Pweng sin Prestuhnsi Se Met, Jun 2010
Won Srihsrihk Rangrang ma Apact Fohkfohk oan ke Mwe Sohksohk Lalos an
Apkuhran in sun yac 60 somlah ah, ke nga tuh kuhlwacnsap oa sie pisap fuhsr ah, Kathleen McKee, katin mas se ke ward luhk ah, el misac. Inmahsrlon ma lal ah pa won srihsrihk rangrang tolu. Luo selos, suc arulacna kahto tuhn rangrang kac ah, ac ituckyang nuh sin kawuck lal ah. Ma ahk tolu sac, Billie, tuhnal rangrang ac tuhntuhnlah ke apact fohkfohk se oan ke mwe sohksohk lal ah. Tahmtahel McKee el suhmuhshlah ke not se nuh sihk: “Yac kom ac sucu lom an kuh in oraclah sie lohm an nuh sel? El tiac pa kahto emet uh, tuhsruhk on lal an pa wo emet uh.”
Tahmtahel McKee el oacna won srihsrihk rangrang se nahtuhl ah suc apact fohkfohk oan ke mwe sohksohk lal ah. El tiacna insewowoyeyuck ke kahto, orek lucng ke mukwikwi, kuh ahkfuhlwactyeyuck sin fihl in sucu. Tuhsruhk on lal uh kahsruh mwet sahyac in insacnweacng in wis mwe toasr lalos ac in kuh in fungyang in oruh orekma lalos uh.
Facluh sesseslah ke won srihsrihk rangrang ma apact fohkfohk oan ke mwe sohksohk lalos an. Ma suhpwacr se kac uh pa arulacna suhpuhs selos lotwelah in on. Kuhtuh pa mwet fuhsr ma tiac etuh lah suc eltahl uh, meac eltahl kuh in oacna kuh finne ke in oacna; ma na eltahl ke uh pa in wekyuck muh mwet se. Kuhtuh pac sahyac foing lac ke matwac, toasrlac na ke fosrngah, kuh sesseslah ke tahfuh luo — moulkihn moul ma arulacna oan ten liki kuhiyaclos.
In moul arulacna wo, kuht enenuh in oraclah kuhiyacsr in sun ongaiyac ke puhlaik, suhpwacrlac ke engan, ac kuhtanglah ke puhsisacl. Kom siyuck, “Kuht ac oraclah fuhkah finsrak inge?” Nga topuk, “Ke kuht etwacack na pwacye lah suc kuht uh!” Kuht pa tuhlihk mukul ac muhtwacn nuhtin God moul, suc luhmal kuht oreklac kac. Nuhnkuh ke ma sacn: oreklac ke luhman God. Kuht tiac na kuh in sruokyac luhlahlfongi se inge fin kuht tiac puhlakihn puhla sasuc na wowo ke fokoko ac kuh.
Ke facl lasr uh, inkaiyen pacl uh luhmah nwacsnwacs uh oacna in srihk srihpac liki oaskuh kuh kahto. Tuhsruhk ke pacl loeloes somlah ah kahs in kahsruh luhn Leum nuh sel Samuel ah kalweni in fahk: “Tuh Leum El tiac liye oacna mwet uh liye; tuh mwet uh liye lihkihn mwet, a Leum El liye inse” (1 Samuel 16:7).
Ke Mwet Lahngo El suk sie mwet luhlahlfongi, El tiac na sulwacllah liki inmahsrlon mwet inse fuhlwact ma sukokyak pacl nuh kwewa ke iwen lohlngohk. Tuhsruhk, El pahnglolwack liki inmahsrlon mukul pahtuhr fin acn Capernaum. Simon, suc tahfuh luo, tiac lutlut, ac tiac nuhnak el eklac Peter, Mwet Sap ke luhlahlfongi. Won srihsrihk rangrang se ma apact fohkfohk oan ke mwe sohksohk la ah fal nuh ke luhlahlfongi ac luhngse luhn Mwet Luti (Mwet Kol).
Ke Mwet Lahngo El sulaclah sie misinacri ma fokoko ac kuh, El tiac sokolwack inmahsrlon mwet iwe Lal tuhsruhk tuh inmahsrlon mwet Lainuhl. Saul suc ahkkohsye mwet uh el eklac Paul suc fahkwelihk mwe luti uh.
Mwet in Molwelah El sulaclah mwet sesuwohs in luti inkacnek nuh ke suwohswohs uh. El oruh ohinge ke pacl sac. El oruh ohinge inge — finne won srihsrihk rangrang ma apact fohkfohk oan ke mwe sohksohk lalos an. El pahngon kom ac nga in kuhlwacnsapwacl ten inge. Olweacng lasr uh enenuh in fohn. Ac ke tikuclkucl lasr, fin kuht puhtatlac, lwelah kuht in kwacfe: “Kol kuht, o kol kuht, Mwet Oraclah wowo luhn mwet, liki lohsr uh in sifilpac oruh kuhiyacsr.”1
Pruhe luhk tuh kuht fah ukwe mwe srihkasrak luhn sie Mukul Galilee, suc kuh in sukokyak inmahsrlon mwet suhkahsruhp, mwet kalyeiyuck, mwet ahkkohsyeyuck, ac mwet kweok. Lwelah on na pwacye soko in tuhkuh insiacsr me ke kuht oruh ohinge uh.
© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn First Presidency Message, June 2010. Kosraean. 09366 868
Luti ke Pweng Se Inge
Ke kom luti uh … , kwacna kahsruh in sang mwet lutiyuck an in suk kuh lohng ke sie ma sollac uh” (Teaching, No Greater Call [1999], 55). In kahsruh mwet ke sucu an in kahlwem ke pweng se lal Prestuhn Monson inge, nuhnkuh in siyuck eltahl in ahkolah in akacsruhi ke ma elos lotwelah tukun elos tuhkweni riti pweng se inge. Suli kais sie mwet in akacsruhi ke ma el puhla muh pa sie ip yohk srihpac ke ma sihmlac inge. Ahksahfyelah ke kom fahkwack luhlahlfongi kuh ke pweng se lal Prestuhn Monson inge.
Luti kahs luhn God, oacna ke utuckuh sin mwet pahluh Lal, kuh in arulacna mokle moul luhn mwet suc kuht luti uh (liye Teaching, No Greater Call, 50). Prestuhn Monson el fahk lah oasr fokoko se ac kuh se ke etwacack se lah kuht tuhlihk nuhtin God. Tukun riti pweng se inge, siyuck sin sucu sacn in akacsruhi kac lah meac kahsreltahl in esam lah suc eltahl uh.