Ko ha Faingamālie ke Liliu
Ko e taʻu fitu ʻeni ʻeku kau ki he Siasí. Lolotonga e taimi ko iá, ne u ʻiloʻi maʻu pē ko e Siasi moʻoni pē ʻeni ʻe taha ʻo e ʻEiki ko Sīsū Kalaisí, ka ne ʻi ai ha taimi ʻi heʻeku moʻuí naʻe ʻikai te u fuʻu mālohi ai.
Naʻe kamata e palopalemá ʻi he taimi naʻe hiki ai homau fāmilí ki ha kolo foʻou. Ne ʻosi e ngaahi māhina siʻi pea mau toki ʻiloʻi e feituʻu naʻe tuʻu ai e falelotu naʻe totonu ke mau ʻalu ki aí, pea ʻosi atu mo ha ngaahi uike peá u toki kamata maʻulotu. Naʻe ʻikai te u fuʻu fiefia he liliu ko ʻení, pea hili pē ha ngaahi uike siʻi, naʻe ʻikai te u toe maʻulotu.
Naʻe ʻaʻahi fakafokifā ange ʻeku pīsopé he ʻaho ʻe taha peá u talitali lelei ia. Naʻá ne fakaafeʻi au ke u foki ange ki he lotú he ngaahi ʻaho Sāpaté mo ʻalu ki he seminelí. Naʻá ku fakakaukau ke tali e ongo fakaafe ko ʻení.
Hili ha ngaahi uike siʻi mei heʻeku kamata maʻulotú, naʻe fakafeʻiloaki ʻe he pīsopé ʻa e polokalama Fatongia ki he ʻOtuá kiate au. Naʻá ne fakamatalaʻi mai e polokalamá, pea naʻá ku loto ke u kamata ia.
Naʻá ku kamata fakafonu mo fakakakato e ngaahi taumuʻa ʻi he tohitufá. Naʻe kamata ke mahino kiate au hono tokoniʻi ʻe he polokalama Fatongia ki he ʻOtuá ʻeku moʻuí ke toe lelei angé. Naʻe fakaʻau ke u mālohi ange ʻi he Siasí peá u manako he ʻalu ki he seminelí. ʻOku ou lolotonga feinga ke toe lelei ange ʻeku moʻui ʻaki e ngaahi tuʻunga moʻui ʻo e Siasí, pea ʻoku ou manako ʻi hono lau ʻo e folofolá mo e Liahoná.
ʻI he taimi naʻá ku kamata ai e polokalama Fatongia ki he ʻOtuá, naʻá ku fokotuʻu ha ngaahi taumuʻa hangē ko e ʻalu ʻo ngāue fakafaifekau mo hū ki he ako teuteuʻanga ʻo e Siasí ko Benemérito de las Américas, mo ha ngaahi taumuʻa kehe pē. Ne u maʻu ʻa e Fakalāngilangi ʻo e Fatongia ki he ʻOtuá mo e Lakanga Taulaʻeiki Faka-Melekisētekí he faʻahitaʻu fakatōlau ko ʻeni ne toki ʻosí, pea ʻe vavé ni mai pē haʻaku ʻalu ʻo ngāue fakafaifekau.
ʻOku ou fakamālō ʻi he ʻaho takitaha ki heʻeku Tamai Hēvaní ʻi hono tuku mai ʻa e faingamālie ke u liliu ai pea hoko ko ha mēmipa moʻui taau ʻo Hono Siasí. ʻOku hounga kiate au ʻa e ngaahi polokalama mo e kau taki ʻo e Siasí naʻa nau tokoni ke u liliú.