Serafo
Ai Sotuni Nuku
Nupwen ua 13 ier, ua poputa ne anneani ewe Puken Mormon iteitan ran, me ua efeioch iteitan ran seni nepoputan.
Am klasin Sukunen Raninfel ren ewe mi 13 ierin ese fakkun kinamwe. Iwe nge, a wor emon sense mi fakkun och mi achocho weires ne afanafana iteitan nesen seni ewe Ngun mi Fel. Eu chok nesen mi usun itenapen aneani ekkewe pukfel.
Nesoponon ewe nesen a pesei ngenikem eu mettoch. An kapasen pesepes epwe ngenikem meinisin, nge ren eu popun a nenengeniei pwisin nupwen a apasa, “Ua pesei ngonuk kopwe anneani seni ewe Puken Mormon iteitan ran!” Ua pwisin ekieki, “Upwe pwäratä ngonuk. Upwe föri!”
Ua poputa 1 Nifai sopun 1 nepwinewe me ua sopweno ai anneani iteitan ran. Meni ai ekiek ese och nupwen ua poputa, nge mwirin ekkis fansoun ua poputa ne sani ifa usun ua memef nupwen ua anneani ewe Puken Mormon. Ua pwapwa nupwen ua anneani iteitan nepwin.
Fitu maram mwirin ua anneani Alma 32 me a kuu netipei me ren ewe ekiekin sotuni nuku. Non sukun aua keran kaeo usun sotuni mettoch, iwe ua fotopukutiw me ua ereni Semach won Nang pwe ua poputa ai sotuni. Ua tingor ngeni pwe upwe sinei ika pwe ewe Puken Mormon mi ennet.
Ai ua ekieki, ua sinei pwe Semach won Nang a pwonueni ai kewe iotek fan chommong. Ai anneani seni ewe Puken Mormon iteitan ran a ngeniei watte tufichin pworacho ngeni mettoch mi ngaw. Ua mefi pwe ua arap ngeni Semei won Nang. Ua mefi pochokun seni manamanen ewe Ngun mi fel ne pworacho ngeni osukosuk. Met Alma a apasa usun sotuni kapsen Kot mi ennet: “A mar non netipei, are ewe kapas allim a nom non netipei iei a anapano ai wewe, ewer ua mefi ochun ngeni inisi” (Alma 32:28).