Mensahe iti Visiting Teaching, Abril 2010
Panagkalikagum a Manggun-od ken Panangawat iti Bukod a Paltiing
Isuroyo dagitoy a nasantuan a kasuratan ken adaw a sao wenno, no kasapulan, ti sabali pay a pagbatayan a mangbendisionto kadagiti kabsat a babbai a sarungkaranyo. Iburayyo ti pammaneknek maipapan iti doktrina. Awisenyo dagiti sarungkaranyo nga iburayda no ania ti narikna ken nasursuroda.
Kasano a Makagun-odak iti Bukod a Paltiing?
“Agsaganatayo nga umawat iti bukod a paltiing a kas iti ar-aramiden dagiti propeta, babaen ti panangadal kadagiti nasantuan a kasuratan, panagayuno, panagkararag, ken panangpatibker iti pammati. Ti pammati ket isu ti tulbek. Laglagipen ti panagsagana ni Joseph para iti Umuna a Parmata.
“‘No siasino man kadakayo ti agkurang iti kinasirib, agdawat koma iti Dios. …
“‘Ngem agdawat koma a babaen ti pammati nga awan ket ti panagduadua.’”1
Elder Robert D. Hales ti Korum dagiti Sangapulo-ket-dua nga Apostol.
“Ti kararag ti bukodmo a tulbek iti langit. Ti kandaduan ket adda iti sikigam iti belo.
“Ngem saan a dayta ti amin. Iti tao a mangipagarup nga umay ti paltiing nga awan ti panagkagumaan, kinuna ti Apo:
“‘Dimo naawatan; impapanmo nga intedko kenka, idi dimo pinanunot malaksid ti agsaludsod kaniak.
“‘Ngem, adtoy, kunak kenka, a nasken nga adalem iti panunotmo; kalpasanna damagem kaniak no pudno, ket no pudno ipariknakto ti ibabara ti barukongmo; ngarudmariknam a pudno.’”2
Presidente Boyd K. Packer, Presidente ti Korum dagiti Sangapulo-ket-dua nga Apostol.
Kasano a Makaawatak iti Bukod a Paltiing?
“Kadagiti ad-adda a pamiliar a pormana, dumteng ti paltiing wenno pammaregta babaen kadagiti balikas wenno kapanunotan a maipakaammo iti panunot (kitaen iti Enos 1:10; DkK 8:2, babaen iti kellaat a pannakalawlawag [kitaen iti DkK 6:14–15, babaen kadagiti positibo wenno negatibo a rikna maipapan kadagiti naisingasing a turongen ti tignay, wenno uray pay babaen kadagiti makaparegta nga aramiden, a kas kadagiti aramid iti arte. Kas iti dinakamat ni Presidente Boyd K.Packer, … Presidente ti Korum dagiti Sangapulo-ket-dua nga Apostol, “Ad-adda nga umay ti pammaregta a kas rikna ngem kas iti uni.’”3
Elder Dallin H. Oaks ti Korum dagiti Sangapulo-ket-dua nga Apostol.
“Ti templo ket maysa a balay a pagsursuruan. Kaaduan a pangiturong a maited iti templo ket adda isimbolona ken masursuro daytoy babaen ti Espiritu. Kaipapanan daytoy a maisurotayo manipud iti ngato. … Dumakkelto ti pannakaawattayo iti kaipapanan dagiti ordinansa ken katulagan bayat ti panagsublitayo a masansan iti templo nga addaan iti panggep nga agsursuro ken mangutob kadagiti agnanayon a kinapudno a maisursuro. … Agrag-otayo iti naespirituan a pigsa ken iti paltiing nga awatentayo bayat ti idadar-aytayo a kanayon iti templo.”4
Silvia H. Alldred, umuna a mammagbaga iti sapasap a panguluen ti Relief Society.
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, April 2010. Ilokano. 09364 864
Dagiti Tulong para iti Visiting Teaching
Kas maysa a visiting teacher, makaawatka kadagiti impresion ti Espiritu maipapan kadagiti kasapulan dagiti kakabsatmo a babbai ken no kasano a maited dagidiay a kasapulan. Bayat ti panangisuroyo iti daytoy a mensahe, mangiburay, kas maitutop, iti ania man a pammaregta wenno tulong a naawatyo maipapan iti visiting teaching.
Bukod a Panagsagana