Poraus seni ewe Aewin Presetensi, April 2010
Eu Angangen Kot mi Napanap
April 6, 1830
Ipuku wanik ier a no, Joseph Smith, Oliver Cowdery, me pwan ekkoch ra chufengen ne förata Ewe Mwichefenin Jises Kraist ren Aramas mi Pin non Fansoun Soponon. Seni kapas meinisin a eu mwich mi mecheres nge mi uren ewe Ngun mi Fel. Joseph a makkei pwe mwirin ewe sakramen, “ewe Ngun mi Fel a ninau woch non napanap watte—ekkoch mi kapas oesini, me am meinisin aua pin ngeni ewe Samon, me aua pwapwa chapur.”1
Chon fonufan rese sinei ekkewe mettoch a fis non ei ran; ese wor watte fisitan are kakapas. Iwe nge, nang a pwapwa me ra pin ngeni Kot—pokiten won ena ran, ewe Mwichefenin Jises Kraist a niwinsefanito ngeni fonufan!
Solomon Chamberlain
Seni ena ran ngeni ei, fite minion noun Semach won Nang at me nengin ra uren nuku ra tapweno mwirin ekkewe memef seni ewe Ngun mi Fel me ra tonong non ekkewe konikin paptais mi pin. Emon mwan itan Solomon Chamberlain.
Solomon ii emon mwan mi uren ewe Ngun mi Fel me a iotek non chommong awa, a kutta omusomusen tipisin kewe me a tingor ngeni Semach won Nang epwe emweni i ngeni ewe ennet. Usun ier 1816, Solomon a angei eu pwon me non ewe tan pwe epwe manau ne kuna ewe ran nupwen ewe Mwichefenin Kraist epwe fisita mwirin napanapen ekkewe aposel epwe fisita sefan won ewe fonufan.
Ekkoch ier mwirin Solomon a sai won mota ngeni Canada nupwen waan we a kouno non ewe kukkun teninimw itan Palmyra, New York. A mefi eu mettoch mi pesei ngeni pwe epwe tota won ewe fonu. Ese sinei pwata a nom ikewe, a poputa ne kapas ngeni ekkewe aramasen ewe neni. Esap fansoun nangatam tori a rongorong usun echo “Paipen mi kolt.” A apasa pwe ekkena ru kapas mi efisata “eu manaman usun fifi [mi] feino seni mokurei ngeni pechei kewe.”
An kapas eis a emweni ngeni imwen ekkewe chon Smith, minne a kapas ngeni ekkewe ir mi nonnom ikewe usun ewe porausen ewe kapas allim mi niwinsefanito. Mwirin ru ran me ikewe me a angei eu kapasen pwäratä ewe ennet, Solomon a sopweno an sai ngeni Canada, me a sai fan 64 peich minefo, mi keran för seni ewe Puken Mormon. Ekkis meinisin a feino, a aiti ekkewe aramas, “asan me fan, ekkewe mi pisekisek me osupwang, … ne ammonata ren ewe angangen Kot mi napanap epwene fis.”2
Eu Angangen Kot mi Napanap
Seni ena ran non April 1830, fite minion aramas ra kaeo ewe ennet an ewe kapas allim mi niwinsefan me ra tonong non ewe konikin paptais. Ua pwäratä pwe ei “angangen Kot mi napanap” mi nom won ei fonufan ikenai. Ua pwäratä pwe ewe Samon a nengeni An Mwichefen me a nemeni seni Noun we soufos, Preseten Thomas S. Monson. Mi eu efeioch mi watte mi manau non ekkei ranin soponon. Ekkei fansoun mi fakkun ningoch, minne soufosun nom mi kukuna me chon nang mi katon. Ewe Samon mi sineiochu An we Mwichefen. A pwan sineiochu ekkewe ir, usun chok Solomon Chamberlain, mi tapweno mwirin ekkewe memef seni ewe Ngun mi Fel me ra fiti pwiir me fefiner kewe won unusen ewe fonufan ne aninis me awatteno ei angangen Kot mi napanap.
© 2010 seni Intellectual Reserve, Inc. Meinisin pung mi kawor. A för non Amerika. Kapungunon non fasun engenes: 6/09. Kapungunon chiakun: 6/09. Chiakun ewe First Presidency Message, April 2010. Chuukese. 09364 901
Afanafan seni Ei Poraus
Pwisin nenien appiru mi eu nein ekkewe pisekin afanafan mi fakkun pochokun” (Teaching, No Greater Call [1999], 18). Nupwen ka aea ewe porausen Solomon Chamberlain, kopwe tingorei ewe famini repwe ausening ngeni fansoun minne a tapweno mwirin ekkewe memef seni ewe Ngun mi Fel. Oupwe poraus won ifa usun an nenien appiru mi tongeni anisi ekkoch. Kopwe tingorei chon ewe famini repwe poraus usun eu fansoun nupwen an emon nenien appiru mi anisir pwisin.