻaki ha ʻuhila, pea foki mai leva ia ʻo ngāue.
ʻI he ʻosi ʻa e tafá, naʻe telefoni ʻa Toketā Nalesoni kia Palesiteni Lī. Naʻe fakatahataha ʻa e Kau Palesitenisī ʻUluakí mo e Kōlomu ʻo e Toko Hongofulu Mā Uá ʻi he temipalé, ʻo ʻaukai mo lotua ʻa ʻEletā Kimipolo. ʻI he fakamatalaʻi ʻe Toketā Nalesoni ʻa e ngāué, naʻá ne talaange kia Palesiteni Lī naʻá ne ongoʻi hangē ha taha teka peisipolo kuó ne toki tekaʻi ha vaʻinga ikuná. Naʻe fakalahi ʻe he ʻEikí hono potó, ʻo lava ai ke ne fakahoko ʻa e tafá tatau tofu pē mo e palōmesi ʻi he faingāue ʻa e lakanga fakataulaʻeikí.
Naʻe fiefia lahi fau ʻa Palesiteni Lī. Naʻá ne talaange ki he kau ʻaposetoló, “ʻOku fakalakalaka lelei ʻaupito ʻa Misa Kimipolo pea kuo ʻosi toʻo ʻa e mīsini ki he mafú.” “Kuo tali ʻe he ʻEikí ʻetau lotú.”
ʻI he mahina tatau pē, lolotonga ʻo e foki meʻalele mai ʻi Lio ti Senelo ʻi Palāsila, ʻa e tokotaha taʻu fāngofulu mā taha ko Helevēsio Mātiní mei he ngāué, naʻe pau ke tuʻu ʻi he fihituʻu ʻa e halá. Naʻe hangē naʻe ʻikai toe ʻi ai ha ngataʻanga ʻo e ngaahi kā naʻe ʻi muʻa ʻiate iá. pea naʻe ʻikai ngali ʻe vave haʻane ʻatā ʻa e tuʻu ko ʻení.
Naʻe fakaʻaongaʻi ai ʻe Helevēsio ha kiʻi taimi ke fakakaukau ki he ngaahi taʻe-fiemālie fakalaumālie naʻá ne ongoʻi ʻi ha ngaahi taʻu lahi. Talu ʻene kei taʻu hongofulu tupu, mo ʻene ngāue mālohi ke mavahe hake mei he masivá. Naʻe liʻaki ʻa e akó ʻi hono taʻu hongofulu mā tahá, pea hoko leva ko ha taha toli moli. Kimui ange aí, hili ʻene hiki mo hono fāmilí ki Lio, naʻá ne ngāue ko ha taha tufa tohi mo e ngaahi fakamoimoi. Naʻe falala ki ai hono kau pulé mo fakahoungaʻi ʻene faivelengá. Naʻe fāifai pea fetaulaki pea mali mo Luta Toulino ti ʻĀsisi, ʻo ne fakalotolahiʻi ia ke ako poʻuli.
Hili ha ngaahi taʻu ʻo e vilitaki ʻa Helevēsió, naʻe maʻu haʻane tipiloma mei he ako māʻolungá pea ʻosi mei he ʻunivēsití mo ha mataʻitohi ʻi he tauhi tohí. Pea kamata ngāue leva ki ha kautaha lolo, pea aʻu ki ha taimi naʻe hoko ai ko e ʻulu ki he potungāué mo ha kau ngāue totongi ʻe toko uangeau tupu.
Lolotonga iá, naʻe fiefia mo Luta pea mo ʻena ongo kiʻi fānaú ʻi he ngaahi fakaafe ki he ngaahi meʻa fakafiefia mo e kakai māʻolungá. Ko ha tōʻonga moʻui ia naʻe fuʻu lelei ange ʻi ha meʻa naʻe lava ke fakakaukau ki ai ʻa Helevēsió.
Neongo ʻa e lavameʻa ʻa Helevēsió, ka naʻá ne kei ongoʻi pē ʻ ʻoku ʻikai ke ne lava ha meʻa. Naʻá ne ʻosi ʻahiʻahiʻi mo Luta ha ngaahi tui fakalotu kehekehe, kau ʻi ha ngaahi tōʻonga tui fakatēvolo mo na vakaiʻi kimui ha ngaahi siasi faka-Kalisitiane. Tatau ai pē pe ko e fē naʻá na ō ki aí, naʻá na ongoʻi ʻoku ʻi ai pē meʻa ʻoku mole.
ʻI he tangutu ʻa Helevēsio ʻi he fihi ʻa e meʻalelé, naʻe fakalalahi ʻene taʻe-fiemāliá. Naʻá ne fakaava leva ʻa e matapā ʻo e kaá kae hifo ki tuʻa ki he halá. Naʻá ne lotu pē, “ʻE hoku ʻOtua, ʻoku ou ʻiloʻi ʻokú ke ʻi ha feituʻu, ka ʻoku ʻikai ke u ʻilo pe ko e fē. ʻOku malava nai, ʻoku ʻikai nai ke ke ʻafioʻi ʻa e puputuʻu ʻoku ou foua mo hoku fāmilí? ʻOku malava nai, ʻoku ʻikai nai ke ke ʻafioʻi ʻoku mau fekumi ki ha meʻa ka ʻoku ʻikai ke mau teitei ʻilo pe ko e hā ia? Fēfē nai ke ke tokoniʻi kimautolu?”
Ko e taimi naʻe ʻosi ai ʻene tautapa ko ʻení, naʻe kamata ke ngaʻunu ʻa e ngaahi meʻalelé. Naʻe foki ʻa Helevēsio ki heʻene kaá ʻo hoko atu, ʻo ʻikai fuoloa kuo ngalo ʻa e meʻa naʻe hokó.
ʻOsi ha uike ʻe ua, kuo maʻu ʻe he fāmili Mātiní ha kaati naʻe mono mai ʻi honau lalo matapaá. Naʻe ʻi he tafaʻaki ʻe taha ʻa e tā ʻo e Fakamoʻuí, pea ʻi he tafaʻaki ʻe tahá naʻe ʻi ai ha taimi-tēpile ki he lotu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe fakatupu fifili kia Helevēsio ʻa e kātí, pea ʻalu mo ia ki he ngāué ʻi he ʻaho hono hokó.
Naʻe talaange ʻe ha taha ʻo ʻene kau ngāué, “Pule, ʻoua te ke ʻalu ki ai. Ko e siasi ia ʻa e kakai ʻAmelika Tokelaú. Kapau ʻoku ʻikai ke te ʻiloʻi ha mēmipa ai, he ʻikai ke u teitei feinga au ke ʻalu ki ai.”
Naʻe tui ʻa Helevēsio ki heʻene tokotaha ngāué pea tukunoaʻi leva ʻene tokanga ki he Siasí. Ka ʻi ha taimi nounou mei ai, kuo tuʻu atu ha ongo faifekau, ko Tōmasi Mekinitaea mo Sitivi Lisiate, ʻi he matapā ʻo e fāmili Mātiní. Ko e taimi naʻá na hū atu aí, naʻe fakatokangaʻi ʻe Helevēsio ha ongo nonga naʻá ne fakafonu honau ʻapí.
Naʻe fakafeʻiloaki ange ʻe he ongo faifekaú kinaua. ʻO na pehē, “ʻOkú ma maʻu ha tāpuaki ki ho fāmilí kapau te mou fiemaʻu ha taha.
Tali ange ʻe Helevēsio, “ʻIo.” Ka ko e ʻuluakí naʻe ʻi ai ʻene ngaahi fehuʻi.
Naʻa nau talanoa ki ha ngaahi fakamatala fakalūkufua fekauʻaki mo e Siasí, pea fai leva ʻe Helevēsio ha fehuʻi faingataʻa—ko ha meʻa naʻe mahuʻinga ki ai ko ha hako ʻo e kakai pōpula mei ʻAfiliká. Naʻá ne pehē, “Koeʻuhí ʻoku hetikuota homou siasí ʻi he ʻIunaiteti Siteití, ko e hā ʻa e fakafōtunga hoʻomou tui fakalotú ki he kakai ʻUliʻulí? ʻOku fakangofua ke nau hū ki he lotú?”
Naʻe hā ngali mā ʻa Mekinitaea. Ka naʻá ne pehē ange, “Tangataʻeiki, ʻokú ke fie ʻilo moʻoni?”
Naʻe tali ange ʻe Helevēsio, “ʻIo.”
Naʻe fakamatalaʻi leva ʻe ʻEletā Mekinitaea ʻe lava pē ke papitaiso ʻa e kakai ʻUliʻulí mo nau kau ko e kau mēmipa ʻo e Siasí ka naʻe ʻikai ngofua ke nau maʻu ʻa e lakanga fakataulaʻeikí mo hū ʻi he temipalé. Naʻe tali ʻe Helevēsio mo Luta ʻene fakamatalá peá na fai ha ngaahi fehuʻi lahi ange fekauʻaki mo e lakanga fakataulaʻeikí pea mo e ongoongoleleí. Naʻe tali lelei mo mahino ʻe he ongo faifekaú ʻa e fehuʻi takitaha.
ʻI he taimi naʻe mavahe ai ʻa e ongo faifekaú, kuo ʻosi ha houa ʻe fā mo e konga. ʻI he pō ko iá, naʻe talanoa ʻa Helevēsio mo Luta ki he meʻa naʻe akoʻi ʻe he ongo faifekaú. Naʻá na mālieʻia ʻi he lēsoni ʻa e ongo faifekaú mo ongoʻi kuo tali kakato ʻena ngaahi fehuʻí.
ʻOsi ha taimi nounou mei ai, kuo ō ʻa e fāmili Mātiní ki heʻenau fuofua houalotu sākalamēnití. Na‘e fakaʻofo‘ofa ʻa e houalotú, pea naʻe talitali lelei mo ʻofa kinautolu ʻe he kāingalotú. ʻIkai fuoloa, kuo afe atu ʻa e palesiteni fakakoló ki he ʻapi ʻo e fāmili Mātiní ʻo fakafeʻiloaki kinautolu ki ha ongo tangata ʻe hoko ko ʻenau ongo faiako fakaʻapí.
ʻI he hoko atu ʻo e maʻulotu ʻa e fāmilí mo talanoa mo e ongo faifekaú, naʻe tupulaki ʻenau tuí. ʻI ha ʻaho ʻe taha, naʻa nau ō ai ki ha fakataha fakaʻofoʻofa ʻa e Vahefonua Lio ti Seneló, pea nau ʻiloʻi leva ʻoku fiemaʻu ke nau kau ki he Siasí.
Naʻe pehē ʻe he tokotaha taʻu hongofulu mā tolu ko Mākisí ʻi he foki mai ʻa e fāmilí mei he Lautohi Faka-Sāpaté ʻi ha uike ʻe taha mei ai, “ʻOku tau kehe ʻi he taimí ni. ʻOku maama homou fofongá, pea ʻoku ou ʻilo ʻa e meʻa ʻoku tupu mei aí—ko e ongoongolelei ʻo Sīsū Kalaisí.”
Naʻe afeʻi ʻe Helevēsio ʻa e kaá ke tuʻu ʻi he veʻehalá, ʻo tangi loʻimata ai ʻa e fāmilí. Ko e taimi naʻe foki ai ʻa e fāmili Mātiní ʻi he efiafi ko iá ki he houalotu sākalamēnití, naʻa nau talaange ki he palesiteni fakakoló, kuo nau mateuteu ke papitaiso.
ʻI ha ʻaho ʻe taha ʻi he meimei taimi ko ʻení, naʻe ʻeke ange ai ʻe he pule ʻo e Kau ʻOsimoní, ‘Eti Lefilā ki he fāmilí pe ʻoku nau fie hiva ʻi ʻIngilani. Naʻe hoko ʻa e foʻi hiva ʻa e kau tautehiná “Down by the Lazy River” mo e lekooti hiva toko taha ʻa Toni ko e “Puppy Love” ʻo manakoa ʻi he ʻIunaiteti Siteití mo Kānata. Naʻe hangē naʻe ʻilo ʻe he taha kotoa ʻi ʻAmelika Noate ʻa e kau tautehina ʻOsimoní, pea ko ʻeni kuo toe fakatokangaʻi foki ʻe he kau taʻu hongofulu tupu ʻi ʻIulopé.
Naʻe pehē ʻe ʻŌlive, “ʻIo, ka ʻi he tuʻunga pē taha—ke u lava ʻo feʻiloaki mo e kuiní.”
Ko ʻene tukuhua pē, ka naʻe fakamātoato ʻa ʻEti ia ʻi heʻene leá. Naʻá ne pehē, “Te u vakaiʻi naʻa lava ke aleaʻi.”
ʻOsi ha taimi nounou mei ai, kuo fakahoko ange ʻe ʻEti ki he fāmilí kuó ne fokotuʻutuʻu ha fakaʻaliʻali kia Kuini ʻElisapeti II mo hono husepānití, Pilinisi Filipe. Pea ʻe maʻu ʻe ʻŌlive ʻene fakaʻamú. Naʻá ne maʻu mo Siaosi ha fakaafe ke feʻiloaki mo ʻena ʻāfifió ʻi he lolotonga ʻo e kiʻi mālōloó.
Naʻe ʻikai ke faʻa-faʻa-tui ki ai ʻa ʻŌlive. Naʻá ne fakatau leva ha kofu totonu mo ha ongo kofunima hinehina ki he meʻá ni. Naʻá ne toe fakatau foki mo ha ngaahi folofola foʻou mo pole ke ne foaki ia ko ha meʻaʻofa ki he kuiní.
Naʻe tūʻuta ʻa e Kau ʻOsimoní ʻi Lonitoni ʻi Mē pea fakaʻaongaʻi ha ngaahi ʻaho siʻi ke teuteu ai ʻenau ngaahi hivá. Naʻe fakahoko ʻa e polokalamá ʻi he ʻaho 22 ʻo Mē 1972, ʻi he London Palladium, ko ha fale faiva ʻiloa ʻi he Tuliki Fakahihifo ʻo e koló. Ko ha koniseti tokoni naʻe fakamafola ʻi he televīsoné ʻo kau ai ha kau hiva, kau faiva heleʻuhila, mo ha kau fakakata mei Pilitānia mo e ʻIunaiteti Siteití.
Naʻe tangutu pē ʻa Siaosi mo ʻŌlive ʻi he kakaí pea mo Malī ʻi he lolotonga ʻo e ʻuluaki konga ʻo e konisetí. ʻI he kiʻi mālōloó, naʻe tātaaʻi mai ʻe Liu Kuleiti ko e tangata naʻá ne fokotuʻutuʻu ʻa e fakaʻaliʻalí, ʻa e uma ʻo Siaosí. Peá ne pehē ange, “Haʻu vave.”
Naʻe tuʻu leva ʻa Siaosi mo ʻŌlive ʻo muimui vave atu ʻia Liu. Kimuʻa pea aʻu ki he ngataʻanga ʻo e ʻotú, kuo ʻiloʻi ʻe ʻŌlive naʻá ne tuku pē ʻene meʻaʻofa ki he kuiní ʻi hono lalo seá. ʻI ha kihiʻi taimi nounou, naʻá ne fakakaukau ke tuku pē ai ʻa e ngaahi folofolá. Ka naʻá ne fakaʻaongaʻi ha taimi lahi ʻi he pō kimuʻá ʻi hono fakaʻilongaʻi mo fakafekauʻaki ʻa e ngaahi fakamatala naʻe saiʻia taha aí maʻá e kuiní. Pea naʻá ne ʻilo he ʻikai ke ne teitei toe maʻu ha faingamālie. Naʻá ne tafoki leva ʻo lele ki hono tangutuʻangá ʻo toʻo mai ʻa e tohí.
Ko e taimi pē naʻe tataki atu ai ʻe Liu ia mo Siaosi ki he ʻafioʻanga ʻo e kuiní, naʻe fakafeʻiloaki atu ʻa ʻŌlive ki heʻena ʻāfifió, punou, pea kiʻi fakataufolofola nounou mo kinaua, pea hoko atu ia kae ʻikai ʻoange ʻene meʻaʻofá. Naʻe sio mai kimui ʻo sio ʻoku tuʻu ʻa Siaosi ia ʻo talanoa mo Pilinisi Filipe kau ki heʻena manako ʻi he tulimanú, mo e toutaí.
Naʻá ne fakatokangaʻi ha mēmipa ʻe taha ʻo e fale ʻo e kuiní ʻoku tuʻu pē ʻo ofi mai, pea fakalea atu ki ai ʻa ʻŌlive mo ʻene ngaahi folofola ʻe fā ʻoku fakaʻaongaʻi ʻe he Siasí. Naʻá ne kole ange, “Te ke lava nai ʻo ʻoange ki he kuiní ʻa e kiʻi meʻaʻofa ko ʻení, hili haʻaku mavahe?”
Naʻe sio ʻa e tangatá kia ʻŌlive pea malimali. Naʻá ne pehē ange, “ʻIlisapeti!” “Naʻe haʻu ʻa Mīsisi ʻOsimoni mo ha meʻaʻofa maʻau.”
Naʻe folofola ange ʻa e kuiní, “Fakaʻofoʻofa moʻoni.” “Kātaki ʻo haʻu ki heni.”
Naʻe mā ʻa ʻŌlive, ka naʻá ne talangofua . Naʻá ne fakamatala ange, ʻo ʻikai ke ne ʻilo pe naʻe maʻu mei fē ʻene leá, “Naʻá ku fie ʻomai ha meʻaʻofa maʻau.” . ʻOku faingataʻa ke te ʻilo ha meʻa ke foaki ki ha kuini, ko ia naʻá ku ʻomai ai maʻau ʻemau kiʻi koloa mahuʻinga tahá.”
Naʻe folofola ange ʻa e kuiní, “Te ke lava ʻo māvae mo ia?”
Pehē ange ʻa ʻŌlive, “ʻIo, ʻoku ou maʻu ha meʻa ʻe taha, tatau tofu pē mo ia.”
Naʻe ʻafio ʻa e kuiní ki he ngaahi folofolá. “Malō ʻaupito, Mīsisi ʻOsimoni. Peá ne folofola ange, “Te u mataʻikoloa ʻaki ʻeni. Te u tuku ia ʻi heʻeku funga laupapá.”
Naʻe nonga hifo ʻa ʻŌlive pea kiʻi talanoa nounou mo e kuiní fekauʻaki mo hono fāmilí. Naʻá na foki mai leva ki hona nofoʻangá ke mamata ʻi he hiva ʻa e tamaiki tangatá.
Kimui angé, ʻi he teuteu ʻa e fāmilí ke nau puna ʻo fokí, naʻe haʻu ʻa ʻEti Lefilā kia ʻŌlive. ʻO ne fehuʻi ange, “Ko e hā haʻo fakakaukau?”
Tali ange ʻe ʻŌlive, “Ko ha meʻa fakafiefia ia ʻi he moʻuí. Naʻe lava ke u foaki ange haʻane Tohi ʻa Molomona.”
“Naʻá ke hā?” Ko e lea ia ʻa ʻEtí, pea ʻasi ʻene taʻe-fiemālié. “Mahalo ko e meʻa kovi taha ia kuó ke malava ke fai.” Naʻá ne fakamatalaʻi ange ʻi heʻene hoko ko e ʻulu ʻo e Siasi ʻIngilaní, naʻe ʻikai ke ʻi ha tuʻunga ai ʻa e kuiní ke ne tali ʻa e ngaahi akonaki ʻo e Tohi ʻa Molomoná.
Naʻe uesia ʻe he ngaahi lea ʻa ʻEtí ʻa ʻŌlive. Naʻe ʻikai ʻuhinga ia ke ne fakamamahiʻi ha taha. Naʻá ne tui pē ia naʻe ʻi ai ha totonu ʻa e kuiní ke fanongo ki he ongoongolelei kuo fakafoki maí ʻo tatau mo e taha kotoa. Kuó ne fakahoko moʻoni nai ha meʻa hala?
Ko ʻene maau pē heka ʻa e fāmilí ʻi he vakapuná pea nonga ʻa e taha kotoá, naʻe tangutu leva ʻa ʻŌlive ʻo kamata lau ʻene folofolá. Naʻe fakaava ʻa e ngaahi pēsí, pea nofo ʻene tokangá ʻi he Tokāteline mo e Ngaahi Fuakava 1:23: “Koeʻuhí ke lava ʻo malanga ʻaki ʻa e kakato ʻo ʻeku ongoongoleleí ʻe he kau vaivaí mo e kau māʻulaló ki he ngaahi ngataʻanga ʻo e māmaní, pea ʻi he ʻao ʻo e ngaahi tuʻí mo e kau pulé.”
Naʻe fakafiemālieʻi ʻe he ngaahi leá ni ʻa ʻŌlive. Naʻe mahuʻi atu ʻene veiveiuá, peá ne ʻilo naʻá ne fai ʻa e meʻa totonu.
ʻI he efiafi ʻo e ʻaho 15 ʻo Sune 1972, naʻe malimali ʻa e tokotaha taʻu hongofulu mā valu ko Maeta Holiteí ʻi heʻene tuʻu fakataha mo ha fānau ako teu ʻosi ʻe toko nimangeau tupu ʻi ha fale vaʻinga ʻi Kalefōnia Sauté. ʻI ha ngaahi māhina siʻi pē, te ne maʻu ai mo hono ngaahi kaungāakó ʻenau tipilomá ʻi he ako māʻolungá pea kamata leva ʻa e tuʻunga hono hoko ʻenau moʻuí. Naʻa nau tatā mo pulupulu tatau, kae lanu kulokula ʻa e fānau ako fefiné pea lanu ʻuliʻuli ʻa e fānau ako tangatá.
Naʻe ʻuhinga kia Maeta kuo mei ʻosi hono taimi ʻi he Indian Student Placement Program (Polokalama Tokoni ki he Tokotaha Ako ʻInitiá). He ʻikai fuoloa ʻe mavahe mei hono fāmilí ke kamata ha moʻui foʻou ʻiate ia pē. Pea hangē ko ha kau ʻosi tokolahi mei he polokalamá, naʻá ne palani ke hū ki he ʻUnivēsiti Pilikihami ʻIongí. Naʻe lolotonga ako ha Kakai ʻInitia ʻAmelika ʻe meimei nimangeau tupu ʻi BYU, ko honau tokolahi tahá ko e kau Navahō ʻo hangē ko Maetá. Naʻe foaki ʻe he ʻapiakó ha ngaahi sikolasipi lahi ki he fānau ako ko ʻení, pea naʻe tokoni ʻa e ongomātuʻa ohi ʻa Maeatá ke tohi ki he ngaahi tokoni ko ʻení.
Naʻe ʻilo ʻe Maeta ʻe kei tokoniʻi pē ia ʻe he fāmili Pelekí. Ko e taimi naʻe haʻu ai ke nofo mo kinautolu ʻi he taʻu ʻe fā kimuʻá, naʻa nau ʻai ia ke hangē pē haʻana taʻahine totonú. Naʻa nau ʻoange ha ʻapi malu mo tokoni ke ne ongoʻi, ko ha konga ia ʻo ha fāmili ʻofa, ko e fuofua taimi ia ʻi heʻene moʻuí. Pea neongo naʻe kau fuoloa ia ki he Siasí pea nau toki nofó, ka naʻa nau fakahaaʻi ange ʻa e tuʻunga ʻe lava ke aʻusia ʻe ha fāmili, kapau ʻe fakatefito ʻi he ngaahi akonaki ʻa Sīsū Kalaisí.
Naʻe ʻikai ke maʻu ʻe he fānau kotoa ʻi he polokalamá ha faʻahinga aʻusia lelei pehē mo honau ngaahi fāmili ohí. Naʻe ʻi ai ha fānau ako ia ʻe niʻihi naʻe ʻikai ke nau ongoʻi ʻoku talitali lelei kinautolu ki honau ngaahi ʻapi ohí pe vālelei mo ʻenau ngaahi mātuʻa ʻohí pe fānaú. Ko ha niʻihi naʻe ʻikai ke nau tali ʻa e feinga ʻa honau ngaahi fāmili ohí ke fakataukeiʻi kinautolu ki he ngaahi anga fakafonua naʻe ʻikai ke nau tupu mo iá. Taimi tatau pē, naʻe maʻu ʻe ha fānau ako ʻe niʻihi ha ngaahi founga ke fakatou fakamahuʻinga ai honau tukufakaholó pea mo ʻenau aʻusia ʻi he polokalamá. Naʻa nau foki ki honau koló, ʻo moʻui ʻi ha moʻui lavameʻa ko e kāingalotu ʻo e Ngaahi ʻAho Kimui Ní ai.
ʻI he tafaʻaki ʻa Maetá, naʻe kei uesia pē ia ʻe heʻene aʻusia fakamamahi ʻi heʻene kei siʻí. Naʻe ʻikai ke ne fiemaʻu ʻa e faʻahinga moʻui ʻa ʻene ongomātuʻá pe ongo kuí. Ka, naʻe fakalotolahiʻi ia ʻe Vena, ke ne fakamahuʻingaʻi hono tukufakaholo faka-Navahoó. Naʻe talaange ʻe Vena ʻi ha meʻa ʻe taha, “ʻOku totonu ke ke laukau ʻaki pe ko hai koe. ʻOku ʻafioʻi ʻe he ʻOtuá ʻokú ke mahuʻinga he ko e Tohi ʻa Molomoná ʻoku fekauʻaki ia mo ho kakaí.” Pea hangē ko ha Kāingalotu tokolahi ʻi he taimi ko iá, naʻe mahino kia Vena ko e ngaahi palōmesi ʻo e Tohi ʻa Molomoná ʻoku fai ia ki he Kakai Tupuʻa ʻo ʻAmeliká. Ko e taimi naʻá ne sio ai kia Maetá, naʻá ne sio ki ha hako ʻo Līhai mo Selaia, ʻoku ʻi ai ʻene totonu ki he ngaahi tāpuaki ʻo e fuakavá.
Naʻe ʻosi talaange ʻe Vena, “Maeta, ʻoku ou fiemaʻu ʻeni maʻau. ʻOku ou fiemaʻu koe ke ke mali ʻi he temipalé ʻi ha ʻaho.” Pea ʻoku ou fiemaʻu ke ke kei ʻalu pē ki he lotú, mo fiemaʻu ke ke ʻilo ʻokú ke mahuʻinga, pea ʻoku mau ʻofa ʻiate koe.”
ʻI he maʻu ʻe Maeta ʻene tipilomá, naʻe teʻeki pē ke mahino kakato kiate ia, pe te ne tali ʻa e meʻa kotoa naʻe akoʻi ange ʻe Vená. Pea neongo ʻene saʻia ʻi hono fāmili ohí, ka naʻe ʻikai ke ne ʻilo pe ʻe lava ke ne maʻu ha mali fiefia mo hano fāmili pē ʻoʻona. Hili ʻene sio tonu ʻi he vete ʻa ʻene ongomātuʻá mo e faingataʻaʻia siʻene faʻeé ʻi he feinga ke tauhi siʻene fānaú, naʻe ʻikai ke mahuʻingaʻia ia ʻi he malí pe ohi hake ha fāmilí.
ʻI he hili ʻo ʻene ʻosi mei he akó, naʻe ʻilo ʻe Maeta kuo tali ʻene tohi kole ki BYU. Pea ʻi heʻene heka ʻi he pasí ki Polovó, naʻá ne fakakaukau ki hono kahaʻú—pea mo ʻene tuí. Naʻe hoko ʻa e ʻalu ki he lotú mo e seminelí ko ha konga mahuʻinga ʻo e Indian Student Placement Program (Polokalama Tokoni ki he Tokotaha Ako ʻInitiá). Ka naʻá ne fiemaʻu ʻa e ongoongolelei kuo fakafoki maí ke hoko ko ha konga ʻo hono kahaʻú.
Naʻá ne fakakaukau, “Kapau te u hū ki BYU, ʻoku ou fakakaukau pe ko e hā ʻa e meʻa ʻoku fiemaʻu ke u faí. ʻOku totonu nai ke u hoko ko ha konga ʻo e Siasí pe ʻoku totonu ke ʻoua?”
Naʻá ne kamata ke fakakaukau ki he ngaahi lēsoni naʻá ne ako meia Vena mo Sipenisaá. Naʻe ʻikai faingofua ʻene moʻuí, ka kuo tāpuekina ia ke nofo mo kinautolu mo hoko ko ha konga honau fāmilí.
Naʻá ne fakakaukau ai, “ʻOku ou tui ki he ʻOtuá.” “Naʻá Ne ʻi ai maʻu pē ʻi he taimi kotoa ko ʻení.”
ʻI he ʻaho 26 ʻo ʻAokosi ʻo e 1972, naʻe lava ke ongoʻi ʻe ʻIsapela Sanitana mo hono husepānití, Uani Masusua, ʻa e fiefiá ʻi hono tau ʻena kiʻi kā Voukisiuēkoni engeengá ʻi he tuʻa Fale-fakatahaʻanga Fakafonua ʻo Mekisikou Sití. Kuo fakatahataha mai ha Kāingalotu ʻe toko tahamano ono-afe tupu mei Mekisikou mo ʻAmelika Lotoloto ki he senitā ki he ngaahi meʻa lalahí ni ki ha konifelenisi lahi fakaʻēlia. ʻI ha ngaahi taʻu lahi, naʻe hoko ʻa e konifelenisí ko e fuofua taimi ia ke nau fanongo ai ki he kau taki māʻolungá ke lea hangatonu ange.
Naʻe kamata fakahoko ʻe he Siasí ʻa e ngaahi konifelenisi lahi fakaʻēliá ʻi he fakahinohino ʻa Palesiteni Siosefa Filitingi Sāmitá. Koeʻuhí ko e tokolahi taha ʻo e kāingalotú naʻe ʻikai ke nau lava ʻo maʻu ʻa e konifelenisi lahi ʻi Sōleki Sití, naʻe ʻoange ʻe he ngaahi konifelenisi fakafeituʻu ko ʻení kiate kinautolu ha faingamālie ke nau fakataha ai mo maʻu fakahinohino mei he kau taki fakalotofonuá mo e kau taki māʻolungá. Ko e ʻuluaki konifelenisi lahi fakaʻēliá naʻe fakahoko ia ʻi Manisesitā, ʻi ʻIngilani, ʻi he 1971. ʻI he tokolahi ange ʻa e kāingalotu ʻo e Siasí ʻi he toko valumanó, naʻe hoko leva ʻa Mekisikou ko ha ʻapitanga ki he Kāingalotu tokolahi taha ʻo e Siasí mavahe mei he ʻIunaiteti Siteití, ʻo hoko ai ko e feituʻu lelei taha ke fakahoko ai ha faʻahinga konfelenisi pehē.
Naʻe fakatumutumu ʻa ʻIsapela mo Uani ʻi heʻena fononga atu ki he senitā faiʻanga polokalamá. Naʻe ʻi ai ha kāingalotu mei he tapa kotoa ʻo Mekisikou pea aʻu ki Kuatemala, Honitula, Kositā Lika, mo Panamā. Ko ha niʻihi ʻo e Kāingalotú naʻa nau fononga mai ʻi ha maile ʻe toluafe ke nau ʻi ai. Ko ha fefine ʻe taha mei he fakatokelau hihifo ʻo Mekisikoú naʻá ne olo ʻa e fō ʻo hono kaungāʻapí ʻi ha māhina ʻe nima ke maʻu ha paʻanga feʻunga kae kau ʻi he fonongá. Ko ha Kāingalotu ʻe niʻihi naʻe totongi ʻenau fonongá ʻaki haʻanau fakatau tako mo e tamale, fufulu kā, pe ʻiate. Naʻe ʻi ai mo ha niʻihi kehe naʻe fakatau ʻenau ngaʻotoʻotá pe nō paʻanga ke nau lava ʻo ōmai. Naʻe ʻi ai ha kakai tokosiʻi naʻa nau ʻaukai koeʻuhí he naʻe ʻikai haʻanau paʻanga ki ha meʻakai. Meʻa-mālié, he naʻe ʻoange ʻe he Penimelitó ha nofoʻanga ki ha tokolahi ʻo e Kāingalotu mei he ngaahi feituʻu mamaʻó.
ʻI he tatali ko ia ʻa e fāmili Masusá ʻi he lainé ke hū ki he fale fakatahaʻangá, naʻe afe mai ha kā ʻo ofi, pea hū mai ʻa Sepenisā W. Kimipolo mo hono uaifi ko Kamilá. Kuo ʻosi ha māhina ʻe fā mei he tafa mafu ʻo ʻEletā Kimipoló, pea kuo sai feʻunga ke hoko atu hono ngaahi fatongia kehekehe ʻi he Kōlomu ʻo e Kau ʻAposetolo ʻe Toko Hongofulu Mā Uá. Ko hono moʻoní, naʻe fakataimi-tēpileʻi ke lea ki he Kāingalotú ʻi he hoʻatā efiafí.
Neongo naʻe tokoni ʻa Palesiteni Siosefa Filitingi Sāmita hono palani ʻo e konifelenisí, ka naʻe pekia ia kimuʻa ke toe lava ʻo ʻi ai. Naʻe fakaʻilongaʻi ʻe heʻene pekiá ʻa e ngataʻanga ʻo e taʻu ʻe hongofulu tupu ʻo ha moʻui lōloa mo līʻoa ʻo e ngāue maʻá e Siasí mo hono kāingalotú . ʻI heʻene hoko ko ha ʻaposetoló, kuó ne tohi ʻo fakamatala lahi ki he tokāteline ʻo e ongoongoleleí mo ha ngaahi tefito fakahisitōlia, tuʻuaki ʻa e tohihohokó mo e ngāue fakatemipalé, pea fakatapui ʻa e ʻOtu Filipainí mo Kōlea ki hono malangaʻi ʻo e ongoongoleleí. ʻI heʻene hoko ko e palesiteni ʻo e Siasí, naʻá ne fakangofua [ke fokotuʻu] ʻa e ngaahi ʻuluaki siteiki ʻi Pelū mo ʻAfilika Tongá, fakatupulaki lahi ʻa e seminelí mo e ʻinisititiuti ʻi he funga māmaní, fakaleleiʻi ʻa e fetuʻutaki mo e kakaí ʻa e Siasí, pea mo ʻai ke fakapalofesinale ʻa e ngaahi potungāue ʻa e Siasí.
Naʻá ne talaange ki he Kāingalotú ʻi heʻene konifelenisi lahi fakaʻosí, “ʻOku ʻikai ha ngāue ʻe lava ʻe hatau taha ke fai ʻe mahuʻinga tatau mo hono malangaʻi ʻo e ongoongoleleí mo e langa hake ʻa e puleʻanga ʻo e ʻOtuá ʻi he māmaní. Ko ia, ʻoku tau fakaafeʻi ai ʻa e kotoa ʻo e fānau ʻa e Tamaí, ʻi he potu kotoa, ke nau tui kia Kalaisi, tali Ia hangē ko hono fakahā ʻe he kau palōfita moʻuí, pea kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Ko hono fetongí, ʻa Hāloti B. Lī, naʻe ʻosi vaheʻi ko e palesiteni ʻo e Siasí, pea hoko ai ʻa ʻEletā Kimipolo ko e palesiteni foʻou ʻo e Kōlomu ʻo e Kau ʻAposetolo ʻe Toko Hongofulu Mā Uá.
ʻI he hū pē ʻa ʻIsapela mo Uani ki he Fale Fakatahaʻanga Fakafonuá, naʻá na nofo ʻi he lotolotonga ʻo ha Kāingalotu ʻe lauiafe. Naʻe konga fā ʻa e ngaahi nofoʻanga ʻi he fale fakatahaʻangá ʻo takatakai ʻi ha siteisi. Naʻe fakafonu ʻe ha kuaea ʻo e kāingalotu ʻo e Siasí mei he fakatokelau ʻo Mekisikoú, ʻa e siteisí. Naʻe ʻi muʻa ʻiate kinautolu ha tuʻunga malanga mo ha konga ʻo ha ngaahi sea naʻe māʻolunga ʻa e ngaahi falalaʻangá ki he kau taki māʻolungá mo ha kau lea kehe.
Naʻe fakaava ʻa e konifelenisí ʻaki ha lea meia Palesiteni Melioni G. Lomenei, ʻa ia naʻe fanauʻi mo ohi hake ʻi he ngaahi kolonia ʻo e Siasí ʻi he fakatokelau ʻo Mekisikoú pea naʻe toki ui kimuí ni ko ha tokoni ʻi he Kau Palesitenisī ʻUluakí. Naʻe lea faka-Sipeini, ʻo fakahā ange ʻene ʻofa ki he Kāingalotu ʻo Mekisikou mo ʻAmelika Lotolotó pea mo ʻene houngaʻia ʻi he puleʻanga ʻo Mekisikoú.
Pea toki lea leva ʻa Palesiteni N. ʻElitoni Tena, ʻo fakahīkihikiʻi ʻa e ivi ʻo e Siasí ʻi Mekisikoú pea mo e ngaahi fonua lea faka-Sipeini kehe ʻo e ongo ʻAmeliká. Naʻá ne fakahā ʻo fakafou ʻi ha taha fakatonuleá, “ʻOku tupulaki, pea ʻoku tanumaki ʻa e tuʻunga fakatakimuʻá ʻi he funga ʻo māmaní.” Ke tokoni ʻi hono fakatupulaki ʻo e kau taki ko ʻení, kuo fakafekauʻaki mo liliu kimuí ni ai ʻa e Tohi Tuʻutuʻuni Fakakātoa ʻo e Siasí ki ha ngaahi lea fakafonua ʻe hongofulu tupu, kau ai ʻa e lea faka-Sipeiní. ʻE lava ʻe he kau taki ʻi he funga ʻo e māmaní ke tokangaʻi ʻa e Siasí ʻo fakatatau ki he founga tatau.
Naʻe fakamoʻoni ʻa Palesiteni Tena, “ʻOku fakaofo ke mamata ki he founga ʻoku tali ai ʻe he kakaí ʻa e ongoongoleleí mo ōmai ki he Siasi mo e puleʻanga ʻo e ʻOtuá. ʻOku fakamoʻoni ʻa e taha kotoa ki he ngaahi tāpuaki ʻoku nau maʻú, ʻi heʻenau ʻilo ko e Siasi ia ʻo Sīsū Kalaisi.”
Naʻe ʻai ʻe he fanongo ʻa ʻIsapela ki he kau leá ke ne ongoʻi fiefia ke hoko ko ha taha ʻo e Kāingalotu Mekisikoú. Naʻe akoʻi ia ʻe heʻene ako ʻi Penimelitó ʻi he mahuʻinga ʻo e hoko ko ha mēmipa ʻo e Siasí, pe ʻai ʻa e ongoongolelei kuo fakafoki maí ke hoko ko e uho ʻo ʻene moʻuí. Ko e taimi naʻá ne ʻuluaki aʻu atu ai ki he ʻapiakó, ko ha kiʻi taʻahine mā pē ia mo ʻikai ke mahino lelei kiate ia ʻa e meʻa te ne lava fakalaumālié. Ka naʻe tāpuekina ia ʻe heʻene kau faiakó ʻi ha ngaahi founga lahi fau. Naʻá ne fokotuʻutuʻu ha ngāue fakaʻaho ke ako mo lotu, pea naʻá ne fononga loto-falala mo ha fakamoʻoni fefeka ki he moʻoní.
Ko ʻeni, kuo ʻākilotoa ia ʻe he Kāingalotu tokolahi, naʻe ʻikai ha meʻa ke ne fai ka ko e fiefia pē. Naʻá ne fakakaukau ai, “Ko ʻeku haʻú mei heni. ʻOku ou ʻi ʻapi.”