iTabagone
Sega ni Dua e Taucoko
Au gadreva tu e veigauna meu vakataki Nifai: talairawarawa dina sara ga, yalodina vakaoti, ka titobu dina vakayalo. E mataqu o Nifai sa dua na ivakaraitaki uasivi duadua ni caka vinaka. E vica na ka e basika mai vei au ka ra levu cake sara mai ena vakasamataki walega ni noqu tubu cake meu vakataki koya—se me tekivutaki noqu taukena e dua mada ga na iwase ni nona ivalavala uasivi.
Ena dua na siga ena noqu sotava e dua na leqa lailai, ka vu mai na noqu vakila niu tawa veiganiti. A dua tu na ka na noqu vakanuinui kei na navunavuci. Ia a vaka me sega tiko ni tini ena dua na vanua. Ena wainimata ni yaluma, au a vakaraitaka vei tamaqu na veika au vakila oqo. A tucake sara vakatotolo, lako sara yani ki na vata ni ivola, ka dreta mai e dua na iVola i Momani. Sega ni cavuta e dua na vosa, a cereka na 2 Nifai 4 ka tekivu wilika na tikina e 17.
A curuma na yagoqu na batabata me vaka na livaliva ena noqu rogoca na veivosa kaukauwa oqo: “A tamata vakaloloma koi au!” E veiciciyaki noqu vakasama. E rawa vakacava vei Nifai, noqu tamata qaqa ka ivakaraitaki, me kaya ni a “vakaloloma”? Kevaka me a vakaloloma, sa qai wacava koi au?
Vakadua tale, na kena curumi au na livaliva ena nona wilika o tamaqu na tikina e 28: “Mo yadra mai na yaloqu! Mo kakua tale ni vakaocai iko ena ivalavala ca. Au vakila vei au ni vaka e sa yali na nuiqawaqawa mai na noqu vakasama ka sa vakasavasavataki me vakatakila na katakata kei na rarama ni dua na lomalagi karakarawa kei na serau ni matanisiga. E dredre sara me vakamacalataki na sala e vakararamataka kina na yaloqu na tikini ivola oqo. E vica na tikini ivolanikalou me vaka na kena oqo era sa vakasinaiti au ena vakanuinui levu, veivakauqeti vakalou, kei na reki.
Ena tikina e 30, e kaya o Nifai na ka sara ga au a vakasamataka, ena vosa gusumacala cake sara: “Io na yaloqu ena rekitaki kemuni na noqu Kalou kei na uluvatu kau sa bula kina.” Na tikina oqo e kauta vata mai na vakilai ni vakacegu kei na vakavinavinaka me baleta na malumu ni loloma veivueti kei na loloma ni Turaga.
A sogota na ivola o tamaqu ka vakamacalataka ni veitikina oqo era vakatokai ena so na gauna me same i Nifai. Ena yalo malua a vakatavulici au ni o ira sara mada ga na tamata uasivi duadua e vuravura era sega ni taucoko, ka sa dodonu kivei ira na tamata oqo me ra kila na nodra sega ni taucoko kevaka e sega era na dokadoka ka, sa na yaco, me ra sega ni uasivi.
Au sa kila. Baleta ni tu vei au na malumalumu e sega ni kena ibalebale ni sega ni rawa meu yaco meu vakataki Nifai. Ena noqu kila na noqu malumalumu e kauti au mai vakavoleka ki na itagede kei Nifai. A uasivi sara o Nifai baleta, ni a talairawarawa ka yalodina, e yalo malumalumu ka rawa me vakatusa ni cala.
Me tekivu mai na gauna au sotava kina na veika o ya, au sa vakamareqeta na veivosa oqo nei Nifai. Ena veigauna au wiliki ira kina, au sotava na veika vata ga a curumi au kei na veivakauqeti vakalou me vaka na imatai ni noqu a wiliki ira. Era kacivaka mai vei au na veitikina niu luvena yalewa na Kalou, au rawa ni cakava e levu cake sara na ka mai na ka au rawa ni vakasamataka. Au kila ni kevaka au na yalodina ka toso ki liu, sa vakarautaki tu na veivakalougatataki e sega ni tukuni rawa.