Rongorongo man te Moan Beretitentii, Beberuare 2010
Inanon Katauraoakim n Tamnei
Reirei mairoun Ara Burabeti
Aan te Onimaki
“Ngkana akea iroura aan te onimaki ae nano ao te kakoaua ae matoatoa ibukin te koaua, ti na kona ni karekea te kanganga n aki otara n angibuaka aika a korakora ao mwaitorotoron aang ibukin kabwakabwaka ake a na roko nakoira n tatabemanira nako.
“Te maiu ae mamate bon te tai ni kataaki, te tai are ti na kakoauaki iai bwa ti kororaoi n okira matan Tamara are i Karawa. N te aro bwa ti na kataaki, ti bon riai n tia n atai kakaewenako ao kangaanga. Aikai a kona ni uruakiira, ao rabunan tamneira a na kona n tabwena ke ni uruaki—n are, ngkana aan ara onimaki, ara kakoaua ibukin te koaua aki nono ni karikirakeaki ma nanora nako.”1
Reireiniko Reirei man te Tai ae Nako
“Inanon kakae ibukin katamaroan oin rabwatara, iai titiraki tabeua ake a na kairi ara iango: Boni Ngaia aei arou ae I tangiria? I kaania riki te Tia Kamaiu n te bong aei nakon are I mena iai ngkoananoa? N na kaania riki nakon te ingabong? Iai irou te ungannano ni bitaki nakon te raoiroi riki? …
“A roko taian ririki ao a manga taonnako, ma te kainnano ibukin kakoauan te euangkerio e teimatoa kakawakina. Ngkana ti waaki nakon te tai ae na roko, ti riai n aki katinanikui reirei ibukin te tai ae nako”2
Oin Am Kambati
“Am kakabwaia mairoun te tamanuea bon am bwai ae bon ti ngkoe. E kona ni kimototo ke n ananau, ni bebete ke ni kanganga Ananaun ao taeka aki riki man ana kakabwaia te tamanuea. Bon te Tamnei are e karokoi koauan raoi nanoiia. E na aki karauaki n rukumaki ao ni kawakinaki n te tabo teuana am kakabwaia. E na aki maroroakinaki ke ni katanoataki. Ni koauana, e na warekaki. E na tangiraki. E na iriiraki. E na aki kairiko rinanon taian kakatai aika a kanganga am kakabwaia mairoun te tamanuea. E na kairiko rinanon bwaikorakin te maiu. … Am kakabwaia mairoun te tamanuea bon am Kambati ni bweena manangam ao ni kaira kawaim. …
“E na bae n tangiraki te nanorinano ngkana ti mataku, tataninga, ao ni mwakuri ibukin te kakabwaia are e a tia ni beritanaki bwa a na kakoroaki raoi.”3
Bane mai Nakoina
“Uringnga bwa ko aki nakonako n ti ngkoe. … Ngkana ko waaki n rinanon te maiu, kaineta te ota n taainako, ao nuun te maiu e na bwaka iakum. …
“Ngkana I tanrikaki nakon taian koroboki aika tabu ibukin te kairi, e aki toki n okioki ni kaoti te taeka teuana. Te taeka [aei bon] ‘nakomai.’ E taku te Uea, ‘Bane mai nako Iu.’ E taku, ‘Bane mai ao reirei irou.’ E taku naba, Nako mai, ao iriirai.’ I tangira te taeka arei, nako mai. Au bubuti bwa ti na nako nakon te Uea.”4
@2009 iroun Interllectual Reserve, Inc. A bane n tauaki mwiin taian kariaia ibukin katootongana. Boretiaki i USA Kariaiakaki n te Ingiriti: 6/09 Kariaiakaki rairana Rairan te First Presidency Message, February 2010. Kiribati. 09362 859
Anga-reirei man te Rongorongo Aei
Teaching, No Greater Call taekinaki: “E aki iango te tiareirei ae e rangi ni mwaatai, … ‘Tera ae N na reiakinna ngkai?’ ma ni koauana, ‘N na kanga ni buokiia au ataei ni kunea bwa baikara bwaai ae a kainnanoi ni kan atai?’” ([1999], 61). Ni buokiia n tatabemania nako bwa a na reiakini bwaai man te rongorongo aei, iangoa anganakiia aia beeba ma taian bentira ao ni karekea aia tai ni wareka ana taeka Beretitenti Monson ao ni korei taian koaua ake a kunei ibukin taekan te katauraoi n tamnei. A kona ni korei tamnein bwaai ake a reiakini ataei ake a uarereke riki. Iangoa karekean aia tai n tibwai bwaai ake a tia ni korei ao ni korobannai.