Te Rongorongo man te Moan Beretitentii, Tuun 2010
Mannikiba ma Karaia ae Kureei iaon Baia ni Kiba
E kaan 60 te ririki n nako, ngke I beku bwa te bitiobi ngke te kairake ngai, Kathleen McKee, te aine ae mate buuna n au uoote, are e a tia n toki maiuna. Ibuakon ana bwai boni iai teniman ana man ae tatangirii aika mannikiba. Uoman, ma karaia ae a rangi n tamaroa ae baboboo, aika a nang tauraoi ni kanakoaki nakoia raoraona. Te kateniman, Billie, e baboboo karana man kunikun kureei aon baia ni kiba. Titita McKee iai ana rongorongo ae koroia nakoiu: “Ko kona ngkoe ao am utu ni karaoa mweengana ibukina? E aki rangin tikiraoi, ma e rangi n tamaroa bwanaana.”
Titita McKee bon aekakin raoi ana mannikiba are baboboo ma karana ae kureei iaon baina ni kiba. E aki kakabwaiaki n aron tamaroana, e bwain tangiraaki n aron teiteina, ke ni karineaki irouia kanoana ni boong aika a na roko. Ma n te tai aei bwanaana e buokiia tabeman n ae korakora ni kabebetei rawawataia ao ni karaoi tabeia.
Te aonaaba e kaonaki ni mannikiba aika a baboboo ma karaia ae kureei iaon baia ni kiba. Te bwai ae nanoangaeaki bwa a karako aika a rabakau n anene. Tabeman bon aomata aika kairake aika aki ataia bwa antai ngaiiaa, tera ae ana kona ni karikia ke n tangiria ni kan riki bwa aekakira; te bwai ae a rangi n tangiria bon te kan riki bwa aomata ae iai aroia. Temwaangina a bon keerikaki n aia ririki, karawawataki ma te raraoma, ke ni kaonaki ma te nanououa—maiuakinan maiu aika a raroa nako ma rinanin aia konabwai.
Ni maiuakina ae tamaroa, ti na riai ni karikirakea te konabwai ni kaitarai kanganga ma te ninikoria, te rawawata nakon te kukurei, ao te tokanikai ma te nanorinano. Ko titiraki, “Ti na kangaa n tokanikai iaon kouru aikai?” I kaekaa, “Mani karekean te atatai ae koaua bwa antai raoi ngaira!” Boni ngaira naati mwaane ao naati aine iroun te Atua ae maiu, are e karikira ni katootoonga arona. Iangoa anne: karikaki ni katotongan te Atua. Ti aki kona ni kakoaua aei n akean rinanoakin te atatai ae bwanin n te korakora ao te mwaaka.
N ara aonaaba, te aroaro n anua n tabetai e taraa ni karako kakawakina nakon te tamaroa ke te mwaaka ni kakukurei ke n anaa nanon te aomata. Ma n taai ake ngkoa te Uea e anga te kaetieti nakon Tamuera bwaanan te burabeti ae e okioki: “Ba E aki taraa te aba Iehova n ai aron te aomata ngkana e taraa te aba; ba e tarataraa tinanikun te aba te aomata, ma E tarataraa te nano Iehova” (1 Tamuera 16:7).
Ngke e ukoukora te aomata ae iai ana onimaki te Tia Kamaiu, E aki rineia mai ibuakon te bwariko aika a rangi n raoiroi aika aki toki ni kuneaki ni katoa tai inanon maneabaia. Taraana, E weteia mai ibuakoia taan akawa mai Kaberenaum. Te nanououa, te aki reirei, Timon e a riki bwa Betero n te tai ae waekoa, te Abotoro ae onimaki. Te mannikiba ae baboboo ma karana ae kureei iaon baina ni kiba e rangi n tau ibukin ana kakoaua ae bwanin te Mataniwii ao ana tangira ae e aki bibitaki.
Ngkana e rinea te mitinare ae korakora ao ni mwaaka te Tia Kamaiu, E kunea bwa tiaki mai ibuakoia Ana Tia Tei ma mai ibuakoia Taan Kaitaraa. Tauro te tia bwainikirina te Ekaretia e a riki bwa Bwauro te tia taetaekina te euangkerio.
Te Tia Kabooi Maiura e rineia aomata aika aki kororaoi bwa a na reiakina te kawai nakon te kororaoi. Ngkana E boni karaoia. E karaoia ngkai—n ai aroia naba mannikiba aika a baboboo ma karaia ae kureei iaon baia ni kiba. E weteiko ao ngai bwa ti na beku Irouna ikai iaon te aba. Ara motinnano e riai ni bwanin. Ao inanon korakaira, ti kona ni bwaka, ao ti na bubuti ma te nano ae korakora: “Ti riai ngaira, o kairira, ana tia karikibwai te Atua, man te roo ni kata riki ara kabanea ni konaa.”1
Au tataro bwa ti na ira ana banna ni katooto te Aomata mai Kariraia, are e aki toki n nooraki ni mena ibuakoia ake a kainnano, a uruaki n nano, ake a kairaki n akea inaomataia, ao ake a rootaki. E bia otinako mai inanora te bwanaa ae koaua n aron ae ti tabe ni karaoia.
© 2010 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/09. Kariaiakaki rairana: 6/09. Rairan te First Presidency Message, June 2010. Kiribati. 09336 859
Reirei man te Rongorongo aei
Ngkana ko reirei … , e bon rangi ni ibuobuoki ni kairakiia taan reiakinaki bwa a na taraa ke n ongora te bwai ae e koaua” (Teaching, No Greater Call [1999], 55). Ni buokia kaain am utu ni kamaataataia n ana rongorongo Beretitenti Monson, iangoia n titirakinia bwa a na katauraoi n tibwaua te bwai are a tia n reiakinna imwiin warekan te rongorongo ni kabane. Kaoa temanna ma temanna te aine ke temwaane bwa e na tibwaua are e namakinna bwa e kakawaki n te rongorongo aei. Kainna man kaotan am koaua n ana rongorongo Beretitenti Monson.
Taetaekinan ana taeka te Atua, are e kanakoaki rinanoia Ana burabeti, e kona ni iai korakorana n rooti maiuia te koraki ake ti reireiniia (tara Teaching, No Greater Call, 50). Beretitenti Monson e taekinna bwa iai te korakora ao te mwaaka n ataakin ae ngaira natin te Atua. Imwiin warekan te rongorongo, titirakina te utu bwa ana tibwaua te bwai are e buokia ni kauringiia bwa antai ngaiia.