Kev Hluas
Tus Neeg Tshiab
Zoo li tsis muaj leej twg uas nyiam kuv li. Peb tsev neeg nyuam qhuav tsiv deb heev los. Pawg ntseeg tshiab no muaj cov hluas coob heev, tab sis no yuav yog thawj zaug uas kuv yog tus, “neeg tshiab.” Qhov phem tshaj plaws yog kuv yuav tsum mus kawm ntawv rau ib lub tsev kawm ntawv tshiab, thiab kuv txawm xav tam sim ntawd hais tias, “Kuv yuav nrog leej twg zaum ua ke thaum noj su?” Tej zaum kuv yuav pom ib tug neeg uas nrog kuv mus tshawj, tiam sis kuv tsis tau xav nrog lwm tus neeg sib txiv noj su, twb yog vim kuv tsis paub xyov lawv puas xav kom kuv nrog lawv koom noj su!
Thawj hnub mus kawm ntawv ntev tsis ntev li. Thaum kawg lub tswb uas qhias tias txog caij noj su txawm nrov. Thaum kuv nkag hoob noj su, kuv thov Leej Txiv Saum Ntuj Ceeb Tsheej pab kuv nrhiav kom tau ib tug neeg uas kuv paub. Kuv xam ncig lees saib kuv puas pom leej twg uas kuv paub. Tsis muaj leej twg hlo li. Ces kuv txawm mus rau ib lub rooj nyob sab tom ub thiab noj kuv qhov su kuv ib leeg xwb.
Tom qab no thaum kuv kawm hoob ua zauv, kuv txawm pom ib tug neeg uas kuv paub. Kuv twb pom David nyob ntawm kev kawm vaj lug kub tag kis ntawd. Nws hais kom kuv muab kuv daim ntawv qhia caij nyoog rau nws saib thiab nws txawm pom tias wb ob leeg noj su thaum tib lub sij hawm. “Ua li, thaum noj su hnub no, koj nyob qhov twg ne?” nws hais.
“Kuv nyob ntawm hoob noj su sab tom ub,” kuv teb.
“Yog li ntawd, tag kis koj los nrog kuv noj su ua ke,” nws hais.
Kuv zoo siab heev rau ib Leej Txiv Saum Ntuj Ceeb Tsheej uas hlub kuv, thiab uas paub hais tias peb txhua tus xav tau kev pab li cas thiab uas teb peb tej kev thov txog Nws. Kuv kuj zoo siab uas muaj leej twg kam cev tes los nrog kuv ntaus phooj ywg. Ib yam yooj yim npaum li caw leej twg ua dab tsi yeej pab tau ntau yam.