Pweng luhn Prestuhnsi Se Met, Mahs 2010
Puhlaik Nwacsnwacs
Sie srihpac ke moul in ikoac uh pa in ahkpwacyei nuh sin God lah kuht fah liyacacng masap Lal ke ma ingacn eis pacl in puhlaik uh. Kuht pahselah tes se ingacn ke facl luhn nguhn ah. Tuhsruhk yohk liki tahfuh sin lupufacn koluk inkuhsrao mweun lain ohiyac se ma elos in srihkeyuck in sie moul in ikoac ma ac oasr pacl upac ma elos ac fah puhtatlac uh.
Met liki kuht isuslac ah, kuht etwacl God Pahpah ac Wen Nahtuhl, Jisus Kraist, suwohswohs. Kuht kuh in liyacltahl ac lohngohlos ke Elos luti ac ahkkweye kuht uh. Ingena sie lihsrlihsr fihliyucki kohsrwaclah nuhnak ac mwe esam lasr uh. Setuhn, pahpah tuhmwacn ma kikiacp, oasr pacl wowo lal ke srihpen kuht enenuh in liye na pwacye lah suc kuht uh ke luhlahlfongi na pwacye uh, ke pacl se mahnosr oruh kuht in nuhnuhnkweyuck ke mwe sruhf luhn facluh ac ke mwe muhnahs luhn mahno uh.
Oasr kahsruh luhlahp lasr in use puhlaik nuh sesr ke moul se inge. Ma se ma yohk emet an pa Iwaclah luhn Jisus Kraist. Ke srihpen ma El oruh inge, ma koluk uh kuh in owolac ke kof in pacptais uh. Kuht kuh in ahksasucye mwe insewowo ingacn ke kuht ipeis kuhfa luhn Leum ke luhlahlfongi ac ke inse auliyak uh.
Mwe sang ke nguhn uh el sie pac kahsruh. Kuht eis Nguhn luhn Kraist ke isuslac ah. Ma ingacn use nuh sesr kuh in etuh lah sulaclah se met liki kuht uh fah kol kuht nuh ke moul ma pahtpaht. Ma suhmuhslah uh el mwe kol na wowo se ke kuht riti ke Nguhn Muhtahl oacna sie mwet wiacsr uh.
Nguhn Muhtahl el lwelah kuht in fahk kuloh ac siyuck ke kahsruh ke pruhe ke kahlwem ac luhlahlfongi lasr ke sie pacl ah ma kuht insewowo yurin Pahpah tuhmasr Inkuhsrao ac suc ma kuht fah eis ke kuht fah fohlohk nuh yohrohl uh. Aetuhi se yurin God ingacn fah kahsruh sislah sahngweng insiacsr uh ke ac muhsaheack luhlahlfongi ac luhngse luhn Pahpah Lucng ac Jisus Kraist uh.
Pristut muhtahl uh use nuh sesr puhlaik nuh ke kuhlwacnsap lasr uh. Ke kais sie akwuck ma kuht eis kuh in kuhlwacnsapuh tuhlihk nuhtin God uh ac in kuhtanglah orekma luhn ma koluk uh. Ke El pahngon kuht in kuhlwacnsap uh, oasr sesr olwelah se inge lah kuhtwena ma eiskuht uh, El ac oasr pac. Tuh El fah fahsr ye muhtahsr ac fah oasr ke lacpo lacyot ac lacsac, ac Nguhn Lal fah oan insiacsr, ac lupufacn Lal fah raunikuhtlac, in sruhk kuhtyak (liye D&C 84:88).
Ke kuhlwacnsap lal mwet pahluh Joseph Smith oasr srihpac lal in sahngweng. Tuhsruhk God el sang nuhsel puhlaik ke mwe ahkpwacyei se inge ke srihkasrak luhn Mwet Kol sac:
El fahk lah fin Joseph Smith el totolac nuh in luhf uh kuh nuh in poun mwet ahkmas uh, ac ituckyang nuhsel in misac; fin el totolac nuh acn loal uh; fin noanoa uh sonuhl ahkkolukyacl; fin eng upac uh tuhkuh oacna mwet lokalok lal; fin inkuhsrao nwacnwaclah ke lohsr, ac ma nuh kewa tuhkweni in mayak; ac yohk liki nuh kwewa, fin wihsen acn in ma koluk uh ikucslah inwacluhl yohk tohkohl, el enenuh in etuh lah ma inge nuh kwewa ma ac sang pahlah se nuhsel, ac ma ac wo nuh sel se.
Leum el fahk nuh sel lah Wen nuhtin Mwet el puhtati nuh ten yurin mwet nuh kwewa. Ac siyuck sel fin el kuh Luhkwel? (liye D&C 122:7–8).
God el use nuh sesr yohk liki ma fal in kahsrwe kuht in sislah sahngweng ac use nuh sesr puhlaik, macnsis kuhnlah ma kuht fah sun ke moul uh. Ke kuht suk ke kahsruh Lal uh, El kuh in sruhk kuhtyak nuh ke moul ma pahtpaht ma kuht suk uh.
© 2009 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn First Presidency Message, March 2010. Kosraean. 09363 868
Luti ke Pweng Se Inge
Jisus Kraist, Mwet Kol ke Luti, kwacna siyuck kihsen siyuck in ahkkweye mwet uh in motko ac sang mwe luti El luti uh. … Kihsen siyuck Lal uh mokle nuhnak, sukok-nguhna, ac olwelah” (Teaching, No Greater Call [1999], 68). Nuhnkuh in orwaclah ac siyuck kihsen siyuck puhs in kahsruh kais sie in kahlwem ac sang mwe luti pwacye ke pweng inge. Nuh ke mwe srihkasrak, kom kuh in siyuck, “Kahsruh fuhkah ma God el usot nuh sum in sislah sahngweng ac usot puhlaik uh?” kuh “God el kahsrwe kom fuhkah in kuhtanglah sahngweng lom an?” Ahkkweye kais sie in motko top lalos met liki elos topuk.