Vahe 29
Fāmili Tokolahi Pē ʻe Taha
ʻI he konga kimuʻa ʻo e 1996, naʻe maʻu ai ʻe Malitana Nava Solesitā ko e Palesiteni ʻo e Fineʻofa he Siteiki ʻIloʻiló ʻi he ʻOtu Filipainí ha ongoongo lelei mei heʻene palesiteni siteiki ko Visilio Kāsiá. ʻI he ngaahi māhina kimuʻá, naʻá ne faitohi ki he kau palesitenisī lahi ʻo e Fineʻofá ke kole ke ne ʻaʻahi kia Sieko ʻOkasaki, ko e tokoni ʻuluaki kia Palesiteni ʻIleini L. Siakí. Naʻe hoko ʻa e ngaahi lea ʻa Sisitā ʻOkasaki ʻi he konifelenisí fekauʻaki mo e tanumaki ʻo e tuí, ke fakalotoa ai ʻa Malitana ke ne tui ʻe lava ke ʻaonga ki he kau fafine ʻi hono siteikí ke nau fanongo ki haʻane lea tonu. Naʻe talaange ʻe Palesiteni Kāsia, ko ʻeni kuo vahe ange kia Sisitā ʻOkasaki ke ʻaʻahi atu ki honau siteikí.
Kuo aʻusia ʻe he Siasí kimuí ni mai ha makamaile mahuʻinga: naʻe tokolahi ange ʻa e Kāingalotu ʻi tuʻa ʻi he ʻIunaiteti Siteití ʻi he kāingalotu ʻi loto ʻi he ʻIunaiteti Siteití. Naʻe kau ʻa Malitana mo hono husepāniti ko Sepú ki he Siasí ʻi ha taʻu ʻe hongofulu tupu kimuʻa ange. Naʻá na sila ʻi he Temipale Manilá ʻi he 1984, pea naʻá na maʻu ha ngaahi foha ʻe toko tolu, ʻa ia naʻa nau taʻu fitu, hiva mo hongofulu ʻi he taimi ko ʻení. ʻI he taʻu ʻe nima talu mei hono ui ʻo Malitana ke hoko ko e palesiteni Fineʻofá, kuo tupulaki ʻa e Siasí ʻi Filipaini ʻaki ha kāingalotu ʻe 80,000 tupu. Ko e fakakātoa ʻo e mēmipasipi ʻi he fonuá ko e kāingalotu ʻe toko 360,000 ʻo hoko ai ko e fonua fika nima ʻi he māmaní naʻe tokolahi taha ai ʻa e Kāingalotu ʻo e Siasí, naʻe lakasi ia ʻe he ʻIunaiteti Siteití, Mekisikou, Palāsila mo Silei.
Naʻe fakaʻau foki ke tupu ʻo tokolahi mo e kau taki māʻolunga ʻi tuʻa ʻi he ʻIunaiteti Siteití. Naʻe ʻosi fakakau ʻi he Ongo Kōlomu ʻUluaki mo e Ua ʻo e Kau Fitungofulú ʻa e kau mēmipa hangē ko ʻEnisolo ʻApelea mei ʻĀsenitina, ʻĒliu ta Losa Kamākou mo Helevēsio Mātini mei Palāsila, ʻEtuato ʻAiala mei Silei, Kālosi H. ʻĀmato mei Kuatemala, Holaisio A. Tenolio mei Mekisikou, ʻIosihiko Kikusi mei Siapani, Hani ʻIni Sangi mei Kōlea Tonga, mo ʻAokositō A. Limi mei he ʻOtu Filipainí. ʻI he 1995, naʻe faʻu ʻe he Kau Palesitenisī ʻUluakí ʻa e fatongia ʻo e mafai fakaʻēliá ke fetongi ʻaki ʻa e lakanga ʻo e fakafofonga fakavahefonuá, ʻo tānaki atu ai ki he tokolahi ʻa e kau taki lakanga fakataulaʻeiki ʻi he funga ʻo e māmaní ʻoku nau poupouʻi ʻa e ngaahi ʻiuniti fakalotofonuá. Naʻe hoko ʻa Sisitā ʻOkasaki, ʻa ia naʻe fanauʻi mo ohi hake ʻi Hauaiʻí, ko e fuofua hakoʻi ʻĒsia ke ngāue ʻi ha kau palesitenisī lahi ʻo e Siasí.
Naʻe mātātonu ʻa Malitana ʻi he tupulaki ʻa e Siasí ʻi ʻIloʻilo Siti. Kuo ʻi ai ʻeni ha ngaahi uooti ʻe valu mo e ngaahi kolo ʻe ono ʻi hono siteikí, pea naʻe fakaʻau ke faingataʻa ange kiate ia mo e kau taki kehe ʻi he siteikí ke ʻaʻahi ki he haʻofanga kotoa pē. Naʻe fakalele ʻe Malitana ha kautaha huʻi faitoʻo, pea naʻá ne femoʻuekina ai. Ka naʻá ne fai hono lelei tahá ke ngāue fakaetauhi ki he kakai fefine naʻá ne tokangaʻí. Neongo kuo hoko ʻa e kau papi ului foʻoú ko e kau mēmipa mālohi, ka naʻe tokolahi foki mo e Kāingalotu ʻi he ʻOtu Filipainí naʻe ʻikai ke nau toe maʻulotu ʻi he Siasí. ʻI he taimi ne ʻaʻahi atu ai ʻa Malitana kiate kinautolu he taimi ʻe niʻihi, naʻe ʻikai ke nau fie lea kiate ia. Naʻe tali ʻe he niʻihi kehé ʻene ʻaʻahi angé pea naʻa nau houngaʻia ʻi heʻene tokanga angé.
ʻI he talanoa ʻa Malitana ki he kakai fefine ko ʻení, naʻá ne ʻilo ai naʻe loto-mamahi hanau niʻihi ʻi honau kaungā kāingalotu ʻi he Siasí. Naʻe mole ʻa e tui ʻa ha niʻihi pe naʻa nau foki ki heʻenau tōʻonga moʻui kimuʻá. Naʻe ʻikai lava ha kakai fefine ʻe niʻihi ʻo fiefia pe ʻe mahino kiate kinautolu ha meʻa lahi mei he ngaahi fakatahaʻangá koeʻuhí he naʻe ʻikai ke nau ʻilo ʻa e lea faka-Pilitāniá pe faka-Takāloká, ʻa e ongo lea fakafonua tefito naʻe fakaʻaongaʻi ʻe he Siasí ʻi Filipainí. Neongo naʻe ngāue ʻa e Siasí ke lava ke maʻu ʻa e ʻū naunaú ʻi he ngaahi lea fakafonua ʻe meimei uangeau ʻo e fonuá, ka naʻe hoko ʻa e fetuʻutakí ko ha palopalema lahi ʻi he kāingalotu ʻo e Siasí.
Naʻe tūʻuta ʻa Sisitā ʻOkasaki ʻi ʻIloʻilo Siti ʻi he pongipongi ʻo e ʻaho 24 ʻo Fēpueli 1996. Naʻe kau ʻa Malitana mo Palesiteni Kāsia ʻi he kōmiti ne nau talitali ia mo ʻEletā ʻAokositō A. Limi mo Sisitā Mina Limi ʻi he malaʻe vakapuná.
Naʻe akoʻi ʻe Sisitā ʻOkasaki mo ʻEletā Limi ʻa Malitana mo e kāingalotu ʻi hono siteikí, ʻi he toenga ʻo e ʻaho ko iá. Naʻe fakaʻaongaʻi ʻe Sisitā ʻOkasaki ʻa e Tokāteline mo e Ngaahi Fuakava 107 ʻi heʻene ʻuluaki lēsoní, ke fakamamafaʻi ʻa hono mahuʻinga ke ako mo fua e ngaahi fatongia ʻi he Siasí. Kimui ange ʻi he efiafi ko iá, naʻá ne lea ki he siteikí kotoa fekauʻaki mo e fekumi ki he ngaahi tāpuaki mei he Tamai Hēvaní.
Naʻá ne pehē, “Siʻoku kāinga ʻofeina, te tau lava ʻo kolea e ngaahi fakaʻamu hotau lotó. Te tau lava ʻo kole ʻi he tui mo e loto-falala. ʻOku tau ʻiloʻi ʻoku fakafanongo mai ha Tamai ʻofa kiate kitautolu. Te Ne finangalo lelei ke ʻomi ʻa e meʻa ʻoku tau fakaʻamuá ʻi he taimi ʻokú Ne malava aí.
Ko e ʻaho hono hokó ko e ʻaho Sāpate, pea naʻe ʻalu ʻa Sisitā ʻOkasaki ki he ngaahi houalotu ʻo e Uooti ʻIloʻilo Sití. Lolotonga e taimi ko iá, naʻá ne fakahinohinoʻi mo poupouʻi ʻa Malitana ke ne talatalaifale mo e kau fefine ʻi he Fineʻofá ʻi heʻenau lea fakafonuá koeʻuhí ke mahino kiate kinautolu ʻene fakahinohinó. Kimuʻa pea mavahe ʻa Sisitā ʻOkasaki he hoʻatā ko iá, naʻá ne ʻoange kia Malitana ha tohi fekauʻaki mo e tuʻunga fakatakimuʻá.
ʻI he hili ha ngaahi māhina mei ai, naʻe maʻu ʻe Malitana mo e Kāingalotu Filipaini kehé ʻa e faingamālie ke sio ki ha takimuʻa ʻe taha ʻo e Siasí: ko Palesiteni Kōtoni B. Hingikelī. Talu ʻene hoko ko e palesiteni ʻo e Siasí, kuó ne folau holo ʻi he funga ʻo e māmaní ke ʻaʻahi ki he Kāingalotú. Naʻá ne ʻaʻahi ki Manila mo Sepū Siti ʻi he ʻOtu Filipainí.
Lolotonga ʻene ʻi Manilá, naʻá ne tali ha ngaahi fehuʻi fekauʻaki mo e Siasí ʻi ha ngaahi televīsone fakalotofonua. Naʻe fekauʻaki ha fehuʻi ʻe taha ki he “Ko e Fāmilí: Ko ha Fanongonongo ki Māmani,” ko ha fanongonongo fakamuimui ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Kuo hohaʻa ʻa e kau taki ʻo e Siasí ʻi ha ngaahi taʻu lahi naʻa liliu ʻa e ngaahi akonaki tukufakaholo fekauʻaki mo e nofo-malí mo e fāmilí ʻi he funga ʻo e māmaní. Naʻe fakapapauʻi ʻe he fanongonongó ko e mali ʻi he vahaʻa ʻo ha tangata mo ha fefine naʻe tuʻutuʻuni ia ʻe he ʻOtuá pea naʻe mahuʻinga ʻa e fāmilí ki Heʻene palani ʻo e fakamoʻuí. Naʻá ne poupouʻi ʻa e haohaoa ʻo e moʻuí, ʻo fakahā ko e kakai kotoa pē ko e ngaahi foha mo e ngaahi ʻofefine kinautolu ʻo ha ongomātuʻa fakalangi, naʻe faʻu ʻi he ʻīmisi ʻo e ʻOtuá mo ha natula faka-ʻOtua mo e ikuʻanga fakalangi. Naʻá ne naʻinaʻi foki ʻa e mātuʻá ke ʻofa ʻi heʻenau fānaú pea ohi hake kinautolu ʻi he anga-māʻoniʻoni, ʻo ngāue fakataha ko ha ongo hoa-ngāue tuʻunga tatau ʻi heʻena fokotuʻu ha ʻapi ʻoku fakatefito ʻi he “tui, lotu, fakatomala, faʻa fakamolemole, fakaʻapaʻapa, ʻofa, manavaʻofa, ngāue, pea mo e ngaahi ʻekitivitī ʻoku fakatupulakí. ”
Naʻe fakamatalaʻi ʻa Palesiteni Hingikelī ki he tokotaha fai-ʻinitaviu ʻi Filipainí, “Ko e fāmilí ko ha faʻunga ia kuo tuʻutuʻuni ʻe he ʻOtuá. Ko e ʻOtuá ʻa ʻetau Tamai Taʻengatá, pea ko ʻEne fānau kitautolu, ʻo tatau ai pē pe ko e hā ʻa e matakali, lanu pe ko e hā pē ha meʻa. Ko ʻEne fānau kotoa ʻa kitautolu. Ko e konga kitautolu ʻo Hono fāmilí.”
Kimui angé, lolotonga ʻene lea ʻi ha kolisiume naʻe fonu ai ha Kāingalotu ʻo e Siasí ʻe toko tolumano nimaafe, naʻá ne pehē naʻe faʻa ʻeke ange ʻe he kakaí he taimi ʻe niʻihi pe ko e hā e ʻuhinga ʻoku tupu vave ai ʻa e Siasí ʻi he ʻOtu Filipainí.
Naʻá ne pehē, “Ko e tali faingofuá pē ʻeni. ʻOku tuʻu ʻa e Siasí ni ko ha fakamaʻunga, ko ha fakamaʻunga fefeka ʻo e moʻoní ʻi ha māmani ʻoku feliliuaki ai ʻa e ngaahi tuʻunga ʻulungaanga mahuʻingá.”
Naʻá ne hoko atu ʻo pehē, “Ko e tangata mo e fefine kotoa pē ʻoku kau mai ki he Siasí ni ʻo pikitai ki hono ngaahi akonakí, ʻe lelei ange ʻene moʻuí, te ne hoko ko ha tangata pe fefine fiefia ange, te ne maʻu ha ʻofa lahi ki he ʻEikí mo ʻEne ngaahi foungá.”
ʻI ha efiafi ʻe taha ʻi Māʻasi 1996, naʻe tuʻu ʻa Velonika Konitilelasi mo hono husepāniti ko Felisinitó ʻi tuʻa ʻi honau ʻapisiasi fakauōtí ʻi Sanitiako, Silei. Naʻá na toki hiki mai pē ki he kolomuʻá mei Panguipuli, ko ha kiʻi kolo siʻisiʻi ange ʻi he fakatonga ʻo Sileí, ko e ʻamanaki ʻe maʻu ha ngaahi faingamālie fakaako lelei ange maʻa ʻena fānau ʻe toko nimá. Te na ofi ange foki ki he Temipale Sanitiako Sileí pea kau ki ha siteiki, ʻa ia ʻe lava ke fakahoko ai ha ngaahi kalasi semineli tuʻu-maʻu mo ha ngaahi ʻekitivitī maʻá e toʻu tupú. Neongo naʻe ʻikai ko ha ʻaho Sāpate, ka naʻe fakakaukau ʻa e ongomātuʻá mahalo pē te na fetaulaki mo ha kāingalotu ʻo e Siasí ʻi he ʻapisiasí. Ka ʻi heʻena aʻu atu ki aí, naʻe loka ʻa e matapaá. Naʻe ʻikai ʻiloa holo ha taha.
Kimui ange ʻi he uike ko iá, naʻe taʻofi ʻe he ongomeʻá ha ongo faifekau naʻá na heka pasikala ʻo kole ange ke na tokoniʻi honau fāmilí ke nau fetuʻutaki ki he pīsopé. Ne ʻikai fuoloa, kuo haʻu ʻa e pīsopé ki he ʻapi ʻo e fāmili Konitilelasí ʻo talitali lelei kinautolu ki he uōtí, ka naʻe ʻikai ke nau mateuteu ki he meʻa te nau fehangahangai mo ia ʻi he ʻuluaki Sāpate ʻo ʻenau maʻulotú.
ʻI Panguipulí, naʻe ngaohi ʻe he Kāingalotú honau ʻapisiasí ʻo hangē pē haʻanau ʻapí, naʻe maʻa mo tauhi leleiʻi ia. Ka ʻi he taimi naʻe hū ai ʻa Velonika ki he ʻapisiasi ʻi Sanitiakó, naʻá ne ʻohovale he sio ki he falikí mo e holisí naʻe ʻilonga ai ʻa e ʻuli ʻo e vaʻeʻi sū mo e vaʻeʻi pasikala ʻi he heka pasikala takai ʻa e fānaú ʻi he holó. Lolotonga e houalotu sākalamēnití, naʻe ʻikai ke nofoʻi ha konga lahi ʻo e ʻū seá, neongo ko e kau mēmipa ʻe toko fitungeau tupu naʻe ʻasi ʻi he lekōtí.
Ko e fakamamahí, he ko e ngaahi palopalema naʻe ʻilo ʻe he fāmili Konitilelasí ʻi honau uooti foʻoú naʻe ʻikai ke hoko ia ʻi Silei pē. Naʻe vave ʻa e tupu tokolahi ʻa e kau papi ului ʻi ʻAmelika Tongá kotoa ʻi he lolotonga ʻa e 1980 tupú mo e konga kimuʻa ʻo e 1990 tupú, ʻo tupunga ai hano faʻu ha ngaahi siteiki lahi. Ka naʻe fefaʻuhi ha kāingalotu foʻou tokolahi ʻi he funga ʻo e māmaní ke tauhi ʻenau tukupā ki he ongoongolelei kuo fakafoki maí hili honau papitaisó.
Naʻe laui taʻu ʻa e hohaʻa e kau taki ʻo e Siasí fekauʻaki mo hono pukepuke mai ʻo e kau papi ului foʻoú pea kuo nau feinga ke solova ʻa e palopalemá ʻi ha ngaahi founga kehekehe. ʻI he 1986, naʻe veteki ʻa e tuʻunga lakanga fakataulaʻeiki fakalotofonua ʻo e kau fitungofulú, ʻo fakalahi ai ʻa e ivi ʻo e ngaahi kōlomu fakalotofonua ʻo e kaumātuʻá. Naʻe poupouʻi foki mo e kau faifekaú ke nau fakaʻaongaʻi ha taimi lahi ange ke fakafeohi mo e kau mēmipa foʻoú, pea naʻe faʻu ʻe he Siasí ha ngaahi lēsoni hokohoko ʻe ono maʻá e mēmipa foʻoú ke tokoniʻi e kau papi ului foʻoú ke nau liliu. Ka neongo iá, naʻe tokolahi e kakai naʻe ʻikai ke nau maʻu ʻa e ngaahi lēsoni ko ʻení. Pea naʻe faʻa lōmekina ʻa e ngaahi uōtí, hangē ko e uooti ʻi Sanitiakó, ʻi he lahi ʻo e ngāue ke pukepuke mai e kau papi ului foʻoú. Naʻe tokosiʻi pē ʻa e kau mēmipa ne nau maʻu e ngaahi fakatahaʻangá ʻi hono fakafehoanaki mo e tokolahi fakakātoa ʻo e Kāingalotu ʻi he uōtí.
Ko e pīsope foʻou ʻo e fāmili Konitilelasí ko ha tangata lelei mo tui faivelenga ia, ka naʻe ʻikai hano ongo tokoni ke tokoni kiate ia ke vahevahe hono fatongiá. Naʻá ne ngāue taimi lōloa foki ʻi he ngāueʻangá pea naʻe ʻikai ai ke ne faʻa lava ʻo fakataha mo e kau mēmipa foʻoú ʻi he lolotonga ʻo e uiké. ʻI he taimi naʻá ne fakataha ai mo Velonika mo Felisinitó, naʻá na kole ange ke na tokoni ʻaki haʻana ngāue ʻi ha faʻahinga feituʻu pē ʻe fiemaʻu ai kinaua. Naʻe ʻikai fuoloa mei ai kuo tā-ʻōkani hona ʻofefine lahi tahá ʻi he uōtí, pea naʻe ngāue fakataha hona ngaahi fohá mo e kau talavou kehé. Naʻe kamata ke tokoni ʻa Felisinito ʻi he hisitōlia fakafāmilí mo e ngāue fakatemipalé pea ngāue ʻi he aleaʻanga māʻolunga ʻa e siteikí. Lolotonga iá, naʻe uiuiʻi ʻa Velonika ke hoko ko e palesiteni Fineʻofa ʻi he uōtí.
Naʻe kau mai mo e niʻihi kehé ʻi heʻena ngāue tokoní. Ka naʻe kei toe lahi pē e meʻa ke fai ke tokoni ke ngāue lelei ange ʻa e uōtí.
ʻI he taimi naʻe fanongonongo ai ʻa e Temipale Hong Kong ʻi ʻOkatopa 1992, naʻe fiefia lahi ʻa Nola Kuti Sū. Kuo ʻosi atu ha taʻu ʻe tolungofulu tupu mei heʻene ngāue ʻi he Misiona Fakatongahahake Mamaʻó. ʻI he taimi ko iá, kuó ne hikifonua ki he ʻIunaiteti Siteití, mali mo ha Siaina ʻAmelika ko Leimoni Sū, pea ʻi ai haʻana fānau ʻe toko fā. Ka naʻe kei manatuʻi lelei pē ʻe Nola ʻene ngaahi aʻusia ko ha fuofua papi ului Siaina ki he Siasí ʻi Hongo Kongó. Ko e ngaahi talanoa ia naʻá ne fai ki heʻene fānaú ʻi he teuteu ke mohé.
Naʻe fakakaukau ʻa Leimoni ʻoku totonu ke ʻalu ʻa e fāmilí kotoa ki hono fakatapui ʻo e temipalé.
Naʻe talaange ʻe Nola, “ʻIkai. Ko ha fakamole lahi ia.”
Naʻe vilitaki pē ʻa Leimoni. Naʻá ne talaange, “ʻOku totonu ke tau ʻalu.”
Naʻe kamata ke tānaki ʻe he fāmilí ha paʻanga. Naʻe lalahi e fānaú he taimi ko ʻení, pea naʻa nau ʻiloʻi ʻa e mahuʻingaʻia ʻenau faʻeé ʻi he fale ʻo e ʻEikí. ʻI he taimi naʻá ne hiki ai ki he ʻIunaiteti Siteití ʻi he 1963, naʻá ne ʻuluaki hifo ʻi Hauaiʻi ke maʻu hono ʻenitaumení ʻi he temipale ʻi Laʻié. Naʻá ne sila mo Leimoni kimui ange ʻi he Temipale Los Angeles, pea ʻi he hili pē ha taimi nounou mei ai, naʻe fakatapui ʻa e Temipale Oakland ʻa ia naʻe ofi ki honau ʻapí ʻi he ʻĒlia Matāfanga ʻo Seni Felenisisikou Kalefōniá. Naʻe iku ʻo ngāue temipale ʻa Nola mo Leimoni ai, pea maʻu ai ʻe Nola ʻa e faingamālie ke fakahoko ʻa e ngaahi ouau fakatemipalé ʻi he lea faka-Manitaliní, Kenitoní, Heimongí mo ha ngaahi lea fakafonua kehe.
ʻI he ʻosi ʻa e Temipale Hong Kong ʻi Mē 1996, naʻe fakahoko ʻe he Siasí ha ʻoupeni hausi uike ʻe ua. Naʻe tūʻuta ʻa Nola mo hono fāmilí ʻi he loto koló ʻi he efiafi ʻo e ʻaho 23 ʻo Meé, ko e ʻaho ia ʻe tolu kimuʻa pea fakatapui e temipalé. ʻI heʻenau hū ki tuʻa mei he malaʻe vakapuná, naʻe ongoʻi ʻe Nola ʻa hono ʻākilotoa ia ʻe he māfana mo e hauhau ʻo e ʻeá.
Naʻá ne malimali mo pehē ange ki hono fāmilí, “Talitali lelei kimoutolu ki Hongo Kongo.”
ʻI he ngaahi ʻaho ne hoko aí, naʻe ʻave ʻe Nola hono fāmilí ʻo fakaʻeveʻevaʻi ʻi he loto koló. Naʻe ngāue fakafaifekau foki hono ʻofefine lahi ko Lōliní ʻi Hong Kong, pea naʻá na fiefia ʻi he toe ʻaʻahi fakataha mai ki he feituʻú. ʻI he fakaʻaliʻali ʻe Nola ʻa e ngaahi halá mo e ʻū falé ki heʻene fānaú, naʻe hoko ʻo moʻoni ʻa e ngaahi talanoa naʻa nau fanongo ai ʻi heʻenau kei siʻí. Ko e taha ʻo e ngaahi fuofua feituʻu naʻá ne ʻave kinautolu ki aí ko e temipalé, naʻe langa ia ʻi he feituʻu ne tuʻu ai e ʻapi fakamisiona motuʻá ʻa ia naʻá ne lahi nofo ki ai ʻi heʻene kei finemuí. Naʻe fiefia ʻaupito ʻa Nola ʻi heʻene sio ʻoku fakaʻaongaʻi ʻa e feituʻú ki ha taumuʻa toputapu.
ʻI he pongipongi ko e ʻaho Sāpate, 26 ʻo Meé, naʻe ō ʻa e fāmilí ki ha houalotu sākalamēniti makehe mo e palesiteni fakamisiona ʻa Nola ko Kalānite Heatoní, pea mo ha kau faifekau kehe mei he Misiona Fakatongahahake Mamaʻó. Lolotonga ʻa e fakatahá, naʻe vahevahe ʻe Palesiteni Heatoni mo e kau faifekau kehé ʻenau fakamoʻoní. ʻI he hokosia e taimi ʻo Nolá, naʻá ne tuʻu hake ki ʻolunga. Naʻá ne fakamoʻoni ʻo pehē, “ʻOku māfana ʻa e Laumālié ʻi loto ʻiate au. Naʻá ku tupu hake ʻi he fonua ko ʻení pea mo e misiona ko ʻení. Pea ʻoku ou houngaʻia ai.”
ʻI he pongipongi hono hokó, naʻe tangutu fakataha ʻa Nola mo hono fāmilí ʻi he loki silesitiale ʻo e Temipale Hong Kong. Naʻe malimali fiefia e fofonga ʻo Nolá ʻi he fakaava ʻe Palesiteni Tōmasi S. Monisoni ʻa e fakatahá pea lea ʻa ʻEletā Niila A. Mekisuele ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻá ne ongoʻi hangē naʻá ne toe foki ki he feituʻu naʻe kamata ai ʻene fonongaʻangá. ʻI he taʻu ʻe fāngofulu-mā-ua kimuʻá, naʻá ne kole kia ʻEletā Hāloti B. Lī ke fakafoki mai e Siasí ki Hong Kong. Naʻe tokosiʻi pē ʻa e Kāingalotu ʻo e Siasí ʻi he koló he taimi ko iá. Ko ʻeni kuo ʻi ai ha fale ʻo e ʻEikí ʻi Hong Kong, pea ʻokú ne ʻi ai mo hono husepānití mo e fānaú.
ʻI he fakaʻosinga ʻo e fakatahá, naʻe fakahoko ʻe Palesiteni Tōmasi S. Monisoni ʻa e lotu fakatapuí. Naʻá ne lotu ʻo pehē, “Kuo tupulaki Ho Siasí ʻo tāpuekina ai e moʻui Ho ngaahi foha mo e ngaahi ‘ofefine tokolahi ‘i he feituʻú ni. ʻOku mau fakamālō ki he ʻAfio ná koeʻuhí ko kinautolu kotoa pē kuo nau tali ʻa e ongoongoleleí pea kuo nau tauhi totonu mo faivelenga ki he ngaahi fuakava kuo nau fai mo e ʻAfio ná. Kuo aʻuaʻu lelei Ho Siasí ʻi he feituʻú ni he taimí ni ʻi hono fakatapui ʻo e temipale toputapú ni.”
Naʻe tō e loʻimata ʻo Nolá ʻi hono hivaʻi ʻe he tokotaha kotoa pē ʻa e “Ko e Laumālie ʻo e ʻOtuá.” ʻI he ʻosi ʻa e lotu tukú, naʻá ne fakatahatahaʻi mai hono husepānití mo ʻene fānaú ʻo fāʻofua kiate kinautolu. Naʻá ne fiefia lahi ʻaupito.
Naʻe ō e fāmilí ki ha fakataha fakatoʻu ʻa e misioná, ʻi he efiafi ko iá. Naʻa nau kiʻi tōmui pea ʻi heʻenau aʻu atú naʻe ʻosi fepōtalanoaʻaki ʻa e tokotaha kotoa pē ʻi ha loki. Naʻe fakalongolongo ʻa e haʻofangá ʻi he hū atu ʻa Nolá, pea naʻe ʻohovale hono fāmilí ʻi heʻenau sio ki he fakafeʻiloaki ʻa e tokotaha takitaha kiate ia ʻi he lāngilangi mo e fakaʻapaʻapa.
Lolotonga e talanoa ʻa Nola mo hano ngaahi kaungāmeʻa fuoloa, naʻe tātaaʻi atu ʻe ha kiʻi tangataʻeiki hono umá. Naʻá ne fehuʻi ange, “ʻOkú ke manatuʻi au?”
Naʻe siofi atu ia ʻe Nola, pea naʻe liliu hono fofongá ʻi heʻene manatuʻi e tangataʻeikí. Ko Hāloti Sāmita ia, ko e taha ia ʻo e kau fuofua faifekau naʻe fetaulaki mo [Nola] ʻi heʻene kei finemuí. Naʻá ne fakafeʻiloaki [e tangataʻeikí] ki heʻene fānaú.
Naʻe pehē ange [ʻe Hāloti], “Naʻe ʻikai ke u fakakaukau ne u fai ha meʻa ʻaonga.” Naʻe ʻikai ke ne tui ʻe manatuʻi ia [ʻe Nola].
Naʻe pehē ange ʻe Nola, “He ʻikai ngalo e kakai naʻa nau fakahaofi kitá.”
ʻI Mē 1997, naʻe movete ʻa e puleʻanga Saieá hili ia ha laui taʻu ʻo e taú mo e moveuveu fakapolitikalé. Naʻe tei mate ʻa Palesiteni Moputu Sese Seko, ʻa ia naʻá ne puleʻi e fonuá ʻi ha taʻu ʻe tolungofulu tupu, pea naʻe ʻikai ke kei ʻi ai hano mālohi ke taʻofi ʻa e fakaʻauʻauhifo ʻo hono puleʻangá. Naʻe hū atu ha ngaahi kulupu fakakautau kuo fakamahafu mei Luanitā, ko e kaungāʻapi fakahahake ʻo Saieá, ke fekumi ʻi he fonuá ki he kau angatuʻu naʻe tuli mei heʻenau tau fakalotofonuá. Naʻe vave ʻa e muimui atu ai ʻa e ngaahi fonua ʻAfilika kehe ʻi he hahaké, ʻo nau iku ʻo kaungā kau fakataha mo e kau tau kehé ke tuli ʻa e palesiteni kuo vaivaí, fetongi ia ʻaki ha taki foʻou, pea fakahingoa foʻou ʻa e fonuá ko e Lepupelika Fakatemokālati ʻo Kongokoú, pe ko e DRC.
Naʻe hokohoko atu pē ʻa e ngāue ʻa e Siasí ʻi he vahefonuá lolotonga ʻa e fekeʻikeʻí. Naʻe meimei ko ha Kāingalotu ʻo e Siasí ʻe toko onoafe naʻe nofo ʻi DRC. Naʻe tokangaʻi ʻe he Misiona Kinisasá ha ngaahi fonua ʻe nima ʻaki ha kau faifekau taimi kakato ʻe toko hongofulu mā fitu. ʻI Siulai 1996, naʻe folau ha ngaahi mātuʻa mali mei he vahefonuá ʻi ha maile ʻe tahaafe fitungeau tupu ke maʻu honau ngaahi tāpuaki fakatemipalé ʻi he Temipale Johannesburg South Africa. ʻI he hili pē ha ngaahi māhina siʻi mei ai, ʻi he ʻaho 3 ʻo Nōvemá, naʻe fokotuʻu ʻe he kau taki ʻo e Siasí ʻa e Siteiki Kinisasá, ko e fuofua siteiki ʻi he DRC pea mo e fuofua siteiki lea faka-Falanisē ʻi ʻAfiliká. Naʻe ʻi ai foki mo ha ngaahi vahefonua ʻe nima mo ha ngaahi kolo ʻe uofulu-mā-nima ʻi he misioná kotoa.
ʻI Luputá, naʻe kei fakatuʻamelie pē ʻa Uili Pinene, naʻe taʻu uofulu-mā-fitu he taimi ko ʻení, ke ne ngāue fakafaifekau taimi kakato, neongo ʻa e moveuveu ʻi hono fonuá. Ka ko e taimi naʻá ne vahevahe ai ʻa ʻene ʻamanakí kia Natapue Kapuiká, ko ha tokoni ʻi he kau palesitenisī fakamisioná, naʻá ne maʻu ha ongoongo fakamamahi.
Naʻe talaange ʻe Palesiteni Kapuika, “Tokoua, ko e taʻu fakangatangatá ko e taʻu uofulu-mā-nima. He ʻikai lava ke ui koe ke ke ʻalu ʻo ngāue fakafaifekau.” Ka ʻi heʻene feinga ke fakafiemālieʻi iá, naʻá ne pehē atu leva, “ʻOkú ke kei siʻi. Te ke lava ʻo ʻalu ʻo ako pea mali.”
Ka naʻe ʻikai ongoʻi ʻe Uili ʻokú ne fiemālie. Naʻá ne ongoʻi kuo siva ʻene ʻamanakí. Naʻe hangē naʻe taʻetotonu ʻa e hoko hono taʻú ko ha meʻa ke taʻofi ai ia mei he ngāue fakafaifekaú. Ko e hā e ʻuhinga ʻoku ʻikai lava ai ʻo fakaʻatā makehe iá, tautautefito ki he ngaahi meʻa kotoa kuo hoko kiate iá? Naʻá ne fifili ki he ʻuhinga naʻe fakalotoa ai ia ʻe he ʻEikí ke ne ngāue fakafaifekaú. Kuó ne fakatoloi ʻene akó mo e ngāue maʻuʻanga moʻuí ke muimui ki he ueʻi ko iá—pea ko e hā leva hono taumuʻá?
Naʻe faifai peá ne pehē loto pē, “ʻOku ʻikai totonu ke uesia koe ʻe he meʻá ni. ʻOku ʻikai taau ke ke fakamaauʻi ʻa e ʻOtuá.” Naʻá ne fakakaukau ke ne nofo maʻu pē ʻi he feituʻu ʻokú ne ʻi aí pea fai e meʻa kotoa pē ʻoku kole ange ʻe he ʻEikí ke ne faí.
Kimui ange ʻi Siulai 1997, naʻe fokotuʻu ʻa e Kāingalotu ʻi Luputá ke hoko ko ha kolo. Hili hono uiuiʻi ʻa Uili ke hoko ko ha kalake fakapaʻanga mo ha faifekau fakakolo ʻo e Siasí, naʻe faifai peá ne ʻiloʻi naʻe teuteuʻi ia ʻe he ʻEikí ke ne fokotuʻu ʻa e Siasí ʻi he feituʻu naʻá ne nofo aí. Naʻá ne pehē, “ʻIo, ko hoku misioná ʻeni.”
Naʻe uiuiʻi foki mo ha Kāingalotu kehe ʻi he Kolo Luputá ke nau hoko ko ha kau faifekau ʻo e koló. Ko e ʻaho ʻe tolu ʻo e uiké, naʻe tauhi ai ʻe Uili ʻene ngoué. Ko e ngaahi ʻaho kehé, naʻá ne ʻalu mei he ʻapi ki he ʻapi ke talanoa ki he kakaí fekauʻaki mo e ongoongoleleí. Hili iá, naʻá ne fō hono talausese naʻe taha mātē peé ke maʻa ki he ʻaho hono hokó. Naʻe ʻikai ke ne fakapapauʻi pe ko e hā e meʻa naʻá ne fakaʻaiʻai ia ke ne malangaʻi ʻa e ongoongoleleí ʻi he tui faivelenga, tautautefito ki he taimi naʻe pau ke ne ʻalu fiekaia aí. Ka naʻá ne ʻiloʻi naʻá ne ʻofa ʻi he ongoongoleleí, pea naʻá ne fiemaʻu ke maʻu ʻe hono kakaí—pea mo ʻene ngaahi kuí—ʻa e ngaahi tāpuaki naʻá ne maʻú.
ʻE lava ke faingataʻa ʻa e ngāué. Naʻe fakamanamanaʻi ʻe ha kakai ʻe niʻihi ʻa e kau faifekau fakakoló pe naʻa nau fakatokanga ki he niʻihi kehé ke fakaʻehiʻehi mei he [kau faifekaú]. Naʻe aʻu ʻo fakatahataha mai ha kakai ʻe niʻihi ʻi he koló ke fakaʻauha ʻa e ngaahi tatau ʻo e Tohi ʻa Molomoná. Naʻa nau pehē, “Tutu ʻa e Tohi ʻa Molomoná pea ʻe puli leva ʻa e Siasí.”
Ka naʻe mātā ʻe Uili hono fakahoko ʻe he ʻEikí ha ngaahi mana ʻo fakafou ʻi heʻene ngaahi ngāué. Naʻe ʻi ai ha taimi ʻe taha naʻá ne tukituki ai mo hono hoá ʻi ha matapā, ʻi hono fakaava haké naʻe maheʻa mai ha meʻa namu haʻahaʻa mei loto. Naʻá na fanongo ki ha ui mai ha kiʻi leʻosiʻi mei loto. Naʻe pehē mai, “Hū mai. ʻOku ou puke.”
Naʻe ilifia ʻa Uili mo hono hoá ke na hū ki he falé, ka naʻá na hū ki loto peá na ʻilo ai ha tangata ʻoku hangē ʻokú ne fakaʻauʻausinó. Naʻá na fehuʻi ange, “ʻE lava nai ke tau lotu?”
Naʻe loto-lelei ki ai ʻa e tangatá, naʻá na fai leva ha lotu ʻo tāpuakiʻi ʻa e tangatá ke moʻui mei hono fokoutuá. Naʻá na talaange, “Te ma toe foki mai ʻapongipongi.”
ʻI he ʻaho hono hokó, naʻá na fetaulaki mo e tangatá ʻoku ʻi tuʻa ʻi hono falé. Naʻá ne pehē ange, “Ko ha ongo tangata kimoua ʻa e ʻOtuá.” Kuó ne ongoʻi sai mai talu mei heʻena lotú. Naʻá ne fakaʻamu ke ne punopuna fiefia.
Naʻe teʻeki ke ongoʻi mateuteu ʻa e tangatá ke kau ki he Siasí, ka naʻe ʻi ai ha niʻihi kehe naʻa nau mateuteu. ʻI he uike kotoa pē, naʻe fetaulaki ʻa Uili mo e kau faifekau kehé mo ha kakai—taimi ʻe niʻihi ko ha fāmili kakato—ʻa ia naʻa nau loto ke moihū fakataha mo e Kāingalotú. Naʻa nau papitaiso ha kakai ʻe toko tolungofulu tupu ʻi ha ngaahi ʻaho Tokonaki ʻe niʻihi.
Naʻe kamata ke tupulaki ʻa e Siasí ʻi Luputa.
ʻI he ʻaho 5 ʻo Sune 1997, naʻe tuʻu ʻa Palesiteni Kōtoni B. Hingikelī ʻi ha tuʻunga malanga ʻi ha lalo tēniti lahi ʻi Kolonia Hualasi, Mekisikou. Naʻe tangutu ha kakai ʻe meimei onoafe ʻi he haʻofangá. Naʻá ne fakakata ange ki he haʻofangá, “ʻOku fakaʻofaʻia mai ha kakai ʻe niʻihi ʻi he Siasí ʻiate kimoutolu. ʻOku hangē ʻoku mou fuʻu mamaʻo mei he tokotaha kotoa pē.”
Naʻe nofo ʻa e kāingalotu ʻo e Siasí mei he ʻIunaiteti Siteití ʻi Kolonia Hualasi pea mo ha ngaahi kolo kehe ʻi he fakatokelau ʻo Mekisikoú lolotonga ʻa e fakafepakiʻi ʻe he puleʻanga ʻIunaiteti Siteití ʻa e mali tokolahí ʻi he 1880 tupú. Naʻe tuʻu ʻa e ʻū kolo ko ʻení ʻi he Toafa kakā ko Sīhuahuaní, fakafuofua ko ha maile ia ʻe uangeau mei ha faʻahinga kolo lalahi pē. Naʻe hokosia e taʻu teau ʻenau ʻapiako naʻe fakalele ʻe he Siasí, ʻa e Akoʻanga Hualasí, pea naʻe haʻu ʻa Palesiteni Hingikelií ke fakamanatua ʻa e polokalamá.
Naʻe ʻiloʻi ʻe Palesiteni Hingikelī ʻa e hisitōlia ʻo e Kāingalotu ʻi Kolonia Hualasí, pea naʻá ne tanganeʻia ʻi heʻenau vilitaki ke tauhi ʻa e tuí. Naʻá ne talaange kiate kinautolu, “Kuo mou fetokoniʻaki ʻi he ngaahi taimi ʻo e faingataʻá mo e mamahí. Naʻe pau ke mou fai ia koeʻuhí he naʻa mou tuenoa. Kuo mou hoko ko ha fāmili tokolahi pē ʻe taha.”
ʻI he ʻaho hono hokó, naʻe lea ʻa Palesiteni Hingikelī ʻi he polokalama fakaʻosi ako ʻa e ʻapiakó peá ne toe fakatapui ʻa e fale foʻou ʻo e ʻapiakó naʻe toki fakaleleiʻí. Hili iá, naʻe fakaʻuli ʻa Melitita Lomenī, ko e palesiteni ʻo e Siteiki Kolonia Hualasí, ʻi ha maile ʻe uangeau ki he tokelaú ki he malaʻe vakapuna ʻi ʻEla Paso, Tekisisí.
Naʻe faingataʻa mo tokakovi ʻa e hala ki ʻEla Pasó. ʻI he kamatá, naʻe femoʻuekina ʻa Palesiteni Hingikelī ʻi he talanoa mo Palesiteni Lomenií. Ka ʻi he hili ha kiʻi taimi naʻe kiʻi holoholo hifo ʻa e fepōtalanoaʻakí, pea naʻe fakakaukau fakalongolongo ʻa Palesiteni Hingikelī ki he Kāingalotu ʻi Kolonia Hualasí pea mo e vāmamaʻo ʻo ʻenau fononga ke ʻalu ki he fale ʻo e ʻEikí. Naʻá ne fifili, “Ko e hā ha meʻa te tau lava ʻo fai ke tokoni ki he kakai ko ʻení?”
Naʻe fekauʻaki ʻa e fehuʻi ko ʻení mo e Kāingalotu ʻi he tapa kotoa pē ʻo e māmaní. Naʻe ʻi ai ha ngaahi temipale naʻe lolotonga palani pe naʻe lolotonga langa, ʻe ʻikai fuoloa kuo lava ʻe ha peseti ʻe 85 ʻo e kāingalotu ʻo e Siasí ʻo aʻu ki ha temipale ʻoku ʻi loto ʻi he maile ʻe tolungeaú. Hangē ko ʻení, ʻi he fakatokelau ʻo Palāsilá, ʻe toe ofi ange ʻa e Kāingalotu naʻa nau faʻa fononga ʻi ha maile ʻe laui afe ke ō ki he temipale ʻi Sao Pauló ki he temipale foʻou ʻi Lesifí, ko ha kolo ʻi he matāfanga fakatokelauhahake ʻo Palāsilá. ʻE pehē pē hono ʻomi ʻe he temipale foʻou ne toki fanongonongo ʻi Kamipinasí, ko ha kolo ʻoku maile ʻe onongofulu ki he fakatokelau ʻo Sao Pauló, ʻa e ngaahi tāpuaki fakatemipalé ki he Kāingalotu ʻe onokilu ʻi Palāsilá. He ʻikai fuoloa, ʻe fiemaʻu foki mo ha ngaahi temipale ʻi he ngaahi kolo hangē ko Poto ʻAleke, Manau, Kulitipa, Palāsīlia, Pelo Holisoni, mo Liotī Seneló.
Ka naʻe loto ʻa Palesiteni Hingikelī ke ʻomi ʻa e ngaahi temipalé ke toe ofi ange ki ha Kāingalotu tokolahi ange. Naʻá ne tui naʻe fakahoko ʻe he fale ʻo e ʻEikí ha fatongia mahuʻinga ʻi hono tokoniʻi ʻa e kāingalotu ʻo e Siasí ke nau kei līʻoa pē ki he ongoongolelei ʻo Sīsū Kalaisi kuo fakafoki maí. Kimuí ni maí, naʻe ʻilo ʻe he palōfitá ko e peseti pē ʻe 20 ʻo e kau papi ului foʻoú naʻa nau kei maʻulotu mo kau ki he Siasí ʻi he hili ha taʻu ʻe taha. Naʻá ne hohaʻa mo hono ongo tokoní ʻi he fakaʻohovale ʻa e pēsetí, pea ʻi Meé naʻa nau ʻave ha tohi ki he kāingalotu kotoa ʻo e Siasí.
Naʻe pehē ʻe he tohí, “ʻOku mau hohaʻa lahi ki ha tokolahi homau kāinga ʻo e toʻu kotoa pē ʻa ia kuo nau maʻu ha fakamoʻoni ʻo e ongoongolelei ʻo Sīsū Kalaisí ka kuo teʻeki ke nau ongoʻi ʻa e māfana ʻo e feohi mo e Kāingalotú. Kuo fuʻu tokolahi ha niʻihi ʻoku ʻikai ke nau maʻu ʻa e ngaahi tāpuaki ʻo e lakanga fakataulaʻeikí pea mo e ngaahi talaʻofa fuakava ʻo e temipalé.”
Naʻe hoko atu ʻa e tohí ʻo pehē, “ʻOku fiemaʻu ʻe he mēmipa foʻou kotoa ha ngaahi meʻa ʻe tolu, ko ha kaungāmeʻa, ko ha fatongia, pea mo ha fafanga fakalaumālie ʻo fakafou ʻi hono ako ʻo e ongoongoleleí.”
ʻI Kolonia Hualasí, naʻe ʻiloʻi ai ʻe Palesiteni Hingikelī naʻe maʻu ʻe he Siasí ʻa e meimei meʻa kotoa pē naʻe fiemaʻu ke fakahoko ʻaki ʻa e faʻahinga tokoni ko ʻení ki he Kāingalotu fakalotofonuá. Ko e meʻa pē naʻe ʻikai ke maʻu aí ko ha fale ʻo e ʻEikí. Ko e meʻa tatau pē naʻe moʻoni ki he ngaahi siteiki ʻi he ngaahi feituʻu kehe ʻi he funga ʻo e māmaní. Ka naʻe faingataʻa ke fakapapauʻi hono langa e ngaahi temipalé ʻi he ngaahi feituʻu naʻe ʻikai ke tokolahi feʻunga ai ʻa e Kāingalotú ke nau fakaʻaongaʻi mo tauhi [ʻa e ngaahi temipalé].
Naʻá ne fakakaukau ki he mamafa e totongi ʻo e ʻū falefoó mo e falekaí ʻi he ngaahi temipalé. Naʻe ʻomi ʻe he ongo meʻa fakatouʻosi ko iá ha tokoni fiemālie ki he kau pataloni ʻo e temipalé. Kae fēfē kapau ʻe ʻomi ʻe he kau pataloní ha vala temipale pē ʻonautolu pea maʻu mo e meʻakaí mei ha feituʻu kehe?
Kuo fakakaukau ʻa Palesiteni Hingikelī, ʻi ha ngaahi taʻu lahi, ke liliu ʻa e palani ʻo e ngaahi temipale ʻe niʻihi kae lava ke langa ha ngaahi temipale lahi ange ʻi he funga ʻo e māmaní. Naʻe ʻosi liliu ʻe he Siasí ʻa e palani ʻo e ngaahi temipalé ke feau ʻa e ngaahi fiemaʻu ʻo e Kāingalotu fakalotofonuá ʻi he ngaahi feituʻu hangē ko Laʻie, Sao Paulo, Feleipeki, mo Hongo Kongó. Fēfē kapau ʻe langa pē ha temipale ʻoku ʻi ai e ngaahi meʻa mahuʻingá: ʻa e faiʻanga papitaisó mo e ʻū loki ki he hilifakinimá, ʻinisitolí, ʻenitaumení mo e silá? Kapau ʻe fakahoko ia ʻe he Siasí, ʻe lava ke fokotuʻu ʻa e fale ʻo e ʻEikí ʻi he ngaahi fonua ʻi he mamaʻó, pea ʻomi ai ʻa e ngaahi fuakava mo e ngaahi ouau toputapú ke ofi ange ki ha Kāingalotu tokolahi ange.
Kimui angé, naʻe tā ʻe Palesiteni Hingikelī ha palani faingofua ki he faliki ʻo e faʻahinga temipale naʻá ne vīsone ki aí. Naʻe mahino mo mālohi ʻa e ueʻi fakalaumālié. ʻI he taimi naʻá ne tūʻuta ai ʻi Sōleki Sití, naʻá ne fakaʻaliʻali ia kia Palesiteni Monisoni mo Palesiteni Fausi, pea naʻá na tali ʻa e fakakaukaú. Naʻe poupouʻi foki ʻe he Kōlomu ʻo e Kau ʻAposetolo ʻe Toko Hongofulu Mā Uá ʻa e foʻi fakakaukaú.
Naʻe faifai pea ʻave ʻe Palesiteni Hingikelī ʻa e fakatātaá ki ha tokotaha tā palani ʻa e Siasí. Naʻe sivisiviʻi ʻe he tokotaha tā palaní ʻa e fakatātaá.
Naʻá ne pehē ange, “Fakaʻofoʻofa. Ko ha fakakaukau ʻoku ngāueʻi ngofua.”