Vahe 33
Ko e Hā ʻa e Siasi Ko ʻEní?
Naʻe fiefia ʻa e Kāingalotu ʻi he tokelau-hahake ʻo Mekisikoú ʻi he ʻaho 28 ʻo ʻEpeleli 2002, ʻi he taimi naʻe fakatapui ai ʻe Palesiteni Hingikelī ha fale ʻo e ʻEikí ʻi Monitelei, Nuevo Leone, Mekisikoú. Ko e temipale ʻaki ia hono 110 ʻo e Siasí naʻe ngāué—pea ko e temipale hono hongofulu mā taha ia kuo fakatapui ʻi Mekisikou ʻi ha taʻu ʻe tolu. Hangē ko e meʻa ne fakakaukau ki ai ʻa Palesiteni Hingikelií, kuo hanga ʻe he temipale ʻe nimangofulu mā valu naʻe fakatapui talu mei he kamata hono fakaʻaongaʻi ʻe he Siasí ʻa e sīpinga foʻou ʻo e temipalé ʻi he 1998, ʻo fakamafola ha ngaahi tāpuaki mo ha ngaahi mana ʻo lahi ʻaupito. Ko e Kāingalotu ko ia naʻa nau fononga tuʻo taha ʻi ha ngaahi ʻaho lahi ke ō ki he temipalé, te nau lava ʻi he taimí ni ʻo aʻu ki he taha ʻo e ngaahi temipalé ʻi ha ngaahi houa pē pea naʻa mo ha ngaahi miniti.
Naʻe kau ʻi he fuofua Kāingalotu naʻe monūʻia mei he lahi ange ʻo e ngaahi temipale naʻe langá ʻa kinautolu ʻi he ngaahi feituʻu naʻe nofoʻi ʻe he kau Mekisikou Siasí, ʻa ia naʻe ueʻi fakalaumālie ʻe heʻenau nofo mamaʻó ʻa e sīpinga foʻou ʻo e temipalé. ʻI hono fakatapui ʻi Māʻasi ʻo e 1999, naʻe sikuea fute ʻe 6,800 ʻa e Temipale Colonia Juárez Chihuahua—ko e temipale siʻisiʻi taha ia ʻa e Siasí—ka naʻe vave ʻene hoko ko ha konga mahuʻinga ʻo e koló.
Naʻe fiefia ʻa Peta Sāveesi, ʻa ia naʻe maʻulotu ofi mai ʻi Nuevo Kesasi Kulenisií, ʻi he taimi naʻe fakaafeʻi ai ia ʻe ha tokoni ʻi he kau palesitenisī ʻo e temipalé ke ne hoko ko ha tokotaha ngāue ouau ʻi he temipale foʻoú. Ko e fakaʻānaua ia ʻa Petá ke ngāue ʻi he fale ʻo e ʻEikí talu mei hono maʻu hono ʻenitaumení ʻi he Temipale Mesa Arizona ʻi he 1987. Kuo hoko ʻeni ʻo moʻoni ʻene misí!
Naʻá ne manatu ʻo pehē, “Ko ha meʻa lelei mo fakaʻofoʻofa moʻoni ia. Naʻá ku puna hake, ʻo tangi ʻi he fiefia, mo e houngaʻia ki he ʻEikí ʻi hono foaki mai ʻa e faingamālie maʻongoʻonga ko ʻeni ke u ngāue ai ʻi Hono falé.”
ʻI he tafaʻaki ʻe taha ʻo e ʻAtalanitikí, naʻe fononga ai ʻa Malilena Keletilī Peleteli Pusito mei hono ʻapi ʻi Potukalí ki he Temipale Madrid Spain ne toki fakatapuí. ʻI he taʻu ʻe taha kimuʻá, naʻe mālōlō ai ʻene kui fefine taʻu 101. Naʻe vēkeveke ʻeni ʻa Malilena ke maʻu ʻa e ngaahi ouaú maʻa ʻene kui fefiné.
ʻI he fale ʻo e ʻEikí, naʻe ʻamanaki ʻa Malilena ke ne ongoʻi ha meʻa makehe ʻi he taimi naʻe papitaiso ai maʻa ʻene kui fefiné, ka naʻe ʻikai. Pe te ne ongoʻi ha meʻa lolotonga ʻa e hilifakinimá mo e ngaahi ouau ʻenitaumení. ʻI he kamataʻangá, naʻe hohaʻa ʻa Malilena ʻi he ʻikai ke ne maʻu ʻa e ongo ko ʻení. Ka ʻi he taimi naʻá ne tūʻulutui ai ʻi he ʻōlitá ʻi he loki silá, kuó ne mateuteu ke silaʻi ʻene kui fefiné ki heʻene ongomātuʻá, naʻá ne fiefia ʻi heʻene fakahoko ʻa e ngāue fakatemipalé.
Naʻe kamata leva ke lea ʻa e faisilá, pea naʻe ongoʻi ʻe Malilena ha ongo makehe ʻi hono sinó. Naʻe ʻikai ke ne lava ʻo fakamatalaʻi totonu ʻa e meʻa naʻá ne ongoʻí, ka naʻá ne ʻiloʻi fakapapau naʻe fiefia ʻene kui fefiné ʻi he maama tataliʻanga ʻo e ngaahi laumālié.
Lolotonga iá, naʻe teuteu ha tokolahi ʻo e Kāingalotu ʻe toko taha kilu ʻo e fonuá ʻi Polivia ke nau ō ki he Temipale Cochabamba hili hono fakatapui ʻi ʻEpeleli ʻo e 2000. ʻI he tui ʻa Malia Mēkau Ti ʻAkuino, ko ha palesiteni Fineʻofa fakasiteiki ʻi Kokapamipā, ʻoku teuteuʻi ʻe he ngaahi fāmili mālohí ʻa e kāingalotu ʻo e Siasí ke nau ō ki he temipalé, naʻá ne fokotuʻutuʻu ai ha fakataha naʻe fakataumuʻa ke fakamālohia ʻa e nofo-malí mo fakamahino ki he houʻeiki fafiné honau mahuʻingá.
ʻI he siteiki tatau pē, naʻe lava ke sio ʻa ʻAnitoniō mo Kolōlia ʻĀvieli ki he founga naʻe fakamālohia ai ʻe he temipale foʻoú hona fāmilí. Naʻe fakamoʻoni ʻa ʻAnitoniō ʻo pehē, “ʻOku faingofua ange hono ohi hake ʻo e fānaú he taimí ni ʻi heʻetau maʻu ʻa e ongoongoleleí mo e ngaahi tāpuaki ʻo e temipalé ʻi heʻetau moʻuí. ʻOku mau maʻu ai ha konga ʻo hēvani ʻi homau ʻapí.”
Naʻe liliu moʻui foki ha fale ʻo e ʻEikí ʻi Fukuoka, Siapani. Kuo laka hake ʻi he taʻu ʻe tolungofulú talu mei he kau ʻa Kasuhiko Iamasitā, ko e palesiteni ʻo e Siteiki Fukuoká, ki he Siasí hili ʻene mamata ʻi he Man’s Search for Happiness (Fekumi ʻa e Tangatá ki he Fiefiá) ʻi he fakaʻaliʻali ʻa e māmaní ʻi ʻOsaka, Siapaní. Naʻe hokohoko atu ʻene maʻu ha fakahinohinó ʻi heʻene tui ki he palani ʻo e fakamoʻuí. Naʻá ne sila mo hono uaifi ko Tasukó ʻi he Temipale Tokyo ʻi he 1980, pea naʻá na maʻu fakataha ha fānau ʻe toko ono.
Naʻe hoko ʻi he taimi ko ʻení ʻa e Temipale Fukuoka ko e uho ʻo e Siasí ʻi he fakatonga ʻo Siapaní. Lolotonga ʻa e ʻoupeni hausí, naʻe fiefia ʻa Kasuhiko ʻi heʻene fakatokangaʻi naʻe fakaafeʻi loto-vēkeveke ʻe ha Kāingalotu tokolahi honau fāmilí mo e kaungāmeʻá ke nau mamata ʻi he fale ʻo e ʻEikí. Naʻe foki mai foki mo ha Kāingalotu tokolahi naʻa nau hē atu mei he tākangá, naʻe toe fakaake ʻenau tuí ʻe he ivi tākiekina mālohi ʻo e temipalé. ʻI he tangutu ʻa Kasuhiko ʻi he loki silesitialé lolotonga ʻo e fakatapuí, naʻá ne ongoʻi nonga moʻoni. Naʻá ne maʻu ha ongo mālohi naʻe ʻi ai ʻa e ʻEikí pea naʻá Ne ʻofa ʻi he Kāingalotu ʻi Siapaní. ʻI he sio atu ʻa Kasuhiko kia Palesiteni Hingikelií, naʻá ne fakatokangaʻi ha loʻimata ʻi he fofonga ʻo e palōfitá.
Naʻe ʻikai fuoloa kuo ʻomi ʻe he temipale foʻou ʻi Monitelei, Mekisikoú ha ngaahi tāpuaki. Naʻe kau ʻa Loma mo Noma Lotilikesi ki he Siasí hili ʻena ʻalu ki he ʻoupeni hausi ʻa e temipalé. ʻI he taimi ko iá, naʻá na fakakaukau ke fakafoʻou ʻena mali taʻu ʻe hongofulu mā nimá ʻi ha kātoanga fakaʻofoʻofa. Ka naʻe ʻi ai ha meʻa fekauʻaki mo e palani ko iá naʻe ʻikai ongo tonu, ʻo ueʻi ai ʻa Noma ke lotu ki he ʻOtuá ke maʻu ha fakahinohino.
ʻI he taʻu hono hokó, naʻá ne foki mo Loma ki he Temipale Monterrey mo ʻena fānau ʻe toko tolú. Naʻe ʻikai ke na toe fiemaʻu ha mali lahi. ʻI he ngaahi talaʻofa fakaʻofoʻofa mo taʻengata ʻo e mālohi faisilá, naʻá na ʻilo ai ʻa e ouau mali kuó na fakaʻamua maʻu peé.
ʻI he taimi naʻe ui ai ʻa Ane Pingilī ko e tokoni ua ʻi he kau palesitenisī lahi ʻo e Fineʻofá ʻi ʻEpeleli 2002, naʻá ne hohaʻa fekauʻaki mo e poto ʻi he laukongá mo e tohí ʻi he lotolotonga ʻo e houʻeiki fafine ʻo e Siasí. Mei he 1995 ki he 1998, naʻá ne hoko ai mo hono husepāniti ko Siaosí ko ha ongo taki fakamisiona ʻi he Misiona Nigeria Port Harcourt. Naʻe ʻikai lava ke laukonga ha tokolahi ʻo e kau fafine naʻá ne fetaulaki mo ia ʻi he taimi ko iá, ʻo faingataʻa ai ke nau ngāue ʻi he Siasí.
ʻI he tupulaki ʻa e Siasí ʻi he ngaahi puleʻanga fakalakalaká lolotonga ʻo e 1970 tupú mo e 80 tupú, naʻe hoko hono akoʻi ʻo e kakaí ke laukongá ko ha konga ʻo hono misioná. ʻI he 1992, naʻe fokotuʻu ʻe ʻIleini L. Siaki ko e palesiteni lahi ʻo e Fineʻofá ʻa e ako lea mo e laukonga faka-Pilitāniá ko ha meʻa ke fakatefito ai ʻene kau palesitenisií, ʻo iku ai ki hono faʻu ʻo e Polokalama Ako Laukonga mo e Tohi ʻa e Ongoongoleleí ke akoʻi ʻa e laukongá mo poupouʻi ʻa e kāingalotu ʻo e Siasí ke nau ako ʻa e folofolá, fakahinohinoʻi honau ngaahi fāmilí, mo fakatupulaki kinautolu.
Naʻe ngāue ʻa Ane ʻi he poate ʻa Palesiteni Siakí kimuʻa peá ne ngāue fakafaifekaú, pea ʻi heʻene tūʻuta ʻi Naisīliá, naʻá ne ngāue mo e kau faifekaú mo e Kāingalotu fakalotofonuá ke paotoloaki ʻa e poto ʻi he laukongá mo e tohí ʻi he ongoongoleleí. Naʻe tokoni foki ʻa e poate lahi ʻa e Fineʻofá mo ha tokotaha tā valivali ʻi ʻIutā ke ne faʻu ha fanga kiʻi pousitā ako faingofua mo ha fanga kiʻi tohi tufa ke tokoni ki he kakai fefine ʻi he misioná naʻe faingataʻa ke nau laukongá. ʻI heʻene fakaʻaongaʻi ʻa e ngaahi naunau ko ʻení, naʻá ne vakai ki ha kakai fefine tokolahi ange ne nau fakahoko honau uiuiʻí ʻi he loto-falala mo e loto-mahino.
Lolotonga ʻo e fuofua taʻu ʻo Ane ʻi he kau palesitenisī lahi ʻo e Fineʻofá, naʻe vahe ange kiate ia ke ne tataki ʻa e ngaahi ngāue ʻa e kautahá ki he laukongá mo e tohí. Naʻe fakahaaʻi ʻe he ngaahi fakatotoló naʻe siʻisiʻi ange ʻa e lava ke maʻu ʻe he houʻeiki fafine ʻi he māmani fakalakalaká ʻa e akó ʻi he kakai tangatá, ʻo siʻisiʻi ange ai ʻenau poto ʻi he laukongá mo e tohí. Naʻe fokotuʻu mai foki ʻe he fakamoʻoní naʻe ngalingali ke nofo ʻa e Kāingalotú ʻi he Siasí mo maʻulotu maʻu pē ʻi he taimi naʻa nau poto ai ʻi he laukongá. Naʻe kaungā-tui fakataha mo Ane, ʻa e palesiteni lahi ʻo e Fineʻofá ko Poni D. Pākini mo e tokoni ʻuluakí, Kefilini Hiu, ʻe hanga ʻe hono tokoniʻi ʻo e kau mēmipa ʻo e Fineʻofá ke ako ke laukongá ʻo fakaivia kinautolu ke nau ngāue lelei ʻi he Siasí, fakamālohia honau ngaahi fāmilí, maʻu ha ngāue lelei ange, mo maʻu ha ngaahi fakamoʻoni mālohi ange kia Sīsū Kalaisi.
ʻI he malumalu ʻo Palesiteni Pākiní, naʻe hokohoko atu hono fakamamafaʻi ʻe he poate ʻa e Fineʻofá ʻa e Ngāue ki he Poto ʻi he Laukongá mo e Tohí ʻi he Ongoongoleleí. Naʻa nau poupouʻi foki ʻa e Kāingalotú ke nau fakaʻaongaʻi ʻa e Ye Shall Have My Words (Te Mou maʻu ʻEku Ngaahi Leá), ko ha tohi lēsoni laukonga naʻe ʻuluaki faʻu ʻe he Potungāue Ako ʻa e Siasí. Hangē ko Ané, naʻe mahino kiate kinautolu naʻe faingataʻaʻia ha kāingalotu tokolahi ʻo e Siasí, ʻo ʻikai ko hanau foʻui, ʻi honau ngaahi uiuiʻí koeʻuhí he naʻe ʻikai ke nau lava ʻo lau pe mahino kiate kinautolu ʻa e ngaahi tohi tuʻutuʻuni mo e ngaahi tohi lēsoni lahi ʻa e Siasí.
ʻI hono aleaʻi ʻe he kau palesitenisií ʻa e ngaahi palopalema ko ʻení, naʻe lea ʻa Ane fekauʻaki mo e founga ʻe lava ke fakaʻaongaʻi ai ʻa e fanga kiʻi tohi ako faingofua hangē ko ia naʻá ne fakaʻaongaʻi ʻi Naisīliá ʻi he funga ʻo e māmaní. Naʻe fakakaukau ʻa Palesiteni Pākini ʻoku totonu ke faʻu ʻe he poate lahi ʻo e Fineʻofá ha fanga kiʻi tohi tatau ke tokoni ki he kāingalotu ʻi he ngaahi feituʻu ʻoku siʻisiʻi ai ʻa e poto ʻi he laukongá mo e tohinimá.
Ke tokoni ki he ngāué ni, naʻe fokotuʻu ʻe he poate lahí ʻa Fololeni Sukiula, ko ha mēmipa ʻo e Siasí naʻe fetaulaki mo Ane ʻi Naisīlia, ke ngāue mo kinautolu. Naʻe ʻaʻahi ʻa Fololeni ki Sōleki Siti lolotonga ʻa e fakataha ako ʻa hono husepānití, ko e fitungofulu taki fakaʻēlia ko Kulisitofā N. Sukiulá, ʻi he hetikuota ʻo e Siasí. Naʻe ngāue ʻa Fololeni ko ha neesi, naʻá ne tupu masivesiva hake pea naʻe mahino kiate ia ʻa e tuʻunga ʻo e nofo ʻi ha feituʻu naʻe kei foʻou ai ʻa e Siasí.
Naʻe fakangofua ʻe he Kau Palesitenisī ʻUluakí ʻa e fakaongoongoleleí, pea vahe ʻe Palesiteni Pākini ʻa Fololeni ke ngāue mo e kōmiti laukongá mo e tohinimá. Naʻe ʻikai fuoloa, kuó ne ngāue mo e kau mēmipa kehe ʻo e poaté ke faʻu ha fanga kiʻi tohi ako faingofua.
Naʻe fiefia lahi ʻa Ane ke sio ki he ngaʻunu ki muʻa ʻa e ngāue ki he poto ʻi he laukongá mo e tohinimá. Naʻá ne fakakaukau, “ʻOku vave ʻaupito ʻene fakalakalaká. ʻOku ʻikai ke u faʻa tui ki ai.”
ʻI Filipainí, naʻe houngaʻia ʻa Sepi Solasitā ke toe foki ki ʻapi. Naʻe fakamafasiaʻi lahi ʻe heʻene mamaʻó ʻa hono uaifi ko Melitiané, mo hona ngaahi foha ʻe toko tolú. Ko ʻeni kuo feohi ʻa e fāmilí ʻi he ʻaho kotoa pē, pea naʻe ongoʻi ʻe Sepi ʻoku tāpuekina kinautolu. ʻOkú ne lava ʻo talanoa mata ki he mata mo hono ngaahi fohá, poupouʻi kinautolu ke nau mālohi ʻi he Siasí, mo tokoniʻi kinautolu ke nau teuteu ke ngāue fakafaifekau.
ʻI he foki mai ʻa Sepí, naʻe hoko ʻa Melitiane ko e kouʻōtineita ʻo e tafaʻaki fetuʻutaki mo e kakaí ʻa e Siasí maʻá e ngaahi siteiki ʻi Iloilo Sití. ʻI he uiuiʻi ko ʻení, naʻá ne tokoni ai ki he kau taki ʻo e koló mo e puleʻangá ke nau ʻilo fekauʻaki mo e Siasí. Naʻá ne fokotuʻutuʻu foki ʻa e Siasí ke fengāueʻaki mo ha ngaahi kulupu fakalotu mo ngāue tokoni ke tokoni ʻi hono sivi ʻo e matá, toʻo totó, mo ha ngaahi ngāue kehe. Lolotonga iá, naʻe hoko ʻa Sepi ko ha aleaʻanga māʻolunga ʻi he Siteiki Iloilo Noaté.
ʻI he taimi ko iá, naʻe kei hohaʻa pē ʻa e Kau Palesitenisī ʻUluakí fekauʻaki mo e Kāingalotu ʻi he ngaahi feituʻu naʻe ʻikai tokolahi ʻa e maʻulotu aí. Naʻe meimei toko nima kilu ʻa e Kāingalotu Filipainí, ka naʻe fakafuofua ki ha peseti pē ʻe 20 ne maʻulotu maʻu peé. ʻI he tali ki he hohaʻa ko ʻení, naʻe ui ai ʻe Palesiteni Hingikelī ʻa ʻEletā Tāleni H. ʻOakesi ke hoko ko e palesiteni ʻo e ʻĒlia Filipainí pea mo ʻEletā Sefilī R. Hōlani ke hoko ko e palesiteni ʻo e ʻĒlia Sileí, ʻa ia naʻe fehangahangai mo ha ngaahi faingataʻa tatau. Naʻe fakatou kamata ʻe he ongo ʻaposetoló ʻena ngāué ʻi ʻAokosi 2002 mo ha palani ke fua ʻa e fatongia ko ʻení ʻi ha taʻu ʻe taha.
ʻI he ʻOtu Filipainí, naʻe fakataha maʻu pē ʻa ʻEletā ʻOakesi mo hono ongo tokoní mo e kau taki fakasiteikí, fakamisioná, mo e fakaʻēliá. Lolotonga ha fakataha ako makehe ʻi Manila, naʻe lea ʻa ʻEletā ʻOakesi fekauʻaki mo e mahuʻinga ʻo hono tali ha “tukufakaholo ʻo e ongoongoleleí” ʻo makatuʻunga ʻi he palani ʻo e fakamoʻuí, ngaahi fekau ʻa e ʻOtuá, mo e ngaahi akonaki ʻa e kau palōfita ʻo onopōní. Naʻá ne fakatokangaʻi naʻe maʻu ʻa e ngaahi ʻelemēniti ʻo e tukufakaholo ʻo e ongoongoleleí ʻi he ngaahi anga fakafonua fakalotofonua ʻi he feituʻu kotoa pē. Ka naʻe ʻi ai foki mo ha ngaahi tafaʻaki ʻo e ngaahi anga fakafonua ko ʻení naʻe ʻikai fenāpasi mo e ngaahi akonaki ʻa Sīsū Kalaisí.
Naʻá ne akonaki ʻo pehē, “ʻOku fakatukupaaʻi kitautolu ʻe he ngaahi fuakava ʻoku tau fai ʻi he papitaisó ke liliu ʻetau moʻuí. Kuo pau ke tau liliu ʻa e ngaahi ʻelemēniti kotoa pē ʻo ʻetau ngaahi angafai pe tōʻonga fakafonua lolotongá ʻa ia ʻoku fepaki mo e ngaahi fekau ʻo e ongoongoleleí, ngaahi fuakavá, mo e tukufakaholó.”
Naʻe fakamamafaʻi ʻe ʻEletā ʻOakesi naʻe fakamālohia ʻe he tukufakaholo ʻo e ongoongoleleí ʻa e ngaahi fāmilí mo e fakafoʻituituí ʻaki hono poupouʻi ʻo e angamaʻá, mali temipalé, faitotonú, moʻui fakafalala pē kiate kitá, mo e hoa ngāue tuʻunga tatau ʻi he nofo-malí. Naʻá ne tapou ki he kau takí ke nau fakamahuʻingaʻi hono akoʻi ʻo e tokāteline ʻa e Fakamoʻuí mo langaki ʻa e tui kiate Iá ʻi he lotolotonga ʻo e Kāingalotú. Naʻá ne faleʻi foki kinautolu ke fakamālohia honau ngaahi uōtí ʻaki hono fakapalanisi ʻa e ngāue fakafaifekaú ʻaki ha ngaahi ngāue fakamālohia lahi ange mo fakahoko maʻu pē ha ngaahi ʻekitivitī ʻa e toʻu tupú.
Hili ʻa e akó, naʻe kole ʻe Sepi mo ha kau taki kehe ʻi he Siteiki Iloilo Noaté ki he kau pīsopeliki ʻo e uōtí ke nau kumi ha ngaahi fāmili ke fakafoki mai ki he tākangá. Naʻá na tui kapau ʻe foki mai ha tamai mo ha faʻē ki he siasí, ʻe pau ke na foki mai foki mo ʻena fānaú. ʻE hoko leva ʻa e fānaú ko ha kau faifekau mo ha kau taki ʻi he Siasí ʻi he kahaʻú.
ʻI he hoko ʻa Sepi ko ha tamai ki ha fānau taʻu hongofulu tupú, naʻá ne mātuʻaki hohaʻa ki he toʻu tupú. Ko ha palopalema lahi ʻi honau feituʻú ʻa e ʻikai lahi ha ngaahi ʻekitivitī maʻá e ngaahi kōlomu ʻo e Lakanga Taulaʻeiki Faka-ʻĒloné mo e ngaahi kalasi ʻa e Kau Finemuí. Naʻe siʻi hifo ʻi he peseti ʻe 10 ʻo e ngaahi uooti mo e kolo ʻi Filipainí ne nau maʻu kotoa mo lele ai ʻa e kōlomu ʻe tolu ʻo e Lakanga Taulaʻeiki Faka-ʻĒloné. Pea ko e lahi taha ʻo e ngaahi ʻiunití naʻe ʻikai ke ʻi ai ha ngaahi ʻekitivitī ʻi he lolotonga ʻo e uiké maʻá e toʻu tupú.
Naʻe tokangaʻi ʻe he Siteiki Iloʻilo Noaté ʻa e palopalemá ni ʻaki hono poupouʻi ʻa e ngaahi uōtí ke nau fakahoko maʻu pē ha ngaahi kalasi maʻá e toʻu tupú neongo kapau ko e toko taha pē pe toko ua ʻi he kalasí. ʻI he lele ʻa e ngaahi kalasí mo e ngaahi kōlomú, neongo pe ʻoku tokosiʻi fēfē, ka ʻe lava ke fakaafeʻi ʻe he kau finemuí mo e houʻeiki tangatá honau ngaahi kaungāmeʻá ki he ngaahi fakatahaʻanga ʻo e Sāpaté mo e ngaahi ʻekitivitī lolotonga ʻo e uiké.
Naʻe tui ʻa Sepi naʻe fiemaʻu ke kau ʻa e toʻu tupú ʻi he ngaahi ʻekitivitī ʻa e Siasí ʻa ia ʻe lava ke nau fakakaungāmeʻa ai mo maʻu ha kau faʻifaʻitakiʻanga lelei. ʻI he taimi naʻe fakahaaʻi ai ʻe he kau taki fakalotofonuá ʻenau hohaʻa naʻa ʻikai ke ʻi ai haʻanau patiseti feʻunga ke totongi ʻaki ʻa e ngaahi ʻekitivitií, naʻe talaange ʻe Sepi mo e kau taki kehe ʻo e siteikí ke nau palani pē ʻe kinautolu ʻa e ngaahi ʻekitivitií. Kapau naʻa nau fiemaʻu ha paʻanga lahi ange, ʻe lava ke ʻoange ia ʻe he siteikí.
ʻI he ngāue ʻa Sepi ki he Kāingalotu ʻi hono siteikí, ʻo fakaʻaongaʻi ʻa e meʻa naʻá ne ako meia ʻEletā ʻOakesí, naʻá ne fakakaukau ai ki hono ngaahi fatongia ʻi he lotú pea ʻi ʻapí. ʻI he lea ʻa ʻEletā ʻOakesi fekauʻaki mo e tukufakaholo ʻo e ongoongoleleí, naʻá ne faleʻi ʻa e Kāingalotu Filipainí ke ʻoua naʻa nau mavahe mei honau fāmilí ʻi ha taimi lōloa ke ngāue, ʻo hangē ko ia ne fai ʻe Sepí. Naʻe ʻi ai ha kakai ʻe niʻihi ʻi he ʻOtu Filipainí naʻe ʻikai haʻanau fili ka ke nau ʻalu ʻo ngāue ʻi muli, ka naʻe ʻiloʻi ʻe Sepi te ne lava pē mo hono fāmilí ʻo nofo fiefia mo tokonaki maʻanautolu ʻi Iloilo Siti.
Pea kiate iá, he ʻikai ha koloa te ne lava ʻo totongi ʻa e taimi naʻá ne mamaʻo ai mei hono fāmilí ʻi ha taimi lōloa.
ʻI ʻEpeleli ʻo e 2003, naʻe tūʻuta ai ʻa Peleiki Mekiueni taʻu hongofulu mā fā ki ha senitā fakasiteiki ʻi Palukihami Hila, ko ha kolo ʻi Senē, ʻAositelēlia, mo hono kiʻi tehina taʻu hongofulu mā fitu ko Ueití. Ko e angamahení, naʻe hoko ʻa e senitā fakasiteikí ko ha feituʻu nonga mo lōngonoa. Ka ʻi he ʻaho ní, kuo fokotuʻu ha tēniti lahi ʻi he tauʻanga meʻalelé, pea fonu ʻa e feituʻú ʻi ha toʻu tupu mei he ngaahi siteiki ʻi Niu Saute Uēlesí. Naʻa nau omi ke kau ʻi ha konifelenisi Tautautefito ki he Toʻu Tupú—ʻa ia ʻoku ʻiloa ʻi he taimí ni ʻi ʻAositelēlia ko e Time for Youth (Taimi maʻá e Toʻu Tupú).
Hili ʻa e ola lelei ʻa e EFY ʻi Pilisipeiní, naʻe poupouʻi ʻe he kau palesitenisī fakaʻēliá ʻa e ngaahi siteiki ʻi ʻAositelēlia mo Nuʻu Silá ke nau fokotuʻutuʻu haʻanau ngaahi polokalama pē ʻanautolu. ʻI he 2002, naʻe fokotuʻutuʻu ʻe Mele Makena mo ʻene kōmití ha Taimi Maʻá e Toʻu Tupú ʻi Pilisipeini pea taha ʻi Nuʻu Sila ʻi he 2003. Ko e Taimi Maʻá e Toʻu Tupu ʻi Palukihama Hilá ko e fuofua polokalama ia naʻe fakahoko ʻi ʻAositelēlia mavahe mei Pilisipeiní.
Neongo naʻe tupu hake ʻa Peleiki ʻi he Siasí, ka naʻe teʻeki ke ne mamata ʻi ha toʻu tupu tokolahi pehē ʻo e Siasí ʻi ha feituʻu ʻe taha kimuʻa. Naʻá ne haʻu mo Ueití mei Penilifi, fakafuofua ki ha fakaʻuli miniti ʻe fāngofulu mā nima mei he senitā fakasiteiki ʻo Palukihami Hilá. Naʻe ʻi ai haʻanau kulupu toʻu tupu mālohi ʻi honau uōtí, ka naʻe feʻunga ʻa e Kāingalotú mo ha vaeuaʻi peseti pē ʻe 1 ʻo e tokolahi ʻo ʻAositelēliá, ko ia ai ko e ngaahi ʻekitivitī ʻa e toʻu tupú—naʻa mo e lēvolo ʻo e siteikí—naʻe tātātaha ke tokolahi ange ʻi he kakai ʻe toko hongofulu mā uá ne kau atú. ʻI he ako māʻolunga ʻa Peleikí, naʻe toko ua pē ʻa e kāingalotu ʻo e Siasí makehe meiate ia mo hono tokouá.
ʻI he taimi pē naʻe lele ai ʻa e Taimi Maʻá e Toʻu Tupú, naʻe tātātaha ke na fesioaki mo Ueiti. Hili ʻa e sīpinga fakalele ʻo e EFY, naʻe kau ʻa e tokotaha kotoa pē ʻi he polokalamá ki ha kiʻi kulupu tokosiʻi naʻe taki ʻe ha ʻetivaisa taautaha kei talavou. ʻI he ngaahi kulupu ko ʻení, naʻe fetongitongi ʻa e toʻu tupú ʻi he ngaahi ʻekitivitií. Naʻa nau kau foki ʻi he ngaahi ngāue tokoní, fanongo ki he ngaahi fakataha lotú mo e ngaahi malangá, ako ha ngaahi hiva, ako ʻa e folofolá, fepoupouaki ʻi ha fakaʻaliʻali talēniti, mo kau atu ki ha hulohula.
Ko e kaveinga ʻo e konifelenisí ko e “ʻOku Mau Tuí,” pea fakatefito ʻi he kalasi semineli ʻo e taʻu ko iá, ʻa ia ko e Tokāteline mo e Ngaahi Fuakavá. Naʻe fakaʻaongaʻi ʻe he kau leá mo e kau ʻetivaisá ʻa e kaveingá ʻi heʻenau vahevahe ha ngaahi aʻusia fakalaumālie mo poupouʻi ʻa kinautolu naʻe kau maí ke nau haʻu kia Kalaisi, lotu, tauhi ha tohinoa, pea moʻui ʻaki ʻa e ngaahi meʻa mahuʻinga kehe ʻo e ongoongoleleí. Naʻe ʻoange foki ʻe he ngaahi houalotu fakamoʻoní ha faingamālie ki he toʻu tupú ke vahevahe ai ʻenau fakamoʻoni ki he Fakamoʻuí mo ʻEne ongoongolelei kuo fakafoki maí mo honau toʻú.
Naʻe faʻa taʻe-manonga ʻa Peleiki ʻi he lotú, ka naʻá ne kau atu ki he Taimi Maʻá e Toʻu Tupú mo ha fakavaʻe lelei ʻo e tuí mei heʻene ongomātuʻá. Naʻá ne hoko mo Ueiti ko e toʻu tangata hono tolu ʻoku kau ki he Siasí, pea naʻe hoko maʻu pē ʻena mātuʻá mo ʻena ngaahi kuí ko ha faʻifaʻitakiʻanga maʻongoʻonga ʻo e tuí mo e ngāue tokoní.
Naʻe fakamālohia foki ia ʻe he polokalama ʻa e Kau Talavoú. ʻI he hoko ʻa Peleiki ko ha tīkoní, naʻe uiuiʻi ia ko e palesiteni ʻo e kōlomú. Naʻe kole ange ʻe heʻene pīsopé ke fili ha ongo tokoni mo ha sekelitali mei he tamaiki tangata kehe ʻe toko hongofulu mā taha ʻi heʻene kōlomú. Hili ʻa e lotua ʻe Peleiki ha fakahinohinó, naʻá ne foki ki he pīsopé ʻi he uike hono hokó mo ha hingoa ʻe tolu. Naʻe fakaʻaliʻali ange ʻe he pīsopé kia Peleiki ʻene lisi ʻaʻaná, ʻa ia naʻe ʻi ai ha tamaiki tangata tatau pē ʻe toko tolu. Naʻá ne fokotuʻutuʻu ʻa e ngaahi hingoá ʻi ha hokohoko kehe, ka naʻá ne liliu ʻene lisí ke tatau mo Peleikí. Naʻe ʻoange ʻe he aʻusiá ni kia Peleiki ha loto-falala ʻi he lotú pea ʻi heʻene malava ke takí.
Naʻe ʻikai fuʻu fakafeohi ʻa Peleiki, ka naʻá ne fiefia ʻi hono maʻu ha ngaahi kaungāmeʻa foʻou mei he ngaahi uooti mo e siteiki kehe ʻi he Taimi Maʻá e Toʻu Tupú. ʻI he fakaʻosinga ʻo e ʻaho takitaha, naʻá ne foki mo Ueiti ki ʻapi ke mālōlō kimuʻa peá na toki foki pongipongia ʻi he pongipongi hono hokó.
Naʻe ʻikai fakatokangaʻi ʻe ha taha ʻiate kinaua ʻa e liliu naʻe hoko kiate kinaua ʻi he ʻaho ʻe tolu ʻi he Taimi Maʻá e Toʻu Tupú, ka naʻe fakatokangaʻi ʻe heʻena faʻeé ʻa e ngaahi liliú. ʻI he lotolotonga ʻo e fakafiefiá mo e vaʻingá, naʻe ʻoange ʻe he Taimi Maʻá e Toʻu Tupú ki he toʻu tupú ha ngaahi faingamālie ke nau ongoʻi ʻa e Laumālié ʻi ha ʻātakai foʻou. ʻI he foki mai ʻa Peleiki mo Ueití, naʻá na tokanga lahi ange ki he folofolá mo maʻu ha loto-falala lahi ange ki heʻena ngaahi fakamoʻoní.
ʻI he hoʻatā efiafi ʻo e ʻaho 10 ʻo Sānuali 2004, naʻe fakataha ai ʻa Siaosi A. Pōneti mo Palesiteni Hingikelī, ʻEletā Lāsolo M. Nalesoni, mo ha Kāingalotu ʻAfilika Hihifo ʻe lauiafe ʻi ha malaʻe sipoti ʻi ʻAkalā, Kaná. Naʻe haʻu ʻa e palōfitá ki he koló ke fakatapui hono temipale foʻoú. Ka kimuʻa pea fakatapuí, naʻá ne kole ki he fānau mo e toʻu tupu ʻo e ngaahi siteiki mo e ngaahi vahefonua ʻo Kaná ke nau fakamanatua ʻa e kātoangá ʻaki ha polokalama fakafonua ʻo fakaʻaliʻali ai ha ngaahi hiva mo ha faiva fakafiefia. Naʻá ne tui ʻe tokoni hono fakahoko ʻo e ngaahi kātoanga pehē ʻi hono fakatapui ʻo e temipalé ke maʻu ʻe he toʻu tupú ha ngaahi manatumelie fakangalongataʻa mo fiefia fekauʻaki mo e Siasí.
Hili ha fua lotu, naʻe tui ʻe he ngaahi kulupú ha ngaahi teunga lanu fakaʻofoʻofa ʻo nau faiva ʻi ha funga siteisi lahi kuo teuteuʻi ʻaki ha ngaahi fakatātā fakaʻofoʻofa. Naʻe hivaʻi ʻe ha niʻihi ʻo e kau fakaʻaliʻalí ha ngaahi hiva. Naʻe fakahoko ʻe ha niʻihi ha ngaahi faiva faka-Kana, hangē ko e Adowa mo e Kpanlogo, pe tā ha ngaahi fasi angamaheni ʻi he nafá mo e kofe fulutá.
Naʻe hoko ha meʻa makehe ʻi he efiafí ʻi he taimi naʻe hoko hake ai ʻa e kau faifekaú ki he funga siteisí ʻo hivaʻi ʻa e fasi ngāue fakafaifekaú ʻa ia ko e “Fanongo ko e ʻEiki ʻOku Ui.” Naʻe kaka hake foki ha fānau Palaimeli ʻe toko valungeau nimangofulu, kuo nau teunga hina, ki he funga siteisí ʻo hivaʻi mo e kau faifekaú ʻa e “Fānau Au ʻa e ʻOtuá.”
ʻI he pongipongi hono hokó, naʻe ʻā hake ʻa Siaosi mo ha loto-houngaʻia moʻoni. Kuo faifai pea aʻu mai ʻa e ʻaho fakatapuí. ʻI he hoko ʻa e hivá, naʻá ne kau fakataha ai mo Palesiteni Hingikelī mo ʻEletā Nalesoni ʻi he loki silesitialé ki he fuofua sēsini fakatapuí. Naʻe kamata ʻaki ha ouau makatuliki naʻe fakahoko ʻe Palesiteni Hingikelī. Hili iá, naʻe lea ʻa e metuloni ʻo e temipalé mo e palesitení, pea hoko atu ai ʻa ʻEletā Nalesoni mo ʻEletā ʻImanuela Kisi, ko ha fitungofulu taki fakaʻēlia ʻi he taimí ni, ʻa ia naʻá ne tataki ʻa e Kāingalotu Kaná lolotonga ʻa e vahaʻataimi taʻofi fakaʻaufulí.
Naʻe fai ʻe ʻEletā Kisi ha fakaʻapaʻapa ʻi heʻene leá kia Siosefa Uiliami Pili Sionisoni, ʻa ia naʻe ʻi he haʻofangá. Naʻá ne lea foki ʻo kau ki ha Kāingalotu kehe ʻi he kuonga muʻá ʻa ia naʻa nau fakafaingamālieʻi ʻa e tupulaki vave ʻa e Siasí ʻi Kaná.
Naʻá ne pehē, “Kuo hoko ʻo moʻoni ʻetau ngaahi fakaʻānauá.”
ʻI he ofi ki he fakaʻosinga ʻo e fakatahá, naʻe lea ʻa Palesiteni Hingikelī ʻi he loto-fakatōkilalo fekauʻaki mo e tokoni ʻa e ʻEikí ʻi hono langa ʻo e temipalé. Naʻá ne fakamoʻoni ʻo pehē, “Naʻe ongoʻi ʻe he ʻEikí ʻetau ngaahi lotú. Naʻá Ne ongoʻi hoʻomou ngaahi lotú. Naʻá ne fanongo ki he ngaahi lotu ʻa ha kakai tokolahi, pea kuo kakato ʻeni ʻa e temipalé.”
Naʻe fakatapui leva ʻe he palōfitá ʻa e falé. Naʻá ne lotu ʻo pehē, “ʻOku mau fakamālō ki hoʻo ʻAfió ʻi he ongo fakatokoua ʻoku ʻi homau lotolotongá, pea he ʻikai lava ʻe ha lanu ʻo e kilí pe fonua tupuʻangá ʻo fakamavahevaheʻi kimautolu ko Ho ngaahi foha mo e ngaahi ʻofefine kuo toʻo kiate kimautolu e ngaahi fuakava toputapu mo fakamaʻú. ʻOfa ke mafola atu hoʻo ngāué ʻi he fonuá ni pea ʻi he ngaahi puleʻanga hoko mai.”
Kimui ange ʻi he ʻaho ko iá, lolotonga ʻa e fakataha fakatapui hono tolú, naʻe ui ʻe Palesiteni Hingikelī ʻa Siaosi ke lea. Naʻe ʻohovale ʻa Siaosi peá ne tuʻu atu ki he tuʻunga malangá. Naʻá ne fakamoʻoni ʻo pehē, “ʻOku ou loto ke mou ʻilo ko hotau ʻOtuá ko ha ʻOtua ʻo e ngaahi mana. ʻOku hoko ʻa e ngaahi maná koeʻuhí ko e tuí, pea ʻoku tokolahi ha niʻihi kuo nau ngāue ʻaki ʻenau tuí ʻo fakafou ʻi he lotú mo e ngaahi founga kehe ʻo e mōihuú ke hoko ai ʻa e ʻaho maʻongoʻonga ko ʻení.”
Naʻá ne hoko atu ʻo pehē, “ʻOku ou tui ko hono maʻu ko ia ha temipale kuo fakatapui ʻi ʻAfilika Hihifó ko ha taha ia ʻo e ngaahi meʻa mahuʻinga taha kuo hoko talu mei he Fakalelei ʻa Sīsū Kalaisí pea mo hono fakafoki mai ʻo e ngaahi meʻa kotoa pē. ʻOku laui miliona ha kakai ʻAfilika kuo nau mālōlō ʻoku nau fiefia fakataha mo kitautolu he ʻahó ni.”
Hili ʻa e fakatapuí, naʻe kau fakataha ʻa Siaosi mo Palesiteni Hingikelī, ʻEletā Nalesoni, ʻEletā Kisi, mo ha niʻihi kehe ke ʻaʻahi kia Sione Kufua, ko e fetongi ʻo Seuli Lōlingi ko e palesiteni ʻo Kaná. Talu mei he hoko ʻa Palesiteni Kufua ki he lakangá ʻi he konga kimuʻa ʻo e 2001, kuó ne tokoni mo poupou mo ʻene timí lolotonga hono langa ʻo e temipalé. ʻI he 2002, naʻá ne ʻaʻahi ai ki he Kau Palesitenisī ʻUluakí ʻi Sōleki Siti ke ako lahi ange fekauʻaki mo e Siasí mo fakamālō ki he Siasí ʻi heʻenau tokoni ʻofa fakaetangata mo fakalotu ki Kaná. Naʻá ne ʻalu foki ki he ʻoupeni hausi kimuí ni ʻo e temipale ʻi ʻAkalaá peá ne ʻaʻahi holo ai ʻi he loto temipalé. Naʻá ne ʻohovale ʻi he meʻa naʻá ne vakai ki aí.
Naʻá ne talaange kia Palesiteni Hingikelī, “Kuo hoko homou siasí ko ha konga moʻoni ʻo Kana.”
ʻI Sune ʻo e 2004, naʻe tatali ʻa ʻEniselā Pitasoni ʻi heʻene kaá ki ha sivi ʻo e malú mo e kohú ʻo ofi ki Uāsingatoni, DC. Naʻe ʻi ai ha ʻū meʻalele lahi ʻi muʻa ʻiate ia, ʻo afeafe holo ʻa e lainé ʻi he tauʻanga meʻalelé. Naʻá ne ʻiloʻi ʻe kiʻi fuoloa ʻeni.
Naʻe ʻikai ke ne tuku moʻui pē ʻene kaá ka ne tamateʻi ia pea tuku hifo ʻa e ʻū sioʻatá ke fakaʻaongaʻi ʻa e ʻea mokomoko ʻo e faʻahitaʻu māfaná. ʻI heʻene tatalí, naʻá ne toʻo hake ha tatau ʻo e “Ko e Fāmilí: Ko ha Fanongonongo ki Māmani,” ʻa ia naʻá ne haʻu mo ia. ʻI he ngaahi uike siʻi kimuʻá, naʻe fakaafeʻi ʻe heʻene palesiteni fakasiteikí ʻa e kāingalotu ʻo hono uooti taautaha kei talavoú ke nau ako maʻuloto ʻa e fanongonongó, mo palōmesi ange ʻe tāpuekina kinautolu ʻi heʻenau fakahoko iá. Naʻe tui ʻa ʻEniselā ki he palōmesi ko iá, ko ia naʻá ne feinga faivelenga ke ako maʻuloto ʻa e fakamatalá.
ʻI he taʻu ʻe hiva talu mei hono tuku mai ʻo e fanongonongo ki he fāmilí ʻi he fakataha lahi ʻa e Fineʻofá ʻi Sepitema ʻo e 1995, naʻe hoko ia ko e uho ʻo e pōpoaki ʻa e Siasí fekauʻaki mo e ngaahi fāmilí. Naʻe fokotuʻutuʻu ʻe he ngaahi mātuʻá honau ngaahi ʻapí ʻo fakatatau mo hono ngaahi tefitoʻi moʻoní, naʻe fakaʻesia ia ʻe ha kāingalotu ʻo e Siasí pea tautau ʻi honau holisí, pea naʻe fakahoko ʻe he ʻUnivēsiti Pilikihami ʻIongí ha kalasi ʻo fakatefito ʻi he peesi ʻe taha ʻo hono fakaleá. Naʻe taʻu hongofulu tupu ʻa ʻEniselā ʻi he taimi naʻe fakafeʻiloaki ai ʻe Palesiteni Hingikelī ʻa e fanongonongó, pea naʻe ʻikai ke ne fakapapauʻi pe naʻá ne ʻosi lau ia kimuʻa ʻi he fakaafe ʻa ʻene palesiteni fakasiteikí.
ʻI he ʻosi ʻa ʻEniselā mei he ako māʻolungá, naʻá ne hiki mei hono kiʻi kolo tupuʻanga ko Sitēlingi, ʻAlapeta, Kānatá ke ako ʻi ha ʻunivēsiti ʻi Lōkani, ʻIutā. Hili ʻene ʻosi mei he akó, naʻá ne ako ngāue ʻi he ʻŌfisi Fetuʻutaki ʻa e Siasí mo e Kakaí ʻi Sōleki Sití kimuʻa peá ne toki maʻu ha ngāue taimi kakato ʻi hono ʻŌfisi Fakavahaʻapuleʻanga mo Fakapuleʻanga ʻi Uāsingatoni, DC. Naʻe kehe ʻaupito ʻa e ngaahi hala kolomuʻá, ʻa ia naʻe ʻotu ai ha ngaahi mīsiume mo ha ngaahi maka fakamanatu mo ha ngaahi ʻōfisi fakapuleʻanga, mei he ngaahi hala efua mei heʻene kei talavoú.
ʻI he aʻu ʻa ʻEniselā ki muʻa ʻi he lainé, naʻá ne ʻalu ki ha loki talitali kae vakaiʻi ʻe ha ʻenisinia ʻene kaá. Naʻe fuoloa ange ʻa e siví ʻi he meʻa naʻá ne ʻamanaki ki aí, pea naʻe kamata ke ne hohaʻa ʻi heʻene sio ki he haʻu mo e ʻalu ʻa e kau kasitomā kehé kae hokohoko atu pē ʻene tatalí. Naʻe ʻi ai nai ha meʻa naʻe maumau ʻi heʻene kaá? Ko e hā e lahi ʻo e fakamole ki hono fakaleleiʻí?
Fāifai, hili ha ngaahi houa, ne hū mai ʻa e ʻenisiniá ʻo talaange kuo paasi ʻene kaá ʻi he siví.
ʻI he ongoʻi fiemālie ʻa ʻEniselá, naʻá ne totongi pea mavahe mei he falé, mo e teʻeki pē ke ne fakapapauʻi pe ko e hā naʻe fuʻu fuoloa pehē aí. Naʻá ne vakai ki he tokotaha ʻenisiniá naʻe talitali ange kiate ia ʻi heʻene kaá.
Naʻá ne pehē ange, “Taʻahine, ʻoku ou fie kole fakamolemole atu ʻi he fuʻu fuoloa hono sivi hoʻo kaá.”
Naʻá ne talaange kia ʻEniselā naʻe ʻalu ʻene tokangá ʻi he tatau ʻo e fanongonongo ki he familí ʻi he nofoʻa pāsesé. Naʻá ne toutou lau ia, pea naʻe ongo kiate ia ʻa e pōpoaki fekauʻaki mo e ngaahi fāmilí.
Naʻá ne fehuʻi ange, “Ko e siasi hā ʻeni? Ko e hā ʻa e fakamatala ko ʻeni ki he fāmilí? ʻE lava ke maʻu haku tatau? ʻOku pehē naʻe hiki ia ʻe ha kau ʻaposetolo. Ko hoʻo ʻuhingá ke talamai ʻoku ʻi ai ha kau ʻaposetolo ʻi he māmaní ʻi he ʻahó ni ʻo hangē ko e kuonga ʻo Sīsuú? Fakamolemole, ʻoku ou fie ʻiloʻi.”
ʻI he ʻohovale ʻa ʻEniselaá, naʻá ne feinga ke fakamāʻopoʻopo ʻene ngaahi fakakaukaú. Naʻá ne talaange, “ʻOku ʻi ai ha kau ʻaposetolo mo ha kau palōfita ʻi he māmaní, ʻo hangē pē ko ia ʻi he kuonga ʻo Sīsū Kalaisí”, ʻo fakamatala nounou ange fekauʻaki mo Siosefa Sāmita mo hono Fakafoki Mai ʻo e ongoongoleleí. Naʻá ne ʻoange ki ai ha tatau ʻo e fanongonongo ki he fāmilí mo ha Tohi ʻa Molomona.
Naʻá ne ʻoange leva hono hingoá mo e fika telefoní ke ʻave ki he kau faifekaú. ʻI he mavahe ʻa ʻEnisela ki ʻapi mei he ngaohiʻanga meʻalelé, naʻá ne tangi mo houngaʻia ʻi heʻene tuku ʻa e fanongonongó ʻi heʻene nofoʻa pāsesé.