THAWJ PAWG THAWJ TSWJ HWM TSAB XOV XWM, Ob Hlis Ntuj 2010
Hais txog Kev Npaj tau rau Sab Ntsuj Plig
Lus Ntuas uas los ntawm Peb tus Yaj Saub los
Ib lub Hauv Paus ntawm Kev Ntseeg
“Yog hais tias peb tsis muaj lub hauv paus tob tob ntawm kev ntseeg thiab ib zag lus tim khawv ntawm qhov tseeb uas nyob ruaj khov, ces ntshe peb yuav tiv tsis taus tej nag xob nag cua thiab tej cua no no heev ntawm kev cov nyom uas peb sawv daws yeej yuav raug.
Lub neej no yog ib lub caij sim peb siab, ib lub sij hawm rau peb tau qhia seb peb puas tsim nyog rov qab mus nrog peb Leej Txiv Saum Ntuj Ceeb Tsheej nyob. Kom peb thiaj li raug sim siab tau, peb yuav tsum muaj kev cov nyom thiab kev nyuab siab. Tej no yuav ua tau rau peb poob siab, thiab tej zaum peb tej siab tej ntsws yuav tawg pleb ntais rhe—yuav muaj li ntawd, yog tias peb lub hauv paus kev ntseeg, peb tej lus tim khawv ntawm qhov tseeb tsis nyob tob tob hauv peb.”1
Kawm ntawm tej uas Tau Muaj Lawm Yav Tas Los
“Nyob rau ntawm txoj kev uas nrhiav kom tau qhov zoo tshaj plaws ntawm peb tus kheej, cov lus nug no yuav pab coj peb tej kev xav: Kuv puas yog tus neeg uas zoo tau raws li kuv xav? Hnub no kuv puas nyob rau ntawm tus Cawm Seej ze dua nag hmo? Kuv puas yuav nyob ze tshaj tag kis? Kuv puas ua tau lub siab loj los hloov mus rau qhov kev zoo? …
“Xyoo tag xyoo tuaj, tab sis qhov uas yuav tsum muaj zaj lus tim khawv ntawm txoj moo zoo yeej yuav yog qhov tseem ceeb heev. Thaum peb mus lawm yav tom ntej, peb yuav tsum nco ntsoov txog tej kev qhia uas peb kawm tau yav tas los lawm.”2
Koj lub Liyahaunas
“Koj qhov koob hmoov yawg suab yog koj li thiab koj ib leeg li xwb. Txawm hais tias hais ntau los sis hais tsawg, yooj yim to taub los sis ua rau yus xav tsis thoobQhov uas nws ntau li cas los sis hais li cas yuav tsis yog qhov tseem ceeb tshaj ntawm daim ntawv yawg suab. Tus Ntsuj Plig yuav yog tus uas qhia tau lub ntsiab tseeb. Koj daim ntawv koob hmoov tsis muab rau koj kom koj muab tais thiab cia zoo zoo xwbTsis yog yuav tsum muab nruab tseg los sis qhia rau sawv daws paub. Yuav tsum muab nyeem. Yuav tsum saib rau nqi. Yuav tsum ua raws li tej lus hais. Koj daim ntawv koob hmoov yawg suab yuav pab koj thaum koj muaj kev tsaus ntuj. Yuav pab coj koj kev ntawm lub neej tej kev xwm txheej. … Koj daim ntawv koob hmoov yawg suab yuav yog koj lub Liyahaunas uas yuav pab tho kev thiab coj koj kev.
“Tej zaum yuav tsum ua siab ntev thaum peb saib, tos, thiab ua hauj lwm kom tau tej koob hmoov raws li tau cog lus tseg.”3
Los Cuag Nws
“Nco ntsoov hais tias koj tsis taug kev koj ib leeg xwb. … Thaum koj taug txoj kev ntawm lub neej, txhua lub sij hawm yuav tsum taug mus rau qhov kaj, ces tej duab ntxoo thiaj yuav nyob tom qab.
“Thaum kuv saib hauv tej vaj lug kub kom tau kev tshoov siab, muab ib los lus uas pheej tshwm rau kuv pom ib lub sij hawm dhau ib ib lub sij hawm. Lo lus yog ‘los. ‘Tus Tswv tau hais tias, ‘Los cuag kuv. ‘Nws tau hais tias, ‘Los kawm txog kuv. ‘Nws kuj tau hais tias, ‘Los, lawv kuv qab. ‘Kuv nyiam lo lus ntawd, los. Kuv xav thov kom peb los rau ntawm tus Tswv.”4
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus As Kiv: 6/09. Pub txhais ua lus Hmoob: 6/09. Kev txhais First Presidency Message, February 2010. Hmong. 09362 295