Pweng ke Forfor Luti, June 2010
Ahksasucye Wuhlweacng ke Kuhfa luhn Leum
Luti ma suhmuhslah ac fahk inge kuh, fin enenweyuck, sie pac ip yohk srihpac ma ac fah ahkinsewowoye tahmtahel ma kom muhtwacta yohroh an. Fahkwack luhlahlfongi ke mwe luti an. Suli mwet kom muhtwacta yuhroh an in akacsruhi ke ma elos puhlakihn ac lotwelah an.
Jisus Kraist El Oakiyac Kuhfa luhn Leum
“Jisus el eis bread se, sang kuloh kac ac kuhnsaclihk, ac sang nuh sin Mwet Tuhmal Lutlut lal, ac fahk, ‘Eis, mongo’ (Matt. 26:26). ‘Ma inge monuk suc ituckot keiwos: oruh ma inge in esamyuc’ (Luke 22:19). Ke ohiyac sac na el eis kuhp in wine se, suc karkaryak ke kof, sang kuloh kac, ac pahselah nuh selos suc raunellah, ac fahk: ‘Kuhp se inge pa wuhlweacng sasuc ke srahk,’ ‘suc ukwiyucklac … nuh ke iyucklac luhn ma koluk.’ ‘Oruh ma inge in esamyuc.’ …
“E ke pacl se ma sikyak ke rum ke twek se lucng ah ke ekuh se met liki Gethsemane ac Golgotha ah, tuhlihk ke olweacng se tuh wuhlweacng in esam kihsac luhn Kraist ke ohiyac sasuc, fuhlwact, muhtahl ac sacohk nuh sin kais sie mwet.”1
Elder Jeffrey R. Holland ke U luhn Mwet Sap Singucul Luo.
Kuht Ahksasucye Wuhlweacng nuh ke Pacptais Lasr ke Kuhfa luhn Leum
“Ke kuht pacptaislac uh, kuht eis nuh facsr sifacna ine muhtahl luhn Jisus Kraist. Eis nuh facsr Inel pa sie ohiyac na yohk srihpac lasr ke moul uh. …
“Kais sie wik ke toeni nuh ke kuhfa luhn Leum, kuht olwelah in esam kisac ke iwaclah luhn Mwet Lahngo lasr ke kuht ahksasucye wuhlweacng nuh ke pacptais lasr uh. Kuht olwelah in oruh oacna ke Mwet Lahngo El oruh ah — in ahkos Pahpah ac liyacacng masap Lal pacl nuh kwewa. Mwe ahkinsewowo ma kuht eis kac uh pa in eis Nguhn Lal in wi kuht pacl nuh kwewa.”2
Elder Robert D. Hales ke U luhn Mwet Sap Singucul Luo
“Nga tuh wi tuhlihk muhtwacn matwac-yac-alkosr se ke lwen in pacptais lal ah. Ke sahflahiyen lwen sac el tiac ahlohloh in fahk, ‘Nga pacptaislac lusen lwen na fohn se, ac nga soenna oraclah ma koluk, tiac sie!’ Tuhsruhk lwen wowo se lal ah tia na wacngihn sahflahiyac, ac nga etuh lah el lutiyuck inge, oacna ke kuht nohfohn lutiyuck uh, lah finne kuht srihke na upac, kuht tiac na kwacna kahingkihn ohiyac koluk nuh kwewa, sulaclah koluk nuh kwewa. …
“… Kuht tiac na kuh in muhkwena oraclah eklac na pwacye uh. Kuhiyacsr sifacna ac orekma wo lasr sifacna uh tiac na fal. Ke kuht oraclah tahfonglac kuh tiac wo sulaclah lasr uh, kuht enenuh in eis kahsruh luhn Mwet Lahngo in fohlohklac nuh ke inkacnek uh. Kuht ipeis kuhfa luhn Leum wik tukun wik in ahkkahlwemye luhlahlfongi lasr ke kuh Lal in ikihl kuht lac. Kuht fahkwack ma koluk lasr ac olweacng in tohllah ma inge.”3
Julie B. Beck, prestuhn luhlahp ke U luhn Rilif Sosaiti.
© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn Visiting Teaching Message, June 2010. Kosraean. 09366 868
Kahsruh nuh ke Forfor Luti
Ke kom etwaclah tahmtahel se ac sucu lal an, suk inkacnek ma kom kuh in kahsrel in ahksasucye wuhlweacng lal ke kuhfa luhn Leum. Fin el tiac wi toeni nuh ke kuhfa luhn Leum, yac kom kuh in solwacl in wi kuh sang kahsruh tuh elan kuh in oruh ohinge (wucnyuck, kahsruh tuhlihk an, kawuck se in muhta siskac, ac kuhtuh pac)?
Ahkolah luhn Kais Sie