iTukutuku ni Mataveiliutaki Taumada, Julai 2010
iTokani Yalodina
E dua vei ira na isakisaki cecere e rawa ni solia vei keda na iVakabula o ya me wiliki keda me da nona “itokani.” Eda kila ni lomani ira kece sara na Luvena na Tamana Vakalomalagi ena loloma sa uasivi sara. E yaco oqo vei ira era sa yalodina tiko ki na nodra qaravi Koya, ni sa vakatokai ira ena itutu talei oqo. Ko ni nanuma tiko na vosa ena wase 84 ni Vunau kei na Veiyalayalati: “Raica au sa kaya talega vei kemudou, au sa vakatokai kemudou oqo mo dou sa wekaqu, raica sa kilikili meu tukuna vei kemudou na ivakaro oqo, io mo dou sa wekaqu ena gauna au a tiko voli kina ena kedra maliwa, raica era a lako yani ka vunautaka na itukutuku vinaka ena noqu kaukauwa” (V&V 84:77).
Eda sa yaco me da Nona itokani ni da qaravi ira na tamata ena Vukuna. Sa ivakaraitaki cecere o Koya ni itokani me da na yaco me vakakina. Sa gadreva na veika uasivi duadua me yaco vei ira na luvena na Tamana Vakalomalagi. Na nodra marau sa Nona marau. E vakila o Koya na nodra rarawa me Nona baleta ni sa mai sauma na nodra ivalavala ca kecega, ka vakacolata Vua na nodra malumalumu, vukea na nodra leqa, ka kila na nodra gagadre kecega. E savasava na Nona inakinaki. E sega ni cakava na ka me rogo kina o Koya ia sa solia na veika kecega me vakalagilagia kina na Tamana Vakalomalagi. Na itokani uasivi duadua, o Jisu Karisito, e sega sara ga ni dau via nanumi Koya ena Nona dau via vakamarautaki ira na tani.
Oi keda yadua eda sa vakayacora oti na veiyalayalati ni papitaiso eda sa yalataka me da muria na Nona ivakarau, o ya me da veivukei vakaikeda ni sa dau vakayacora vakakina o Koya (raica Mosaia 18:8).
Ena vuqa sara na madigi ena vica na siga mai oqo mo ni sa na Nona itokani kina. Ena vaka beka ni o taubale tiko ena dua na gaunisala qereqere. Se ena gauna o vodo kina ena dua na sitimanivanua. Ena vaka beka ni o vaqara e dua na vanua mo dabe kina ena dua na ivavakoso ni Lotu. Kevaka mo na yadrava tiko, ko na raica ni dua e colata tiko e dua na icolacola bibi. Ena rairai icolacola beka ni rarawa se galili se cudru. O na raica rawa na veika oqo kevaka o sa masulaka me dolava na matamu na Yalotabu mo raica na yalodra ka yalataka mo tabeya cake na liga sa wadamele.
Na isau ni nomu masu ena kena waqa beka mai na matana e dua na itokani makawa, e dua beka sa balavu sara na nomu sega tu ni raici koya ia e votu mai na nomu vakasama kei na yalomu na nona leqa ka vakila ni sa nomu dina. A yaco vei au na veika oqo. Era yacovi au mai na itokani makawa ena yawa ni vanua kei na balavu ni gauna me ra vakayaloqaqataki au ena veigauna a rawa duadua ga kina Vua na Kalou me tukuna vei ira na noqu icolacola.
Era sa kerei keda tiko na parofita bula ni Kalou me da itokani yalodina vei ira na curuvou mai ki na Lotu ka laki vueti ira mai era sa luluqa yani. Eda na rawata, ka da na cakava rawa kevaka me da dau nanuma tiko na iVakabula. Ni da dodoliga yani me da solia na vakacegu ka veivuke ena dua na icolacola, ena dodoliga vata kei keda o Koya. Ena liutaki keda o Koya vei ira era vakaleqai tu. Ena vakalougatataki keda me da vakila na veika era vakila tiko. Ni da gumatua me da qaravi ira, ena dau soli tiko ga mai vei keda na isolisoli me da vakila na Nona lomani ira. Na veika oqo ena solia vei keda na yaloqaqa kei na kaukauwa me da dodoliga tikoga yani e veigauna ena yalodina.
Ia, ena veigauna oqo kei na bula tawamudu, eda na vakila na marau ena noda kidavaki yani ki na nodra veitokani na Nona itokani yalodina. Sa noqu masu me noda na veivakalougatataki o ya kei ira talega eda na qarava.
© 2010 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni First Presidency Message, July 2010. Fijian. 09367 858