Abril 2010 Mensahe sang Unang Panguluhan
Isa ka Daku nga Buluhaton sang Dios
Abril 6, 1830
May siento otsenta na ka tuig ang nagligad, sanday Joseph Smith, Oliver Cowdery, kag ilisipon nga iban pa ang nagtililipon sa pag-organisar sang Ang Simbahan ni Jesucristo sang mga Santos sa Ulihing mga Adlaw. Sa pagkamatuod, isa yadto ka simple apang espirituhanon nga miting. Ginsulat ni Joseph nga pagkatapos sang sakramento, “ginbubo sa amon ang Balaan nga Espiritu sing di-hamak—nga ang pila nagpanagna, samtang ginadayaw namon tanan ang Ginuo, kag nagkalipay sing lubos.”1
Ang mga hitabo sa sining adlaw naglabay lang nga wala matalupangdan sang kalibutan; wala ini masulat sa mga pahayagan ukon mapahayag man lang sa kalibutan. Bisan pa man, daw ano ayhan ang pagkalipay sang mga kalangitan kag paghimaya sa Dios—kay sa sina nga adlaw, ang Simbahan ni Jescristo nagbalik na sa duta!
Solomon Chamberlain
Sugod sina nga adlaw tubtob sa karon, minilyon ka mga napun-an sang pagtuo nga kaanakan nga lalaki kag babayi sang Amay nga Langitnon ang nagsunod sang mga pagpabatyag sang Balaan nga Espiritu kag nagpatugmaw sa sagrado nga mga tubig sang pagbunyag. Isa sadto amo si Solomon Chamberlain.
Si Solomon isa ka espirituhanon nga tawo kag naghinguyang sang madamo nga mga inoras sa pagpangamuyo, nga nagahangad sang kapatawaran sang iya mga sala kag pag-ampo sa Amay nga Langitnon sa pagtuytoy sa iya sa kamatuoran. Sang mga 1816, ginpanaad kay Solomon sa isa ka palanan-awon nga maabtan pa niya ang adlaw sang pagtukod sang Simbahan ni Cristo pagkatapos nga ang organisasyon sang Napulo’g Duha ka mga Apostoles mapahamtang liwat sa duta.
Makaligad ang mga tinuig nagbiyahe si Solomon sakay sa barko nga pakadto Canada sang ang iya ginasakyan naghapit sa magamay nga banwa sang Palmyra, New York. Didto iya nabatyagan ang isa ka di-mapunggan nga puwersa nga nagasudyot sa iya sa pagpanaog sa barko. Bangod kay wala makahibalo kon ngaa didto sia, nagsugod sia sa pagpakighambal sa mga tawo sa banwa. Wala gid man madugayi kag iya nabatian ang istorya parte sa isa ka “bulawan nga Bibliya.” Siling niya yadtong duha ka mga tinaga nagdala sang “gahum nga daw kasubong sang kuryente [nga] naglatay halin sa tuktok sang akon ulo pakadto sa punta sang mga tudlo sang akon mga tiil.”
Ang iya mga pagpangusisa nagdala sa iya sa balay sang mga Smith, sa diin nakigsugilanon sia sa ila didto parte sa makadalayaw nga mga balita sang ginpanumbalik nga ebanghelyo. Pagkatapos sang duha ka adlaw nga pagtiner didto kag pagbaton sang panaksihon parte sa kamatuoran, nagpadayon si Solomon sa pagbiyahe pakadto sa Canada, dala ang 64 ka bag-o nga gin-imprinta, kag wala pa mahugpong nga mga pahina sang Ang Libro ni Mormon. Bisan sa diin sia magkadto, iya gintudlo sa mga tawo, “alangay sa mataas kag manubo sing estado sa sosyedad, maggaranon kag kubos, … nga maghanda para sa daku nga buluhaton sang Dios nga manug-abot na sa karon.”2
Isa ka Daku nga Buluhaton sang Dios
Sugod sina nga adlaw sang Abril 1830, minilyon ang nakadiskubre sang kamatuoran sang ginpanumbalik nga ebanghelyo kag nagpatugmaw sa mga tubig sang pagbunyag. Nagasaksi ako nga ining “daku nga buluhaton sang Dios” yari na karon sa duta. Nagapamatuod ako nga ginabantayan sang Ginuo ang Iya Simbahan kag ginadumala ini paagi sa Iya propeta nga si Pangulong Thomas S. Monson. Indi isa ka ordinaryo nga bugay ang mabuhi sa sining ulihing mga adlaw. Mahimayaon ining panahon, nga nakita na sadto pa sang dumaan nga mga propeta kag gin-updan sang mabinantayon, maka-anghel nga mga panong. Ang Ginuo nagaulikid sa Iya Simbahan. Nagaulikid man Sia sa ila nga, pareho kay Solomon Chamberlain, nagasunod sa mga pagpabatyag sang Balaan nga Espiritu kag nagabuylog upod sa ila mga kautoran sa bug-os nga kalibutan sa pagpahanabo sining daku nga buluhaton sang Dios.
© 2009 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, April 2010. Hiligaynon. 09364 861
Pagtudlo gikan sa Sining Mensahe
Ang personal nga halimbawa amo ang isa sa pinakagamhanan nga mga pamaagi sa pagtudlo nga may yara kita” (Teaching, No Greater Call [1999], 18). Sa inyo pagpaambit sang istorya ni Solomon Chamberlain, agdaha ang pamilya sa pagpanumdom sang mga tinion nga iya ginsunod ang mga pagpabatyag sang Espiritu. Hambali kon paano ayhan nakabulig sa iban ang iya halimbawa. Agdaha ang mga miyembro sang pamilya sa pagpaambit sang tion nga ang maayong halimbawa sang iban nakabulig sa ila.