iVaqa ni Veisiko, Maji 2010
Vaqaqacotaki ni Vakabauta na Kalou na Tamada kei Jisu Karisito mai na Vulici Yadudua ni iVolanikalou
Vakavuvulitaka na ivolanikalou oqo kei na vosacavuti se, kevaka e gadrevi, e dua tale na ivakavuvuli ka na vakalougatataki ira na marama o dau sikova. Wasea na nomu ivakadinadina me baleta na vunau. Sureti ira ko vakatavulica tiko me ra wasea mai na veika era sa vakila ka vulica.
“Ena gauna au se qai vakawati vou kina, … au a sureti ki na dua na ivakasigalevu me baleti ira taucoko na marama ena iSoqosoqo ni Veivukei ena noqu tabanalevu ka ra sa wilika oti na iVola i Momani se dua na ivola ni itukutuku makawa ni Lotu. Au a dau wilika tu ga vagauna na ivolanikalou, kau a digitaki rawa ki na veisureti oqo ena noqu a wilika na ivola lailai oqo ni a rawarawa ka taura e dua na gauna lekaleka. Ena noqu a vakasigalevu toka au a vakasamataka sara vakabibi ni dina ga na ivolatukutuku makawa ko ya e vinaka, ia e dodonu meu a sa wilika na iVola i Momani. Sa vakavotuya tikoga vei au na Yalo Tabu meu veisautaka na ivakarau ni noqu dau wilika na ivolanikalou. Mai na siga ko ya au a tekivutaka kina meu wilika na iVola i Momani, ka sega ni tao tale. … Baleta niu sa tekivuna na noqu wilika ena veisiga na ivolanikalou, au sa mai kila kina na Tamaqu Vakalomalagi, na Luvena o Jisu Karisito, kei na veika meu cakava meu ucui Rau kina. …
“… E rawa vei ira na marama yadua me ra ivakavuvuli ni uto ni kosipeli ena nodra vuvale, ka gadrevi vei ira na marama yadua ena Lotu me ra kila na kosipeli ni ra sa iliuliu ka ivakavuvuli. Kevaka ko ni se bera ni tauyavutaka e dua na bula vakaivakarau ni vuli ivolanikalou ena veisiga, mo ni tekivu sara ga edaidai ka vulica tikoga me rawa kina mo ni vakavakarau ki na nomuni ilesilesi ni bula oqo kei na veika tawamudu.”1
Julie B. Beck, peresitedi raraba ni iSoqosoqo ni Veivukei.
“Na vuli ivolanikalou ena vukea noda ivakadinadina kei na nodra ivakadinadina na lewe ni noda matavuvale. O ira na luveda ena gauna oqo era sa tubu cake tiko mai ka vakavolivoliti ira na domo e cikevi ira tiko me ra biuta tani na ka e dodonu ka kakavaka me kena isosomi, na marau vakavuravura. Vakavo ga ke ra tudei tu ena kosipeli i Jisu Karisito, ena dua na ivakadinadina ni dina, kei na gumatuataki ni bula dodonu, ena rawarawa nodra kuitaki ena veivakayarayarataki oqo. Sa noda itavi meda vakataudeitaki ira ka taqomaki ira.”2
Peresitedi Thomas S. Monson
“Keimami vinakati ira na ganei keimami me ra kenadau ena ivolanikalou. … E gadrevi mo ni na kila vinaka tu na nona dina tawamudu me baleta na nomuni tiko vinaka, kei na inaki ni nodra vakatavulici na dui luvemuni kei ira kece tale eso o ni rawa ni vakayarayarataki ira.”3
“Keimami vinakata noda vuvale me ra vakalougatataki mai vei ira na marama dauwili ivolanikalou—kevaka o dawai se vakamau, gone se qase, yada se bula tiko ena dua na matavuvale. Mo kenadau ena ivolanikalou—ka mo kakua ni beca kina e dua, ia mo laveti ira cake kina!”4
Peresitedi Spencer W. Kimball (1895–1985).
© 2009 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, March 2010. Fijian. 09363 858
Veivuke me baleta na Veisiko
Ena gauna ni nomu veisiko, sauma na taro ka wasea na raiyawa ena kena vakayagataki na ivolanikalou. Wasea na ivakadinadina ena kena vakaukauwataka na nomu vakabauta na vuli ivolanikalou. Taroga na marama o sikova me wasea se vakaukauwataka vakacava na nona vuvale kei na matavuvale na nona vuli ivolanikalou.
Vakavakarau Yadudua