iTabagone
Tamata Vou
A dredre toka vei au na noqu saga meu veimaliwai rawa. Keitou a se qai toki walega vakamatavuvale ki na yasa kadua ni vanua. Na tabanalevu keitou a laki lewena era lewe levu toka na kena itabagone, ia oqo sa imatai ni gauna meu “tamata vou” kina. Na kena dredre duadua o ya na noqu gole ki na koronivuli vou, ka totolo sara na noqu vakasamataka, “O cei beka keirau na dabe vata ena gauna ni vakasigalevu?” Au na raica beka e dua mai valenilotu, ia au sega ni via usumaki au yani ki na nona teveli ni kana e dua tale, vakabibi niu sega tu ni kila era vinakati au se sega!
Na imatai ni siga ni vuli sa qai dua na siga balavu duadua. Sa taqiri sara na lali ni vakasigalevu. Niu yaco yani vakamalua ena rumu ni vakasigalevu, au a masu vua na Tamaqu Vakalomalagi me vukei au meu raica e dua au kila. Au a veiraiyaki meu raica rawa e dua au kila. Sega ni dua. Au sa qai gole yani ki na teveli ena mua sara ni rumu ka laki vakasigalevu kina.
Ena yakavi ena kalasi ni fika, au raica sara e dua au kila. Au a raici David ena semineri ena mataka o ya. A kerea o koya me raica na gauna ni noqu kalasi ka raica ni tautauvata na neirau gauna ni vakasigalevu. “O a vakasigalevu evei nikua?” a kaya.
“Au a vakasigalevu ena mua sara ni rumu,” au a sauma.
“Raica, daru qai vakasigalevu vata ni mataka,” a kaya.
Au sa vakavinavinaka vua na Tamada Vakalomalagi dauloloma, sa dau kila vakavinaka tu na noda gagadre ka sa dau sauma na noda masu. Au sa vakavinavinaka talega vei koya a dodoliga mai me noqu itokani. E dua na ka rawarawa me vaka ga na veisureti ni sa rawa me caka mana.