Lamharon
Eksperimento sa Akon Pagtuo
Sang 13 anyos pa lang ako, ginsuguran ko na ang pagbasa sang Ang Libro ni Mormon adlaw-adlaw kag ginbugayan ako sa tagsa ka adlaw sumugod sadto.
Ang amon klase sa Sunday School para sa mga 13 ka tuig medyo magahod. Ugaling, may isa kami ka dalayawon nga titser nga nagtinguha gid sa pagtudlo sang tagsa ka leksyon paagi sa Espiritu. Isa sadto ka leksyon amo ang parte sa pagbasa sang balaan nga mga kasulatan.
Sa katapusan sang leksyon ginhatagan niya kami sang isa ka hangkat. Gintuyo gid yadto para sa amon tanan, apang kon sa ano nga rason nga iya ako gintulok sing direkta sang sia nagsiling, “Ginahangkat ko kamo nga magbasa sang Ang Libro ni Mormon sa tagsa gid ka adlaw!” Ginpensar ko sa akon kaugalingon, “Ipakita ko sa imo. Himuon ko ina!”
Nagsugod ako sa 1 Nefi kapitulo 1 sina gid nga gab-i kag nagpadayon sa pagbasa adlaw-adlaw. Daw wala ako sa husto nga panimuot sang magsugod ako, apang sang ulihi nanamian na ako sa akon nabatyagan kon ako magbasa sang Ang Libro ni Mormon. Ang pagbasa sa tagsa ka gab-i akon na nalingawan.
Pagkaligad sang binulan nakalab-ot na ako sa Alma 32 kag nagdayaw gid sa ideya parte sa isa ka eksperimento sa pagtuo. Sa eskuwelahan bag-o pa gid lang namon matun-an ang parte sa paghikot sang mga pag- eksperimento sa siyensya, gani nagluhod ako kag naghambal sa Amay nga Langitnon nga sugoran ko na ang eksperimento. Nangabay ako nga akon mahibaloan kon bala Ang Libro ni Mormon matuod.
Sa pagdumdom sadtong inagihan ko, nakahibalo ako nga ginsabat sang Amay nga Langitnon ang akon mga pangamuyo sing madamo na nga beses. Ang adlaw-adlaw nga pagbasa sang Ang Libro ni Mormon naghatag sa akon sing dugang nga kapasidad nga madaug ang kalainan. Nabatyagan ko nga nangin mas malapit ako sa akon Amay sa Langit. Nabatyagan ko nga ginpabakod ako sang gahum sang Balaan nga Espiritu agud malampuwasan ang mga kabudlayan. Matuod ang ginhambal ni Alma parte sa pag-eksperimento sa pulong sang Dios: “Ini nagasugod sa pagpadako sang akon kalag; huo, ini nagasugod sa pagpasanag sang akon paghangop, huo, ini nagasugod nga mangin manamit sa akon” (Alma 32:28).