Mensahe iti Visiting Teaching, Marso 2010
Panangpapigsa iti Pammati iti Dios nga Ama ken ni Jesucristo babaen ti Bukod a Panagadal iti Nasantuan a Kasuratan
Isuroyo dagitoy a nasantuan a kasuratan ken adaw a sao wenno, no kasapulan, ti sabali pay a pagbatayan a mangbendision kadagiti kabsat a babbai a sarungkaranyo. Iburayyo ti pammaneknek maipapan iti doktrina. Awisenyo dagiti sarungkaranyo nga iburayda no ania ti narikna ken nasursuroda.
“Idi kabarbaroak pay la a nagasawa, … naawisak iti maysa a pangaldaw para iti amin a kabsat a babbai ti Relief Society iti wardko a nakapagbasan iti Libro ni Mormon wenno maysa a libro ti ababa a pakasaritaan ti Simbaan. Saan a kanayon ti panagbasak idi iti nasantuan a kasuratan, isu nga inaramidko ti kabaelak tapno makadar-ayak iti pangngaldaw babaen ti panangbasak iti ababa a libro gapu ta nalaklaka daytoy ken bassit ti oras a mabubos. Bayat ti pannanganko, adda nariknak a bileg a nupay nasayaat a basaen ti libro ti pakasaritaan, masapul koma a binasak ti Libro ni Mormon. Al-allukoyennak ti Espiritu Santo a baliwak dagiti ugalik iti panagbasa iti nasantuan a kasuratan. Iti dayta met la nga aldaw rinugiak a binasa ti Libro ni Mormon, ket diak pulos nagsardeng. … Gapu ta inrugik ti panagbasa kadagiti nasantuan a kasuratan iti inaldaw, nasursurok ti maipapan iti Nailangitan nga Amak, ti Anakna a ni Jesucristo, ken no ania ti kasapulak tapno agbalinak a kas Kadakuada. …
“…Kabaelan ti tunggal babai ti agbalin a mannursuro iti doktrina ti ebanghelio iti pagtaenganna, ket kasapulan ti tunggal kabsat a babai iti Simbaan ti pannakaammo iti ebanghelio kas maysa a lider ken mannursuro. No diyo pay naipaugali ti panagbasa iti nasantuan a kasuratan iti inaldaw, rugianyo itan ket itultuloyyo ti panagadal tapno nakasaganakayo kadagiti pagrebbenganyo iti daytoy a biag ken kadagiti kinaagnanayon.”1
Julie B. Beck, sapasap a presidente ti Relief Society.
“Ti panagadal kadagiti nasantuan a kasuratan ket mangtulong kadagiti pammaneknektayo ken kadagiti pammaneknek dagiti miembro ti pamiliatayo. Dumakdakkel dagiti annaktayo iti agdama a napalikmutan kadagiti timek a mangguyguyugoy kadakuada a bay-andan dayta nga umno ket gun-odenda, ketdi, dagiti pagragsakan ti lubong. Malaksid no addaandan ti natibker a pundasion iti ebanghelio ni Jesucriso, pammaneknek iti kinapudno, ken determinasion nga agbiag a sililinteg, alistoda a maaringan kadagitoy nga impluwensia. Pagrebbengantayo ti mangpapigsa ken mangsaluad kadakuada.”2
Presidente Thomas S. Monson.
“Kayatmi nga adu ti ammo dagiti kakabsattayo a babbai maipanggep kadagiti nasantuan a kasuratan. … Kasapulanyo ti pannakaammo kadagiti agnanayon a kinapudnona para iti bukodyo a pagimbagan, ken para kadagiti panggep ti panangisuroyo kadagiti bukodyo nga annak ken amin a dadduma pay nga umay iti sakup ti impluwensiayo.”3
“Kayatmi a maparaburan dagiti pagtaengantayo kadagiti kabsat a babbai a nalaing iti nasantuan a kasuratan—baro ken balasang wenno naasawaan man, ubing wenno lakay, balo wenno sibibiag man iti maysa a pamilia. … Agbalinkayo nga iskolar wenno nalaing kadagiti nasantuan a kasuratan---a saan a tapno mangibaba kadagiti dadduma, ngem ketdi mangitag-ay kadakuada!”4
Presidente Spencer W. Kimball (1895–1985).
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, March 2010. Ilokano. 09363 864
Dagiti Tulong para iti Visiting Teaching
Bayat ti isasarungkaryo, sungbatanyo dagiti saludsod ket mangiburay kadagiti nalawag a pannakaammo nga usaren dagiti nasantuan a kasuratan. Iburayyo ti pammaneknek maipapan iti no kasano a pinapigsa ti pammatiyo ti panagadalyo iti nasantuan a kasuratan. Kiddawenyo iti kabsat a babai a sarungkaranyo nga isalaysayna no kasano a napapigsan ti pagtaengan ken pamiliana ti panagadalna kadagiti nasantuan a kasuratan.
Bukod a Panagsagana