iTukutuku ni Mataveiliutaki Taumada, Maji 2010
Yalodei ena Bula Savasava
E dua vei ira na inaki ni bula vakavuravura sa ikoya na kena vakadeitaki vua na Kalou ni da na rokova na Nona ivakaro ena noda sa yalodei. Eda sa qaqa mai na veivakatovolei oqori ena vuravura ni yalo. Ia e dua na ikatolu ni lewei lomalagi era saqata na vakatutu me ra vakatovolei ena dua na bula vakayago ena nodra ririkotaka de ra na sega ni rawata.
Ni bera noda sucu, o ikeda vakayadua eda veikilai vinaka kei na Kalou na Tamada kei na Luvena, o Jisu Karisito. E rawa meda raici Iratou ka rogoci Iratou ena Nodratou veivakavulici ka vakauqeti keda. Ena gauna oqo sa sogolatia na noda vakasama kei na noda vakanananu e dua na ilati. Sa yaco me rawarawa kina ena gauna oqo vei Setani, na tama ni veika lasu, baleta ni dodonu meda raica na dina ni se o cei o ikeda mai na mata ni vakabauta, ena gauna vata eda rawa ni rawai tu kina ena veitemaki kei na malumalumu vakayago.
E levu na veivuke e tu me vakayaloqaqataki keda ena bula oqo. Na kena e uasivi duadua sa ikoya na Veisorovaki i Jisu Karisito. Ena vuku ni ka a vakayacora o Koya, sa rawa me savati na ivalavala ca ena wai ni papitaiso. E rawa meda vakavouya na veivakalougatataki o ya ena noda vakaivotavota ena sakaramede ena vakabauta kei na veivutuni ni lomada.
E dua tale na veivuke sa ikoya na veisolisoli vakayalo. Eda ciqoma na Yalo i Karisito mai na noda sucu. Oqori e solia vei keda na kaukauwa meda kila kina ka na liutaki keda ki na bula tawamudu e dua na digidigi sa tu e matada. Ena liutaki keda vakaidina na veivolanikalou ke da wilika ka vakakina na veitokani ni Yalo Tabu.
E rawa mai vua na Yalo Tabu meda vakaraitaka noda vakavinavinaka ka kerea na veivuke ena masumasu ena kena matata kei na nuidei eda a marautaka vata kei na Tamada Vakalomalagi ka da na taukena tale vakakina ena noda lesu ki Vua. Na veitaratara vata kei na Kalou o ya e vukea na kena vakasavi tani na rere ni lomada ena kena tarai cake na vakabauta kei na loloma kivei rau na Tamada Vakalomalagi kei Jisu Karisito.
Na matabete tabu e vakayaloqaqataki keda ena noda veiqaravi. Ena kena cakacakatabu vakalotu eda ciqoma kina na kaukauwa meda qaravi ira na luve ni Kalou ka vorata na veivakayarayarataki ca. Ni kacivi keda o Koya meda veiqaravi, e solia vei keda na yalayala oqo: “Ia ko koya sa vakacegui kemudou sa vakacegui au talega, niu sa lako vata tiko kei kemudou. Au na tiko e yasamudou imatau ka tiko talega e yasamudou imawi; ia na noqu Yalotabu ena tiko e yalomudou; era na vakavolivoliti kemudou na noqu agilosi ka laveti kemudou cake” (V&V 84:88).
A tu na vu ni nona rere vakalevu o Parofita Josefa Simici ena nona veiqaravi voli. Ia a vakayaloqaqataki koya na Kalou vakakina na veivakadeitaki ni Nona ivakaraitaki oqo na iVakavuvuli:
“Ia kevaka ko sa biu ki na ikeli, se era tauri iko na daulaba, se tau vei iko na itotogi mate; kevaka ko sa biu ki na wasaliwa titobu ka ubi iko na biau lelevu, se kevaka sa liwa na cagi kaukauwa mo leqa kina; ia kevaka sa kumukumuni vata na o loaloa ni lomalagi kei na vei vu ni ka me latia na nomu sala, oqo na kena ilutua; kevaka sa dalaga mai ko eli me tilomi iko, mo kila sara na luvequ ni ko na kalougata vakalevu, kevaka ko sa vosota rawa na veika kece oqo.
“Raica na Luve ni Tamata sa vosota rawa na veika e toro sobu sara. Ia ko nanuma li ni ko sa uasivi cake mai vua?” (V&V 122:7–8).
Na Kalou e solia vei keda e levu cake sara na veivuke me vakasavi tani na rere ka veivakayaloqaqataki, se cava ga eda sotava ena noda bula. Ena noda kerea yani na Nona veivuke, sa na rawa kina Vua me laveti keda ki na bula tawamudu eda vakasaqara tiko.
© 2009 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni First Presidency Message, March 2010. Fijian. 09363 858
Veivakavulici mai na iTukutuku Oqo
O Jisu Karisito, na iVakavuvuli ka dauveituberi, e dau taro vakawasoma me vakauqeti ira kina na tamata me ra vakasamataka vakatitobu ka vakayagataka na ivakavuvuli e vakavulica. … Na taro e vakauqeta na vakasama, na vakadidike vakatitobu, kei na noda gugumatua” (Veituberi, Me iLutua Ni Noda Bula [1999], 78). Vakasamataka na kena buli ka tarogi e vica na taro me vukea na tamata yadua ena nona kila ka vakayagataka na dina e vakatavulici ena itukutuku oqo. Me kena ivakaraitaki, e rawa mo taroga, “Na veivuke cava sa solia vei iko na Kalou mo vakasava tani kina na rere ka vakayaloqaqataki iko?” se “E sa vukei iko vakacava na Kalou mo vorata nomu rere?” Vakauqeti ira yadua me ra vakananuma nodra isaunitaro ni bera nodra sauma.