Agtutubo

Ania ti Pudno a Kinapintas?

Kuna ni Presidente Monson iti daytoy a mensahe, “Iti lubongtayo, masansan a napatpateg pay ti kinapintas wenno kinangayed ngem iti nadalus a kinadayawtayo.” Mabalin nga agkagumaan dagiti agtutubo a babbai iti langada no asinoda ken no ania ti kabaelanda a pagbalinan. Ibilang dagitoy a kapanunotan maipapan iti pudno a kinapintas manipud ken ni Elder Lynn G. Robbins ti Pitupulo:

Ti maysa nga agtutubo a babai a makita iti langana ti agpada a ragsak ken kinasingpet agraniag iti kinapintas nga aggapu iti unegna.
Pudno a napintas ti nasagudayan nga isem no mangted lawag iti naan-anay a gagangay a wagas. Saan a maipinta daytoy pudno a kinapintas ngem maysa a sagut ti Espiritu.
Ti kinaemma ket akinruar a pagilasinan ken kasapulan para iti akin-uneg a kinapintas.
No maupaykayo maipapan iti langayo, matulongannakayonto daytoy a kumita iti bagiyo babaen dagiti mata dagiti ipatpategyo. Ti nakalemmeng a kinapintas a makita dagiti ipatpateg ket agbalin a sarming para kadagiti panagsayaat wenno bukod a panagdur-as.
Ti klase ti lalaki a kayat nga asawaen ti maysa a nasagudayan a babai ket “saan a kumita” met a kas iti kitaen ti nailubongan a tao (kitaen iti 1 Samuel 16:7). Isuna ket magargari iti pudno a kinapintas a pagraniagenna manipud iti natarnaw ken naragsak a puso. Kasta met a pumayso iti maysa nga agtutubo a babai nga agsapsapul iti nasagudayan nga agtutubo a lalaki.
Namnamaen ti Amatayo iti Langit iti amin nga annakna a pumilida iti umno, a daytoy laeng ti wagas nga agturong iti manayon a ragsak ken akin-uneg a kinapintas.
Iti Apo, awan ti pannakibalubal. Amin ket agpapada iti pribilehio a maaddaan iti ladawanna a naikitikit kadagiti langatayo (kitaen iti Alma 5:19). Awan ti pudpudno a kinapintas.

Iti panangbasa iti sibubukel a mensahe, kitaen iti Lynn G. Robbins, “True Beauty,” New Era, Nob. 2008, 30. Masarakan dagiti agtutubo a lallaki ti isu met la a balakad iti Errol S. Phippen, “Ugly Duckling or Majestic Swan? It’s Up to You,” Liahona, Okt. 2009, 36.