Ngaahi Fakakaukau Maʻá e Efiafi Fakafāmili ʻi ʻApí

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pea ʻi ʻapi foki.Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“ ʻOku Hoko e Ngaahi Talanoa mei he Folofolá ko ha Sīpinga maʻa ʻEtau Moʻuí,” p. 16: Kamata ʻaki hano lau e fakamatala kia Tēvita mo Kolaiaté, ʻo fakaʻaongaʻi e fakatātā mei he fakamatalá. ʻI haʻo fai ha talanoa ʻe taha mei he folofolá, fekumi ki he “ ʻa kinautolu-ʻi ai-ʻi he taimi ko ia.” Hiki kinautolu ʻi ha laʻi pepa. Fehuʻi ange pe ʻoku faitatau fēfē ʻa e talanoá mo hotau kuongá ni, peá ke hiki ʻa e “ko au-ʻi heni-ʻi he taimi ní.” Mou aleaʻi e founga ʻe lava ke tokoni ai e founga ko ʻení ki hoʻomou ako folofola fakatāutaha pe fakafāmilí.

“Teunga Tāú: Ko ha Tefitoʻi Moʻoni Tuʻuloa maʻá e Tokotaha Kotoa Pē,” p. 28: Faʻa lotu ʻi hoʻo teuteu e lēsoni ko ʻení he ko ha tefito pelepelengesi ʻeni. Fakamatalaʻi e teunga tāú mo hono ʻuhinga ʻoku mahuʻinga aí, ʻo ke fakaʻaongaʻi ʻa e konga “Ko e hā ʻa e Teunga Taau?” “Ko e Hā ʻOku Fie Maʻu Ai ke Tau Teunga Tāú” mo e “Ko ha Tefitoʻi Moʻoni Tuʻuloa.” Fakamamafaʻi ʻa e fakakaukau ʻoku fakaafeʻi mai ʻe he teunga tāú ʻa e takaua ʻa e Laumālie Māʻoniʻoní. Fai e talanoa mei he konga ko e “Ngaahi Tāpuaki Fekauʻaki mo e Teunga Tāú,” pea fakaafeʻi e kau mēmipa ʻo e fāmilí ke nau fakamatala ki he ngaahi tāpuaki kuo nau maʻu pe kuo nau mamata ai ʻi heʻenau tui ʻa e teunga tāú.

“Ko Ha Ngaahi Meʻa Fakaʻofoʻofa ʻi he Kahaʻú,” p. 36: Lau e talanoá, pea fekau e kau mēmipa ʻo e fāmilí ke nau hiki ha ngaahi taimi ʻoku fie maʻu ai ʻa e loto-toʻá. (Mahalo ʻe fie maʻu ke ke fakamatalaʻi ki he fānau iiki angé pe ko e hā ʻa e loto-toʻa. Ko ha sīpinga lelei e ngaahi talanoa ʻi he peesi K6–K7.) Aleaʻi e founga naʻe maʻu ai ʻe he faifekaú ʻa e loto-toʻá mo e founga ʻe lava ke fakaʻaongaʻi ai ʻe he kau mēmipa ʻo e fāmilí ʻa e tefitoʻi moʻoni tatau pē ki he ngaahi meʻa kuo hiki ʻi heʻenau lisí.

“Feinga Maʻu Pē,” p. 38: ʻOange ha taueli ke takitaha e mēmipa kotoa ʻo e fāmilí. Kole ki he tokotaha takitaha ke ne pelu ua e tauelí kae ʻai ki mui hano nima ʻe taha, pea sio angé pe ko hai ʻe vave taha ʻene pelú. Fai e ngaahi talanoa mei he moʻui ʻa ʻEletā ʻOkataviano Tenolió. Aleaʻi e ngaahi ʻulungāanga lelei naʻá ne maʻu ʻa ia ne tokoni ke ne aʻusia ai ʻene ngaahi taumuʻá. Kole ki he kau mēmipa ʻo e fāmilí ke fakaʻaongaʻi lōua honau nimá ke pelu e tauelí. Aleaʻi hono ʻuhinga ʻoku tokoni ai ʻa e feinga kakató ke maʻu ha ola ʻoku lelei angé.