Poraus seni ewe Aewin Presetensi, June 2010
Ekkoch Maachang mi Ekkis Chonochon won Pour Kewe
Arap ngeni 60 ier a no, nupwen ua wisen pisop, Kathleen McKee, emon fefin mi nipiich me non ai we wart, a mano. Me nein pisekin kewe me wor unumon maachang. Ruemon, mi on me ra fakkun ningoch, ra fang ngeni chienan kewe. Ewe aunungatin, Billie, mi on nge mi wor ekkis chonochon won poun kewe. Fefinach McKee a makkei non echo taropwe ngeniei: “Ouse mochen ami me om we famini oupwe nouni? Ese fakkun ningoch, nge a fakkun angangoch ne kon.”
Fefinach McKee a usun chok noun we maachang mi on ren ekkis chonochon won poun kewe. Esap emon mi feioch ren ningan, are pwara, me ese pwan wor noun kewe. Nge an we kon a fakkun anisi ekkoch aramas ne ekieta ar kewe chou me ra tongeni uta fan oser kewe.
Ewe fonufan mi ur ren maachang mi on ren ekkis chonochon won pour kewe. Nge a sonap pwe ekkoch chok ra kaeo ar repwe kon. Ekkoch mi serafo rese mo sinei io pwisin ir, met ra tongeni winiti are met ra mochen fori ren manauer; ra chok mochen pwe repwe emon mi auchea. Ekkoch ra fakkun chinnap, ra chou fan oser kewe, are ra uren tipemwaremwar—mi manaueni eu sokkun manau minne ese mo tori tufichir kewe.
Ne manau napanap, mi namot pwe sipwe kaeo ewe tufichin kunu ngeni osukosuk ren pwara, netipechou ren pwapwa, me pworacho ngeni mettoch ren netip tekison. Oupwe eis, “Ifa usun sipwe angei ekkei mettoch?” Ua pwonueni, “Me ren om kopwe wesewesen weweiti io kich!” Sia noun emon Kot mi manau at me nengin, me sia for non nikinikinin. Kopwe ekieki usun ena mettoch: for non nikinikinin Kot. Sise tongeni wesewesen sineochu ei mettoch ika sise weri eu weweochun pochokun me manaman.
Non ei fonufan, fan chommong ochun manau a feito mwirin ningoch. Nge seni fansoun nom ekkewe kapasen aurour seni ewe Samon ngeni Samuel ewe soufos a pochokun: “Ai kuna emon aramas ese usun an aramas kuna. Aramas ra chook nengeni nukun, nge ngang ua nengeni non.” (1 Samuel 16:7).
Nupwen ewe Chon Amanau a kutta emon re nuku, ese fini seni me nein ekkewe chommong aramas ra tiipeta mi nom non ewe imwen fan. Iwe nge, a kokkori i me nein ekkewe sou attau seni Capernaum. Ina mo pwe a nukunukumang, ese fakkun sineioch, Simon a winiti Peter, ewe Apostelen nuku. Emon maachang mi on ren ekkis chonochon won poun kewe mi tongeni angei unusan an ewe Masta nuku me tong.
Nupwen ewe Chon Amanau a finata emon misineri mi uren achocho me pochokun, ese nom nein chienan kewe nge a nom nein ekkewe chon u ngeni. Saul ewe chon u ngeni a winiti Paul ewe chon afanafan.
Ewe Chon Amanau a finata aramas rese unusoch ne afanafana ewe pwe sipwe unusoch. Iwe ina met a fori. A fori iei—pwan ekkewe maachang mi on ren ekkis chonochon won pour kewe. A kokkoruk me a kokkoriei ne angang ngeni I ikkei fan nang. Mi namot pwe ach pwon epwe unus. Me non ach weires, ika sipwe rikino, sipwe tingorei: “Emweni kem, o emweni kem, en ewe chon fori aramas, seni rochopwak ne manau sefan.”1
Ai iotek ina pwe sipwe tapweno mwirin ewe nenien appirun ewe Re Galilee, minne sia tongeni kuna nein ekkewe mi osupwang, ekkewe mi netipechou, nom fan weires, me ekkewe mi samau. Amo ita eu kon mi ennet epwe feiniu seni netipach kewe nupwen sia fori ina usun.
© 2010 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/09. Kapungunon chiakun: 6/09. Chiakun ewe First Presidency Message, June 2010. Chuukese. 09366 901
Afanafan seni Ei Poraus
Nupwen ka afanafana … , mi aninis pwe chon kaeo repwe kutta are ausening ngeni och mettoch mi auchea” ( Teaching, No Greater Call [1999], 55). Ne anisi chon famini ne weweiti porausen Preseten Monson, kopwe ekiekin tingorer pwe repwe ammonata ne poraus usun met ra kaeo mwirin ra anneafengen ewe poraus. Kopwe tingorei emon me emon aramas ne aporausa met a mefi mi auchea seni me non ewe poraus. Kopwe osupwano me ren om kopwe apasata om kapasen pwaratan an Preseten Monson poraus.
Afanafana ewe kapasen Kot, usun mi feito seni Noun kewe soufos, a tongeni pochokun ngeni manauen ekkewe ir sia afanafan ngeni (nengeni Teaching, No Greater Call, 50). Preseten Monson a apasa pwe mi wor pochokun me manaman non ach sinei pwe sia noun Kot kewe semirit. Mwirin oua anneani ewe taropwe, kopwe tingorei ewe famini ne aporausa met a anisir ne chechemeni io ir.