Pweng luhn Prestuhnsi Se Met, Fepweri 2010
In Oruh in Ahkolah Ke Ip luhn Nguhn
Kahs in kahsruh sin Mwet Pahluh Lasr
Sie Pwelucng ke Luhlahlfongi
“Fin wacngihn sie pwelucng loal ke luhlahlfongi lasr uh ac sie fahkwack luhlahlfongi fokoko ke ma pwacye, ac upac nuh sesr in lain pahkah upac ac eng upac ke ma koluk suc kais sie sesr tiac kuh in kahingkuhnlah.
“Moul in mahno pa sie pacl in srihkeyuck, sie pacl in ahkpwacyei kuht sifacna in nwacsnwacs in fohlohk nuh ye muhtuhn Pahpah tuhmasr Inkuhsrao. Ke kuht ac srihkeyuck uh, kuht enenuh in sun mwe sruhf ac ma upac uh. Ma inge kuh in kuhnauskuhtlac, ac acn lucng ke nguhnasr uh fah kaptwelihk ac muhsahlsahluh—pa ingacn, fin pwelucng ke luhlahlfongi lasr uh, fahkwack luhlahlfongi pwacye lasr uh tiacna fihliyucki loal in kuht.”1
Lotwelah Mwe Luti ke Pacl Somlah ah
“Ke sukyen kuhiyacsr sifacna uh, kihsen siyuck pucspucs fah kol mwe nuhnak lasr uh: Kuh pa inge ma nga kena uh? Kuh nga fototoyang nuh yurin Mwet Lahngo mihsenge likina ekeah? Kuh nga ac srwackna fototo nuh yohrohl lutu? Kuh oasr puhlaik luhk in eklac wo likina met ah? …
“Yac uh tuhkuh ac som, tuhsruhk enenuh nuh ke sie fahkwack luhlahlfongi ke wosasuc uh tiac tui in yohkyohkwaclihk. Ke kuht fahsr nuh met nuh ke pacl fahsruh uh, kuht enenuh in tiac pihlesruh mwe luti ke pacl somlah ah.”2
Liahona Nuhtum Sifacna an
“Mwe insewowo luhn patriarch lom an ma na lom ac ma lom muhkwena. Ac kuh in fototo kuh loes, fihsrwacsr kuh upac. Lusac ac kahs kac an tiacna sang mwe insewowo luhn patriarch nuh kac. Nguhn sac pa sang kalmeyac pwacye sac. Mwe insewowo lom uh tiac enenuh in lihmlihmi wo ac tohuyak. Tiac enenuh in srihpsrihpyak kuh etweyuck. Likina, ma in ritiyuck. Ma in luhngseyuck. Ma in ukweyuck. Mwe insewowo luhn patriarch lom uh fah liye kom ke fong in lohsr uh. Ac kol kom ke mwe sensen ke moul uh. … Mwe insewowo luhn patriarch lom an pa sie Liahona lom sifacna in pwen kom ac kol acn kom fahsr we an. …
“Mongfihsrwacsr uh kuh in oasr ke kuht liye, sano, ac orekma nuh ke sie mwe insewowo uliyuckme in ahkfalyeyucklac uh.”3
Fahsruh nuh Yohrohl
“Esam lah kom tiac muhkwena fahsr. … Ke kom fahsr ke moul uh, fahsr nuh ke kahlwem lwen nuh kwewa, ac nguhnin moul uh fah puhtati siskom. …
“Ke nga [fah] ngwet nuh ke ma suhmuhslah ke moklweyuck uh, sie kahs srihsrihk tuhkuh ke pacl ac pacl muhkwena. Kahs sacn [pa] ‘fahsruh.’ Leum el fahk, ‘Fahsruh nuh yuruk.’ El fahk, ‘Fahsruh lutlut keik.’ El oacyacpac fahk, ‘Fahsruh, fahsr tukuk.’ Nga luhngse kahs sac, fahsruh. Kena luhk uh pa kuht in fahsr nuh yurin Leum.”4
© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn First Presidency Message. February 2010. Kosraean. 09362 868
Luti ke Pweng Se Inge
Teaching, No Greater Call fahk muh: “Sie mwet luti suhmaht el tiac nuhnkuh, … ‘Meac nga fah luti mihsenge uh?’ tuhsruhk in, ‘Nga ac kahsruh fuhkah tuhlihk lutlut luhk uh in sokwack ma elos enenuh in etuh uh?’” ([1999], 61). In kahsruh kais sie mwet in lotwelah ke ip yohk se inge, nuhnkuh in sang nuh selos pwepuh ac pinsucl ac sang pacl lalos in riti kahs lal Prestuhn Monson ac suhmuhslah ma pwacye ma elos sokwack kac in oruh in ahkolah ke ip luhn nguhn. Tuhlihk fuhsr kuhtuh an kuh in srolwaclah petsac ke ma elos lotwelah an. Nuhnkuh in sang elos in akacsruhi ke ma elos suhmuhslah kuh srolwaclah an.