Mensahe ti Umuna a Panguluen, Hunio 2010
Dagiti Kanario nga Adda Maris Dapo kadagiti Payakda
Dumani 60 a tawen ti napalabas, idi kabarbaroak pay laeng a bishop, pimmusay ni Kathleen McKee, maysa a balo iti wardko. Maibilang kadagiti banag a tagikuana ket ti tallo nga aywanna a kanario (tumatayab). Dua ditoy, a dumani panay amarilio ti marisna, ket maited kadagiti gagayyemna. Ti maikatlo, ni Billie, ket amarilio ti marisna a nalaokan iti maris dapo dagiti payakna. Insurat ti Sister McKee iti maysa a surat kaniak: “Mabalin kadi nga amponenyo iti pamiliam daytoy? Saan nga isu ti kapintasan, ngem ti unina ti kapintasan.”
Kasla kapadpada ni Sister McKee ti amarilio a kanariona nga adda maris dapo kadagiti payakna. Saan a naparaburan isuna iti kinapintas, naipaayan iti postura, wenno idaydayaw dagiti kaputotanna. Ngem ti kantana ti nakatulong kadagiti dadduma tapno nataltallugodda a mangimet kadagiti dagensenda ken ad-adda a kabaelanda nga ibaklay dagiti aramidda.
Ti lubong ket napno kadagiti amarilio a kanario nga addaan maris dapo kadagiti payakda. Daksanggasat ta manmano laeng ti nakasursuro nga aguni wenno agkanta. Dagiti dadduma ket isuda dagiti agtutubo a di makaammo no asinoda, ken no ania ti kayatda a pakabalinanda wenno ania ti tartarigagayanda a pagbalinan; ti kayatda laeng ket agbalinda a nalatak. Nagkubbon dagiti dadduma gapu iti kinalakay ken kinabaketda, nadagsenan kadagiti awitda, wenno napnuan iti panagduadua—nga agbibiag iti nababbaba nga amang ngem iti kabaelanda a ragpaten.
Tapno agbiag a naragsak, nasken nga addaantayo iti kabaelan a sanguen dagiti problematayo nga addaan iti tured, ti pannakapaaytayo nga addaan iti naan-anay a ragsak, ti balligitayo nga addaan kinapakumbaba. Saludsodenyo, “Kasano ngata a magun-odmi dagitoy a panggep a tun-oyen?” Sungbatak, “Babaen ti pananggun-od iti pudno a pannirigan no asinotayo a talaga!” Annaknatayo ti sibibiag a Dios, a naparsuatayo a kalanglangana. Panunoten dayta: naparsua a kalanglanga ti Dios. Ditayo kabaelan a patien a sipupudno daytoy a ditayo marikna ti baro a kaipapanan ti pigsa ken bileg.
Iti lubongtayo, masansan a napatpateg pay ti kinapintas wenno kinangayed ngem iti nadalus a kinadayaw. Ngem manipud idi punganay imbalakad ti Apo ken ni Samuel a propeta: “Ni Jehova saan a kumita a kas iti ikikita ti tao; ta ti tao kitaenna iti akinruar a panagparang, ngem ni Jehova kitaenna iti puso” (1 Samuel 16:7).
Idi sapulen ti Mangisalakan ti maysa a lalaki nga addaan pammati, saanna a pinili isuna manipud iti ragup dagiti aginlalaing a kanayon a makitkitada kadagiti sinagoga. Ngem ketdi, inawaganna manipud kadagiti mangngalap iti Capernaum. Managduadua, saan a nakapagadal, ti nadursok a Simon ket nagbalin a Pedro, ti Apostol nga addaan pammati. Ti amarilio a kanario nga adda maris dapo kadagiti payakna ket maikari iti naan-anay a panagtalek ken awan sudina nga ayat ti Apo.
Idi nagpili ti Mangisalakan iti maysa a misionario nga adaan kinaregta ken bileg, nasarakanna isuna saan a kadagiti kapammatianna no di ketdi iti baet dagiti kabusorna. Ni Saulo a mangidadanes ket nagbalin a ni Pablo a misionario.
Pinili ti Mannubbot dagiti saan a perpekto a tao tapno mangisuro iti dalan nga agturong iti kinaperpekto. Kasta ti inaramidna idi. Ar-aramidenna daytoy ita—uray kadagiti amarilio a kanario nga adda maris dapo kadagiti payakda. Aw-awagannakayo ken aw-awagannak nga agserbi Kenkuana ditoy daga. Nasken a naan-anay koma ti panagkumittayo. Ket iti panangikarigatantayo, no maidalebtayo, ipakaasitayo koma: “Iturongnakami, o iturongnakami, naindaklan a Namarsua dagiti tao, manipud iti kasipngetan tapno agkagumaan manen.”1
Ikararagko ta sapay koma a surotentayo ti pagwadan ti Lalaki ti Galilea, a mabalin a masarakan a makipulpulapol kadagiti marigrigat, dagiti maidaddadanes, dagiti maparparigat, ken dagiti agsagsagaba. Mapataud koma ti maysa a pudno a kanta kadagiti puspusotayo iti panangaramidtayo iti kastoy.
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, June 2010. Ilokano. 09366 864
Panangisuro manipud iti Daytoy a Mensahe
No mangisurokayo … , masansan a makatulong no ipakita wenno ipangngeg ti maysa a banag a naidumduma kadagiti sursuruan” (Teaching, No Greater Call [1999], 55). Tapno matulongan a maawatan dagiti miembro ti pamilia ti mensahe ni Presidente Monson, ibilang nga idawat kadakuada nga agsaganada a mangibinglay no ania ti nasursuroda kalpasan ti panangbasada nga aggigiddan iti mensahe. Awisen ti tunggal tao a mangibinglay iti no ania ti mariknana a napateg a banag iti artikulo. Gibusan babaen ti panangiburay iti pammaneknek maipapan iti mensahe ni Presidente Monson.
Ti panangisuro iti balikas ti Dios, kas naited babaen kadagiti propetana, ket mabalin nga adda nabileg nga impluwensiana iti biag dagiti sursuruantayo (kitaen iti Teaching, No Greater Call, 50). Kinuna ni Presidente Monson nga adda pigsa ken bileg iti pannakaammo nga annaknatayo ti Dios. Kalpasan ti panangbasa iti artikulo, idawat iti pamilia nga isalaysayda no ania ti makatulong kadakuada a manglagip no asinoda.