Agtutubo
Awan ti Tao a Perpekto
Kanayon a tinarigagayak ti agbalin a kas ken ni Nephi: napnuan unay iti kinatulnog, napnuan unay iti kinapudno, ken napnuan unay iti kinaespirituanna. Iti imatangko ni Nephi ket isu ti kaindaklan a pagwadan ti kinaimbag. Sumagmamano a banag ti nakay-aywak ngem ad-adda a pinanunotko ti dumakkel nga agbalin a kas kenkuana—wenno uray koma laeng matagikuak ti sangkabassit ti kinalaingna.
Maysa nga aldaw naaddaanak iti bassit a parikut, a gapuanan dagiti rikna ti kinakurang. Addaanak kadagiti kasta nga arapaap ken nakaad-adu a panggep a tun-oyen. Ngem kasla diak latta makadanon iti papanak. Babaen dagiti lua ti kinaawan ti namnama, inyebkasko dagitoy a riknak ken ni tatangko. Dagus a timmakder isuna, napan iti pagidulinan ti libro, ket inruarna ti maysa kadagiti kopia ti Libro ni Mormon. Awan ti saona, linukibna daytoy iti 2 Nephi 4 ket inrugina ti panangbasa iti bersikulo 17.
Kasla koriente a nagsaknap ti lamiis iti bagik bayat idedengngegko kadagitoy nabileg a balikas: “O nakakaasiak a tao!” Adu dagiti napanunotko. Kasano a makuna ni Nephi, ti bannuarko ken pagwadak, nga isu ket “nakakaasi”? No isu ket nakakaasi, ania ti inaramid dayta kaniak?
Manen, pimmardas ti panagsaknap ti koriente iti kaunggak bayat ti panangbasa ni tatangko iti bersikulo 8: “Agriingka, kaunggak! Saanka nga agnunog iti basol.” Nariknak a kasla nagawan dagiti nangisit nga ulep iti panunotko ket limmawag tapno makita ti bara ken ngayed ti nawada nga asul a langit ken naraniag nga init. Saan a mabalin nga iladawan no kasano ti pananglawag daytoy a bersikulo iti kaunggak. Sumagmamano a bersikulo ti nasantuan a kasuratan ti nangpunno kaniak iti adu a namnama, pammaregta, ken rag-o a kas iti inaramid kaniak daytoy.
Iti bersikulo 30, sinao ni Nephi ti kas met iti pinampanunotko, ngem iti nalawlawag a balikas: “Agrag-o kenka ti kaunggak, Diosko, a pondasion ti pannakaisalakanko.” Daytoy a bersikulo ket nangibuyog kadagiti rikna ti talna ken panagyaman iti nadungngo nga asi ken ayat ti Apo.
Inrikep ni tatangko ti libro ket inlawlawagna a no dadduma ket maaw-awagan iti salmo ni Nephi dagitoy a bersikulo. Kalpasanna sidudungngo nga insurona kaniak nga uray dagiti kaindaklan a tao iti daga ket saan a perpekto wenno adda pagkuranganda, ket nasken a bigbigen dagitoy a tao dagiti pagkuranganda wenno no saan agbalinda a natangig, ket ngarud, saanda a naindaklan.
Naawatakon. Saan a gapu ta addaanak iti pagkapsutan saanna a kayat a sawen a diak kabaelan ti agbalin a kas ken ni Nephi. Ti panangbigbigko iti pagkapsutak ti ad-adda a nangyasideg kaniak iti kabaelan ni Nephi. Naindaklan ni Nephi gapu ta, malaksid iti panagbalinna a natulnog ken napudno, napakumbaba ken sitatallugod pay nga inakona dagiti biddutna.
Manipud pay iti dayta a padas, impategkon dagitoy a balikas ni Nephi. Tunggal kanito a basaek dagitoy, mapadasak dagiti isu met la a regget ken pammaregta idi immuna a binasak dagitoy. Ikanta dagiti bersikulo a maysaak nga anak a babai ti Dios, dakdakkel ti kabaelak ngem iti maipagarupko. Ammok a no napudnoak ket agtultuloyak, adda dagiti di pay naipalgak a parabur nga agur-uray kaniak.