Mensahe iti Visiting Teaching, Hunio 2010
Panangpabaro kadagiti Katulagan babaen ti Sakramento
Isuroyo dagitoy a nasantuan a kasuratan ken adaw a sao wenno, no kasapulan, ti sabali pay a pagbatayan a mangbendision kadagiti kabsat a babbai a sarungkaranyo. Iburayyo ti pammaneknek maipapan iti doktrina. Awisenyo dagiti sarungkaranyo nga iburayda no ania ti narikna ken nasursuroda.
Inrugi ni Jesucristo ti Sakramento
“Ni Jesus nangala iti maysa a tinapay, ket binendisionanna ket pinisina, ket intedna kadagiti adalan wenno (Apostolna), ket kinunana, ‘Alaenyo, kanenyo’ (Mat. 26:26). ‘Daytoy isu ti bagik a maited gapu kadakayo: aramidenyo daytoy a panglaglagip kaniak’ (Lucas 22:19). Iti isu met la a wagas innalana ti kopa ti arak, linaokanna iti danum a kas iti sigud, binendisionanna daytoy ken nagyaman para iti daytoy, ket imbunongna daytoy kadagiti adda a nagummong iti aglawlawna, kinunana: ‘Daytoy a kopa ti baro a tulag iti darak,’ ‘a naibukbok … para iti pannakapakawan dagiti basol.’ ‘Aramidenyo daytoy a panglaglagip kaniak.’ …
“Manipud iti dayta a padas iti nangato a siled sakbay ti ipapanda iti Getsemani ken Golgota, nakitulagen dagiti annak ti kari a laglagipenda ti sakripisio ni Cristo ditoy iti nabarbaro, nangatngato, nasansantuan ken kabukbukodan a wagas.”1
Ni Elder Jeffrey R. Holland ti Korum dagiti Sangapulo-ket-dua nga Apostol.
Pabaruentayo dagiti Katulagantayo iti Panagbuniag babaen ti Sakramento
“No agbuniagtayo, awatentayo iti bagbagitayo ti sagrado a nagan ni Jesucristo. Ti panangawattayo iti naganna ket maysa kadagiti kapapatgan a padastayo iti biag. …
“Tunggal lawas iti miting ti sakramento ikaritayo a manglaglagip iti panangsubbot a sakripisio ti Mangisalakantayo bayat ti panangpabarotayo iti katulagantayo iti panagbuniag. Ikaritayo nga aramiden ti kas iti inaramid ti Mangisalakan—nga agbalin a managtulnog iti Ama ken kanayon nga agtungpal kadagiti bilinna. Ti bendision nga awatentayo kas supapak ket ti maaddaan a kanayon iti Espirituna a kadkaduatayo.”2
Ni Elder Robert D. Hales ti Korum dagiti Sangapulo-ket-dua nga Apostol.
“Kaduak ti ubing a babai nga agtawen ti walo iti aldaw ti panagbuniagna. Idi agmalem kinunana nga addaan iti panagtalek, ‘Nabuniaganak para iti maysa nga aldaw, ket diak pulos nagbasol uray naminsan!’ Ngem saan a nagbayag ti aldawna a panagaramidna iti perpekto, ken awan duaduak nga isu ket nakasursuro itan, kas iti panagsursurotayo amin, a no uray kasano ti panangikarigatantayo, saan a kanayon a maliklikantayo ti tunggal dakes a kasasaad, ti tunggal madi a panagpili. …
“… Ditayo kabaelan ti pudno a panagbalbaliw nga agmaymaysa laeng. Saan nga umdas ti bukod a panagsaganatayo ken dagiti nasayaat a panggeptayo. No agbidduttayo wenno madi dagiti pilitayo, kasapulantayo ti tulong ti Mangisalakan tapno makasublitayo iti umno a dalan. Makiranudtayo iti sakramento iti linawas tapno ipakitatayo ti pammatitayo iti bilegna a mangpabalbaliw kadatayo. Ipudnotayo dagiti basbasoltayo ket ikaritayo a tallikudanen dagitoy.”3
Ni Julie B. Beck, sapasap a presidente ti Relief Society.
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/08. Pannakaanamongna a maipatarus: 6/09. Pannakaipatarus ti Visiting Teaching Message, June 2010. Ilokano. 09366 864
Dagiti Tulong para iti Visiting Teaching
Bayat ti pannakaam-ammoyo iti maysa a kabsat a babai ken ti pamiliana, agsapulkayo kadagiti wagas a mabalin a pakatulonganyo kenkuana a mangpabaro kadagiti katulaganna babaen ti sakramento. No saan isuna a dumardar-ay iti miting ti sakramento, mabalinyo nga awisen a dumar-ay wenno idiayayo a tulongan tapno makadar-ay isuna (ikkan iti pagpletena, tulongan nga aywanan dagiti ubbingna, paabay iti gayyem iti tugawna, ken dadduma pay).
Bukod a Panagsagana