Mensahe ti Umuna a Panguluen, Abril 2010
Maysa a Naindaklan nga Aramid ti Dios
Abril 6, 1830
Sangagasut ken walopulo a tawen ti napalabasen, da Joseph Smith, Oliver Cowdery, ken sumagmamano a dadduma pay ti naguummong a sangkamaysa tapno buklenda ti Ti Simbaan ni Jesucristo dagiti Santo iti Ud-udina nga Aldaw. Babaen ti amin a pakasaritaan maysa daytoy a simple ngem naespirituan a miting. Insurat ni Joseph a kalpasan ti sakramento, “ti Espiritu Santo ket naibukbok kadakami iti naindaklan unay a kasasaad—sumagmamano ti nagpropesia, bayat panagrukbabmi amin iti Apo, ket nagrag-okami unay.”1
Dagiti pasamak iti daytoy nga aldaw ket naglabas a di nadlaw ti lubong; saanda a nadanggayan dagiti pagiwarnak wenno agipadpadamag. Nupay kasta, kasano man ti panagrag-o ken panangdayaw dagiti langit iti Dios—gapu iti dayta nga aldaw, naisubli ti Simbaan ni Jesucristo iti daga!
Solomon Chamberlain
Manipud iti dayta nga aldaw agingga ita, minilmilion a napnuan iti pammati nga annak a lallaki ken babbai ti Nailangitan nga Ama ti nangsurot kadagiti pannignay ti Espiritu Santo ket simrekda kadagiti sagrado a dandanum ti panagbuniag. Maysa kadakuada ni Solomon Chamberlain.
Maysa a naespirituan a tao ni Solomon ken binubosna ti adu nga oras iti panagkararag, a nagkalikagum para iti pannakapakawan dagiti basolna ken nagpakaasi iti Nailangitan nga Ama nga iturongna isuna iti kinapudno. Maysa nga aldaw idi 1816, naikari ken ni Solomon iti maysa a parmata nga agbiag isuna tapno makitana ti aldaw a pannakaipasdek manen iti Simbaan ni Cristo iti daga kalpasan ti pannakabukel ti Sangapulo-ket-dua nga Apostol.
Kalpasan dagiti tawen agbambaniaga ni Solomon babaen ti bapor nga agturong iti Canada idi nagsardeng ti baporna iti bassit nga ili ti Palmyra, Nueva York. Sadiay nakarikna isuna iti mamilpilit a puersa a mangguyguyugoy kenkuana a dumsaag. Dina ammo no apay nga adda isuna sadiay, nangrugi ti pannakisaona kadagiti umili. Saan pay a nabayag idi mangngeganna ti saritaan maipapan idi “balitok a Biblia.” Kinunana a dagidiay dua a balikas ti nangyeg iti “bileg a kas koriente [nga] immagibas manipud iti tuktok ti ulok agingga iti murdong dagiti ramay dagiti sakak.”
Dagiti panagsalsaludsodna ti nangiturong kenkuana iti pagtaengan dagiti Smith, a nakisaritaanna kadagiti adda sadiay maipapan kadagiti nakakaskasdaaw a damag maipapan iti naisubli nga ebanghelio. Kalpasan ti panangbubosna iti dua nga aldaw sadiay ken pannakaawatna iti pammaneknek iti kinapudno, nagpatuloy ni Solomon iti panagbaniagana a nagturong iti Canada, nga intugotna ti 64 a kaipprenta, di pay naakkuban a pinanid ti Libro ni Mormon. Tunggal lugar a napananna, insurona dagiti tao, “agpada a nangato ken nababa ti saadna iti kagimongan, nabaknang ken napanglaw, … nga agsagana para iti naindaklan nga aramid ti Dios nga ita ket dumanin dumteng.”2
Maysa a Naindaklan nga Aramid ti Dios
Manipud iti dayta nga aldaw idi Abril 1830, minilionen ti nakatakuat iti kinapudno ti naisubli nga ebanghelio ken simrek kadagiti dandanum ti panagbuniag. Paneknekak a daytoy “naindaklan nga aramid ti Dios” ket addan iti daga iti agdama. Paneknekak a ti Apo banbantayanna ti Simbaanna ken iturturongna daytoy babaen ti propetana, ni Presidente Thomas S. Monson. Saan a gagangay a bendision ti agbiag kadagitoy ud-udina nga aldaw. Dagitoy ket nagloriaan a panawen, a nakita iti masakbayan dagiti nagkauna a propeta ken dinar-ayan dagiti agbambantay a pangen ti anghel. Ti Apo ket Ammona ti Maipapan iti Simbaanna Ammona pay ti maipapan kadagiti tao, kas ken ni Solomon Chamberlain, a mangsursurot kadagiti pannignay ti Espiritu Santo ken kumadkadua kadagiti kakabsatda a lallaki ken babbai iti intero a lubong iti panagtitinnulong a mangisangbay iti daytoy naindaklan nga aramid ti Dios.
© 2009 by Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, April 2010. Ilokano. 09364 864
Panangisuro manipud iti Daytoy a Mensahe
Ti bukod a pagwadan ti maysa kadagiti kabilegan a ramit ti panangisuro nga adda kadatayo” (Teaching, No Greater Call [1999], 18). Bayat ti panangisalaysayyo iti estoria maipapan ken ni Solomon Chamberlain, awisenyo ti pamilia a lagipenda dagiti panawen idi sinurotna dagiti pannignay ti Espiritu. Ilawlawag no kasano a nakatulong kadagiti dadduma ti pagwadanna. Awisenyo dagiti miembro ti pamilia a mangisalaysayda iti maysa a panawen idi nakatulong kadakuada ti nasayaat a pagwadan ti maysa a tao.