Te Reirei ibukin te Bootaki n Aine Ae Bita Ara Utu
Ko a tia ni iangoia bwa e na iai te kawai ae bebete, ae kanga te kakai ni kamanoa am utu man waaki aika buakaka ake a kanenei man itera nako?
I noora te bitaki ae karaurau n ana katei natira te mwaane ae Jacob inanon ana moan ririki n te kauarinan n reirei (a tia ni bitaki taian ara). Bon te ataeinimwaane ae tamaroa, ma n tabetai ao e kona ni katei man aki ongotaeka. E tara n ti kabanea nanona n te terewition, takakaro n te witeo, ao n te Intanete. E aki toki ni mwangaingai nakoira ibukin karaoan ana bwai n reirei, kakaitiakan ana ruu, ao ni ibuobuoki inanon te auti. I a tia n noora naba aron aei n riki nakoia natira ake a ikawai riki ngkana a roko n te ririki ae tebwi tabun, ma I namakinna ae e bon riao riki aei. I ataia man waaki aika a kamaraki ake I a tia n rinanoi aroia tabeman ataei ni kitana te Ekaretia ngkana a ikawai. I tataro ma te nanomaraki ni kan ataa aron kamanoaia natiu mwaane aika uarereke riki ao ara utu ae bwanin man waaki aika buakaka n te aonaaba.
I bon aki kantaninga te kakai n te Taabati n Nobembwa ngke I tekateka mai buki n tain te reirei n te Bootaki n Aine. Titita Randall, te kauntira n te beretitentii n te Bootaki n Aine, e a katanoata bwa atuun te reirei bon kamatebwaian booki aika tabu, ao I taonaki n te namakin ae rawawata n iangoan oin au utu. “I aki manga tangira riki kamatebwaian booki aika tabu,” I bon iango. “N na karaoa ae au kabanea ni kona.”
Buu te mwaane bon te buu ao te karo ae tamaroa are e bon rangi n tangira ana utu, ma e bon aki kan katabeaki ma kamatebwaian booki aika tabu n te utu. Ti bon tataro ma ataei, ao ti kataia ni karaoi ara bootaki n utu n te tairiki ni katoa tai. Ma n te tai are I taekina karaoan kamatebwaian booki aika tabu, e bon aki kan iangoia. Ibukina bwa I namakinna ae rangi ni kakaawaki, I wareki booki aika tabu ma natiu n tatabemania ngkana I kaweneia n aia tabo ni matu. I aki ataia bwa tera riki ae N na kona ni karaoia.
E ngae n anne, ao imwina riki, n te tai are I rin n te ru ibukin warekan booki aika tabu ma Jacob, ma n angin te tai e taku: “O, tiaki ngkai. I a rangi ni kua [ke n tabe ke tera riki; a mwaiti riki ana anga]. I a bon wareware ibon irou.” N taai ake ti aki wareki booki aika tabu iai ao I a manga taekinna n te ingabong are imwina, e aki toki n taekinna bwa e a bon tia ni “mwaninga” ni karaoia. I a bon miimi bwa e na kanga ni kairoroa warekan booki aika tabu ngkana e kona n ongo ae tamana e tabe ni mataku n te terewition inanon te ruu are teuana.
Ngke e a moana ana reirei Titita Randall, I bon kantaningaia ni manga ongo karakin “te utu ae kororaoi” ni kukurei ni karaoan te kamatebwai iaon booki aika tabu. Ma n onean mwiina, e moanna Titita Randall n taekina te karaki man te O Tetemanti: “Warekaia Iteraera 21 e taekinaki karakinan taian naeta ake a rangi n tena tena nakoia kaain Iteraera ngke a mwananga nakon te aba ni berita. A mwaiti aomata ake a tenaaki irouia naeta ao a mate. N nooran te kangaanga ae kamamate aei, a rairinanoia kaain Iteraera ao a bubutia Mote bwa e na tataro nakon te Uea ni kanakoia taian naeta mairouia ao man kamaiuaki.”
Inanon au iango ao I a katea tamneia au utu ni mwananga inanon te maiu ao man tenaaki irouia taian naeta aika rangi n tena tena n aron tein te waaki n ara bong aika kaitira n naeta aika kamamate: uruakan tuua, bwaai ni kamangingin aika taburoroko, tamnei aika bwaitingako, ao aroaro aika aki raraoi. I namakinna ae akea buokau n aroia kaain Iteraera.
E kamataata Titita Randall aron ana taeka te Uea nakon Mote bwa e na karaoa te naeta ae te buraati (e tei ni katootonga Kristo) ao ni katoka iaon te oko. Imwina e berita Mote nakoia aomata bwa ane e a tia n tenaaki iroun te naeta ao e na ti tara te naeta te buraati ao teuanne ke neienne e na kamaiuaki. N aki tabeakina bebeten te berita aio, e tuangira Aramwa bwa “ma a bon mwaiti ake a bon rang ni matoatoa ao ake aki kan tararake, ngaiia ake a mate. Ao ngkanne, bukin ae a rawa n tararake bon bukin ae aki kakoauaa bwa e na kamaiuia” (Aramwa 33:20).
E tuangira Titita Randall bwa e ngae n ae inanon ara bong aikai ao taian naeta aika tena tena a kaoti n aekaki ni bwai aika kaokoro, ao ngaira naba ti kona n tararake nakon Kristo ao ni kamaiuaki. Inanon ara bong aikai ao taian burabeti a tia n tuangira bwa ti na wareki booki aika tabu ni katoa bong, n ae ti ngaira ao ma ara utu; ni karaoi oin ara tataro ao ma ara utu; n irii ara bootaki nako; ni kabwakai kabwianibwai; n rairi nanora; n tau n nakon te tembora; ao ni karaoi ara bootaki n utu n te tairiki. Aio ara kawai n tararake nakon Kristo ao ni kamaiuaki.
N te moan ao bebeten te iango e taraa ni bebete ibukin kamanoakira man kaririin te maiu ni katoa bong. Ma ngke e taetae Titita Randall, e rootaki nanou, ao I namakinna bwa e taetae te Uea nakoiu rinanon neiei. I ataia bwa bon ti kaotakin te onimaki. I onimakin aia taeka taian burabeti ao abotoro, ke N na tannako, n aroia kaain Iteraera aika mwaiti ake a tannako man te naeta te buraati?
I a okira mweengau man te taromauri ma te iango ae korakora ni buoka au utu bwa e na kakorakoraaki man te tataro n utu ao kamatebwaian booki aika tabu. I tataro inanon wiiki aika mwaiti bwa e na kamarauaki nanon buu te mwaane. I aki mamatam. I karaoa te bootaki n utu n te tairiki ae onoti ao man kaoa natiu te mwaane ae e aki rangin kakaonimaki ae e a tia ni mareaki ma ana utu bwa a na ira ara waaki. Ti reiakina taekan Mote ao taian naeta aika tena tena. N tokina, teuana te tairiki I bubutia buu te mwaane ngkana ti kona ni moana te ririki ae boou man kamatebwaian booki aika tabu n te utu. Ao n te Bong are Moan te Ririki ae Boou e a moanna ni kairira ibukin kamatebwaian booki aika tabu ni katoa bong.
E aki waekoa ni kororaoi ara utu n te tairiki naba arei, ma I bon miimi n aron mwaitin te tamaroa n rikirake inanon mweengara. Ti aki bati ni ikakaiwi ao te tamnei ae kakukurei e mena inanon mweengara. I aki unuun ke ni bwarannano ni katoa tai. I a bon miimi bwa I a namakina te kaaniaki ma buu te mwaane ao nakon te Uea. Bon anuan Jacob, ae kanga, e korakora bitakina. E moanna ni kauringira ni kabane bwa ti na riai ni karaoa ara kamatebwai ni booki aika tabu n te utu, ao man tauraoi naba ni wareware.
I a manga tiba ataa te rabakau n toui mwiin aia berita taian burabeti ao ni mwiokoia. I bon kakoauai ana taeka ni kabane Beretitenti James E. Faust, Kauoman ni Kauntira n te Moan Beretitentii: “N taainako ao e tangira te korakora ae raka arona ibukia kaaro n te utu ae tabetabe ni kautia ni kabane ao ni ikotaki ibukin te tataro n te utu ao kamatebwaian booki aika tabu. E na kona n taainako n akea te nano ni kan tataro ngkana a bane ni ikotaki, ma e na bon karekea te rikirake ngkana ko bon nanomatoa.”1