Mensahe ti Umuna a Panguluen, Marso 2010
Tured iti Dayaw
Maysa kadagiti panggep ti biag iti daga ket isu ti panangpaneknek iti Dios a tungpalentayo dagiti bilinna no kasapulan dayta ti tured. Nalasattayo dayta a pannubok iti lubong dagiti espiritu. Ngem apagkatlo dagiti pangen ti langit ti nagrebelde a maibusor iti dayta a singasing a masubokda iti biag iti daga nga adda pagpeggadan a mabalin a pakapaayanda.
Sakbay a nayanaktayo, personal nga am-ammotayo ti Dios Ama ken ti Anakna, ni Jesucristo. Makitatayo Ida ken mangngegantayo Ida bayat ti panangisuro ken panangparegtada kadatayo. Ita naikabilen ti belo kadagiti panunot ken lagiptayo. Adda gundaway ni Satanas, ti ama dagiti inuulbod, gapu ta nasken a makitatayo ti kinapudno ti kinasiasinotayo babaen dagiti mata ti pammati, idinto ta dagiti bagitayo ti mangpapadas kadatayo iti nailubongan a sulisog ken iti pagkapsutan ti bagi.
Addaantayo kadagiti naindaklan a tulong a mangted kadatayo iti tured iti daytoy a biag. Ti kaindaklan ket ti Pannubbot ni Jesucristo. Gapu iti inaramidna, mabalin a maugasan dagiti basol kadagiti dandanum ti panagbuniag. Mapabarotayo dayta a bendision no makiranudtayo iti sakramento a sipapammati ken addaan iti managbabawi a puso.
Dagiti naespirituan a sagut ti sabali pay a tulong. Awatentayo ti Espiritu ni Cristo iti pannakayanak. Dayta ti mangted kadatayo iti bileg a mangammo no ti pili a sangsanguentayo ket mangiturong iti agnanayon a biag. Dagiti nasantuan a kasuratan ti masinunuo a pangiwanwan no basaentayo dagitoy a ti Espiritu Santo ti kaduatayo.
Palugodannatayo ti Espiritu Santo a mangyebkas iti panagyaman ken dumawat iti tulong babaen iti kararag nga addaaan iti kinalawag ken panagtalek a naminsan a sinagraptayon iti denna ti Nailangitan nga Amatayo ken addanto manen kadatayo no agsublitayo Kenkuana. Dayta a pannakisarita iti Dios ket mangtulong a mangikkat iti buteng iti puspusotayo bayat ti panangparnuayna iti pammati ken ayat ti Nailangitan nga Ama ken ni Jesucristo.
Ti nasantuan a priesthood ket mangted kadatayo iti tured iti panagserbitayo. Kadagiti ordinansana awatentayo ti bileg tapno agserbi kadagiti annak ti Dios ken tapno masarkedan ti impluwensia ti sairo. No awagannatayo Isuna tapno agserbi, addaantayo iti daytoy a kari: “Ket asino man a mangawat kadakayo, addaakto met sadiay, ta addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo” DkK 84:88).
Ti Propeta Joseph Smith iti panagserbina ket adda gapu iti panagbutengna. Ngem inikkan isuna ti Dios iti tured nga addaan iti daytoy a namnama ti pagwadan ti Maestro:
“Ket no maipisokkanto iti abut, wenno kadagiti ima dagiti mammapatay, ket maipataw kenka ti patay; no maipuruakka iti nauneg; ket no pagaambonandaka ti um-umkis a dalluyon; no agbalin ti kabusormo a narungsot nga angin; no agdalungdong ti langit iti sipnget, ket amin a banag agkukunsabo a mangbangon iti dalanmo; ken kangrunaan ti amin, no dagiti yo ti impierno ungapendanto ti ngiwatda a mangalun-on kenka, ammuem anakko, nga amin dagitoy a banag ipaayandaka iti padas, ket agbalindanto a pagsayaatam.
“Ti Anak ti Tao bimmaba iti babaenda amin. Nain-indaklan ka kadi ngem isu?” DkK 122:7–8).
Inikkannatayo ti Dios iti ad-adu pay a tulong a mangikkat iti buteng ket ikkannatayo iti tured, ania man ti mabalin a pakaisanguantayo iti biag. Bayat ti panagkalikagumtayo nga agpatulong Kenkuana, maitag-aynatayo nga agturong iti agnanayon a biag a kalkalikagumantayo a gun-oden.
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, March 2010. Ilokano. 09363 864
Panangisuro manipud iti Daytoy a Mensahe
Ni Jesucristo, ti Maestro a Mannursuro, ket masansan nga agsaludsod tapno allukoyenna dagiti tao a mangutob ken mangyaplikar kadagiti pagbatayan nga Insurona. … Dagiti saludsodna ket nangguyugoy iti panunot, panagsapsapul ti kararua, ken panagkumit” (Teaching, No Greater Call [1999], 68). Ibilang ti panangparnuay ken panangdamag iti sumagmamano a saludsod a makatulong kadagiti tao a mangawat ken mangyaplikar iti biagda kadagiti kinapudno a naisuro iti daytoy a mensahe. Kas pagarigan, mabalinmo a saludsoden ti, “Ania ti tulong nga inted kenkan ti Dios a nangikkat iti buteng ken nangted kenka iti tured?” wenno “Kasano a tinulongannaka ti Dios a nangparmek kadagiti butengmo?” Allukoyem dagiti tao nga utobenda dagiti sungbatda sakbay a sumungbatda.