Fas Presidensi Mesej, Jun 2010
Smol Yelo Pijin Wetem Grei Kala long Ol Wing blong Olgeta
Kolosap 60 yia i pas finis, taem mi bin stap olsem wan yangfala bisop, wan wido long wod blong mi, Katlin Maki, i bin ded. Long ol samting we hem i gat, i gat tri smol yelo pijin. Tu (2), tufala i yelo gud evriwan, we i blong givim long ol fren blong hem. Nambatri, Bili, hem i gat yelo kala i miks wetem grei kala long ol wing blong hem. Sista Maki i bin raetem long wan not long mi se: “Bae yu mo famle blong yu i givim wan haos long hem? Hem i no naes tumas, be singsing blong hem i gud moa.”
Sista Maki hem i moa olsem smol yelo pijin wetem grei kala long ol wing blong hem. Hem i no bin gat blesing ia blong gat wan naes fes, hem i no gat blesing ia blong gat wan gud rilesensip, o hem i no gat blesing ia blong gat wan laen blong hem oli onarem hem. Yet, ol singsing blong hem i bin helpem ol narawan blong oli karem ol samting we oli hevi long olgeta wetem glad hat mo oli save karemaot ol wok blong olgeta.
Wol i fulap wetem ol smol yelo pijin wetem grei kala long ol wing blong ogleta. Sore nao, from smol nomo oli bin lanem blong singsing. Sam oli ol yang pipol we oli no save huia olgeta, wanem oli wantem blong kam olsem; evri samting we oli wantem i blong gat wan nem. Ol narawan oli olfala tumas, i no gat man i tekem gud kea long olgeta, o oli fulap wetem tu tingting—oli folem laef blong olgeta long wan level we i daon tumas bitim wanem oli save mekem.
Blong laef long gudfala laef, yumi mas developem paoa blong fesem trabol wetem strong tingting, fesem harem nogud wetem tingting blong glad, mo win wetem tingting we i stap daon. Yu aksem, “Olsem wanem yumi save mekem ol gol ia i tekem ples?” Mi ansa, “Sapos yumi kasem tru save ia long huia stret yumi!” Yumi ol pikinini boe mo gel blong wan God we i stap laef; Man ia nao oli bin krietem yumi folem imej blong Hem. Tingbaot hemia: krietem yumi folem imej blong God. Bae yumi no save bilivim strong hemia sapos yumi no filim insaed long yumi, wan niu strong paoa long bodi mo maen.
Long wol blong yumi, oltaem oli tekem gudfala fasin i kam olsem nambatu samting, be bodi mo fes i naes o ol samting we oli stap pulum ae mo tingting blong man, oli kam fas samting. Be, long taem bifo finis, Lod i bin talem long profet Samuel se: “Fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem” (Fas Samuel 16:7).
Taem Sevyia i bin stap lukaotem wan man blong fet, hem i no bin jusum hem long medel blong grup blong ol stret mo gud man we oli stap oltaem long haos blong prea. Be, Hem i singaotem hem we i stap long medel blong ol man blong fising blong Kapaneam. Saemon, man we i no tingting gud bifo i mekem samting, man we i gat tu tingting, i no skul, hem i kam Pita, Aposol blong fet. Wan smol yelo pijin wetem grei kala long ol wing blong hem i bin kwalifae blong kasem ful lav mo strong tingting blong Masta blong hem.
Taem Sevya i jusum wan misinari we i smat mo gat paoa, Hem i no faenem hem long medel blong olgeta we oli sapotem Hem, be long medel blong olgeta we oli agensem Hem. Sol, man blong agens, hem i kam Pol, man blong mekem misinari wok.
Ridima i jusum ol pipol we oli no stret blong oli tij blong yumi folem stret rod. Hem i bin mekem hemia, long taem bifo. Hem i mekem hemia naoia—mo tu, ol smol yelo pijin wetem grei kala long wing blong ogleta oli mekem. Hem i singaotem yu mo mi blong mekem wok blong Hem daon long ples ia. Strong tingting blong yumi i mas fulwan. Mo taem yumi stap traehad, mo fasfas, i gud yumi askem : “Lidim mifala, o lidim mifala, bigfala Krieta blong man, blong mifala i kamaot long tudak blong mifala i save wokhad wan moa taem.”1
Prea blong mi, hem i we bae yumi folem eksampol blong Man ia blong Galili, we oltaem hem i stap wetem man we i pua, man we oli mekem nogud hem, man we oli agensem hem, mo man we i harem nogud. Bae wan tru singsing i kamaot long hat blong yumi taem yumi mekem olsem.
© 2010 i kam long Intellectual Reserve, Inc. Oli holem evri raet. Oli printim long YSA Oli letem long Inglis: 6/09. Oli letem translesen: 6/09. Translesen blong First Presidency Message, June 2010. Bislama. 09366 852
Tij Aot long Mesej Ia
Taem yu tij … , oltaem hem i gud blong mekem olgeta we oli stap lan oli luk o lisin long wan poen nomo” (Teaching, No Greater Call [1999], 55). Blong helpem ol memba blong famle oli andastanem mesej blong Presiden Monson, tingbaot blong askem olgeta blong rere blong serem wanem oli lanem afta we oli ridim mesej ia tugeta. Invaetem wanwan blong serem wanem hem i filim se hem i wan impoten poen long toktok ia. Endem wetem testemoni blong yu abaot mesej blong Presiden Monson.
Taem yu tijim toktok blong God, olsem we hem i kamaot tru long ol profet blong Hem, i save gat wan strong paoa long laef blong olgeta we yumi tijim (luk long Teaching, No Greater Call, 50). Presiden Monson i bin talem se i gat strong paoa long bodi mo maen taem yumi save se yumi ol pikinini blong God. Afta we ol famle oli ridim toktok ia, askem olgeta blong serem wanem i helpem olgeta blong tingbaot huia olgeta.