Haʻu ʻo Fanongo ki he Leʻo ʻo e Palōfitá
ʻOku Monūʻia ʻa e Faʻa Fakaleleí
Mei ha lea naʻe fai ʻi he ʻUnivēsiti Pilikihami ʻIongí ʻi he ʻaho 6 ʻo Fēpueli, 1994.
ʻI he taimi ʻokú ke sio ai ʻi hoʻo nusipepá mo hoʻo televīsoné, ʻoku siʻisiʻi ke ʻasi ai ha meʻa kau ki he melinó. ʻOku fonu e ongoongó ʻi he ʻaho kotoa pē ʻi he ngaahi moveuveu ʻoku hoko ʻi māmaní.
Naʻe folofola ʻa e Fakamoʻuí, “ ʻOku monūʻia ʻa kinautolu kotoa pē ʻoku faʻa fakaleleí, he ʻe ui ʻa kinautolu ko e fānau ʻa e ʻOtuá” (3 Nīfai 12:9).
ʻI heʻeku lau ia heʻeku kei siʻí, naʻa ku fifili ki hono talaʻofá. Naʻe ʻikai ke ongo ia hangē ha meʻa naʻe fuʻu nāunauʻia. Ka ʻi he taimi ní ʻoku ou ʻilo ʻa e nāunauʻia mo e pau ʻa e talaʻofá ni. Ko e fānau ʻa e ʻOtuá ʻa kinautolu te nau maʻu ʻa e moʻui taʻengatá.
ʻOku ou fakamoʻoni ʻoku ʻafioʻi koe ʻe he ʻOtuá. ʻOkú Ne tokanga kiate kinautolu ʻoku mou feohí, pea ʻokú Ne ʻofa ʻiate koe. Ko ʻEne ākonga koe, pea ʻokú ke hoko ai ko ha maama ki he kakaí. ʻI he taimi ʻokú ke ngāue ai ʻi he tuí ke ʻoatu ʻa e ongoongoleleí kiate kinautolu ʻoku mou feohí, te nau ongoʻi e maama ʻa e Fakamoʻuí. Kuó ke fakahā kiate kinautolu ʻa e halá.
ʻOku ou fakamoʻoni atu ʻoku moʻui ʻa e ʻOtuá; ko e Kalaisí ʻa Sīsū. ʻOku ou ongoʻi ʻEne ʻofa kiate kimoutolú. ʻOku ou ʻiloʻi ʻoku folofola ʻaki ʻe he Fakamoʻuí ʻa e moʻoní ʻi Heʻene pehē, “ ʻOku monūʻia ʻa kinautolu ʻoku faʻa fakaleleí.”
Ko ha Efiafi Fakafāmili ʻi ʻApi Naʻe ʻIkai ke Melino
ʻOku ʻi ai pē taimi ʻe fie maʻu ai ʻe he ʻapi kotoa pē ha tokotaha faʻa fakalelei. ʻOku ʻi ai e ngaahi foha ʻe toko fā mo e ongo ʻofefine ʻo Palesiteni mo Sisitā ʻAealingi. Naʻe ʻi ai e taimi ʻi he kei iiki ʻena fānaú naʻe akoʻi ai ʻe Palesiteni ʻAealingi ha lēsoni he efiafi fakafāmili ʻi ʻapí ʻo kau ki he melinó. Lolotonga ʻene faiakó, naʻá ne fakatokangaʻi naʻe tau ʻaka e toko ua ʻo ʻene fānau tangatá! Ka ʻi he tupu hake ʻa e ongo tamaikí ni ʻo lalahi angé, naʻá na ako e founga ke na faʻa fakalelei aí pea na hoko ko e ongo kaumeʻa mamae mo fetokoniʻaki.
Ko e fē ha taimi ʻoku fie maʻu ai ʻe homou fāmilí ha tokotaha faʻa fakalelei? Ko e hā ʻe lava ke ke fai ke tokoni aí?
Fie Maʻu ha Taha Faʻa Fakalelei!
Ko ha taimi ʻeni naʻe fie maʻu ai ha tokotaha faʻa fakalelei. Fokotuʻutuʻu e ʻū fakatātaá mei he ʻuluakí ki he fakamuimui tahá ke sio angé pe ʻoku uesia fēfē ʻa e fāmilí ʻe he holi ʻa ha kiʻi tamasiʻi pe taʻahine ke hoko ko ha tokotaha faʻa fakaleleí.
A
E
F
H
Ko e Founga ʻEtau Maʻu e Ngaahi Monūʻiá
Ko e taha ʻo e ngaahi malanga naʻe ui ʻe Sīsū “ko e Ngaahi Monūʻiá” ʻa e “Monūʻia ʻa kinautolu ʻoku faʻa fakaleleí” (vakai, Mātiu 5:1–11). Ko e Ngaahi Monūʻiá ko ha ngaahi founga ia ke tau moʻui fiefia ai. ʻOku nau fakamatala takitaha ki ha tāpuaki pau ʻoku tau maʻu ʻi he taimi ʻoku tau muimui ai ʻi ha akonaki pau. Ko e founga ʻeni ʻetau maʻu e Ngaahi Monūʻiá:
1. ʻI he ʻaho ʻe taha naʻe muimui ai ha kakai tokolahi ʻia Sīsū. Naʻa nau fanongo ai naʻe lava ke Ne fakamoʻui e kakaí mo fai ha ngaahi mana kehe. Naʻa nau fie fanongo ki Heʻene akonakí.
2. Naʻe ofi ʻa Sīsū ki ha kiʻi moʻunga. Naʻá Ne kaka hake he tafa moʻungá peá ne fai ai ha lea, pe malanga.
3. ʻI he malanga ʻa Sīsuú, naʻá Ne akoʻi ai ʻa e kakaí ʻi he founga totonu ʻo e moʻuí kae lava ke tāpuakiʻi kinautolu ʻe he ʻOtuá. ʻOku ʻuhinga ʻa e foʻi lea ko e monūʻiá ki he “fiefia” pe “faitāpuekina.”
4. ʻOku ui ʻa e malanga naʻe fai ʻe Sīsū ʻi he ʻaho ko iá ko e Malanga he Moʻungá. Hili e toetuʻu ʻa Sīsuú, naʻá Ne fai ha malanga tatau pē ki he kakai ʻi he ongo ʻAmeliká ʻi Heʻene ʻaʻahi kiate kinautolú (vakai, 3 Nīfai 12:3–11).
Pilinisi ʻo e Melinó, tā ʻe Simon Dewey; tā ʻo e lupé © Corbis; Malanga he Moʻungá, tā ʻe Harry Anderson; ngaahi tā fakatātā ʻa Beth Whittaker