Mwet Fuhsr
Wacngihn Mwet Suwohs
Nga kena lwen nuh kwewa in oacna Nephi: ahkostwen na upac, yohk luhlahlfongi la, ac sesseslah ke nguhn. Ke ma nga liye uh Nephi el mwe srihkasrak na wowo se ke ma wo uh. Kais kuhtuh ma sikyak nuh sihk yohk liki na nuhnak in kapkapwack in muh oacna el uh—kuh sahp muhtwacwacack in eis finne kihtin wo lal ah.
Sie lwen ah oasr elyah srihsrihk se sikyak nuh sihk, sikyak ke puhla suhfal. Oasr kena in orwaclah wowo ac finsrak na puhs. Tuhsruhk Nga tiacna kuh in oraclah nuh ke kuhtwena acn. Tuhng ke wacngihn finsrak, Nga sang puhla inge nuh sin pahpah tuhmuhk. El tuyak na, ac fahsr nuh ke acn in puk se, ac ollah sie kapi ke Puk luhn Mormon ah. El tiac fahklah sie kahs, el ikucslah nuh ke 2 Nephi 4 ac muhtwacwacack riti fuhs 17.
Tuhnin mihsrihsr monuk oacna sahrom uh ke nga lohng kahs na fokoko inge suc el lakihn lah el sie mwet na suhpwacr. Nuhnak luhk mukwikwi. Nephi, mwet kuhtanglah ac srihkasrak luhk, el oruh fuhkah in fahk muh el “kasrkuhsrak”? Fin el kasrkuhsrak, ma ingacn ac oruh nga mac?
Sifilpac, sahrom sac mokleyuc ke pahpah tuhmuhk ah riti fuhs 28 ke Nephi el sapkihn nguhnal in acsmaklac ac tiac sifil muhta in ma koluk. Tiac sifil muhta in ma koluk. Oacna ngan puhla muh puhkuhnyen lohsr se insifuckah maelihk ac mwesahslah in ahkkahlwemye sie puhkuhnyeng folfol fucsrfucsr ac kahto ma ikacklah ac faht kahlwem uh. Kuh in ahkuhtweyucki atacn fuhs inge nwacklah nguhnihk uh. Kuhtuh fuhs ke ma suhmuhslah nwekyuclac ke finsrak, mokleyuck, ac engan oacna ke ma se inge oruh uh.
Ke fuhs 30, Nephi el fahk oacna ma nga nuhnkuh uh, tuh ke kahs in kaksahk yohk na. El fahk lah nguhnal fah engan in El suc pa God lal ac yot in molwelah lal. Fuhs se inge use puhla mislac ac kuloh ke pahkotwen ac luhngse luhn Leum.
Pahpah tuhmuhk ah kaliyac puk sac ac ahkuhtweyac lah fuhs inge kuhtuh pacl uh pahngpahng on lal Nephi. Na el kahkahsrihk lutiyuc lah finne mwet wo na pwacye fin facluh uh tiac suwohs, ac mwet inge enenuh in akihlen sesuwohs laltahl kuh elos fah insefuhltwact ac, ke ma inge, tiac wo.
Nga kahlwemwack. Tiac kalmen oasr mwe muhnahs luhk pa nga tiac kuh in oacna Nephi. Akihlen mwe muhnahs luhk ahkfototoyeyuc nuh ke lahlmwetmwet lal Nephi. Nephi el wo na upac ke srihpen, el kwewana ahkostwen ac yohk luhlahlfongi la, el insepuhsisacl ac kena in fahkwack ma koluk lal.
Tukun na ma sac, nga seko kahs lal Nephi inge. Kais sie pacl nga riti uh, nga puhlakihn pac atac sac ac mokleyuck uh oacna pacl se met nga riti ah. Fuhs ingacn fahkwack nuh sihk lah nga sie tuhlihk muhtwacn nuhtin God, yohk likina ma nga kuh in nuhnkuh uh. Nga etuh lah fin yohk luhlahlfongi luhk ac fahsr na nuh met, mwe insewowo soenna etweyuck uh srwackna oasr suhna.