Pweng luhn Prestuhnsi Se Met, Eprel 2010
Sie Orekma Yohk luhn God
Eprel 6, 1830
Yac siofok alngucul somlac ah, Joseph Smith, Oliver Cowdery, ac sie pac un mwet sahyac tuhkweni fahsrweni in akiyac Alu luhn Jisus Kraist luhn Mwet Luhlahlfongi ke Lwen-sahflah. Ke koanon sramsram ah arlac sie ma na fihsrwacsr tuhsruhk nguhnguhn miting sac. Joseph el suhmuhslah lah tukun kuhfa luhn Leum ah, “Nguhn Muhtahl puhtati nuh facsr ke sie ohiyac na usrnguck—ma kuhtuh mwet uh palye uh, ke pacl kuht ahkfuhlwactye Leum, ac engankuhnuhl yohklacna uh.”1
Ma sikyak ke lwen se inge tiacna ahkkahlwemyeyuck nuh fin facluh; tiacna oreklac ke ma sihmlac lucng ke pwepuh kuh ke news uh. Ne ohinge, fuhkah luhpan engan ac wolacna luhn God inkuhsrao—ke ma lwen se ingacn, Alu luhn Jisus Kraist fohlohk nuh facluh!
Mwet Kol lohm sel Soloman
Ke lwen sac me nuh ke ma inge, foko sin tuhlihk mukul ac muhtwacn nwacnwaclah ke luhlahlfongi nuhtin Pahpah Lucng ukwe mokleyuck luhn Nguhn Muhtahl ac utyak nuh ke kof in pacptais muhtahl. Sie mukul ingacn pa Mwet Kol lohm sel Soloman ah
Soloman el sie mukul nguhnguhn ac el eis ao pucspucs in pruhe, suk ke nuhnak muhnahs luhn ma koluk lal ac siyuck Pahpah Lucng elan koluhl nuh ke ma pwacye. Ke kuhtuh pacl ke 1816 ah, uliyuckyang nuh sel Soloman in sie araruhma lah el fah moul ac liye lwen se ma Alu luhn Kraist fah oreklac tukun tahklac luhn mwet forlah ah sifilpac orwaclah sie fin facluh ah.
Yac ekahsr tohkoh ke Soloman el kalkal ke oak uh nuh Canada ke oak luhlahp ukwacl ah tui ke sie mura srihsrihk fin acn Palmyra, New York. E we el puhla sie mokleyuck na fokoko nuh sel in ai we. Ke tiac etuh lah efuh el oasr we, el muhtwacwacack in sramsram nuh sin mwet we ah. Tiac paht met liki el lohng sramsram ke sie “Pwacpuhl kol.” El fahk lah kahs luo ingacn sang “sie kuh oacna sahrom [ma] som nuh fin sifacl nuh ke ten ke kufun niyacl.”
Siyuck lal kohlohllah nuh lohm sel Joseph ah, ma el sramsram nuh sin elos suc oasr ke pweng wowo ke fohlohkihnyuckyak luhn wosasuc uh. Tukun muhta we ke lwen luo we ac eis sie fahkwack luhlahlfongi kuh ke ma pwacye uh, Soloman el sifil kalweni fuhfahsryucsr lal nuh Canada, us sra puk sasuc 64 ma tuhfahna sihmihsyucklac, ac sonna ikacklah ke Puk luhn Mormon. Acn nuh kwewa ma el som nuh we uh, el luti mwet uh, “kwewana acn fuhlwact ac tuhpahsrpahsr uh, kahsruhp ac suhkahsruhp, … in ahkolah nuh ke sie orekma yohk luhn God ma ac fah tuhkuh uh.”2
Sie Orekma Yohk luhn God
Tukun lwen se ke Eprel 1830 ah, foko mwet sokwack ma pwacye ke wosasuc fohlohkihnyuckyak uh ac utyak nuh ke kof in pacptais. Nga fahkwack lah “orekma yohk luhn God” inge oasr fin facluh mihsenge. Nga fahkwack mwe lohoh luhk lah Leum el karuhnganwacng Alu Lal ac kom sin mwet pahluh Lal, Prestuhn Thomas S. Monson. Tiac mwe insewowo fihsrwacsr se in moulkihn ke lwen sahflah inge. Ma inge pa pacl wolacna, palyeyuck sin mwet pahluh met ah ac wiyuck ke kahrihngihnyuck sin un lupufacn. Leum el nuhnkuh yohk Alu Lal. El oacyacpac nuhnkuh yohk elos suc, ma oacna Mwet Kol lohm se Soloman, ukwe ke mokleyuck luhn Nguhn Muhtahl ac wi tamuhlwel ac tahmtahel wiyaclos fin facluh nohfohn in kahsruh usaclihk orekma yohk luhn God inge.
© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn First Presidency Message, April 2010. Kosraean. 09364 868
Luti ke Pweng Se Inge
Srihkasrak luhn kais sie pa sie kuhfa ke mwe luti na fokoko lasr uh” (Teaching, No Greater Call [1999], 18). Ke kom akacsruhi sramsram ke Mwet kol lohm sel Soloman an, suli sucu an in liye pacl ma el ukwe mokleyuck luhn Nguhn uh. Sramsramkihn lah srihkasrak lal ingacn ac kuh in kahsruh mwet sahyac ah fuhkah? Suli mwet ke sucu an in akacsruhi ke sie pacl ma orwaclah wowo luhn sie mwet kahsrwel an.