iVaqa ni Siko Vuvale, Julai 2010

Vaqaqacotaki ni Matavuvale kei na iTikotiko

Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava na iSoqosoqo ni Veivukei me sa tiki kaukauwa ni nomu bula.

Mai na iVolanikalou: Ai Vakatekivu 18:19; Mosaia 4:15; V&V 93:40; Mosese 6:55–58

Veivaqaqacotaki ena Veimadigi Yadua

“E duidui na keda ituvaki vakamatavuvale yadudua. Eso na matavuvale e tiko kina o tama kei tina kei ira na gone. Eso na veiwatini sa sega tale ni dua na gone e tiko e vale. E vuqa vei ira na lewe ni Lotu era sega tu ni vakamau, ka so era itubutubu le dua ga. Eso era sa yada se dawai ka ra bula duadua tiko.

“Se cava ga na irairai ni noda matavuvale, sa rawa vei keda yadua me da vaqaqacotaka na noda dui matavuvale se vukea na nodra vaqaqacotaki o ira tale eso.

“Ena dua na gauna au a laki tiko vakalailai vei vugoqu ena nodratou matavuvale. Ena yakavi o ya ni bera ni ra laki moce na gone, keitou a lotu vakamatavuvale vakalekaleka ga ka rogo italanoa mai na ivolanikalou. A talanoataka o tamadratou na matavuvale nei Liai kei na nona vakavulici iratou na luvena me ratou ququmi matua tikoga ena ititoko kaukaumea, o ya na vosa ni Kalou. Eratou na taqomaki ka muataki ki na bula marau kei na reki ke ratou na ququmi tikoga vakaukauwa ena ititoko kaukaumea. Kevaka e ratou na laiva na ititoko kaukamea, eratou na rawa ni luvu ena uciwai ni wai dukadukali.

“Ena kena vakamacalataki na ka oqo vei iratou na gone, o tinadratou sa na vakatakarakarataka na ‘ititoko kaukamea’ me ratou na ququmi tiko kina, kei tamadratou me sa tevoro, ka me saga me dreti iratou na gone mai na vanua taqomaki kei na bula marau. Eratou a marautaka sara na gone na italanoa oqo ka vulica kina na bibi ni noda ququmi tiko ki na ititoko kaukamea. Ni oti na italanoa mai na ivolanikalou sa vakayacori sara na masu vakamatavuvale. …

“Na ivolanikalou, na lotu vakamatavuvale, kei na masu vakamatavuvale ena vaqaqacotaka na matavuvale. Eda na gadreva me da taura na veigauna vivinaka yadua me da vaqaqacotaka kina na matavuvale ka veitokoni vakataki keda yadua me da tikoga ena sala dodonu.”¹

Barbara Thompson, ikarua ni daunivakasala ena mataveiliutaki raraba ni iSoqosoqo ni Veivukei.

Na Cava E Rawa Ni Da Cakava?

Na veivakasama cava ni vaqaqacotaki ni matavuvale kei na itikotiko o rawa ni wasea vei ira na marama? Ni ko vakasamataka na kedra ituvaki yadudua, sa na rawa vua na Yalotabu me vakaraitaka vei iko eso na vakasama.
Na veika bibi cava o rawa ni veisautaka ena vula oqo mo vaqaqacotaka cake kina na nomu matavuvale kei na nomu itikotiko?

Mai na Keda iTukutuku

Vakatekivu sara mai liu a ilesilesi taumada ni iSoqosoqo ni Veivukei me na vaqaqacotaka na matavuvale kei na itikotiko. Ena dua na kena soqoni taumada ni iSoqosoqo ni Veivukei a vakavulica kina o Parofita Josefa Simici vei ira na marama, “Ni ko lako ki vale, kakua ni ko vosa cudrucudru se vosa vakaca vua na watimu, ia me vakaisala ga na nomu cakacaka ena yalovinaka, na loloma cecere kei na loloma me tekivu oqo ka lako yani.”²

Ena 1914 a kaya vakaoqo o Peresitedi Joseph F. Smith vei ira na marama ni iSoqosoqo ni Veivukei, “Ni sa tiko na lecaika se na tawa kilai ni veika me baleta na vuvale, … e tiko ena isoqosoqo se voleka veikeda mai na ciqomi ni edaumeni kei na veivakauqeti ka sa tu ena isoqosoqo era vakarau ka taucoko tu me ra soli ivakasala ki na itavi bibi e vakamacalataki tiko.”³

© 2010 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, July 2010. Fijian. 09367 858