Klumech er a First Presidency, Ongeuang el buil 2010
Ngklou el Urerel a Dios
Elolem el kebesengil Ongeuang el Buil, 1830
A dart ma okai er rak er a mla memong, a Joseph Smith, Oliver Cowdery, me a rebebil er a rechad a mlo dmak e okisii a Ikelesia er a Jesus Kristo er a Uriul-sils el Santo. A klemedengei er a rechad a tiang a di mle beot ngdi mle miting er a reng. A Joseph a lilechesii tiang el dilubech el sakrament, “a Edaol Reng a milchubel el kmal mlo mui er kemam—a rebebil a ulemlaoch, e kemam el rokui a di uleldanges er a Rubak, e di ngara klou el deurreng.”1
A ikang el dilubech el tekoi er tiang el sils a dimlak el odengei a beluulechad; ngdimlak a chisel tuobed er a simbung malechub eng subed. Meng mle uaisei, ngdi diak el okor el kmal mle klou a deurreng er a babeluades me a omengull er a Dios—e leng ngar sel sils, ea Ikelesia er a Jesus Kristo a liluut el mei er a beluulechad!
Solomon Chamberlain
Ngulemuchel er sei el sils el mei er elechang, ea remilion el sechal me a redil el ngelekel a Edam er Babeluades a ultireklii a odbechel a Edaol Reng e mlo soiseb er a edaol ralm er a techolbeelid. A tang er a mle uaisei el chad a Solomon Chamberlain.
A Solomon a kmal ultebechel a rengul chad e mle betok el sikang el loluluuch, el olengit a ngbetel a kngtil e olengit er a Edam er a Babeluades me lochotii a klemerang er ngii. E sera 1816, a Solomon a ngiluu a iaksok er s ues el kmo ngdi ngar el mo mesa sel sils el luut el mekiis a Ikelesia er a Jesus Kristo uriul er a lemekideb a chelchad er a reapostol er a beluulechad.
A uriul er a bebil er a rak a Solomon a mlara omerollel el mora Canada el ngara bilas e te mlo stob er a kekerei el hang er a Palmyra, New York. Ng ngarisei eng milchesuar a mesisiiche el odbechel a rengul el kmo ngkirel kmerd. Ngdi dimlak el lodengei el kmo ngerang a uchul eng ngar sei, meng di ulemuchel el mengedecheduch er a rechad er sel hang. Ngdimlak el meketeket eng remenges a omesaod er a “kolt el Biblia.” Ngdilung el kmo a ngii el erung el tekoi a mle “mesisiich el ua dengki [el] milrael er a bdelul el mora rsel a edngelel a ochil.”
Ngulkereker e mo medengelii a blil a Smith, meng mlong e mengedecheduch er tirkei el mlar ngii el kirel sel kmal ungil chais er oltel a osischakl. A uri ul er erung el klebesei er al renges a olechotel a klaumerang er a klemerang, a Solomon a liluut el mo melemolem er a omerollel el mora Canada, e ngilai a 64 el dirke milluches e diak el selemosem el Babier er a Mormon. A bekel blorngii, eng ngulsischkl er a rechad, “a rengarbab me a rengariou, a remerau me a remechebuul, … el kirel okedmeklel a klou el urerel a Dios el di kmedung eng omuchel.”2
A Klou el Urerel a Dios
Ngulmuchel er sel sils er a Ongeuang el Buil 1830, e a remilion el chad a mla mo medengelii a klemerang er a oltel a osischakl e mla mo soisebe er a ralm er a techolbeelid. A kuuchais a klemerang el kmo tiang el “klou el urerel a Dios” a ngar a beluulechad er elechang el sils. A kuuchais a klemerang el kmo a Rubak a di omes er a Ikelesia er Ngii e orrurt er ngii el okiu a reprofet er Ngii, el President Thomas S. Monson. Ngdiak el kora di kebekakl el klengeltengat el de kiei el elechang el uriul el klebesei. A ikang a temel a klebkall, el ulemlaoch a reprofet er a ngaramong e lekerkikl el mengkar a reanghel. A Rubak a kmal kerkikl er a Ikelesia er Ngii. Ngii a dirrek el kmal kerkikl er tirkei el, di ua Solomon Chamberlain, el oltirakl a odbechel a Edaol Reng e mo dmak tir me a rodam me a rodos er tir el ngara beluulechad e kaingeseu el otutii tiang el klou el urerel a Dios.
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei ra oidel: 6/09. Oidel a April 2010 First Presidency Message. Palauan. 09364 881
Osischakl el mlar Tiang el Klumech
A teletelel a klechad er kid a tang er a kmal bedochel el dongu er osischakl el dolab” Teaching, No Greater Call [1999], 18). Sel mouchais er a eldechedechal a Solomon Chamberlain, molengit er a chedal a telungalk me lolatk a ikei el taem el ngii a ultirakl er a odbechel a rengul er a Reng. Mosaod el kmo tiang el teletael milkerang e ngosuterir a rebebil er a rechad. Molengit er a rechedal a telungalk me louchais a ungil teletelir a rengodech el chad el ua ikang el ngilsuterir.