Fakafaivaʻi ʻo e Folofolá ʻi he Efiafi Fakafāmili ʻi ʻApí

Sikoti mo Koni Moi, ʻIutā, USA

ʻI he teʻeki ai ke hū ʻema ongo kiʻi tamaikí ʻo akó, naʻá ma faʻa feinga ke tohoakiʻi ʻena tokangá ʻi he taimi efiafi fakafāmili ʻi ʻapí. Lolotonga ʻeku feinga mo hoku uaifí ke teuteu ha lēsoni kau ki he talangofuá he uike ʻe taha, naʻá ma lototaha ke ma fai e talanoa kia ʻĀmoní. Naʻá ma ongoʻi foki ko ʻene ʻosi pē ʻema fai e talanoa mei he tohí, pea totonu leva ke mau fakatātaaʻi ia. Naʻá ma tānaki mai ha ʻū meʻavaʻinga ko ha fanga kiʻi manu ke ʻai ko e fanga sipí ia peá ma ngaohi pē ha heletā pepa. Naʻe saiʻia ai ʻema ongo kiʻi tamaikí peá na kole ke toutou fai pē ia. ʻI he konga kimui ʻo e uiké, naʻá na fakatou ʻeke mai pe ko e hā e talanoa te mau fakafaivaʻi he Mōnite hokó.

ʻI he ngaahi taʻu siʻi hoko aí, ne tuʻo lahi ʻema fakakau hono “fakafaivaʻi ʻo e folofolá” ʻi heʻemau ngaahi efiafi fakafāmili ʻi ʻapí. Naʻe faʻa tokoni mai ʻema ongo kiʻi tamaikí ki hono kumi pe faʻu ha fanga kiʻi meʻa faingofua pē ke fakaʻaongaʻi hili ʻemau toe vakaiʻi e foʻi talanoá ʻi he taimi lau folofola fakafāmilí. Naʻe aʻu pē ki heʻema sio ʻokú na akoako e fanga kiʻi talanoá ʻi hona taimi vaʻingá.

Naʻa mau fakafaivaʻi hono maʻu ʻe Nīfai e ʻū peletí, hono foʻu ʻe Noa e ʻaʻaké, ʻa e tau ʻa Tēvita mo Kolaiaté, ngaahi meʻa naʻe aʻusia ʻe he kau paionia, mo e ngaahi talanoa lahi kehe. Naʻá ma fakamahinoʻi ange ʻa e ngaahi tefitoʻi moʻoni ʻo e ongoongoleleí naʻa mau ako mei he ngaahi sīpinga ko ʻení, pea naʻe lava ke fakamoʻoniʻi ʻe heʻema fānaú ʻa e founga tatau pē ʻoku tokoniʻi ai kitautolu ʻe he Tamai Hēvaní he ʻahó ni.