Agtutubo
Ti Eksperimentok iti Pammati
Idi 13 ti tawenko, rinugiak a binasa ti Libro ni Mormon iti inaldaw, ket nabendisionanak iti inaldaw manipud idi.
Ti klasemi nga agtawen iti 13 iti Sunday School ket saan unay nga am-ammo gapu iti kinamanagraemmi. Nupay kasta, naaddaankami iti nakasaysayaat a mannursuro a nangikarigatan iti amin a kabaelanna tapno maisurona ti tunggal adalen babaen ti Espiritu. Maysa nga adalen ket maipapan iti panagbasa kadagiti nasantuan a kasuratan.
Iti ungto ti adalen nangted kadakami iti pangkarit. Daytoy ket naisangrat kadakami amin, ngem gapu iti sumagmamano a rason pinerrengnak bayat ti panagkunana, “Karitenka tapno agbasaka manipud iti Libro ni Mormon iti tunggal maysa nga aldaw!” Napanunotko iti bagik, “Ipakitakto kenka. Aramidekto dayta!”
Rinugiak ti umuna a kapitulo ti 1 Nephi iti dayta met la a rabii ket nagtultuloy ti panagbasak iti tunggal aldaw. Nalabit nga awananak iti umno a galad idi nangrugiak, ngem iti saan a nabayag nangrugi a kinaay-ayok ti wagas a panamagrikna kaniak ti panagbasa iti Libro ni Mormon. Ti panagbasak iti tunggal rabii ket nagbalin a makaay-ayo nga ugali.
Kalpasan dagiti sumagmamano a bulan nadanonko ti Alma 32 ket naawis ti imatangko iti kapanunotan maipapan iti pannakapadas wenno pannakaeksperimento ti pammati. Iti eskuela kaad-adalmi ti maipapan iti panangimaton kadagiti eksperimento a mainaig iti siensia, isu a nagparintumengak ket imbagak iti Nailangitan nga Ama a rinugiakon ti eksperimento. Kiniddawko a maammuakto no pudno met laeng ti Libro ni Mormon.
Iti panagkunak, ammok a sinungbatan ti Nailangitan nga Ama dagiti kararagko iti namin-adun a gundaway. Ti panagbasak iti inaldaw manipud iti Libro ni Mormon ket nangted kaniak iti dakdakkel a kabaelan a mangrimbaw iti dakes. Nariknak nga as-asidegak iti Amak iti Langit. Nariknak a pinapigsanak ti bileg ti Espiritu Santo tapno marimbawak dagiti tubeng. Ti kinuna ni Alma maipapan iti panangeksperimentona iti balikas ti Dios ket pudno: “Rugiannan ti mangpadakkel iti kararuak; wen, rugiannan ti mangsilaw iti panunotko, wen, mangrugin a nananam kaniak”Alma 32:28